Mǒhtûlû̌hǎhtûsa 43 - Kawyaw New Testament

Khûyṳ̂tǎ apṳ̌wè̤̌ tokhlǒ cû̌ sô̌ dǒ Ijî̌gǎ

¹ Khònò̤̌dě dǒ Khanagǎnu gǎwǐ̤gǎko jî̌jû̌ pe pwǎ.

² Pô̤̌nudě bǎ Khûyṳ̂tǎ apṳ̌awè̤̌ kû̌ ahǐphû̌phòphû̌ sî ǎbòkè bǔkû̌lǎ dǒ asî cû̌ pwî̤geǐ dǒ Ijî̌gǎ nutokhlǒ akha, apha Phaya̤kò hî̌ asî kû̌, “Cû̌pwî̤ǎ sô̌ mò̌ lô̌khô palǎ̤ǎlǎ̤ô dǒ Ijî̌gǎ tîkî̌phû̌ tô̤̌ya.”

³ Bǎbǎkǎlè Khûyǔda hî̌shǔ apha kû̌, “Pwa̤pǒshipǒgǎ dǒ a pǒ Ijî̌gǎ nutôpwa̤ dǐsè̌rè̌ shotuklǔ hto pa kû̌, ‘sî kè̌ kaǎhèǐ sîpṳ̌ kònò tô̤̌ mî̌, sî hèkè̌shî̌ he mî̌ anǐ̤ tô̤̌,’ a hî̌ pô̤̌nu.

⁴ Na kè̌ plûcû̌ papṳ̌ Khûbîyame̤ kû̌ pa hî̌dě, pa cû̌pwî̤ǎ bǎ na shǎǎshǎô pě.

⁵ Na kè̌ plûcû̌gû̌ a kû̌ pa tô̤̌ mî̌, pa cû̌ tô̤̌tô̤̌, ma̤titèhî̌dě pwa̤pǒshipǒgǎ nutôpwa̤ hî̌ pa kû̌, ‘sî kè̌ kaǎhèǐ sîpṳ̌ kònò tô̤̌ mî̌, sî hèkè̌shî̌ he mî̌ anǐ̤ tô̤̌.’”

⁶ Phaya̤kò hî̌shǔ aphû̌sî kû̌, “Sî cû̌ pwe̤ǐ lṳ̌tǒ̤ pwa̤pǒshipǒgǎ nutôpwa̤ kû̌ sîpṳ̌pwa̤khû ô̌pe tôpwa̤, dě sî cû̌ ma̤gû̌ma̤gè̌ he mî̌ ama̤titè?”

⁷ Aphû̌sî hî̌shǔ lû̌û kû̌, “Pwa̤pǒshipǒgǎ nutôpwa̤ gwè̌hto gwè̌sô̌ pawe̤pakè kû̌ pahǐphû̌phòphû̌ awe̤akè dě a gwè̌ pa kû̌, ‘sîpha ô̌htûpwa̤ pepwǎ ya? Sîpṳ̌ dǒ ashǔshawa̤mî̌ aô̌pe tôpwa̤pwa̤ ya?’ Pô̤̌nu akhû̌akhî, pa shôbǐǐlṳ̌ cǒcǒ bǎ lû̌û pwǎ. Agwè̌ pa dě a glè̌ no kaǎhè papṳ̌ kònò pô̤̌o pě numî̌ pa sî̌ganǎ̤ nǎwǐ ya?”

⁸ Htodě Khûyǔda hî̌shǔ lû̌û kû̌, “Pô̤̌khô pa kû̌ na kû̌ paphû̌ tokhlǒ gǔ si tô̤̌, gǔ htûpwa̤bò̌ ayanu, plûcû̌ Khûbîyame̤ kû̌ henu, dě pa hǎhtò̌cû̌ khònò̤hǒ.

⁹ He wṳ̂̌dòtû̌ kû̌ ta̤pò̤̌ta̤sha bǎ a tôcǒ꤮ tô̤̌. Dě dǒ ayanu, tûlû̌꤮ yṳ̌ǎnǎla̤ǐ he dě bè̌lò̤bò ta̤pṳ̂̌tocǒ dǒ hekhû̌nu. He kè̌ kaǎge sô̌ a dǒ naô̌ tô̤̌ hî̌dě, na bè̌ he ta̤sǔ tûjû̌pwa̤ mî̌ anǐ̤.

¹⁰ Pa kè̌ ma̤pò̤̌yǎ̤pò̤̌sha pwǐnutô̤̌ mî̌, khònò̤̌ pacû̌ page nî̌ anǐ̤hto ginǐ̤plǎhǒ kǎlè.”

¹¹ Dǒnô̌kòdě asîpha Phaya̤kò hî̌ asî kû̌, “A kè̌ mè̤̌caca pô̤̌nu hî̌dě tôbǎma̤ pô̤̌o, phî̌cû̌nṳ̌ lô̌khô ta̤ dǒ awô̌lǒ bǎ pagǎkûnu tokhlǒ dǒ amè̤̌kû̌ sǒri ta̤khû̌numû̌ tîkî̌, wè̌khû̌shi tîkî̌, ta̤numû̌ dǒ lǎ̤pǎ̤nṳ̌ numò̤̌wǐ kû̌ hǎsǐ tokhlǒ, Mǔra shinumû̌, Batanimôsǎ asô̌sô̌kû̌ Sûmûsǎ kû̌ Ǔshôkhèdimô asô̌sô̌kû̌ Lǔsǎ nudě cû̌ǐ lô̌khô kû̌ pwa̤pǒshipǒgǎ nutôpwa̤ sû nî̌.

¹² Phî̌cû̌ nṳ̌ lǒ lô̌khô ru ginǐ̤plǎ gûlǎ̤nu, htodě cû̌ ǐtîkhî sô̌ ru dǒ kòyò shû̌nṳ̌ bǎ sî dǒ sî huhtǒkû nutokhlǒ. Kòyò tôpwa̤pwa̤ cû̌ shû̌nṳ̌sǔtò̤̌ bǎ sî kǎlè.

¹³ Kaǎnṳ̌ mò̌ sîpṳ̌ kònò dě cû̌ sô̌ mò̌ lô̌khô khònò̤̌ dǒ pwa̤pǒshipǒgǎ nutôpwa̤ aô̌nu.

¹⁴ Pô̤̌khô pwa̤pǒshipǒgǎ nutôpwa̤ gǔ plûge sîpṳ̌wè̤̌ Khûsume̤û kû̌ Khûbîyame̤ kû̌ sîyanu, he kwicaba kû̌ Cǒmara dǒ apô̤aphǎ nutôpwa̤ gǔ no sǎyṳgwèbǎǐ tûû̌ pwa̤pǒshipǒgǎ nutôpwa̤ kû̌ sî pe nî̌. Dǒ he dě, he kè̌ tôbǎ lò̤jû̌ hephû̌ tokhlǒ hî̌dě, he bǎ lò̤jû̌kè pě.”

¹⁵ Pô̤̌nukhû̌khî asî phî̌nṳ̌ sû nutokhlǒ kû̌ ru ginǐ̤plǎ gûlǎ̤, htodě a kaǎcû̌nṳ̌ lô̌khô Khûbîyame̤. Dě a tuplṳ̌tewě̤ hǎhtò̌cû̌ lô̌khô dǒ Ijî̌gǎ dě asî cû̌ lô̌khô dǒ Khûyṳ̂tǎ lǎ̤ô̌ nutôkû.

¹⁶ Bǎ Khûyṳ̂tǎ kè̌shǐ kû̌ Khûbîyame̤ hètǒ̤ kû̌ asî akhanu, a hî̌ kòyò dǒ apǒǐ bǎ lû̌û hǐdǒkû nutôpwa̤ kû̌, “Kaǎcû̌ asî dǒ hehǐnu, ma̤si mò̌ ta̤mi̤ta̤mò̤̌ tôdo dě tîwî̌tòwò phôǎ bǎ asî lṳmṳ̌htǔ shǎǎ ayanu, ma̤titèhî̌dě asî bǎ ǎcuôcu kû̌ he dîca pě.”

¹⁷ Htodě kòyòpha nutôpwa̤ ma̤ pô̤̌ Khûyṳ̂tǎ hî̌ lû̌û nu, dě a kaǎcû̌ Khûyṳ̂tǎ apṳ̌wè̤̌ tokhlǒ dǒ Khûyṳ̂tǎ ahǐ.

¹⁸ Kòyò kaǎcû̌ asî dǒ Khûyṳ̂tǎhǐ akhû̌akhî, asî ǐsha dě a gènè̤ lô̌khô kû̌, “Kòyò kaǎ pa bǒo mî̌ amè̤̌kû̌ dǒ awǐkha tôplǎ kòyò bè̌nṳ̌ bǎ paru dǒ pa huhtǒkûnu akhû̌akhî pwǎkǎ. Ma̤pô̤̌nudě a sǎyṳ pṳ̂̌ pa, a sǎyṳ phî̌sigwǐ kèbò pa mǐû̌lǎ tokhlǒ dě a sǎyṳnohtû pa kû̌ ajû̌ pwǎkǎ.”

¹⁹ Asî cû̌tǒ̤ dǒ pwa̤pǒǐ Khûyṳ̂tǎ hǐdǒkû nutôpwa̤ a ô̌ dě a cû̌ hî̌ lû̌û bǎ hǐtakhanu.

²⁰ Dě asî hî̌ kû̌, “Ǒ běcǎ, dǒ awǐkha pa hè pwî̤ǎ bǎ shǎǎshǎô bǒo tôplǎ,

²¹ Dě bǎ lṳmṳ̌khǐ pa ge ô̌kǔ dǒ klè̌lô̤ gûlǎ̤ lǎ̤ô̌kǔ akhanu, pa bǔmô pa huhtǒ dě tôpwa̤ kû̌ tôpwa̤ pa kè̌shǐbò gesô̌ paru dǒ pa ǐ kû̌ bǔkû̌lǎ pwî̤ nutokhlǒ dǒ pa huhtǒkû. Dě ru nutokhlǒ pa phî̌hèbò sô̌ hǒ.

²² Pa phî̌hènṳ̌lǒ pô̤̌ ru dǒ pa lǎ̤ pwî̤ kû̌ shǎǎshǎô ayaya. Mò̌pè tôpwa̤ cû̌ shû̌nṳ̌ gesô̌ bǎ pa ru dǒ pahuhtǒkû dě pa sî̌ganǎ̤ tô̤̌.”

²³ Pwa̤pǒǐ Khûyṳ̂tǎ hǐdǒkû nutôpwa̤ hî̌shǔ asî kû̌, “Bǎyô̤ tǎ̤mǎ̤, Cǒmaradû̌ dǒ sî kû̌ sîpha cabahtò̌ǐ yǎ nutôpwa̤ shû̌nṳ̌ bǎ sî ru dǒ sîhuhtǒkû pwǎkǎ. Ma̤titèhî̌dě he nǐ̤bǎ sî ru pwǎ,” a hî̌ htodě a cû̌kaǎhè gesô̌ Khûsumeû dǒ asîô̌.

²⁴ Htodě pwa̤pǒǐ Khûyṳ̂tǎ hǐdǒkû nutôpwa̤ kaǎnṳ̌ asî dǒ Khûyṳ̂tǎ ahǐdǒkû, a dò̌hèbǎ asî shi dě asî cǔbò kû̌ akhò̌lôpô̤̌, dě a bǔǎ bǎ asîmǐû̌lǎ tokhlǒ ashǎ.

²⁵ Kòyò hî̌ asî kû̌ asî gǔ ǎplǒ dî kû̌ Khûyṳ̂tǎ pě akhû̌akhî, htû̌ lṳmṳ̌htǔ Khûyṳ̂tǎ getǒ̤ pě asî gǔ ǐ lû̌û sû ayanu, a tîwî̌tòwò nǎ lô̌khô sû tokhlǒ dǒ Khûyṳ̂tǎ aya.

²⁶ Bǎ Khûyṳ̂tǎ getǒ̤ dǒ hǐ akhanu, a hèǐ lô̌khô Khûyṳ̂tǎ sû dǒ asî phî̌hèǐ bǎ lû̌û dǒ hǐdǒkû nutokhlǒ, dě a dô̌gînî̤ û̌lò̤ bè̌dǔbè̌nǎ̤ lô̌khô dǒ jûkhû̌ bǎ Khûyṳ̂tǎ alô̤mô̤̌.

²⁷ Dě asî ô̌shû̌ô̌mô̤ lô̌khô ya mî̌ ô̌mô̤ tô̤̌ya, Khûyṳ̂tǎ gwè̌ asî htodě a gwè̌pô̤̌ asî kû̌, “Sîpha mǒ̤pwǎ̤ dǒ sî shôbǐǐ bǎ he awe̤akè nutôpwa̤ mî̌ a ô̌shû̌ô̌mô̤ pwǎ ya? A ô̌htûpwa̤ pepwǎ ya?”

²⁸ Dě asî hî̌shǔ kû̌, “Najû̌ amè̤̌kû̌ papha nî̌, a ô̌htûpwa̤ pe pwǎ, a ô̌shû̌ô̌mô̤ pwǎpwǎ.” Dě asî dô̌gînî̤ û̌lò̤ bè̌dubè̌nǎ̤ lô̌khô dǒ alô̤mô̤̌.

²⁹ Bǎ Khûyṳ̂tǎ kè̌shǐ apṳ̌ Khûbîyame̤ amè̤̌kû̌ amǒ̤ aphû̌pwa̤khûnu akhanu, a gwè̌ asî kû̌, “Hǒo mî̌ sîpṳ̌ kònò dǒ sî shôbǐǐ bǎ he nutôpwa̤ he yahî̌?” Htodě a hî̌ kû̌, “Hephû̌, Cǒmaradû̌ gǔ ma̤bwǐma̤sîrî pû na nî̌.”

³⁰ A hî̌ hto pô̤̌nu dě a taplṳ̌tewě̤ hǎhtò̌cû̌kè, a mô̤ǐ jî̌ apṳ̌ akhû̌akhî, a cû̌kè̌lǎ gûlǎ̤ lǎ̤hǎ, dě a cû̌nṳ̌ hǎ dǒ alǎ̤ô̌khô̌ tû̌ hǐdǒkû nutôkû.

³¹ Htodě a upla̤kè amǐ̤sǎ dě a hǎhtò̌ gesô̌ dǒ akhlo. Dě a khòǐ anǎ̤ dě a nophî̌htò̌ kòyò mû̌ kû̌ hǎsǐ.

³² Khûyṳ̂tǎ aya dě kòyò dǐǎ khô̌ tû̌yǎ dîgògǒ tômè, dǒ apṳ̌wè̤̌ sîtokhlǒ aya dě kòyò khwè̌ǎ khô̌ bǎ yǎ tômè, Ijî̌phû̌ dǒ a ǎplǒôplǒ gû̌ kû̌ lû̌û bǎnu tokhlǒ dě kòyò khwè̌ǎ khô̌ bǎ asî tôkûkû. Ma̤titèhî̌dě Ijî̌phû̌ tokhlǒ ma̤yǒ̤ ǎcuôcu kû̌ Hebrǔ tokhlǒ.

³³ Khûyṳ̂tǎ no hǎnòò̌ dò̌rûbò apṳ̌wè̤̌sî dǒ alô̤mô̤̌, a nohǎnòò̌ sahtò̌wǐ awè̤̌pwǎ̤lǒ lò̤tutṳ̌ dǒ akònòlǒ pô̤̌nu, dě asî kè̌ǐ lû̌û tôpwa̤ kû̌ tôpwa̤ dě aǒò̌ lǒ̤bò.

³⁴ Bǎ Khûyṳ̂tǎ yṳ̂̌lò̤ dǐǎ bǎ asî shǎǎ dǒ alǎ̤ǎdîwǎ̤lô̤ nutokhlǒ akha, Khûbîyame̤ nǐ̤ bǎ dû̌ bòkhlo kû̌ apṳ̌wè̤̌ dǒ ashǔshawa̤ nutokhlǒ yè̤̌plǎ gûlǎ̤. Pô̤̌nudě asî sǎlě̤sǎlò̤ ǎ ô lô̌khô kû̌ Khûyṳ̂tǎ.