Mǒhtûlû̌hǎhtûsa 12 - Kawyaw New Testament

Cǒmara tûjû̌pwa̤ kaǎ hǎhtò̌cû̌kè Khûabra dǒ Khanagǎ

¹ Cǒmara tûjû̌pwa̤ hî̌ Khûabra kû̌, “Bè̌kè nashinagǎ, nakhlinalè kû̌ napha ahǐphû̌phòphû̌ tokhlǒ dě hǎhtò̌cû̌ mò̌ dǒ shigǎ dǒ he gǔ dǔlè̌lṳ̌ bǎ na pě nutôgǎ nî̌.

² He gǔ no htûhtò̌ na kû̌ khlilè dû̌ tôcǒ pě dě he ǐshowî̤ na pě, he no lṳ̌shilṳ̌gǎ nami̤ pě dě na htû bǎ ta̤ǐshowî̤ tôcǒ dǒ kòyòya pě.

³ He ǐshowî̤ kòyò dǒ a ǐshowî̤ na nutokhlǒ pě. He ǐsho kòyò dǒ a ǐsho na nutokhlǒ pě. Htodě kòyò ô̌ dǒ hǎkhû̌ nutokhlǒnu lǒ̤bò nî̌, he ǐshowî̤ tṳtṳ̌ asî kû̌ na pě.”

⁴ Dě Khûabra hǎhtò̌cû̌ mè̤̌caca pô̤̌ Cǒmara tûjû̌pwa̤ hî̌ lû̌ûnu, dě aphû̌dû̌ Khûlòtǎ gû̌ cû̌ lû̌û. Bǎ Khûabra ô̌ dǒ Wî̤̌hara dě a hǎhtò̌cû̌ akhanu aně ô̌ susô̌tishi kû̌ yè̤̌ně hǒ.

⁵ Khûabra kaǎnǐ̤ ama Mǒ̤sarè̌, aphû̌dû̌ Khûlòtǎ, htodě a phî̌nṳ̌bò aruyî̌htaglǒ kû̌ ata̤phû̌ta̤wè̤ kû̌ jû̌ dǒ a nǐ̤bǎ bǎ Wî̤̌harakû nutokhlǒ, dě asî hǎhtò̌cû̌ lô̌khô dǒ Khanagǎ, dě a cû̌ tǒ̤ lô̌khô bǎnu.

⁶ Khûabra kû̌ a kòyò tokhlǒ nṳ̌cû̌tûlû̌ Khanagǎ dě a cû̌tǒ̤ lô̌khô dǒ Wî̤̌shake, sǒmṳ̌dû̌ ô̌ bǎ Mûrè̌gǎ nutômṳ̌ a ô̌. Bǎnukha Khana khlilèphû̌ tokhlǒ ô̌ lô̌khô bǎ gǎkûnu.

⁷ Bǎnukha Cǒmara tûjû̌pwa̤ ô̌lṳ̌htò̌ bǎ Khûabra dě a hî̌ lû̌û kû̌, “Gǎ nutôgǎ nî̌, he gǔ ǐ kû̌ naphû̌nali̤ pě,” htodě Khûabra tèhtò̌ bǎ Cǒmara tûjû̌pwa̤ dǒ a ô̌lṳ̌htò̌ bǎ lû̌û nutôpwa̤ aya ta̤lṳhtò̌wǎ̤ kû̌ lǒ̤ tôwǎ̤.

⁸ Htodě a lò̤tòlò̤ dǒ gǎcôcǐ bǎ Wî̤̌betelǎ lṳmṳ̌htò̌ nutôkhô shô̌kla nudě a cû̌ma̤htò̌ lô̌khô ahǐphû̌ bǎ Wî̤̌betelǎ kû̌ Wî̤̌aǐ aplǎkûnu. Wî̤̌betelǎ dě a ô̌ dǒ alṳmṳ̌nṳ̌, Wî̤̌aǐ dě a ô̌ dǒ lṳmṳ̌htò̌ tôkhô. Dě a tèhtò̌ bǎ Cǒmara tûjû̌pwa̤ aya ta̤lṳhtò̌wǎ̤ kû̌ lǒ̤ bǎnu tôwǎ̤ dě a cabahtò̌ ǐ Cǒmara tûjû̌pwa̤ bǎnu.

⁹ Dǒ anô̌nu a khlè̌cû̌ tôkû hto tôkû, dě a cû̌ô̌ tǒ̤dǒ Khanagǎ cǔtûmû tôkhô.

Khûabra cû̌ô̌ dǒ Ijî̌gǎ

¹⁰ Bǎnuakha něgǎko dě gǎwǐ̤gǎko ô̌htò̌ shû̌sho jî̌jî̌ dǒ Khanagǎkû akhû̌akhî, Khûabra khlè̌lò̤ cû̌ô̌ kûmṳ̂̌ bǎ Ijî̌gǎ tòshò̌phû̌.

¹¹ Bǎ asî glè̌ nṳ̌tǒ̤ phǔ dǒ Ijî̌ gǎhtukû akhanu a hî̌ ama Mǒ̤sarè̌ kû̌, “Na mî̌ pwa̤mǒ̤ dǒ a mǒ̤wî̤tè̤̌sǐ tôpwa̤.

¹² Htû̌ Ijî̌phû̌ tokhlǒ kè̌shǐ na akha pěnu, asî gǔ hî̌ lô̌khô kû̌, ‘na mî̌ ama hǒ.’ Dě asî ma̤sikè he pě, dě a dǐ ô̌htûpwa̤ kè na pě.

¹³ Khòsǎdô hî̌ ǐ nanǎ̤ kû̌ na mî̌ hepṳ̌pwa̤mǒ nî̌, na kè̌ hî̌ pô̤̌nu mî̌ asî ma̤mô̤ma̤wô̌shǔ he pě, dǒ nakhû̌nakhî dě asî gǔ dǐ ô̌htûpwa̤ he pěpě.”

¹⁴ Htodě bǎ asî cû̌nṳ̌ dǒ Ijî̌gǎkû akhanu, Ijî̌phû̌ tokhlǒ kè̌shǐ Mǒ̤sarè̌ kû̌ a mǒ̤wî̤tè̤̌sǐ lî.

¹⁵ Dě Ijî̌gǎkhwǐ apwa̤ma̤ta̤phû̌ tokhlǒ kè̌shǐ Mǒ̤sarè̌ dě a hè htû̌sò̌ǐ Mǒ̤sarè̌ awe̤akè kû̌ khwǐ, dě khwǐ sǎyṳ lû̌û kû̌ ama dě a nocû̌ kaǎ lû̌û dǒ ahôkû.

¹⁶ Dǒ Mǒ̤sarè̌ akhû̌akhî, khwǐ kaǎmô̤shǔ wô̌ mî̌ca Khûabra, htokhôtô̤̌ a ǐ dû̌wî̤ lû̌û sû̌phû̌ kû̌ pè̤̌, pṳ̂̌panǎ̤, mǐû̌lǎmǒ̤, mǐû̌lǎpha, jû̌pwa̤khû, jû̌pwa̤mǒ̤ kû̌ tîsî̌budû̌ tokhlǒ.

¹⁷ Dě khwǐ phî̌ Mǒ̤sarè̌ akhû̌akhî, Cǒmara tûjû̌pwa̤ nolò̤ ta̤shasiwě̤ dǒ atirǐsò̌ mî̌ca tokhlǒ dǒ khwǐ kû̌ ashiphû̌gǎphû̌ tokhlǒ alô̤.

¹⁸ Pô̤̌nukhû̌khî khwǐ kaǎ Khûabra dě a hî̌ lû̌û kû̌, “Na cû̌ ma̤tǒ̤ he pô̤̌o mî̌ ma̤titè? A mî̌ hema, na hî̌ he pô̤̌nu tô̤̌ ma̤titè?

¹⁹ Na cû̌hî̌ tǒ̤ he kû̌ ‘a mî̌ hepṳ̌pwa̤mǒ pwǎ,’ dě na cû̌ no phî̌ tǒ̤ he kû̌ a ma̤titè? Hǒo mî̌ nama, kaǎge mò̌ dě hǎhtò̌cû̌kè lô̌khô.”

²⁰ Hǒtôplǎ dě khwǐ hî̌bǎhtò̌ akhôphijǎ tokhlǒ dě asî kaǎ Khûabra kû̌ ama htodě a no tô̤̌nṳ̌bò ata̤dû̌yò̤̌htò̌sa ata̤phû̌ta̤li̤ tokhlǒ dě a sûhǎhtò̌cû̌kè asî.