Mǒhtûlû̌hǎhtûsa 44 - Kawyaw New Testament

Khûyṳ̂tǎ ma̤kè̌kè̌ apṳ̌wè̤̌ sî

¹ Htodě Khûyṳ̂tǎ no pwa̤pǒǐ bǎlû̌û hǐdǒkû nutôpwa̤ kû̌, “Tǒ̤nṳ̌ bǎ asî bǔkû̌lǎ dǒ asîhuhtǒkû bǎ asî dò̌ge pè̤̌nu, dě tôpwa̤ kû̌ tôpwa̤ arunu bè̌nṳ̌ gesô̌ bǎ asî dǒ asî huhtǒkû dǒ akhû̌lǒnu.

² Htodě shû̌nṳ̌ hebǎlěru dǒ apî̌tî̌lǒ nutôpwa̤ ahuhtǒkû dǒ akhû̌lǒnu, abǔkû̌lǎ pwî̤sî dě shû̌nṳ̌ gebò bǎnu hǒ nî̌.” Dě a ma̤ pô̤̌ Khûyṳ̂tǎ hî̌ lû̌ûnu.

³ Bǎ lṳmṳ̌lî wî̤sò akhanu Khûyṳ̂tǎ apwa̤ma̤ta̤phû̌ tokhlǒ gesûkè asî kû̌ asîmǐû̌lǎ tokhlǒ.

⁴ Bǎbǎkǎlè bǎ asî getǒ̤yî̤ lû̌ khôtô̤̌ akhanu, Khûyṳ̂tǎ hî̌ pwa̤pǒǐ bǎ lû̌û hǐdǒkû nutôpwa̤ kû̌, “Gû̌lû phwèphwè kû̌mò̌ kòyò nutokhlǒ akò, dě bǎ na lûlǎ hǒ asî akhanu, hî̌ asî kû̌, ‘kòyò ma̤wô̌ sî dě sî cû̌ ma̤geshěshǔ kòyò kû̌ ta̤kěta̤plě hětè?

⁵ Sî cû̌ ǎhǔge nǐ̤tǒ̤ heběcǎ ashibaru ma̤titè? Nṳ mî̌ ashibalǎ̤ô, htokhôtô̤̌ a noǎ ǐtû̌ kû̌ alǎ̤kè̌shǐlṳ̌nǎ jò ta̤ yano̤. Sî ma̤ pô̤̌o numî̌ sî ma̤ hǒ ta̤phû̌mò̤̌shǐhtô hǒ.’”

⁶ Bǎ pwa̤pǒ bǎ Khûyṳ̂tǎ hǐdǒkû nutôpwa̤ lûlǎ hǒ asî akhanu, a hî̌ asî pô̤̌ aběcǎ no hî̌ lû̌ûnu.

⁷ Bǎbǎkǎlè asî hî̌shěshǔ lû̌û kû̌, “Běcǎdû̌, na cû̌gènè̤yṳ̂̌ tǒ̤ pa pô̤̌o ma̤titè? Najû̌ amè̤̌hǒ panu, pa ishǒjò̌ payô̤̌ kû̌ pa ma̤ nô̌ pô̤̌nu tôkhò̌ tô̤̌.

⁸ Běcǎ sî̌ganǎ̤ tûû̌ hǒ kû̌ ru dǒ awǐkha tôhu pa kè̌shǐ dǒ pahuhtǒkû nutokhlǒ, pa ô̌ dǒ Khanagǎ dě pa phî̌hè gesô̌ dǒ běcǎô̌ hǒ. Ma̤pô̤̌nudě ru bǎbǎ hta bǎbǎ pa cû̌ ǎhǔ tǒ̤ pe dǒ naběcǎhǐkû nuhětè?

⁹ Běcǎdû̌ kè̌ kè̌shǐ balěru ô̌ dǒ najû̌ hǒtokhlǒ alô̤ tôpwa̤pwa̤ hî̌dě ma̤sikè tûû̌ a nî̌. Htodě pa lǒ̤bò mî̌ pa gǔ htû tûû̌ pa běcǎdû̌ ajû̌ pěpě.”

¹⁰ Dě a hî̌shǔ asî kû̌, “Awô̌ hǒ, a gǔ htûhtò̌ pô̤̌ sî hî̌ nupě nî̌, bǎbǎkǎlè kòyò dǒ a bǎhtû hejû̌ numî̌ a bǎhtû pwǎ tǒ̤ a phî̌ shiba nutôpwa̤ pwǎ, dǒ ashǔshawa̤ tokhlǒ dě a gǔ hǎplǎ kètû̌ pě.”

¹¹ Asî tôpwa̤ kû̌ tôpwa̤ taplǔtewě̤ jotě̤ ǐtûû̌ lô̌khô ahuhtǒ dě a bôphlǔ ǐtûû̌ lô̌khô ahuhtǒ.

¹² Htodě Khûyṳ̂tǎ apwa̤ma̤ta̤phû̌ nutôpwa̤ sahtò̌ kè̌lǎru dǒ adû̌lǒkhlo htodě lò̤tutṳ̌ tǒ̤htǔ apî̌tî̌lǒ tôpwa̤ ahuhtǒkû. Dě a cû̌kè̌shǐ hǒ balěru nutôbǎ dǒ Khûbîyame̤ ahuhtǒkû.

¹³ Hǒtôplǎ dǒ asî sǎphlǒpî̌ mî̌ca akhû̌akhî, a cǐhǎyè̌ ǐbò aje, htodě asî pṳ̂̌ tôpwa̤ bè̌htò̌ bòsô̌ atě̤ta̤ dǒ asîmǐû̌lǎ tokhlǒ alô̤ dě asî tiwǐgesô̌ lǒ̤bò sô̌ dǒ wî̤̌kû.

¹⁴ Bǎ KhûYǔda kû̌ apṳ̌wè̤̌sî gekhitǒ̤ hǒ dǒ Khûyûtǎ akhanu, Khûyṳ̂tǎ ô̌pe bǎ hǐ nutômè pwǎ. Dě asî dô̌gînî̤ û̌lò̤ bè̌dubè̌nǎ̤ lô̌khô dǒ jûkhû̌ dě lû̌lô̤mô̤̌.

¹⁵ Dě Khûyṳ̂tǎ hî̌ asî kû̌, “Sî cû̌ ma̤tǒ̤ pô̤̌o ma̤titè? Kòyò pô̤̌ henu a kè̌shǐlṳ̌nǎjò ta̤ numî̌ sî sî̌ganǎ̤ tô̤̌ ya?”

¹⁶ Dě KhûYǔda hî̌shǔ lû̌û kû̌, “Ǒ běcǎdû̌, pa glè̌ hî̌jò pe hětè? Pa glè̌ htè̌shǔjò pe běcǎdû̌ hětè? Pa mî̌ kòyòcǒkòyòtè̤ tokhlǒpwǎnu pa glè̌ khòlṳ̌jò pe hětè? Cǒmaradû̌ dǔlṳ̌ hǒ pata̤ma̤sǔ hǒ. Dě khònò̤̌ kòyò dǒ kòyò kè̌shǐ balěru dǒ ahuhtǒkû nutôpwa̤ htû tǒ̤ tûû̌ běcǎ ajû̌ mè̤̌tô̤̌, pa lǒ̤ bò gǔ htûbòtû̌ hǒ běcǎ ajû̌ hǒ.”

¹⁷ Bǎbǎkǎlè Khûyṳ̂tǎ hî̌shǔ asî kû̌, “Tô̤̌, he ma̤bò̌ pô̤̌ sîhî̌ nutô̤̌. Pwa̤ dǒ a bǎhtû hejû̌ numî̌ tǒ̤ pwǎ kòyò kè̌shǐ balěru dǒ lû̌huhtǒkû nutôpwa̤ pwǎ. Dǒ ashǔshawa̤ tokhlǒ dě gemô̤gewô̌ lô̌khô tûû̌ dǒ sîpha ô̌nu.”

KhûYǔda kwisǎyṳ bǎ dǒ apṳ̌ Khûbîyame̤ aya

¹⁸ Hǒtôplǎ dě KhûYǔda hè dǒ Khûyṳ̂tǎ a ô̌ dě a hî̌ lû̌û kû̌, “Ǒ běcǎdû̌, khòsǎdô ǐhî̌bǎ kû̌lǎ najû̌nu yô̤̌tômû nî̌. Na asô̌sô̌kû̌ Khwǐ bǎbǎkǎlè sǎphlǒdû̌ najû̌nu tǎ̤mǎ̤ nî̌.”

¹⁹ Běcǎdû̌ gwè̌ najû̌ hǒtokhlǒ kû̌, sîpha ô̌pe pwǎ ya? Sî pṳ̌ dǒ ashǔshawa̤ ô̌pe yahî̌?

²⁰ Dě najû̌ hǒtokhlǒ hî̌shǔ běcǎdû̌ kû̌, papha mǒ̤pwǎ̤ ô̌ tôpwa̤, htodě papṳ̌kònò dǒ phanu phû̌ô̌nǐ̤ lû̌û bǎ a mǒ̤pwǎ̤ lû̌ hǒ akhanu a ô̌ tôpwa̤. Dǒ awè̤̌ dě asihto hǒ, dǒ asî amǒ̤ phû̌ô̌lò̤ nǐ̤ lû̌û aklanu, a ô̌kè tû̌ a tôpwa̤ pwǎ, dě apha mô̤ ǐtûû̌ gutṳ̌ lû̌û.

²¹ “Htodě běcǎdû̌ hî̌ najû̌nu kû̌, pô̤̌khô he gǔ kè̌shǐ a kû̌ henǎ̤nu, kaǎ a bǒo.”

²² Bǎbǎkǎlè pa hî̌shǔ běcǎ kû̌, a cû̌tephe kû̌ apha mî̌ anǐ̤ tô̤̌. A kè̌ cû̌khô̌ kû̌ apha mî̌, apha si pě.

²³ Bǎbǎkǎlè běcǎdû̌ hî̌shǔ najû̌ sî kû̌, sî kè̌ kaǎhènǐ̤ sîpṳ̌kònò tô̤̌ mî̌, sî hèkè̌shî̌ he mî̌ anǐ̤ pe tô̤̌ hǒ.

²⁴ Pô̤̌ běcǎdû̌ hî̌ najû̌nu, bǎ najû̌nu ge tǒ̤ hǒ dǒ papha ô̌ akha, najû̌nu ge shôbǐǐlṳ̌ lǒ̤bò kû̌ lû̌û pô̤̌ běcǎdû̌ hî̌ panu.

²⁵ Dǒnô̌kòdě, papha hî̌ kû̌, cû̌pwî̤ gesô̌ lô̌khô shǎǎshǎô tîkî̌phû̌nî̌.

²⁶ Bǎbǎkǎlè pa hî̌shǔ lû̌û kû̌, papṳ̌kònò kè̌ cû̌gû̌ kû̌ pa tô̤̌ mî̌ pa cû̌ bò̌ nô̌tô̤̌ hǒ. Ma̤titèhî̌dě papṳ̌kònò kè̌ cû̌ gû̌ kû̌ pwa̤tô mî̌, palǎ̤kè̌shǐ běcǎ nutôpwa̤ amǐ̤sǎnu a yṳ̂tô̤̌.

²⁷ Papha hî̌ najû̌ hǒtokhlǒ kû̌, sî sǎganǎ̤tû̌ hǒ kû̌ hemî̌ Mǒ̤rakhîlǎ phû̌ô̌ bǎhe phû̌pwa̤khû sò̌ginǐ̤.

²⁸ Tôpwa̤ dě a hǎmǎkè hǒ. Ta̤mi̤ta̤mò̤̌ htěǎhtěpwǐ kèbò hǒ lû̌û hǒ, sahtò̌ bǎnu dě he kè̌shǐ nô̌pe lû̌û tôkhò̌ tô̤̌ hǒ.

²⁹ Na kè̌ kaǎcû̌ apî̌tî̌lǒ hǒtôpwa̤ hî̌dě, hî̌pě a cû̌htûhtò̌tò̤̌ pô̤̌ ta̤tôcǒcǒ hè̌. He mǒ̤pwǎ̤ hǒ, hî̌pě he si kû̌ sî ma̤gû̌ma̤gè̌ sǎplǎ̤sǎyô̤jî̌ he akhû̌akhî pě, a hî̌ pa pô̤̌nu.

³⁰ Papha ta̤ô̌htûpwa̤nu a ô̌icu pwǎ kû̌ phijǎphû̌ tôpwa̤ pwǎ akhû̌akhî, khònò̤̌dě a kè̌ page kû̌ pa tô̤̌ mî̌, pa gejò dǒ papha paphasǎdô a ô̌ tô̤̌.

³¹ Dě papha kè̌ kè̌shǐ kû̌ a page kû̌ najû̌ hǒtokhlǒ tô̤̌ mî̌, a gǔ sikè pě. Papha dě a mǒ̤pwǎ̤ hǒhǒ, dǒ pa ma̤gû̌ma̤gè̌ lû̌ akhû̌akhî, a gǔ sikè pě.

³² He wṳ̂̌dò htohǒ hepha kû̌ he gǔ kè̌khwè̌ takaǐwô̌ tûû̌ a pe hǒnu, dě he hî̌ lû̌û kû̌, he kè̌ kaǎge sô̌ a dǒ naô̌ tô̤̌ hî̌dě, na bè̌ ta̤sǔ tû̌ he tûjû̌pwa̤ mî̌ anǐ̤ pwǎ, he hî̌ lû̌û pô̤̌nu.

³³ “Ma̤pô̤̌nudě běcǎdû̌, dǒ agûlǎ̤nu he ô̌kètû̌ bǎo dě he htûtû̌ běcǎ ajû̌ pě. Dǒ a dě plûge gû̌kè a kû̌ awè̤̌sî nutokhlǒ nî̌.

³⁴ A kè̌ gû̌gekû̌ he tô̤̌ hî̌dě he cû̌getô̤jò hepha hětè? He sǎyṳ kè̌shǐ pe hepha khòbǎ ta̤sǎphlǒgû̌gè̌nu tîkî̌ tô̤̌ hǒ.”