Matěo 21 - Kawyaw New Testament

Běcǎ Yeshǔ mî̌ Me̤shǐya hènṳ̌ dǒ Wî̤̌yarǔshôle

¹ Bǎ Běcǎ Yeshǔ kû̌ akhôphijǎ tokhlǒ hètǒ̤phǔ kû̌ Wî̤̌yarǔshôle akhanu, a hètǒ̤ lô̌khô dǒ Dobetaphake dǒ a ô̌ bǎ Òlǐba khôlôkhû̌nu. Yeshǔ nohè wǐ akhôphijǎ sò̌ginǐ̤ dě a hî̌ asî kû̌,

² “Hènṳ̌ wǐ lô̌khô do dǒ alô̤mô̤̌nu tôdo, sî hè nṳ̌nṳ̌ kû̌ sî gǔ kè̌shǐ kòyò comě mǐû̌lǎmǒ̤ tôdo kû̌ aphû̌phapî̌tî̌ ô̌sûkhû̌ padô̌ lû̌û bǎnu tôdo pě. Bôphlǔ a dě cî̌gebò dǒ heô̌ bǒo.

³ Kòyò tôpwa̤pwa̤ kè̌ hî̌ sî tôcǒcǒ hî̌dě, shôbǐǐlṳ̌ bǎ lû̌û kû̌ Běcǎ lǎ̤lṳ̂ asî hî̌pô̤̌nu, sî kè̌ hî̌ pô̤̌numî̌ a plûge tûû̌ sî tôplǎ nô̤̌pě.”

⁴ Ta̤hǒonu a gǔ ma̤lǒhtò̌behtò̌ piwi̤pèshè a ta̤hî̌nǎ kû̌,

⁵ “Shôbǐǐlṳ̌ bǎ Wî̤̌shǐûphû̌ tokhlǒ kû̌, ‘kè̌mò̌ lô̌khô, sî khwǐcôphǎ hè dǒ sî ô̌ hǒ. A mî̌ a sǎdôhôbǐ dě a dò̌ hèǐ mǐû̌lǎ. Dě a dò̌ hèǐ aphû̌pî̌tî̌ tôdo.’”

⁶ A khôphijǎ nusò̌ginǐ̤ cû̌ma̤ pô̤̌ a hî̌ asî nu.

⁷ Asî cî̌genǐ̤ mǐû̌lǎmǒ̤ kû̌ aphû̌ dě asî dahtò̌ lô̌khô ajekhlo dǒ mǐû̌lǎ tokhlǒ awǎ̤tě̤khû̌ dě Běcǎ htò̌hǎnòò̌ bǎnu.

⁸ Kòyò saprṳ̂dû̌ tokhlǒ dalò̤ lô̌khô ajekhlo tokhlǒ dǒ klè̌dakû. Tokhlǒkhlǒdě a pě̤gǎ lô̌khô sǒphòphû̌ tokhlǒ dě dalò̤ dǒ klè̌dakû.

⁹ Kòyò cû̌ wǐ dǒ Běcǎ alô̤mô̤̌ tôprṳ̂tôphǎ, a gû̌kû̌ dǒ nô̌kò tôprṳ̂tôphǎ dě a kaǎgǔ lô̌khô kû̌, “Hûsè̌na, htû̌sò̌htò̌ lô̌khô Khwǐdawi̤ aphû̌khû.” “Běcǎ dǒ a hè kû̌ Cǒmara ami̤ tôpwa̤nu, ta̤ǐshowî̤ gǔ lò̤bǎ pû a nî̌꤮” “Hûsè̌na, htû̌sò̌htò̌ lô̌khô Cǒmara dǒ a ô̌ dǒ mǒkhû̌ a gûlǎ̤htò̌yô̤̌lǒ nutôpwa̤.”

¹⁰ Bǎ Běcǎ Yeshǔ nṳ̌ dǒ Wî̤̌yarǔshôle akhanu, Wî̤̌yarǔshôlephû̌ tôwî̤̌lǎ̤bò sǎphlǒ tîrî̌sò̌ bò dě asî gwè̌ kû̌, “A mî̌ mò̌pè?”

¹¹ Kòyò saprṳ̂dû̌ hî̌shěshu kû̌, “A mî̌ Yeshǔ. A mî̌ piwi̤pèshè dǒ a ô̌ dǒ Galilè̤̌gǎ, Na̤sôrè̤̌ wî̤̌nu tôpwa̤.”

Běcǎ Yeshǔ hènṳ̌ dǒ ta̤lṳhtò̌hô

¹² Běcǎ Yeshǔ cû̌nṳ̌ dǒ ta̤lṳhtò̌hôkû dě a cû̌nṳ̌ wṳ̂̌hǎhtò̌kè bò kòyò shaǎtě̤ta̤ bǎnu tokhlǒ dě a nṳ̌shò̌ lò̤tě̤glǒkè bò kòyò lǎ̤htû̌lè̌ ru A ala̤wǎ̤ nutokhlǒ kû̌ gògǒ dǒ kòyò lǎ̤hǎnòò̌ shaǎ kû̌ htû̌lǐ̤ Nutokhlǒ.

¹³ Htodě a hî̌ kû̌, “Lî̤plò̌shǐkû hî̌ kû̌, ‘he hǐ mî̌ kòyò gǔ kaǎ kû̌ ta̤caba ahǐ,’ Bǎbǎkǎlè sî cû̌ no htûhtò̌ bòkè hepha ahǐ kû̌ ‘pwa̤ǎhǔ lǎ̤ô̌û̌hǐ agûlǎ̤ hǒ.’”

¹⁴ Kòyò mǐ̤sǎkhǐ khò̌lôpô̤̌dě tokhlǒ hènṳ̌tô bò kû̌ Běcǎ Yeshǔ dǒ ta̤lṳhtò̌hôkû, dě a ma̤hǎmǎbǎ bò asî.

¹⁵ Bǎbǎkǎlè bǎ pwa̤shû̌gǎ ikǒlǒkò dû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ kè̌shǐ Běcǎ Yeshǔ ma̤ ta̤cô̌klǐcô̌sè tokhlǒ htodě a kè̌shǐ kû̌ phijǎphû̌ tokhlǒ yî̤̌kǒhtò̌ lô̌khô kû̌, “Hûsè̌na, htû̌sò̌htò̌ Khwǐdawi̤ aphû̌khû,” Dǒ ta̤lṳhtò̌ hôkû akhanu, asî sǎphlǒdû̌ jî̌꤮ lî.

¹⁶ Asî gwè̌ Běcǎ kû̌, “Phijǎphû̌ sîtokhlǒ kaǎgǔ numî̌ na ganǎ̤de ya?” Dě Běcǎ hî̌shěshu asî kû̌, “O, he ganǎ̤de kǎ꤮, lî̤plò̌shǐ hî̌ kû̌, ‘phijǎphû̌ sîtokhlǒ kû̌ phijǎphû̌ dǒ a ô nû̌ pe tokhlǒnu, na gǔ no htû̌sû̌htò̌ asî pě,’ a hî̌ pô̤̌nu mî̌ sî dô̌nô̌ gû̌ kòyò tô̤̌ ya?”

¹⁷ Htodě Běcǎ Yeshǔ hǎhtò̌cû̌kè dǒ do Betanǐ dě a cû̌ hǎmôô̌ bǎnu.

Běcǎ Yeshǔ nokhwe sikè dǐshimṳ̌ tômṳ̌

¹⁸ Nô̌kòtôwô̤ bǎ lṳmṳ̌lî wî̤sò akhanu, Běcǎ kû̌ akhôphijǎ tokhlǒ getîkhî sô̌ dǒ Wî̤̌yarǔshôle, dě bǎ asî ge dǒ klè̌lô̤ akha, Yeshǔ sǎǎ sǎô.

¹⁹ Dě Yeshǔ kè̌shǐ dǐshimṳ̌ tôsǒ ô̌ dǒ klè̌htu dě a cû̌ tô bǎnu bǎbǎkǎlè a kè̌shǐ asǎ ô̌ tôphlǒ꤮ tô̤̌. A ô̌ còcè̌ alǎ pwǎ. Hǒtaplǎdě a hî̌ dǐshimṳ̌ hǒtôsǒ kû̌, “Sǎ pe tǎ̤ tôkhò̌꤮ tǎ̤mǎ̤ nî̌꤮” A hî̌ dě dǐshimṳ̌ khwesikè tôplǎnô̤̌.

²⁰ Bǎ akhôphijǎ tokhlǒ kè̌shǐ ta̤htûhtò̌ pô̤̌o akha, a ǒò̌ kiti̤kaa bò dě asî gwè̌ Běcǎ kû̌, “Dǐshimṳ̌ hǒtôsǒ a cû̌sikè jò tǒ̤ tôplǎnô̤̌ hî̌tè ya?”

²¹ Běcǎ hî̌shěshu asî kû̌, “He hî̌cǒcǒ sî, na yṳ̌ǎ dě na kè̌ sǎphlǒwò̌wè̌ tô̤̌ numî̌ pô̤̌ he hî̌ dǐshimṳ̌ dě a khwesikènu, sî mî̌ sî ma̤ jò pô̤̌nu pwǎ. Sî gǔ ma̤jò khlo pe kû̌ hǒo nupě. Sî kè̌ hî̌ khôlô hǒtômè kû̌, ‘shǒ cû̌ tephekè dǒ shidû̌shite̤we̤ akûnu,’ mî̌ a gǔ htûhtò̌ bǎ sî pô̤̌ sî hî̌ nupě.

²² Sî kè̌ yṳ̌ǎnu, sî kwita̤ dǒ pha Cǒmara a ô̌ titètè̌꤮ bǎbǎ sî nǐ̤bǎ pě.”

Kòyò htû ikǒlǒkòdû̌ tokhlǒ gwè̌ Běcǎ Yeshǔ a ta̤siwi̤sòwò̤

²³ Běcǎ Yeshǔ nṳ̌ dǒ ta̤lṳhtò̌hô we̤kû dě bǎ a sû̌ǐtòwòǐlò̤ kòyò akhanu, pwa̤shû̌gǎ ikǒlǒkòdû̌ tokhlǒ kû̌ Yǔdaphû̌ ta̤cubucaba ikǒlǒkòdû̌ tokhlǒ hè dǒ Běcǎ a ô̌ dě a gwè̌ lû̌û kû̌, “Na cû̌ma̤tǒ̤ ta̤pô̤̌o tokhlǒ numî̌ na cû̌ma̤ kû̌ mò̌pè a ta̤siwi̤sòwò̤ ya? Mò̌pè noma̤ na ya?”

²⁴ Běcǎ hî̌shěshu asî kû̌, “He gwè̌ sî yô̤̌sǎ tômû, sî kè̌ hî̌shěshu bǎ he hî̌dě he ma̤ ta̤hǒotokhlǒ kû̌ mò̌pè a ta̤siwi̤sòwò̤ pěnu he shôbǐǐlṳ̌ sî pě.

²⁵ Pwa̤jushi Khûyṳ̂ha ju bǎ kòyò shi numî̌ Cǒmara ǐ yǎ ta̤siwi̤sòwò̤ ya? Tô̤̌mî̌ kòyòhǎkhû̌phû̌ ǐ yǎ ya?” Dě asî hî̌ lû̌û kû̌, “Pa kè̌ hî̌ kû̌, ‘Cǒmara ǐ yǎ’ kè̌hî̌dě, a glè̌ gwè̌ pa kû̌, ‘kè̌hî̌pô̤̌nudě sî yṳ̌ǎ yǎ tô̤̌ ma̤titè?’ A glè̌ hî̌ pô̤̌nu pě.

²⁶ Bǎbǎkǎlè pa kè̌ hî̌ kû̌, ‘kòyòhǎkhû̌phû̌ ǐ yǎ’ kè̌hî̌dě, pa ǐsha kòyò saprṳ̂ tokhlǒ alǎ̤lǎ̤, ma̤titè̌hî̌dě kòyò hǒtokhlǒ yṳ̌ǎ lô̌khô kû̌ Khûyṳ̂ha mî̌ Cǒmara apiwi̤pèshè mè̤̌mî̌ca tôpwa̤, pô̤̌nu.”

²⁷ Pô̤̌nu akhû̌akhî asî hî̌shěshu Yeshǔ kû̌, “Pa sî̌ganǎ̤tô̤̌.” Dě Yeshǔ hî̌shěshu asî kû̌, “Kè̌hî̌pô̤̌nudě he ma̤ta̤ tokhlǒ kû̌ mò̌pè a ta̤siwi̤sòwò̤ yanu he shôbǐǐlṳ̌ nô̌ sî tô̤̌.”

Ta̤dô̌nè khěkhô̌ dǒ phû̌pwa̤khû sò̌ginǐ̤ awe̤akè

²⁸ “Shôbǐǐ kè̌kè̌mò̌ he kû̌ sî gènè̤ hî̌tè? Kòyò tôpwa̤ dě a phû̌pwa̤khû ô̌ sò̌ginǐ̤. Dě a cû̌ hî̌ awè̤̌ tôpwa̤ kû̌, ‘khò̌tini̤ hè wè̤ ta̤ dǒ sîpî̌mṳ̌ phǎkla nu nî̌꤮.’

²⁹ “Dě a hî̌shěshu apha kû̌, ‘he hè tô̤̌,’ a hî̌ bǎbǎkǎlè dǒ nô̌kònu a sǎphlǒ htû̌lè̌ tèplè̌ sô̌ dě a hè sô̌.

³⁰ “Htodě phanu tôpwa̤ nî̌ a cû̌sô̌ dǒ apṳ̌ tôpwa̤ a ô̌ dě a hî̌ sô̌sô̌ lû̌ pô̤̌ a hî̌ a phû̌wè̤̌pwǎ̤ nutôpwa̤. Dě a hî̌shěshu apha kû̌, ‘o pha, he hètû̌ pě,’ bǎbǎkǎlè a hè bǎ tô̤̌.

³¹ “Phû̌pwa̤khû hǒo sò̌ginǐ̤nu, bǎtè tôpwa̤ ma̤tô apha sǎphlǒ ya?” Dě asî hî̌shěshu lû̌û kû̌, “Adû̌ tôpwa̤.” Dě Běcǎ hî̌ asî kû̌, “He hî̌cǒcǒ sî, sî lǎ̤nṳ̌ô̌ agûlǎ̤ dǒ mǒkhû̌ shilǎ̤gǎkû nu, pwa̤kwita̤kûta̤mṳ̂̌ kû̌ pwa̤mǒ̤pǔlǔpǐli tokhlǒ cû̌nṳ̌wǐkè sî hǒ.

³² Ma̤titèhî̌dě Khûyṳ̂ha hè dǔlè̌lṳ̌ sî kû̌ ta̤tě̤ta̤mè̤̌ aklè̌ bǎbǎkǎlè sî yṳ̌ǎ yǎ tô̤̌. Bǎbǎkǎlè pwa̤kwita̤kûta̤mṳ̂̌ kû̌ pwa̤mǒ̤pǔlǔpǐli tokhlǒ yṳ̌ǎ yǎ. Sî kè̌shǐ kòyò tokhlǒ asǎphlǒ htû̌lè̌ ge bǎbǎkǎlè sî sǎphlǒ htû̌tèlè̌kè gû̌ kòyò tô̤̌ htokhôtô̤̌ sî yṳ̌nǐ̤nǎ̤nǐ̤ gû̌ kòyò tîkî̌ tô̤̌.

Ta̤dô̌nè khěkhô̌ dǒ pwa̤ma̤ǎ sîpî̌phǎ dǒ ajî̌ tokhlǒ

³³ “Ganǎ̤de pô̤̌ lô̌khô yô̤̌sǎkhěkhô̌ dǒ ashǔshawa̤ nutôshǒ. Bǎtaplǎnu hǔkla běcǎ dǒ a shǒǐ a sîpî̌mṳ̌ tokhlǒ ô̌tôpwa̤. A te̤we̤bǐ bò a awe̤nu, dě a pho ǐ ahǎkû tûkû dǒ a gǔ wǐ̤htò̌ kû̌ sîpî̌shi aya, htodě a bô̌htò̌ǐ hǐphû̌htò̌yô̤̌ dǒ kòyò lǎ̤ô̌pǒ̤kè̌ kû̌ we̤ aya tômè. Htodě a dǐlô̤̌lò̤ǎ awe̤nu kû̌ pwa̤ma̤we̤ tokhlǒ dě a hǎhtò̌cû̌kè dǒ gǎshǐshawa̤ tôgǎ.

³⁴ Pô̤̌khô pwa̤dakǎǎ awe̤ tokhlǒ gǔ běǎ a sǒsǎ tokhlǒnudě, bǎ shěkhǎ phǔhè dǒ tô běǎplǒ sîpî̌sǎ akha nu, a nohè a jû̌ tokhlǒ dǒ pwa̤dakaǎ hǔkla tokhlǒ a ô̌.

³⁵ “Pwa̤dakaǎ hǔkla tokhlǒnu a pṳ̂̌ hǔkla běcǎ a jû̌ tokhlǒ dě a po̤ lû̌û tôpwa̤, a ma̤sikè lû̌û tôpwa̤, tôpwa̤ dě a wî lû̌û kû̌ lǒ̤.

³⁶ Tôplǎdě a nohè dû̌wî̤ khlo jû̌ tokhlǒ dǒ asî ô̌ dě a hèdû̌wî̤ khlo kû̌ a hè wǐ nutokhlǒ bǎbǎkǎlè pwa̤dakaǎ hǔkla nutokhlǒ ma̤jî̌ma̤jû̌ asî sô̌sô̌kû̌ a hè wǐ nutokhlǒ pwǎ.

³⁷ Dǒnô̌kò tôplǎdě, a nohè a phû̌pwa̤khû dǒ asî ô̌. ‘Hephû̌ kû̌ henǎ̤ mî̌ asî bǎ bè̌dubè̌nǎ̤ ǐsha khlo pwǎ kǎpě,’ a hî̌ pô̤̌nu.

³⁸ “Bǎbǎkǎlè bǎ pwa̤dakaǎ hǔkla tokhlǒ kè̌shǐ lû̌û akhanu, asî hî̌ kè̌khî lû̌û kû̌, ‘a mî̌ pwa̤ dǒ a nǐ̤bǎ û̌tě̤û̌ca nutôpwa̤ pě, cû̌! Cû̌ma̤sikè yǎ tǎ꤮, dě pa gǔ phî̌ a û̌tě̤û̌ca pě tǎ꤮,’ a hî̌ lô̌khô pô̤̌nu.

³⁹ Dě a pṳ̂̌ lû̌û dě a cî̌htò̌kè lû̌û dǒ we̤khlo dě a ma̤sikè lû̌û.

⁴⁰ “Pô̤̌nudě htû̌꤮ hǔkla běcǎ hètǒ̤ pěnu, a gǔ ma̤ asî hî̌tè pě?”

⁴¹ Pwa̤shû̌gǎ ikǒdû̌ tokhlǒ kû̌ Yǔdaphû̌ ta̤caba ikǒlǒkòdû̌ tokhlǒ hî̌shěshu kû̌, “A gǔ ma̤jî̌ma̤jû̌, ma̤sikè kòjî̌kòjû̌ nutokhlǒ pě. Dě a gǔ plû khô̌ akòyònu kû̌ pwa̤dakaǎ hǔkla dǒ a gǔ ǐpè̤̌ geǎ bǎ lû̌û ta̤sǎta̤phô hǎhtò̌ ashěakhǎ nutokhlǒ pě.”

⁴² Běcǎ hî̌ asî kû̌, “Lî̤plò̌shǐ kû hî̌ kû̌, ‘kòyò ma̤htò̌ hǐ dě lǒ̤ dǒ asî wîkè lû̌û nutômè nî̌ a htûhtò̌ lǒ̤ dǒ a tûhtû̌mě bò hǐtômè hǒ. Hǒnumî̌ Běcǎ Cǒmara ma̤ta̤ pwǎ, dě a ma̤ta̤ hǒo numî̌ a cô̌klǐcô̌sè jî̌.’ Lî̤plò̌shǐkû hî̌ pô̤̌omî̌ sî dô̌nô̌ gû̌ kòyò tôkhò̌ tô̤̌꤮ ya? Sî bǎ dô̌ pwǎ.”

⁴³ “Pô̤̌nudě he hî̌ sî mǒkhû̌ shilǎ̤gǎkû dǒ sî tô nǐ̤bǎnu Cǒmara gǔ phî̌sigwî̌ sî pě. Dě a gǔ ǐ kû̌ kòyò dǒ a jûlě̤phî̌yô̤̌ Cǒmara ayô̤̌ nutokhlǒ pě.

⁴⁴ Kòyò dǒ a lò̤tě̤ dǒ lǒ̤ nutômè alô̤nu, akhwǐ gǔ la̤gǎ pě, bǎbǎkǎlè lǒ̤ nutômè gǔ lò̤tě̤ dǒ lû̌ûlô̤ pěnu, akhwǐakrû̌ gǔ mǔ sipwǐ bò pě.”

⁴⁵ Bǎ pwa̤shû̌gǎ ikǒlǒkò dû̌ tokhlǒ kû̌ Pharishè̌phû̌ tokhlǒ ganǎ̤de Běcǎ Yeshǔ hî̌khěkhô̌ akhanu, asî sî̌ganǎ̤ kû̌ Běcǎ hî̌khô̌ asî.

⁴⁶ Dě asî kè̌lǎǐ lô̌khô klè̌ dǒ a glè̌ pṳ̂̌ Yeshǔ bǎbǎkǎlè Yeshǔ mî̌ piwi̤pèshè tôpwa̤, kòyò saprṳ̂ tokhlǒ lî̤̌ yṳ̌ǎ lô̌khô pô̤̌nu akhû̌akhî, asî ǐsha kòyò saprṳ̂ nutokhlǒ alǎ̤.