Petru awǐlǒ tabǎ 2 - Kawyaw New Testament

Lǒ̤ htûpwa̤ kû̌ kòyò khlilè plò̌shǐ

¹ Pô̤̌nudě, sǎkhěkhû̌khwè pe tǎ̤ kòyò tǎ̤mǎ̤. Lǒ̤bò ta̤lòhô, ta̤jî̌cǒjî̌tè̤, ta̤sǎkhwè̌, ta̤dô̌mi̤dô̌yô̤ sî tokhlǒnu tôbǎ ô̌ petô̤̌.

^2-3 Sî sî̌ya bǎhto Cǒmara abwǐsîrî hǒ. Pô̤̌nudě htûhtò̌ sô̌sô̌ lô̌khô pô̤̌ phijǎphû̌ ô̌sa dǒ a sǎwǐ̤sǎô mè̤̌mî̌ca nṳ̌shi dǒsû̌dǒsò̌ tôkhô nutokhlǒ nî̌꤮. Dǒ sî sǎwǐ̤sǎô nṳ̌shi acè̌ pô̤̌nu akhû̌akhî, sî dû̌htò̌pwǎ̤htò̌ sî̌ya tǒ̤dǒ ta̤ma̤hǎplǎge lǒhtò̌behtò̌ nupě.

Lǒ̤ htûpwa̤

⁴ Hè lô̌khô dǒ Běcǎ ô̌ bǒo, a mî̌ asô̌sô̌kû̌ lǒ̤htûpwa̤ tômè dǒ kòyò gènè̤ lû̌û kû̌ alě̤apwî̤ ô̌tô̤̌. Dě kòyò wîkè lû̌û bǎbǎkǎlè Cǒmara rû̌htò̌ gesô̌ lû̌û dě alě̤dû̌pwî̤htû mî̌ca dǒ lû̌ya.

⁵ Sî hǒtokhlǒnu a sô̌sô̌ kû̌ lǒ̤htûpwa̤ tokhlǒ hǒ. Cǒmara noǎ lǒ̤ dǒ a amè̤̌kû̌ sî dě a gǔ ma̤htò̌ hǐ dǒsû̌dǒsò̌ tômè. Sî ma̤ta̤ dǒ hǐkûnu sô̌sô̌kû̌ pwa̤shû̌gǎ aplò̌shǐ tokhlǒnu pě. Htokhôtô̤̌ sî lṳhtò̌ ta̤lṳ dǒ Cǒmara a ô̌ dǒsû̌dǒsò̌ tôkhô tokhlǒ pě. Dǒ Yeshǔ Khrǐ akhû̌akhîdě, Cǒmara phî̌shǐshu sî ta̤lṳ nutokhlǒ pě.

⁶ Ma̤titèhî̌dě lî̤plò̌shǐkû hî̌ kû̌, “He rû̌htò̌ lǒ̤ lě̤dû̌pwî̤htû tômè dǒ he bè̌lò̤ a kû̌ lǎ̤ma̤měgle hǐkòsho dǒ Wî̤̌shǐû akû. Kòyò tôpwa̤pwa̤ dǒ a yṳ̌ǎ Běcǎnu a sòwò̤̌ tôkhò̌꤮ tô̤̌.”

⁷ Dě lǒ̤ hǒtômènu, alě̤dû̌pwî̤htû mî̌ca dǒ sî pwa̤yṳ̌ǎta̤ nutokhlǒ aya. Bǎbǎkǎlè kòyò dǒ a yṳ̌ǎkû̌ lû̌tô̤̌ tokhlǒ ayanu: “Lǒ̤ dǒ pwa̤ma̤lò̤hǐ wîkè a tômènu, dǒgutṳ̌kò dě a htûhtò̌ lǒ̤ dǒ a lṳ̂dû̌khlo kû̌ akhônu.” dě

⁸ “Lǒ̤nu tômènu a gǔmè̤̌ lǒ̤ dǒ kòyò lǎ̤htò̌tukhu a aya, dě a gǔ ma̤lòkhǔpo̤ kòyò aya.” A ganǎ̤de kû̌ kòyò Cǒmara alě̤ayô̤̌ tô̤̌ akhû̌akhî, a htò̌tukhu lò̤khǔpo̤ pwǎ. Cǒmara tîwî̌tòwò bǎ asîya pô̤̌nuhǒ.

⁹ Bǎbǎkǎlè sî mî̌ khlilèphû̌ tôcǒ dǒ Cǒmara rû̌htò̌ yǎ, pwa̤shû̌gǎ dǒ asô̌sô̌kû̌ khwǐ tokhlǒ, kòyò khlilèphû̌ dǒ aplò̌shǐ, kǎtô̤̌ Cǒmara a kòyò tokhlǒ hǒ. Pô̤̌khô sî gǔ shôbǐǐlṳ̌ Cǒmara a ta̤ma̤wô̌ khô̌tû̌ tokhlǒ ayanu, Cǒmara rû̌htò̌ sî hǒ. Cǒmara kaǎhtò̌ge sî dǒ ta̤khǐsiwi̤ alǎ̤ dě a sûnṳ̌ sî dǒ a ta̤lîta̤kakha mô̤ akû hǒ.

¹⁰ Tôplǎkhanu, sî mî̌ Cǒmara a kòyò mè̤̌tô̤̌ bǎbǎkǎlè khònò̤̌ sî htû Cǒmara a kòyò hǒ. Tôplǎkhanu, sî sî̌ganǎ̤ Cǒmara a ta̤sǎyṳgwèbǎǐ tô̤̌ bǎbǎkǎlè khònò̤̌ sî nǐ̤bǎ a ta̤sǎyṳgwèbǎǐ hǒ.

¹¹ He khô sî꤮, dǒ hǎkhû̌nu sî mî̌ asô̌sô̌kû̌ kòyò cû̌htû shilǎ̤gǎkhlophû̌ kû̌ shǐpwǎ̤shǐmè̤ tokhlǒ pwǎ. He kwisǎyṳ sî kû̌ sî gǔ cû̌ tephekè lô̌khô kû̌ sî nǎ̤glǒ a ta̤sǎyṳsǎbǎ phû̌mò̤̌ dǒ ashěapě̤ sǎla̤la̤ ǐ sî sǎphlǒ nutokhlǒ nî̌꤮.

¹² Bǎ sî ô̌htûpwa̤ dǒ khlilèphû̌ ashǔshawa̤ dě a yṳ̌ǎ kû̌ kòyò Cǒmara tô̤̌ nutokhlǒ akla, dě a bè̌ ta̤sǔ sî kû̌ sî mî̌ kòyò dǒ a ma̤ ta̤phû̌mò̤̌shǐhtô akhanu, ô̌htûpwa̤ shapwǎ̤ sî̌yawô̌ lô̌khô sînǎ̤ nî̌꤮. Asî gǔ kè̌shǐ sî ta̤ma̤wô̌ tokhlǒ pě dě htû̌꤮ Cǒmara hèlò̤ alṳmṳ̌ni̤ pě tôni̤nu, a bè̌dubè̌nǎ̤ lû̌pě.

¹³ Dǒ Běcǎ Yeshǔ ma̤bǎ pa akhû̌akhî, sǎyṳ kû̌ pa jûlě̤phî̌yô̤̌ ganǎ̤de kòyò hǎkhû̌phû̌ ô̌kû̌ ta̤siwi̤shû̌sho tokhlǒ ayô̤̌. Kǎtô̤̌ khwǐdû̌ dǒ a ô̌ kû̌ a ta̤siwi̤sòwò̤ lǒkò tokhlǒnu bǎbǎkǎlè jûlě̤phî̌ lô̌khô ayô̤̌nî̌꤮.

¹⁴ Htodě kòyò dǒ khwǐdû̌ rû̌htò̌ asî dǒ a gǔ htûdû̌htûpwǎ̤ tokhlǒnu jûlě̤phî̌yô̤̌ lô̌khô ayô̤̌ nî̌꤮. Khwǐdû̌ nohtò̌htû asî dǒ a gǔ cî̌htò̌ kòyò dǒ a ma̤ ta̤phû̌mò̤̌shǐhtô nutokhlǒ dě a gǔ htû̌sò̌htò̌ǐ kòyò dǒ a ma̤ ta̤wô̌ nutokhlǒnu.

¹⁵ Cǒmara sǎyṳ noma̤ sî ta̤wô̌, ma̤titèhî̌dě a sǎyṳ dǒ sî gǔ ma̤ ô̌sǔtukǔkè kòyò dǒ a hî̌htôhî̌lò̤ dě gènè̤ getîkhî hètû̌aya bǎ kòyò tô̤̌ nutokhlǒ.

¹⁶ Ô̌htûpwa̤ lô̌khô pô̤̌ kòyò nṳ̌bǎ ta̤pili̤ nutokhlǒ nî̌꤮. Bǎbǎkǎlè noǎ tǎ̤ sî ta̤pilinu kû̌ a gǔ ma̤bǐkè tǎ̤ sî ta̤sǔnu tǎ̤mǎ̤. Mè̤mè̤̌tôkhô̌ ô̌htûpwa̤ sô̌sô̌ lô̌khô kû̌ Cǒmara ajû̌ tokhlǒnu.

¹⁷ Bè̌dubè̌nǎ̤ lô̌khô kòyò pṳ̂̌꤮ tôpwa̤ nî̌꤮. Mô̤ǐ lô̌khô sî pṳ̌wè̤̌ Khrǐphû̌ tokhlǒ nî̌꤮. Ǐsha lô̌khô Cǒmara dě bè̌dubè̌nǎ̤ lû̌û nî̌꤮. Bè̌dubè̌nǎ̤ lô̌khô khwǐdû̌ nî̌꤮.

Khrǐ khòlṳ̌ kè̌lû̌mò̌mu a ta̤jî̌ta̤jû̌

¹⁸ Sî dǒ a htû jû̌ tokhlǒnu, sî bǎ jûlě̤phî̌yô̤̌ ganǎ̤de sîběcǎ ayô̤̌ dě dǔlè̌lṳ̌ lǒbe asî kû̌ sî ta̤bè̌dubè̌nǎ̤ lû̌nu nî̌꤮. Mè̤̌pwǎtǒ̤ běcǎ dǒ a gwèbǎǐ sî dě akè̌akhwè̌ sî nutokhlǒ ayanu tǎ̤mǎ̤ nî̌꤮. Běcǎ dǒ akhu phû̌mò̤̌ tokhlǒnu bǎbǎ, sî tôbǎ bè̌dubè̌nǎ̤ lû̌û, dě sî tô jûlě̤ ganǎ̤de ayô̤̌.

¹⁹ Dǒ Cǒmara ma̤bǎhto pa akhû̌akhî, dě ta̤jî̌ta̤jû̌ dǒ sî tôbǎ khò mè̤̌tô̤̌ bǎbǎkǎlè sî kè̌ khòsǎphlǒhtûbò̌ hî̌nu Cǒmara gǔ kè̌dû̌ sî pě.

²⁰ Dǒ sî ma̤sǔta̤ akhû̌akhîdě, kòyò kè̌po̤kè̌plè sî hî̌nu, abwǐsîrî ô̌bǎtè? Bǎbǎkǎlè dǒ sî ma̤tôta̤ akhû̌akhîdě, sî kè̌ khòsǎdôbò̌ ta̤jî̌ta̤jû̌ hî̌nu, Cǒmara gǔ kè̌dû̌ ǐtû̌ sî pě.

²¹ Pô̤̌khô sî bǎ khòsǎphlǒhtûbò̌ ta̤jî̌ta̤jû̌nu ayanudě, Cǒmara kaǎhtò̌ sî hǒ, ma̤titèhî̌dě Khrǐ anǎ̤běcǎ khò hto ta̤jî̌ta̤jû̌ dǒ sîya hǒ. Dě pô̤̌khô sî gǔ khakû̌ akhò̌lôpô̤̌ ayanu, a bè̌kè bǎ sî lǎ̤kè̌lû̌ hǒ.

²² “A ma̤ ta̤sǔ tôcǒ꤮ tô̤̌. Kòyò ganǎ̤de kû̌ a hî̌bǎ lòhô tôpwǎ̤꤮ tô̤̌.”

²³ Bǎ kòyò pîjî̌ǐsho a akhanu, a pîjî̌ǐsho geshěshu kòyò tô̤̌. Bǎ kòyò ma̤jî̌ma̤jû̌ a akhanu, a ma̤ǐsha geshěshu kòyò tô̤̌. Mè̤mè̤̌tôkhônu bò̌bò ta̤we̤ta̤kè tokhlǒnu, a ǐlò̤kè kû̌ Cǒmara acǔdekû. Dě a yṳ̌ǎnǐ̤ kû̌ Cǒmara cî̌htò̌ cǒcǒtè̤tè̤ pwǎ.

²⁴ Pô̤̌khô pa gǔ icupe kû̌ ta̤sǔta̤phû̌mò̤̌ tokhlǒ tô̤̌, kǎtô̤̌ pô̤̌khô pa gǔ ô̌htûpwa̤bò̌ kû̌ dǒ ta̤tě̤ta̤mè̤̌ pě ayanudě, bǎ kòyò ma̤sihtò̌ Khrǐ dǒ nò̌dò̌htǔlô̤ akhanu, a phǐhtò̌kè pa ta̤sǔta̤phû̌mò̤̌ nutokhlǒ dǒ anǎ̤lô̤ hǒ. Dǒ a khòbǎ ta̤jî̌ta̤jû̌ nutokhlǒ akhû̌akhî, a ma̤hǎmǎkè bòkè sî hǒ.

²⁵ Sînu, asô̌sô̌kû̌ sû̌phû̌ dǒ a cû̌sǔklè̌ tokhlǒ. Bǎbǎkǎlè khònò̤̌ sî getîkhî sô̌ dǒ pwa̤kè̌ sû̌phû̌ dǒ a kè̌pǒ̤ǐ sî ta̤htûpwa̤ nutôpwa̤ a ô̌ hǒ.