Mǒhtûlû̌hǎhtûsa 8 - Kawyaw New Testament

Shisǔlò̤

¹ Bǎbǎkǎlè, Phanṳ̂̌a kû̌ lǒ̤bò ta̤phû̌ta̤wè̤ dǒ a ô̌ kû̌bò lû̌û bǎ sǒkhlidû̌kû nutokhlǒ, a plò̤ bǎbǎ, ana̤ bǎbǎ, Cǒmaradû̌ shôpe̤ǐ bǎ asî tô̤̌. Dě a plûhǎhtò̌ gili̤sǎ dǒ hǎkhû̌, dě shi sǔlò̤kè.

² Hǒtôplǎ dě shipǒ̤hǎhtò̌ dǒ hǎlǎ̤ tokhlǒ kû̌ shitakha dǒ mǒkhû̌ tokhlǒ abǐ bòkè akhû̌akhî gǎyô̤kè hǒ.

³ Dě shi dǒ hǎkhû̌ sǔ sǔ a sǔ lò̤kè, dě a sǔlò̤ yî̤ tǒ̤dǒ ani̤ tôya̤ kû̌ yè̤̌shi.

⁴ Bǎ susô̌tala nutala, shǐsusô̌tôni̤ nutôni̤ akhanu sǒkhlidû̌ lò̤ô̌kǔkè bǎ ararǎ khôlôkhû̌.

⁵ Sǔ sǔ shi sǔlò̤kè alashǐ tôlanu, dě bǎ alashǐ akû, awǐlǒ nutôni̤nu kè̌shǐ lṳ̌bò khôlôkhi nutokhlǒ .

⁶ Bǎ a tûlû̌hè pô̤̌ asa lǐ̤shi akhanu, Phanṳ̂̌a bǔmô takhaphû̌ dǒ a ma̤nǎ dǒ sǒkhlidû̌kû nutôbǎ,

⁷ Dě a plûhǎhtò̌ wi̤cû̌ cǎwǎ tôbǎ. Dě cǎwǎ nutôbǎ a wi̤le̤wi̤ge, wi̤htôwi̤lò̤, wi̤ tǒ̤dǒ shisǔ gelò̤ tǒ̤ dǒ hǎkhû̌.

⁸ Dǒnô̌kòdě, shisǔkè dǒ hǎkhû̌ hǒ ya mî̌ asǔ nò̌khôtô̤̌yanu, Phanṳ̂̌a sǎyṳ sî̌ganǎ̤ akhû̌akhî, aplû wi̤hǎhtò̌cû̌ pô̤̌ htû̌lǐ̤ tôbǎ.

⁹ Bǎbǎkǎlè htû̌lǐ̤ hǒtôbǎnu a kè̌shǐ alǎ̤ô̌kǔ tôkû̌꤮ tô̤̌, ma̤titèhî̌dě shi dû̌bǐbò pe hǎkhû̌nu akhû̌akhî, htû̌lǐ̤ hǒtôbǎ wi̤ge sô̌ dǒ Phanṳ̂̌a asǒkhlidû̌ ô̌, dě Phanṳ̂̌a yṳ̂̌htò̌ acǔde dě a pṳ̂̌nṳ̌ sô̌ htû̌lǐ̤ nutôbǎ dǒ asǒkhlidû̌kû.

¹⁰ A ô̌pǒ̤ pô̤̌ susô̌tôni̤ dě a plûhǎhtò̌ cû̌ tîkhîsô̌ htû̌lǐ̤ nutôbǎ.

¹¹ Bǎ lṳmṳ̌lò̤ akhanu, htû̌lǐ̤ nutôbǎ ěge ǐ òlǐbalǎ aǐso tôbǎ dě a wi̤ge sô̌ dǒ Phanṳ̂̌a ô̌. Dě Phanṳ̂̌a sî̌ganǎ̤ kû̌ shisǔkè dǒ hǎkhû̌nu hǒ.

¹² Htodě Phanṳ̂̌a ô̌pǒ̤ pô̤̌ susô̌tôni̤ dě a plûcû̌ sô̌ htû̌lǐ̤ nutôbǎ, hǒtôplǎ dě htû̌lǐ̤ nutôbǎ getîkhî pe dǒ lû̌ô̌ tôkhò̌ tô̤̌.

¹³ Bǎ la htò̌wǐlǒ tôla, awǐlǒ tôni̤, Phanṳ̂̌a něô̌ ayasusô̌ kû̌ tôně akhanu, shisǔlò̤kè dǒ hǎkhû̌ hǒ. Dě Phanṳ̂̌a ma̤môlò̤kè sǒkhlidû̌ ahǐgukhû̌ dě a kè̌shǐ kû̌ hǎkhû̌ nî̌ a khwebò hǒ.

¹⁴ Bǎ ginǐ̤la tôla, ginǐ̤shi kû̌ susô̌tôni̤ akhanu, hǎkhû̌ khwedǎtrè̌ bòmǔtegle hǒ.

¹⁵ Hǒtôplǎ dě Cǒmaradû̌ hî̌ Phanṳ̂̌a kû̌,

¹⁶ “Ǒ nṳ̂̌a, kaǎnṳ̌ nama, naphû̌pwa̤khûsî kû̌ nadè̌sî nutokhlǒ dě hǎhtò̌bò mò̌ dǒ sǒkhlidû̌ akhlonu,

¹⁷ Lǒ̤bò ta̤bô̌lò̤ dǒ a ô̌plǒ kû̌ na mè̤̌kû̌ htû̌phû̌yṳ̌phû̌, ta̤mi̤ta̤mò̤̌, kû̌ ta̤phû̌ta̤wè̤ dǒ adû̌dû̌ apî̌tî̌tî̌ nutokhlǒ lǒ̤ bò, pô̤̌khô a gǔ phû̌htò̌dû̌htò̌ lô̌khô, dě ô̌be cû̌peshe cû̌bò hǎkhû̌ ayanu plûhǎhtò̌bò mò̌ asînu.”

¹⁸ Pô̤̌nukhû̌khî Phanṳ̂̌a kaǎnṳ̌ ama, aphû̌pwa̤khûsî kû̌ adè̌sî tokhlǒ dě a hǎhtò̌bò dǒ sǒkhlidû̌ akhlo.

¹⁹ Htodě lǒ̤bò ta̤phû̌ta̤wè̤ dǒ adû̌dû̌ apî̌tî̌tî̌ kû̌ lǒ̤bò htû̌phû̌yṳ̌phû̌ kû̌ ta̤mi̤ta̤mò̤̌, ta̤phû̌ta̤wè̤ ô̌ dǒ hǎkhû̌ nutokhlǒ ô̌bò bǎ sǒkhlidû̌kû dě hǎhtò̌ lô̌khô tôprṳ̂ hto tôprṳ̂.

Phanṳ̂̌a shû̌u lṳhtò̌ ata̤lṳta̤tò

²⁰ Htodě Phanṳ̂̌a tèhtò̌ ta̤lṳhtò̌wǎ̤ kû̌ lǒ̤ dǒ aglè̌ cabahtò̌ Cǒmara tûjû̌pwa̤ aya tôwǎ̤, htodě aphî̌ ta̤phû̌ta̤wè̤ kû̌ htû̌ dǒ amṳ̂̌plî tokhlǒ, dě a bè̌htò̌ dǒ ta̤lṳhtò̌wǎ̤khû̌ dě a shû̌u lṳhtò̌ kû̌ Cǒmara.

²¹ Cǒmara tûjû̌pwa̤ nṳbǎ ta̤lṳtòhtò̌ ata̤nṳmû̌ akhǔnu dě mô̤sû̌mô̤sò̌ mî̌ca lû̌sǎphlǒ. Dě a bè̌lò̤ asǎphlǒ dě a hî̌ kû̌, “Htû̌nô̌khîkò pěnu mî̌ he sî̌ganǎ̤ kû̌ kòyòhǎkhû̌phû̌ tokhlǒ gènè̤ ta̤phû̌mò̤̌shǐhtô tokhlǒ dǒ aphijǎkha penu bǎbǎ, dǒ asî ta̤sǔ akhû̌akhî he ǐso pe hǎkhû̌ tô̤̌. Pô̤̌ he ma̤ hto khònò̤̌nu, htû̌nô̌kòpěnu mî̌ he ma̤simè̤mè̤̌ pe lǒ̤bò ta̤bô̌lò̤ dǒ ata̤htûpwa̤ ô̌ nutokhlǒ tô̤̌ hǒ.

²² Hǎkhû̌nu kè̌ ô̌gutṳ̌ pe mò̌ mî̌, ta̤shǒǐ ashěakhǎ kû̌ ta̤kǎwô̌ma̤wô̌ ashěakhǎ, gǎgû̌ kû̌ gǎju, gǎgû̌kha kû̌ gǎwô̤̌kha, lṳmṳ̌khǐ kû̌ lṳmṳ̌sha gǔ ô̌ sělě hènè pû pě nî̌.”