Matěo 3 - Kawyaw New Testament

Jushi Khûyṳ̂ha a ta̤shôbǐǐlṳ̌htò̌

¹ Něyî̤layî̤ hè akhanu, kòyò ô̌ tôpwa̤, a cû̌lè shôbǐǐlṳ̌ ta̤ dǒ Yǔdagǎ gǎshashigǎ lǒ̤seměkhû̌, dě kòyò kaǎ lû̌û kû̌ pwa̤jushi Khûyṳ̂ha.

² Dě a hî̌ kû̌, “Yò̤lǎ̤plǎdî̌ lô̌khô sîsǎphlǒ, ma̤titè̌hî̌dě mǒkhû̌ ashiagǎ phǔhtò̌hǒ.”

³ A mî̌ kòyò dǒ piwi̤pèshè Khûyashǎya hî̌nǎ nutôpwa̤ awe̤akè kû̌, “Kòyò tôpwa̤ yî̤̌kǒhtò̌ dǒ gǎshashigǎ lǒ̤seměkhû̌ dě a hî̌ kû̌, ‘tîwî̌tòwò nǎ lô̌khô klè̌ dǒ Běcǎ aya. Ma̤cǒma̤nò̤ lô̌khô Běcǎ lǎ̤hèklè̌ aya tôbô nî̌꤮.’”

⁴ Khûyṳ̂ha kûsô̌htò̌nṳ̌ jejû dǒ kòyò bǒ kû̌ tîsî̌budû̌ ashû̌, dě a è̌mě sèwò̤̌ sǎto̤phě. Dě a ǎpwǎ dèpǒ̤ kû̌ wè̌khû̌shi.

⁵ Kòyò ô̌ bǎ Wî̤̌yarǔshôle akû kû̌ Yǔda gǎ kû̌ lǒ̤꤮ bò kòyò dǒ a ô̌ te̤we̤bò dû̌wî̤ Jòda shilô̤̌mǒ̤ nutokhlǒ hè lô̌khô dǒ Khûyṳ̂ha a ô̌.

⁶ Asî hè olò̤wǎ̤lò̤ lô̌khô ata̤sǔ tokhlǒ dě Khûyṳ̂ha ju bǎ asî shi dǒ Jòda shilô̤̌mǒ̤kû.

⁷ Bǎbǎkǎlè bǎ Khûyṳ̂ha kè̌shǐ Pharishè̌phû̌ kû̌ Sadukè̌phû̌ tokhlǒ hèprṳ̂ hèphǎ dǒ a gǔ hèju anǎ̤ kû̌ shi akhanu, a hî̌ asî kû̌, “Wṳ̂̌sasî꤮! mò̌pè tôpwa̤ dǐsè̌rè̌ sî kû̌ sî gǔ hǎplǎbò̌ kû̌ Cǒmara a ta̤cî̌htò̌ dǒ a hèlò̤pě nuya?

⁸ Sî kè̌ yò̤lǎ̤plǎdî̌ mè̤̌mî̌ca sî nǎ̤ kè̌hî̌dě dǔlè̌lṳ̌ lô̌khô sî ta̤ô̌htûpwa̤ tokhlǒ kû̌ sî ta̤bè̌ sî sǎphlǒsǔshi sîtokhlǒ.

⁹ Hî̌htôhî̌lò̤ tǎ̤ sînǎ̤ kû̌, ‘Pa mî̌ PhaAbraha akhlialè’ nutǎ̤mǎ̤. He hî̌ sî, Cǒmara ma̤htûhtò̌ jò lǒ̤ tokhlǒ kû̌ PhaAbraha aphû̌ mî̌ a ma̤jò pwǎ.

¹⁰ Kû tôbǎ ô̌ dǒ sǒ kòshî̌ dě kòyò gǔ gû̌gǎ lò̤khǔpo̤ sǒmṳ̌ tokhlǒ pě, dě kòyò gǔ cô̌tṳ̌yǎ tǒ̤dǒ akhò̌wǐ̤ pě. Sǒmṳ̌ tômṳ̌mṳ̌ dǒ asǎaphô wî̤ǎ tô̤̌nu, kòyò gû̌gǎ lò̤khǔpo̤ a pě dě kòyò wînṳ̌kè a dǒ mî̌kû pě.

¹¹ “Dǒ sî yò̤lǎ̤plǎdî̌ sîsǎphlǒ akhû̌akhî, he ju sî kû̌ shi. Bǎbǎkǎlè kòyò dǒ a ta̤pô̤ta̤phǎ shû̌sho khlo kû̌ he tôpwa̤nu a hè pě. A ju sî kû̌ Yôla Plò̌shǐ Běcǎ kû̌ mî̌ pě. He jocû̌ bǎ pwǎ a khò̌phě pwǎnu, he gwǎkû̌ a tô̤̌.

¹² A pṳ̂̌mě dògo dǒ a cǔdekû, dě a tîwî̌tòwò nǎhto dǒ a khǎbò bǔshò̌ pě. A khǎbò hto pě dě a gǎplǒ bǔshò̌ dǒ phòkû pě. Dě bǔsû̌ tokhlǒnu a shû̌ukè kû̌ mî̌ dǒ a pǐ̤jò tôkhò̌꤮ tô̤̌ nutôphǎ akû pě.”

Yeshǔ ju anǎ̤ kû̌ shi

¹³ Htodě pô̤̌khô Yeshǔ ju anǎ̤ kû̌ shi dǒ Khûyṳ̂ha a cǔdekû ayanu, a ô̌ dǒ Galilè̤̌gǎ dě a hè dǒ Jòda shilô̤̌mǒ̤ a ô̌.

¹⁴ Bǎbǎkǎlè Khûyṳ̂ha sǎyṳ ju bǎ lû̌û tô̤̌. Dě a hî̌ lû̌û kû̌, “He tô ju tèpè̤̌꤮ henǎ̤ dǒ na ô̌ hò̌꤮ dě na cû̌hè ju nanǎ̤ dǒ heô̌ hî̌tè?”

¹⁵ Yeshǔ hî̌shěshu lû̌û kû̌, “Khònò̤̌ dě tûlû̌ ju bǎ mò̌ he, ma̤titè̌hî̌dě pa tôbǎ ma̤lǒbe lǒ̤꤮ bò Cǒmara a ta̤sǎyṳ noma̤ pa nutokhlǒ,” A hî̌ dě Khûyṳ̂ha sǎphlǒô̌ ju bǎ lû̌û.

¹⁶ Bǎ Yeshǔ juhto anǎ̤ kû̌ shi dě a ihtǒ dǒ shikla kû̌ Cǒmara bǔmô mǒkhû̌ takha. Dě a kè̌shǐ Cǒmara a Yôla Plò̌shǐ hèlò̤ ô̌ dǒ alô̤ sô̌sô̌kû̌ htû̌lǐ̤nu.

¹⁷ Htodě alě̤pwe̤htò̌ dǒ mǒkhû̌ tômû dě a hî̌ kû̌, “Hǒtôpwa̤ mî̌ hephû̌pwa̤khû dǒ he mô̤ǐyǎ dě a ma̤mô̤ he sǎphlǒ tôpwa̤.”