Matěo 9 - Kawyaw New Testament

Běcǎ Yeshǔ ma̤hǎmǎbǎ kòyòpha sitôkô̌ke tôpwa̤

¹ Běcǎ Yeshǔ nṳ̌ dǒ sǒkhlikû dě cû̌bò̌ shikoǒdû̌ dě a ge dǒ ado Kaperanò̤ dǒ a ô̌ ǐ lû̌û khònò̤̌nu.

² Kòyò tokhlǒ ò̌hènṳ̌ kòyònǎ̤ si tôkô̌ke tôpwa̤ dǒ Běcǎ Yeshǔ a ô̌ dě a hǎmôô̌ pwǎ dǒ lǎ̤dakhû̌. Bǎ Běcǎ Yeshǔ kè̌shǐ asî ta̤yṳ̌ta̤nǎ̤ akhanu, a hî̌ kòyò si tôkô̌ke nutôpwa̤ kû̌, “He phû̌pwa̤khû bè̌shû̌bè̌sho na sǎphlǒ nî̌꤮. He plûkè na ta̤sǔ hǒ.”

³ Bǎnuakha pwa̤sû̌ǐ ta̤sû̌ta̤tòwò asara tokhlǒ gènè̤ lô̌khô dǒ a sǎphlǒkû kû̌, “Kòyò hǒtôpwa̤ hî̌bǎsǔ Cǒmara hǒ.”

⁴ Běcǎ Yeshǔ sî̌ganǎ̤phlǔbò asî ta̤gènè̤ nutokhlǒ dě a hî̌ asî kû̌, “Ma̤titèdě sî cû̌gènè̤ phû̌mò̤̌ tǒ̤ lô̌khô dǒ sî sǎphlǒkû pô̤̌numî̌ ma̤titè?

⁵ ‘He plûkè na ta̤sǔta̤plě hǒ’ mî̌ ayûkhlo ya? Kè̌mè̤̌tô̤̌dě ‘ihtǒ dě cû̌mò̌’ mî̌ ayûkhlo ya?

⁶ Bǎbǎkǎlè Kòyòphû̌khû mî̌ he, pô̤̌khô sî gǔ sî̌ganǎ̤ lô̌khô kû̌ dǒ hǎkhû̌nu, he ô̌ kû̌ ta̤siwi̤sòwò̤ dǒ he plûkèbǎ kòyò ta̤sǔta̤plě tokhlǒnudě, he gǔ dǔlè̌lṳ̌ bǎ sî,” A hî̌ htopô̤̌nudě, a hî̌ kòyò sitôkô̌ke tôpwa̤ kû̌, “Ihtǒ tûlûnṳ̌ na khlô̌lǎ̤da nudě gemò̌ dǒ na hǐnu.”

⁷ Kòyò nutôpwa̤ ihtǒge dǒ ahǐ.

⁸ Cǒmara ǐlò̤ kòyò a ta̤siwi̤sòwò̤ pô̤̌o akhû̌akhî, bǎ kòyò saprṳ̂ kè̌shǐ ta̤ma̤anǎ̤ pô̤̌nu akha, asî ǐsha bè̌dubè̌nǎ̤ lô̌khô Cǒmara dě htû̌sò̌htò̌ lô̌khô Cǒmara.

Běcǎ Yeshǔ kaǎ Khûmǎtè̌

⁹ Bǎ Běcǎ Yeshǔ hǎhtò̌cû̌kè bǎnuakha, a kè̌shǐ kòyò tôpwa̤ ami̤ kû̌ Khûmatè̌ hǎnòò̌ ma̤ ta̤ma̤ dǒ lǎ̤kwita̤kûta̤mṳ̂̌ khwǐhǐkû. Běcǎ Yeshǔ hî̌ lû̌û kû̌, “Cû̌꤮ gû̌kû̌ hekò dě htû he khôphijǎ.” Dě Khûmatè̌ ihtǒcû̌ dě gû̌kû̌ akò.

¹⁰ Bǎ Běcǎ Yeshǔ ǎdî lṳmṳ̌hǎ dǒ Khûmǎtè̌ hǐ akhanu, pwa̤kwi ta̤kûta̤mṳ̂̌ tokhlǒ kû̌ pwa̤ma̤sǔphû̌ tokhlǒ hè ǎcuôcubò kû̌ Yeshǔ kû̌ akhôphijǎ tokhlǒ.

¹¹ Bǎ Pharishè̌phû̌ tokhlǒ kè̌shǐ pô̤̌o akha, a gwè̌ akhôphijǎ tokhlǒ kû̌, “Sî sara dě a cû̌ ǎcuôcu tǒ̤ kû̌ pwa̤kwi ta̤kûta̤mṳ̂̌ kû̌ pwa̤ma̤sǔphû̌ nutokhlǒ ma̤titè?”

¹² Běcǎ Yeshǔ ganǎ̤de dě kû̌ a hî̌shěshu asî kû̌, “Kòyò dǒ a ô̌shû̌ô̌mô̤ tokhlǒnu, a lǎ̤lṳ̂ bǎ ta̤khû̌saradû̌ tô̤̌. Kòyò dǒ ashǐasha tokhlǒnu mî̌ a lǎ̤lṳ̂bǎ nò ta̤khû̌saradû̌ pwǎ.

¹³ Bǎbǎkǎlè kè̌lǎ sî̌ya lô̌khô Cǒmara sǎyṳ hî̌ yô̤̌mûyô̤̌sǎ tokhlǒ dǒ a hî̌ kû̌, ‘he sǎyṳ bǎ ta̤lṳta̤tòhtò̌ tô̤̌, he sǎyṳ pwǎ ta̤sǎyṳgwèbǎǐ lû̌û tôpwa̤ kû̌ tôpwa̤ pwǎ.’ Ma̤titèhî̌dě, he hè kaǎge kòyò dǒ acǒatè̤ nutokhlǒ mè̤̌tô̤̌. He hè kaǎgepwǎ kòyò dǒ a ta̤sǔta̤plě ô̌ nutokhlǒ pwǎ.”

Ta̤gwè̌ dǔǎshǎ awe̤akè

¹⁴ Htodě jushi Khûyṳ̂ha akhôphijǎ tokhlǒ hè dǒ Běcǎ Yeshǔ ô̌ dě a hè gwè̌ lû̌û kû̌, “Pa kû̌ Pharishè̌phû̌ tokhlǒnu, pa dǔǎshǎ, bǎbǎkǎlè nakhôphijǎ tokhlǒ dě a dǔǎ gû̌ kòyò shǎ tô̤̌ ma̤titè?”

¹⁵ Běcǎ Yeshǔ hî̌shěshu asî kû̌ yô̤̌sǎkhěkhô̌ tômû dě a hî̌ kû̌, “Bǎ khòmò̤̌phû̌khû ô̌cu pe kû̌ akhô shǐpwǎ̤shǐmè̤ akhanu, akhô shǐtèmè̤ tokhlǒ cû̌sǎplǎ̤ jò hî̌tè? Bǎbǎkǎlè htû̌ shěkhǎ hètǒ̤ dǒ kòyò kaǎcû̌ tephekè khòmò̤̌phû̌khû pě akhanu, asî glè̌ dǔǎdǔô lô̌khô pě.

¹⁶ “Kòyò shò̌phǎdǎ gò̌pwǐyò̤̌ kû̌ gò̌pwǐsa dǒ a sutǔ nò̌khôtô̤̌ nu a ô̌ tôpwǎ̤ tô̤̌, ma̤titèhî̌dě kè̌ shò̌phǎdǎ pô̤̌numî̌ gò̌pwǐsa nî̌ a gǔ htò̌sutǔkè dě a lě̤ cî̌sutǔ hǎyè̌ lè̤̌kè pô̤̌ gò̌pwǐyò̤̌nu pě.

¹⁷ Kòyò tènṳ̌ sîpî̌ shisî̌yô̤̌sa dǒ shiôkobě ali̤kûnu a ô̌ tôpwǎ̤ tô̤̌. Kòyò kè̌ tènṳ̌ pô̤̌nu hî̌dě, shiko gǔ pǒ̤phò̌ dě sîpî̌ shisî̌yô̤̌ gǔ lò̤gǔbò pě. Htokhôtô̤̌ shiôkobě gǔ pî̌kè bò pě. Pô̤̌nudě kòyò tènṳ̌ pwǎ sîpî̌ shisî̌yô̤̌ asanu dǒ shiôkobě asakû pwǎ. Kè̌ ma̤pô̤̌nu hî̌dě sîpî̌ shisî̌yô̤̌ bǎbǎ, shiôkobě bǎbǎ, a pî̌ pe tô̤̌.”

Phǐjǎpwa̤mǒ̤phû̌ dǒ a si tôpwa̤ kû̌ pwa̤mǒ̤ dǒ a hètô̌bǎ Běcǎ Yeshǔ ajejû tôpwa̤

¹⁸ Bǎ a hî̌bǎ kòyò pô̤̌o akhanu, ta̤cabahǐ ikǒlǒkòdû̌ tôpwa̤ hè dô̌gînî̤lò̤ dǒ alô̤mô̤̌ dě a hî̌ lû̌û kû̌, “He phû̌pwa̤mǒ̤ simô̤̌pepwǎ, bǎbǎkǎlè ge kû̌ he dě gebè̌htò̌ na cǔde dǒ alô̤ mî̌ a htûpwa̤ pwǎkǎ pě.”

¹⁹ Běcǎ Yeshǔ ihtǒ gû̌ ge kû̌ yǎ. Dě akhôphijǎ gû̌ ge kû̌ lû̌û.

²⁰ Bǎ asî ge dǒ klè̌lô̤ akhanu, pwa̤mǒ̤ dǒ a khòbǎ ta̤shasǐlò̤ dǒ ayî̤ shǐginǐ̤něnu a ô̌ tôpwa̤, dě a gû̌ ge kû̌ Běcǎ khû̌dò̌kò dě a hè tô̌bǎ Yeshǔ jejûgòpwè̤.

²¹ “He kè̌ tô̌bǎ pwǎ ajejû nupwǎ mî̌ he ta̤shasǐlò̤ bǎ hǎmǎlò̤tṳ̌ pě,” A hî̌ hǔ tûû̌ anǎ̤ dě a hè dǒ Yeshǔ khû̌dò̌kò dě a hè tû̌ lû̌û jejûgòpwè̤.

²² Běcǎ Yeshǔ ti̤wǐ̤ kè̌tîkhî dě kè̌shǐ lû̌û akha a hî̌ lû̌û kû̌, “Phû̌pwa̤mǒ̤, bè̌shû̌bè̌sho na sǎphlǒ nî̌, na ta̤yṳ̌ta̤nǎ̤ nî̌ a ma̤hǎmǎkè na ta̤shahǒ.” Dě pwa̤mǒ̤ nutôpwa̤ a ta̤shanu, a hǎmǎ sělěkè tôplǎnô̤̌.

²³ Bǎ Běcǎ hènṳ̌ dǒ Yǔdaphû̌ ikǒdû̌ nutôpwa̤ ahǐkû akhanu, a kè̌shǐ pwa̤ǔtî̌lû̌ tokhlǒ kû̌ kòyò hǎwô pwe̤nǎ̤sǎgô̌ tôprṳ̂tôphǎ dě a hî̌ asî kû̌,

²⁴ “Cû̌tephebò lô̌khô. Phijǎpwa̤mǒ̤phû̌ nutôpwa̤ nî̌ a si bǎtô̤̌, a hǎmôô̌ shôpě̤ pwǎ.” A hî̌ dě kòyò sǎyǎ̤ bò lû̌û.

²⁵ Bǎ kò nohǎhtò̌bò hto kòyò saprṳ̂ nutokhlǒ dǒ akhlo akhanu, Yeshǔ nṳ̌ dǒ hǐdǒkû bǎ phijǎpwa̤mǒ̤phû̌ nutôpwa̤ lǎ̤môô̌ gûlǎ̤nu dě a pṳ̂̌mě lû̌û cǔde akha phijǎpwa̤mǒ̤phû̌ nutôpwa̤ ihtǒtîkhîsô̌.

²⁶ Ta̤we̤ta̤kè hǒonu a mi̤lṳ̌hǔsǎ cû̌bò pṳ̂̌shipṳ̂̌gǎ.

Běcǎ ma̤lî getîkhî kòyò mǐ̤sǎkhǐ sò̌ginǐ̤ htodě a ma̤wô̌ getîkhî kòyòpè̌ tôpwa̤

²⁷ Bǎ Běcǎ Yeshǔ hǎhtò̌cû̌kè bǎnu tûkû akha, kòyò mǐ̤sǎkhǐ sò̌ginǐ̤ gû̌ kaǎgǔ kû̌ akò kû̌, “Ǒ Phadawi̤ aphû̌khû, gwèbǎǐ pa dě ma̤jè̌ mò̌ pa nî̌꤮.”

²⁸ Bǎ Běcǎ Yeshǔ cû̌nṳ̌ dǒ hǐ tômèkû akhanu, kòyò nusò̌ginǐ̤ gû̌ genṳ̌ kû̌ yǎ dě Běcǎ Yeshǔ gwè̌ asî kû̌, “He ma̤lî jò sî mǐ̤sǎnu sî yṳ̌ ya?” Asî hî̌shěshu kû̌, “O, pa yṳ̌nǐ̤nǎ̤nǐ̤, Běcǎ.”

²⁹ Dě Běcǎ tè̌bǎ asî mǐ̤sǎphlǒ dě a hî̌ kû̌, “Dǒ sî ta̤yṳ̌ akhû̌akhî, he ma̤hǎmǎbǎ sî.”

³⁰ Dě asî mǐ̤sǎphlǒ lî bò tîkhî sô̌. Běcǎ Yeshǔ mǎtě̤mè̤̌ asî kû̌, “Shôbǐǐlṳ̌ bǎ tǎ̤ kòyò tôpwǎ̤꤮ tǎ̤mǎ̤ nî̌꤮.”

³¹ Bǎbǎkǎlè asî hǎhtò̌cû̌ dě cû̌ô̌lè shôbǐǐ peshebò ta̤we̤ta̤kè bǎnu tôgǎ akû dǒ gûlǎ̤ pṳ̂̌꤮ tûkûnu.

³² Bǎ kòyò mǐ̤sǎkhǐ nusò̌ginǐ̤ hǎhtò̌cû̌ htonu, kòyò kaǎhènǐ̤ kòyòpwa̤khû dǒ khînǎ dò̌ lû̌û dě a pè̌ tôpwa̤ dǒ Běcǎ Yeshǔ a ô̌.

³³ Bǎ Běcǎ Yeshǔ wṳ̂̌hǎhtò̌kè hto khînǎ akhanu, kòyòpè̌ nutôpwa̤ hî̌bǎ jò getîkhî sô̌. Dě kòyò saprṳ̂ tokhlǒ ǒò̌ kiti̤kaa bò. “Kòyò ma̤jò ta̤ pô̤̌o dǒ Isôrělaphû̌ aklanu kè̌shǐ nô̌ tôkhò̌꤮ tô̤̌,” A hî̌ lô̌khô pô̤̌nu.

³⁴ Bǎbǎkǎlè, Pharishè̌phû̌ tokhlǒ hî̌ kû̌, “A wṳ̂̌hǎhtò̌bò̌ khînǎkhîno nutokhlǒ mî̌ khînǎkhîno a ikǒlǒkòdû̌ nutokhlǒ ǐ yǎ ta̤siwi̤sowò̤ akhû̌khî pwǎ.”

Yeshǔ gwèbǎǐ kòyò saprṳ̂

³⁵ Běcǎ Yeshǔ cû̌bò wî̤̌ pṳ̂̌꤮ tôwî̤̌ do pṳ̂̌todo dě cû̌ sû̌ǐtòwòǐ bǎ kòyò dǒ Yǔdaphû̌ ta̤cabahǐ tokhlǒ akû, dě cû̌nṳ̌ shôbǐǐ bǎ kòyò kû̌ Cǒmara ashiagǎ a ta̤sǎlě̤we̤kè, dě ma̤hǎmǎbǎ bò kòyò ta̤shǐta̤sha pṳ̂̌tocǒ.

³⁶ Bǎ a kè̌shǐ kòyò saprṳ̂ dǒ a bǎpò̤̌bǎsha dě a lǎ̤nǎla̤ǐ kòyò ô̌ tôpwǎ̤ tô̤̌ dě asô̌sô̌kû̌ sû̌phû̌ tôprṳ̂ dǒ kòyò pwa̤kè̌ǐ asî ô̌tô̤̌ nutokhlǒ akhanu, a gwèbǎǐ gutṳ̌glǎ asî.

³⁷ Bǎnuakha, a hî̌ akhôphijǎ tokhlǒ kû̌, “Lǎ̤kǎbǔ agûlǎ̤ ô̌dû̌wî̤, bǎbǎkǎlè pwa̤kǎbǔ ô̌tîkî̌꤮ phû̌nô̤̌.

³⁸ Dě kwicaba lô̌khô lè̤̌běcǎ kû̌ a gǔ nohè pwa̤kǎbǔ tokhlǒ bǒonu nî̌.”