Mǒhtûlû̌hǎhtûsa 2 - Kawyaw New Testament

¹ Ta̤bô̌lò̤ mǒkhû̌ kû̌ hǎkhû̌ kû̌ ta̤ ô̌ dǒ lû̌kû pṳ̂̌꤮ tôcǒ htobò hǒ.

² Cǒmaradû̌ ma̤htobò ata̤bô̌lò̤ tokhlǒ hǒ dě bǎ mṳ̌ni̤ susô̌tôni̤ nutôni̤nu, a ô̌kǔ dě a ma̤ pe ta̤ma̤ tôcǒ꤮ tô̤̌.

³ Ma̤titèhî̌dě Cǒmaradû̌ bô̌lò̤ ta̤ lǒ̤꤮ bò a htobòhǒ dě a ô̌kǔ bǎnu tôni̤. Pô̤̌nudě a ǐshowî̤ mṳ̌ni̤ susô̌tôni̤ nutôni̤ htodě a bè̌plò̌shǐ ǐ lû̌û.

Ta̤bô̌lò̤ pwa̤mǒ̤ kû̌ pwa̤khû

⁴ Dě ta̤we̤ta̤kè hǒtokhlǒ numî̌ bǎ Cǒmaradû̌ bô̌lò̤ mǒkhû̌ kû̌ hǎkhû̌ akha tokhlǒ awe̤akè hǒ. Bǎ Běcǎ Cǒmara tûjû̌pwa̤ bô̌lò̤ hǎkhû̌ kû̌ mǒkhû̌ tokhlǒ akhanu,

⁵ Ta̤khlita̤lè kû̌ sǒdosǒlǎ sîtokhlǒ dô̌htò̌phôhtò̌ bǎ tômṳ̌꤮ khôtô̤̌. Sǒmṳ̌wû̌bô sîtokhlǒ a dô̌htò̌phôhtò̌ bǎ khôtô̤̌tô̤̌, ma̤titèhî̌dě Běcǎ Cǒmara tûjû̌pwa̤ noju lò̤ gǎ hǎkhû̌ khôtô̤̌, dě pwa̤ma̤hǔkla mî̌꤮ a ô̌ tôpwa̤ khôtô̤̌tô̤̌.

⁶ Bǎbǎkǎlè shi ô̌ dǒ hǎlǎ̤ tokhlǒnu asǐcô̌ bǎ hǎkhû̌.

⁷ Htodě Běcǎ Cǒmara tûjû̌pwa̤ phî̌ hǎkumṳ̌ dě a bô̌ kû̌ pwa̤khû tôpwa̤. Dě a ǔnṳ̌ gili̤ dǒ a ǐ ta̤htûpwa̤ dǒ pwa̤khû nò̌khîkû dě pwa̤khû nî̌ a htûpwa̤htò̌.

⁸ Běcǎ Cǒmara tûjû̌pwa̤ tîwî̌tòwò nǎ bǎ pwa̤khû aya we̤kû tôwe̤ dǒ kòyò kaǎ kû̌ Ede we̤kû dǒ gǎlṳmṳ̌htò̌ tôgǎnu dě a bè̌lò̤ pwa̤khû dǒ a bô̌lò̤ nutôpwa̤ bǎ we̤kûnu.

⁹ Htodě Běcǎ Cǒmara tûjû̌pwa̤ no dô̌htò̌ sǒmṳ̌wû̌bô pṳ̂̌tocǒ dě awî̤atwè̤̌ mî̌ca dě a sǎhtò̌ sǒsǎ dǒ awǐashu mî̌ca tokhlǒ. Dǒ we̤ klǎmakû nu sǒmṳ̌ dǒ a ǐ kòyò ta̤htûpwa̤ nî̌ a ô̌ tôsǒ, kû̌ sǒmṳ̌ dǒ a ǐ kòyò kû̌ kòyò gǔ sî̌ganǎ̤ ta̤wô̌ kû̌ ta̤phû̌mò̤̌ tôsǒnu a ô̌ bǎnu.

¹⁰ Shilô̤̌mǒ̤ tôbô sahtò̌ lò̤ dǒ Ede we̤kû dě alò̤gûjû̌ bǎ bò sǒmṳ̌ bǎ Ede we̤kû nutokhlǒ, dě shilô̤̌mǒ̤nu tôbô nî̌ a lò̤ phû̌phòhtò̌ sô̌ shilô̤̌ lî̤̌bô.

¹¹ Shilô̤̌ awǐlǒ tôbô nî̌ kòyò kaǎ lû̌mi̤ kû̌ Phî̌shû, dě a lò̤ cǒnṳ̌ bò Hawî̌lagǎ dǒ hta lǎ̤hǎhtò̌ nutôgǎ hǒ.

¹² Hta bǎnu tôkûmî̌ htawî̤htawô̌, ta̤numû̌ dǒ kòyò kaǎ kû̌ Badûla kû̌ lǒ̤pwe̤dû̌ dǒ kòyò kaǎ kû̌ Shahalǒ̤ tokhlǒnu kòyò kè̌shǐ a hǎhtò̌ bǎnu.

¹³ Shilô̤̌ ginǐ̤bô tôbô mî̌ kòyò kaǎ lû̌mi̤ kû̌ Gǐhû, a lò̤ te̤we̤lû̌bò bǎ Kǔshǎgǎkû.

¹⁴ Shilô̤̌ subô tôbônu kòyò kaǎ lû̌mi̤ kû̌ Tǐkirǐ, a lò̤nṳ̌cǒ dǒ Ashǔrǎgǎkû dě a lò̤ tǒ̤dǒ gǎlṳmṳ̌htò̌ tôgǎ. Htodě shilô̤̌ lî̤̌bô tôbô dě kòyò kaǎ kû̌ Yupharǎ shilô̤̌.

¹⁵ Běcǎ Cǒmara tûjû̌pwa̤ nṳ̌bè̌ pwa̤khû bǎ Ede we̤kûnu, dě a noǎwè̤ǎ nokè̌ǐ lû̌û.

¹⁶ Dě Běcǎ Cǒmara tûjû̌pwa̤ mǎnǎ ayô̤̌ kû̌, “Sǒsǎ titètè̌ bǎbǎ, dǒ a ô̌ bǎ Edewe̤kû tokhlǒnu na ǎ mî̌ anǐ̤bò pwǎ.

¹⁷ Bǎbǎkǎlè sǒmṳ̌ dǒ ami̤ kû̌ sî̌ganǎ̤ ta̤wô̌ kû̌ ta̤phû̌mò̤̌ nutômṳ̌ asǎnu na bǎǎ yǎ tîkî̌꤮ tô̤̌. Na kè̌ ǎ yǎ numî̌ na si mè̤̌caca bǎ na ǎ a nutôni̤ pě.”

¹⁸ Htodě Běcǎ Cǒmara tûjû̌pwa̤ hî̌ sô̌ ayô̤̌ kû̌, “Pwa̤khû ô̌ tûû̌ tôpwa̤ nô̤̌ dě awô̌bǎ aya tô̤̌. He gǔ bô̌lò̤ a pwa̤ma̤jè̌ akhô dǒ alò̤tôlò̤bǎ dǒ lû̌ya tôpwa̤.”

¹⁹ Htodě Běcǎ Cǒmara tûjû̌pwa̤ phî̌ hǎkumṳ̌ dě a bô̌lò̤ kû̌ lǒ̤bò ta̤mi̤ta̤mò̤̌ ô̌ dǒ hǎkhû̌ nutokhlǒ kû̌ htû̌phû̌yṳ̌phû̌ wi̤ dǒ mǒlǎ̤ nutokhlǒ. Dě pô̤̌khô Cǒmara gǔ kè̌shǐ sî̌ganǎ̤ pwa̤khû nutôpwa̤ gǔ kaǎ bò ta̤mi̤ta̤mò̤̌ nutokhlǒ ami̤ kwè̌ hětènu Cǒmara sûhè bò ta̤mi̤ta̤mò̤̌ nutokhlǒ dǒ a ô̌ dě pwa̤khû nutôpwa̤ kaǎnṳ̌ bǎ asîmi̤ hětènu a htûbò asîmi̤ pô̤̌nu hǒ.

²⁰ Pô̤̌nudě pwa̤khû kaǎnṳ̌ ta̤mi̤ta̤mò̤̌ dǒ kòyò bǔ a hǐphòdǒkû nutokhlǒ kû̌ htû̌phû̌yṳ̌phû̌ wi̤ dǒ mǒlǎ̤ nutokhlǒ kû̌ ta̤mi̤ta̤mò̤̌ ô̌ dǒ mi̤kla nutokhlǒ ami̤. Bǎbǎkǎlè pwa̤ma̤jè̌ bǎ KhûAda amè̤̌kû̌ akhô dǒ alò̤tôlò̤bǎ dǒ ayanu, a ô̌ tô̤̌.

²¹ Htodě Běcǎ Cǒmara tûjû̌pwa̤ no hǎmôô̌ shôpe̤ pwa̤khû dě bǎ a hǎmôô̌ shôpe̤kè akhanu, a běhtò̌ lû̌û wě̤khwǐ tôbǎ dě bǎ a běhtò̌ agûlǎ̤nu a ma̤bǐ getîkhî bǎ lû̌û kû̌ ayî̌.

²² Dě Běcǎ Cǒmara tûjû̌pwa̤ bô̌lò̤ pwa̤mǒ̤ tôpwa̤ kû̌ wě̤khwǐ dǒ a běhtò̌ bǎ pwa̤khûkûnu dě a sûhè pwa̤mǒ̤nu dǒ pwa̤khû a ô̌.

²³ Dě pwa̤khû hî̌shǔ kû̌, “Ǒ khònò̤̌dě hǒo nî̌ akhwǐ mî̌ a phî̌htò̌ dǒ he khwǐ, ayî̌ mî̌ a phî̌htò̌ dǒ he yî̌. kòyò běhtò̌ a dǒ pwa̤khûkû akhû̌akhî, kòyò tôbǎ kaǎ lû̌mi̤ kû̌ ‘pwa̤mǒ̤.’”

²⁴ Dǒ ta̤we̤ta̤kènu akhû̌akhî, pwa̤khû bè̌kè amǒ̤apha dě a cû̌ô̌ kû̌ ama, dě kòyò sò̌ginǐ̤nu a htûhtò̌kè tôpwa̤ nô̤̌.

²⁵ Dě pwa̤khû kû̌ ama sò̌ginǐ̤ nî̌, a ô̌koyo pwǎ bǎbǎkǎlè a shòwò̤̌ lô̌khô tô̤̌.