Phǐlǐpǐ 4 - Kawyaw New Testament

¹ Pô̤̌nu akhû̌akhî, he pṳ̌wè̤̌ sî, sî mî̌ kòyò dǒ he mô̤ǐ tokhlǒ dě he nǎsǔǐ jî̌ tokhlǒ, sî mî̌ pwa̤ dǒ a ma̤ sǎlě̤sǎlò̤ jî̌ he dě he phǐhtò̌gôjô mî̌ca henǎ̤ kû̌ sîkhû̌khî. Khôbǒsû̌ sî hǒnumî̌ amè̤̌kû̌ sî tô ô̌měô̌gle lô̌khô dǒ Běcǎ akû hî̌tènu hǒ.

² Mǒ̤yǔûdǐya kû̌ Mǒ̤sǔtakhe sî, sî pṳ̌kû̌wè̤̌ lû̌û dǒ Khrǐ akû akhû̌akhî, he kwisǎyṳ sî kû̌ sî gǔ sǎphlǒtô kè̌khî lû̌û tôpwa̤ kû̌ tôpwa̤.

³ Na mî̌ kòyò dǒ a ma̤ ta̤ kû̌ he dǒ acǒ kû̌ ayô̤̌ tôpwa̤ hǒ. Dě he sǎyṳ kwi na ta̤ma̤jè̌ tôcǒ, pô̤̌khô pwa̤mǒ̤nu sò̌ginǐ̤ gǔ kla kè̌khî lû̌û ayanu, ma̤jè̌ mò̌ asî nî̌꤮. Ma̤titèhî̌dě asî nusò̌ginǐ̤ numî̌ a jî̌pwǐ̤ htǒkhû̌htǒǎ ma̤wô̤̌wô̤̌ ta̤wǐ̤lò̤ ta̤sǎlě̤we̤kè ata̤ma̤ kû̌ he ně. Asî ma̤wô̤̌ kû̌ Khûkleme kû̌ hekhô dǒ pa ma̤wô̤̌wô̤̌lû̌ ta̤ dǒ ashǔshawa̤ nutokhlǒ, dě lǒ̤bò asî nutokhlǒ ami̤ mî̌ a ô̌ bòkè dǒ Běcǎ a lî̤htûpwa̤ akû nuhǒ.

⁴ Sǎlě̤sǎlò̤ lô̌khô dǒ Běcǎ akû pṳ̂̌꤮ taplǎ nî̌꤮, dě he hî̌ sô̌ sî, sǎlě̤sǎlò̤ lô̌khô nî̌꤮.

⁵ Na sǎphlǒ sǎdôhôbî̌nu nokè̌shǐbò kû̌ kòyò pṳ̂̌꤮ tôpwa̤ nî̌꤮. Běcǎ glè̌ hènṳ̌ phǔtinǐ̤hǒ.

⁶ Bǎyû tǎ̤ lô̌khô tôcǒ tǎ̤mǎ̤ nî̌꤮. Bǎbǎkǎlè dǒ ta̤lǒ̤꤮ bò akûnu, kwicaba dě kwi lô̌khô ta̤ dǒ sî lǎ̤lṳ̂ nutokhlǒ, dě kwi lô̌khô kû̌ ta̤hî̌bwǐhî̌sîrî Cǒmara nî̌꤮.

⁷ Cǒmara gǔ ǐ sî ata̤gûjû̌gûbǎ dǒ kòyò hǎkhû̌phû̌ gènè̤ htûtô̤̌ nupě. Dǒ sî htûhtò̌ ta̤tôcǒ꤮ nô̤̌ kû̌ Yeshǔ Khrǐ hǒ akhû̌akhî, Cǒmara a ta̤gûjû̌kabǎ ô̌pǒ̤mě sî sǎphlǒsǔshi kû̌ sî ta̤gènè̤ tokhlǒ pě.

⁸ Pṳ̌wè̤̌sî, ganǎ̤de lô̌khô he ta̤hî̌bǎ dǒ nô̌kò gutṳ̌lǒ tokhlǒ nî̌꤮. Dǒ sî sǎphlǒkûnu sî tô gènè̤ kwè̌꤮ pô̤̌hî̌tèhî̌dě, sî tô gènè̤ pwǎ ta̤dǒ acǒatè̤ tokhlǒ, ta̤dǒ kòyò bè̌dubè̌nǎ̤ a tokhlǒ, ta̤dǒ atôabǎ tokhlǒ, ta̤dǒ a ma̤mṳ̂̌plî tokhlǒ, ta̤dǒ kòyò sǎyṳgwèbǎǐ tokhlǒ, bè̌sû̌bè̌sǎ dǒ awî̤awô̌ tokhlǒ, ta̤dǒ awô̌ tokhlǒ, ta̤dǒ kòyò tô htû̌sò̌htò̌ tokhlǒ nupwǎ nî̌꤮.

⁹ Lǒ̤bò sî sû̌ǐphî̌nṳ̌ hto dě sî kè̌shǐ ganǎ̤de hto he ta̤hî̌bǎ tokhlǒ kû̌ he ta̤phǐta̤ma̤ dǒ he ô̌ tokhlǒnu, ô̌htûpwa̤ gû̌ma̤ lô̌khô pô̤̌nu dě ta̤gûjû̌kabǎ a Cǒmara ô̌ pû kû̌ sî nî̌꤮.

Khûpò̌lǔ hî̌bwǐhî̌sîrî sû dǒ a nǐ̤bǎkwe tokhlǒ

¹⁰ He hî̌bwǐhî̌sîrî jî̌ Běcǎ dě he htû̌sò̌htò̌ jî̌ yǎ, ma̤titèhî̌dě dǒ gutṳ̌lò̤nu, sî sûhè bǎ he ta̤ma̤jè̌ numî̌ sî dǔlè̌lṳ̌ sô̌ sî ta̤wô̌ tokhlǒ dǒ hekhû̌ hǒ. He sî̌ganǎ̤ kû̌ sî wô̌ bǎ dǒ hekhû̌ pṳ̂̌꤮ taplǎ bǎbǎkǎlè sî glè̌ dǔlè̌lṳ̌ sô̌ sî sǎphlǒô̌ he hǒtôhunu, sî kè̌shǐ ta̤shěta̤khǎ wô̌ dǒ sîya nò̌khôtô̤̌ dě sî sûhèlǎ bǎ he tô̤̌ pô̤̌nupwǎ.

¹¹ He hî̌ pô̤̌o dě atô kû̌ he lṳ̂ru pô̤̌nu mè̤̌tô̤̌, ma̤titèhî̌dě he kè̌shǐbǎ ta̤ma̤anǎ̤ kû̌ he pwî̌tètè̌꤮ bǎbǎ, Cǒmara sû̌ǐ hto he kû̌ he gǔ bè̌jò̌ he sǎphlǒ pwǎ.

¹² He ô̌htûpwa̤ shôdô tě̤ta̤ bǎbǎ, he ta̤ ô̌plṳ̂ô̌phǎ bǎbǎ, he ô̌htûpwa̤hè bǎbò hǒ. He lǎ̤ǎlǎ̤ô ô̌lǒô̌be bǎbǎ, a ô̌ koyoklǐ pwǎ bǎbǎ, he tě̤ta̤ ô̌wô̤̌ bǎbǎ, a ô̌ tîkî̌꤮ pwǎ bǎbǎ, he sû̌ǐ hèbò hto henǎ̤ kû̌ ta̤htûhtò̌ kû̌ he pwî̌tètè̌꤮ bǎbǎnu, he ô̌htûpwa̤ jò pwǎ.

¹³ Yeshǔ Khrǐ dǒ a ǐ he ta̤khû̌ta̤ǎ nutôpwa̤ ma̤jè̌ he akhû̌akhî, he ma̤bò̌bò ta̤pṳ̂̌꤮ tocǒ hǒ.

¹⁴ Bǎbǎkǎlè sî tokhlǒnu, sî ma̤wô̌bǎ he. Bǎ he kè̌shǐ tṳ̌bǎ kû̌ ta̤pò̤̌ta̤sha akhanu, sî ma̤jè̌ he.

¹⁵ Wî̤̌phǐlǐpǐphû̌ sî꤮. Bǎ he cû̌ shôbǐǐlṳ̌ bǎ sî ta̤sǎlě̤we̤kè dě he hǎhtò̌cû̌kè dǒ Mèsidûnǐ̤ya gǎkû akhanu, pwa̤ dǒ a ma̤jè̌ he kû̌ ru numî̌ tǒ̤pwǎ sî ta̤dòkû nutôprṳ̂ pwǎ numî̌ sî sî̌ganǎ̤ tě̤tě̤mè̤̌mè̤̌ bò hǒ.

¹⁶ Bǎ he ô̌ dǒ Wî̤̌tîsalònǐ akû akhanu bǎbǎ, he lṳ̂bǎ ta̤ma̤jè̌ dě sî sûcû̌nô̌ bǎ he ta̤ma̤jè̌ ginǐ̤suwǎ̤ hǒ.

¹⁷ He kè̌lǎ dǒ kòyò gǔ ǐkè he sû pô̤̌nu mè̤̌tô̤̌. Pô̤̌khô Cǒmara gǔ ǐ sî ta̤ma̤nǐ̤khû̌kǎ nudě he sǎphlǒshû̌ sǎyṳ kè̌shǐ khlotèpè̤̌ dǒ sî gǔ ma̤ dû̌wî̤pô̤̌ ta̤wô̌ tokhlǒ pô̤̌ sî ma̤ hto nutokhlǒ.

¹⁸ Lǒ̤bò sî sûhè bǎ he tokhlǒnu he nǐ̤bǎ lǒ̤꤮ bò hǒ, dě a lǒbe tûlû̌shû̌lě dǒ heya. Lǒ̤bò sî ǐ tokhlǒnu KhûEpaprǔdǐtǔ phî̌hè bǎ he, dě khònò̤̌ lǒ̤bò he lṳ̂bǎ tokhlǒnu a ô̌ bò hǒ. Ta̤ǐ tokhlǒnu, asô̌sô̌kû̌ ta̤nṳ̌mû̌ dǒ kòyò lṳhtò̌ dǒ Cǒmara ô̌ nuhǒ. Ta̤lṳ dǒ atô Cǒmara asǎphlǒ, dě a ma̤mô̤ lû̌û sǎphlǒ nutokhlǒ hǒ.

¹⁹ Dǒ Yeshǔ Khrǐ akhû̌akhîdě, Cǒmara gǔ ma̤jè̌ bǎbò sî lǒ̤bò sî lǎ̤lṳ̂ nutokhlǒ pě. Pô̤̌ a dû̌yò̤̌htò̌sa lǒlǒbebe hî̌jò pe takǎkǎ tô̤̌nu, a gǔ ma̤jè̌ sî pô̤̌nu pě.

²⁰ Pa pha Cǒmara gǔ nṳ̌bǎtû̌ ta̤bwǐdû̌sîrîhtû tûjû̌pwa̤ talakhǎ nî̌꤮. Ame̤.

Ta̤hî̌mô̤hî̌wô̌ dǒ gutṳ̌lò̤

²¹ He hî̌mô̤hî̌bǎwô̌ cû̌ Cǒmara a kòyò pṳ̂̌꤮ tôpwa̤ dǒ a yṳ̌ǎ Yeshǔ Khrǐ tokhlǒ. Pṳ̌wè̤̌ Khrǐphû̌ dǒ a ô̌ kû̌ he bǎo tokhlǒ sûcû̌ padô̌ a ta̤hî̌mô̤hî̌wô̌ tokhlǒ dǒ sîô̌.

²² Cǒmara a kòyò lǒ̤꤮ bò bǎo tokhlǒ sûcû̌ padô̌ bò̌bò a ta̤hî̌mô̤hî̌wô̌ tokhlǒ dǒ sîô̌. Dû̌shî̌ mî̌ pṳ̌wè̤̌ dǒ a ma̤ ta̤ma̤ dǒ caphǎdû̌ hôkû nutokhlǒ hî̌mô̤hî̌bǎwô̌ cû̌nṳ̌ padô̌ sî.

²³ Běcǎ Yeshǔ Khrǐ abwǐsîrî ô̌kû̌ tû̌ sî lǒ̤꤮ bò nî̌꤮. Ame̤.