Matěo 2 - Kawyaw New Testament

Pwa̤sî̌jò̌phû̌ hè kè̌shǐ kû̌ Yeshǔ

¹ Yeshǔ ô̌phijǎlò̤ dǒ Wî̤̌bè̌telehe, Yǔdagǎ akû, bǎ Khwǐherû pǒshipǒgǎ akhanu. Yeshǔ ô̌phijǎlò̤ htodě pwa̤sî̌jò̌phû̌ Dǒ gǎ lṳmṳ̌htò̌ tokhlǒ hè dǒ Wî̤̌yarǔshôle dě hègwè̌ khwǐ kû̌,

² “Phijǎphû̌ dǒ a glè̌ htûhtò̌ Yǔda akhwǐ tôpwa̤ numî̌ a ô̌phijǎlò̤ tôbǎtè tûkû? Ma̤titèhî̌dě pa kè̌shǐ a shǎ ô̌lîhtò̌lṳ̌ dǒ gǎ lṳmṳ̌htò̌ tôkhô dě pa glè̌ hè cubucabahtò̌ yǎ.”

³ Bǎ Khwǐherû ganǎ̤de ta̤hî̌bǎ pô̤̌o akhanu, a sǎphlǒgû̌gè̌ jî̌lî. Lǒ̤꤮ bò Wî̤̌yarǔshôlephû̌ tokhlǒ mî̌mî̌ sǎphlǒgû̌ sǎphlǒgè̌ bò.

⁴ A kaǎ ô̌plǒ hî̌bǎcu bò pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ. Dě a gwè̌ asî kû̌, “Piwi̤pèshè tokhlǒ hî̌nǎ kû̌ Me̤shǐya nutôpwa̤ a gǔ ô̌phijǎlò̤ tôbǎtè tûkû pěya,” A hî̌.

⁵ Dě asî hî̌shěshu lû̌û kû̌, “A gǔ ô̌phijǎlò̤ dǒ Wî̤̌bè̌telehe, Yǔdagǎ akû pě, piwi̤pèshè Mǐka wě̤ dě a hî̌ kû̌,

⁶ Běcǎ hî̌ kû̌, ‘Ǒ꤮ Wî̤̌bè̌telehe, wî̤̌ ô̌ dǒ Gǎyǔda akû nutokhlǒ aklanu, na mî̌ wî̤̌ pî̌tî̌lǒ dǒ ami̤ lṳ̌hǔsǎ kû̌ kòyò tô̤̌ pô̤̌khônu mè̤̌tô̤̌. Ma̤titèhî̌dě pwa̤pǒta̤ tôpwa̤ dǒ a tagaǐ dě a gǔ nè̌klè̌nè̌klò he Isôrělaphû̌ nutôprṳ̂ ô̌htò̌ dǒ nakû pě.’”

⁷ Pô̤̌nudě Khwǐherû kaǎhǔsè̌ pwa̤sî̌jò̌phû̌ dǒ a ô̌ bǎ gǎlṳmṳ̌htò̌ hè tokhlǒ dě a gwè̌ tě̤tě̤mè̤̌mè̤̌ asî kû̌ shǎ hǒtômènu a ô̌lṳ̌htò̌ bǎ asî bǎkhò̌tè pô̤̌nu.

⁸ Htodě a nocû̌ asî dǒ Wî̤̌bè̌telehe dě a hî̌ asî kû̌, “Cû̌kè̌lǎ tě̤tě̤mè̤̌mè̤̌ lô̌khô phijǎphû̌ nutôpwa̤ nî̌꤮. Pô̤̌khô he gǔ cû̌ cubucabahtò̌ anu, sî kè̌ kè̌shǐshǐ kû̌ ge shôbǐǐ sělě pû he nî̌꤮.”

⁹ Bǎ asî ganǎ̤dehto khwǐ hî̌ pô̤̌o dě a hǎhtò̌cû̌ lô̌khô. Bǎ asî hǎhtò̌cû̌ akhanu, shǎ dǒ asî kè̌shǐ dǒ gǎ lṳmṳ̌htò̌ nutômè ô̌lṳ̌htò̌ sô̌ bǎ asî. Shǎ nutômè cû̌ wǐ dǒ asî lô̤mô̤̌ dě a cû̌ ô̌kǔ tôtǐ bǎ asî, bǎ phijǎphû̌ ô̌ agûlǎ̤nu.

¹⁰ Bǎ asî kè̌shǐ shǎnutômè akhanu, asî sǎlě̤sǎlò̤ jî̌jî̌.

¹¹ Dě asî nṳ̌ dǒ hǐkû dě nṳ̌kè̌shǐ phijǎphû̌ ô̌kû̌ amǒ̤ Mǒ̤ma̤rǐ. Asî dô̌gînî̤ û̌lò̤ cubucabahtò̌ lû̌û. Htodě a bǔmô phî̌htò̌ lô̌khô hta kû̌ ta̤numû̌mǔ dǒ kòyò kaǎ kû̌ Li̤banû (Lò̤ba) kû̌ ta̤khû̌ numû̌ dǒ kòyò kaǎ kû̌ Mǔra dǒ ta̤lě̤dû̌pwî̤htû nutokhlǒ dě a ǐ kû̌ phijǎ sû.

¹² Dě Cǒmara dǐsè̌rè̌ pwa̤sî̌jò̌phû̌ tokhlǒ dǒ a ta̤hǎmimò̤̌ akû kû̌ asî gǔ getô pe dǒ Khwǐherû a ô̌ tô̤̌. Dě asî gekhô̌kè klè̌ dǒ ashǔshawa̤ tôbô dǒ asîgǎ.

Hǎhtò̌khlè̌cû̌ dǒ Ijî̌gǎ

¹³ Bǎ pwa̤sî̌jò̌phû̌ tokhlǒ gehtonu, Cǒmara a mǒkhû̌ tanaphû̌ tôpwa̤ hèô̌lṳ̌htò̌ bǎ Phayṳ̂tǎ dǒ a ta̤hǎmimò̤̌ akû dě a hî̌ lû̌û kû̌, “Ihtǒmò̌! dě kaǎnṳ̌ phijǎphû̌ kû̌ amǒ̤nu dě hǎhtò̌cû̌khlè̌kè mò̌ dǒ Ijî̌gǎnu. He kè̌ shôbǐǐ na tocǒ꤮ tô̤̌ kè̌hî̌dě tûlû̌ ô̌ lô̌khô bǎnu nî̌꤮, ma̤titè̌hî̌dě Khwǐherû glè̌ no kè̌lǎ ma̤si akliphû̌ tokhlǒ kû̌ phijǎphû̌ nutôpwa̤ pě.”

¹⁴ A pě̤ihtǒ dě a ihtǒ kaǎnṳ̌ phijǎphû̌nu kû̌ amǒ̤ dě hǎhtò̌cû̌ dǒ Ijî̌gǎ bǎ lṳmṳkhǐlṳmṳ̌na̤ akha.

¹⁵ A cû̌ô̌ bǎnu dě Khwǐherû sikè. Ta̤htûhtò̌ anǎ̤ pô̤̌numî̌ a ma̤lǒhtò̌behtò̌ Běcǎ Cǒmara no hî̌nǎ a piwi̤pèshè Yṳ̂ěla kû̌, “He kaǎhtò̌ gekè hephû̌ dǒ Ijî̌gǎ.”

¹⁶ Bǎ Khwǐherû sî̌ya kû̌ pwa̤sî̌jò̌phû̌ tokhlǒ lô̌yǎ akhanu, a sǎphlǒdû̌ gutṳ̌glǎlî. Pô̤̌ a kè̌lǎ sî̌ya tě̤tě̤mè̤̌mè̤̌ dǒ pwa̤sî̌jò̌phû̌ tokhlǒ alô̤ kû̌ shǎ ô̌lṳ̌htò̌ bǎ asî bǎkhò̌tènu, a noma̤si bò pwa̤khû phijǎphû̌ ginǐ̤ně alǎ̤ tokhlǒ dǒ a ô̌ bǎ Wî̤̌bè̌telehe akûnu kû̌ do ô̌ te̤we̤bò bǎnu lǒ̤꤮ bò.

¹⁷ Ma̤pô̤̌nudě, Cǒmara hî̌nǎ ayô̤̌ kû̌ piwi̤pèshè Ye̤ramǐyanu a lǒbe hèhǒ.

¹⁸ Piwi̤pèshè Ye̤ramǐya hî̌ kû̌, “Ta̤hǎta̤wô gǔ ô̌htò̌ dǒ Wî̤̌ramǎ akû pě. Kòyò gǔ hǎwô lǒ̤sû̌lǒ̤sò̌ pě. Mǒ̤rakhîlǎ akhlialè tokhlǒ gǔhǎgǔwô ǐbò aphû̌ pě. Dǒ aphû̌ tokhlǒ sibò dě a gènè̤ tôkhôsò̌nu, kòyò ma̤lè jò lû̌û tôpwǎ̤꤮ tô̤̌.”

Ô̌ dǒ Ijî̌gǎ hǎhtò̌ge

¹⁹ Bǎ Khwǐherû sihto dě Phayṳ̂tǎ ô̌pe dǒ Ijî̌gǎ akhanu, Cǒmara a mǒkhû̌ tanaphû̌ tôpwa̤ hèô̌lṳ̌htò̌ bǎ lû̌û dǒ a ta̤hǎmimò̤̌ akû.

²⁰ Dě a hî̌ lû̌û kû̌, “Ihtǒmò̌! Kaǎnṳ̌ phijǎ kû̌ amǒ̤nu dě getîkhî sô̌mò̌ dǒ Isôrěla gǎnu, ma̤titè̌hî̌dě kòyò dǒ a kè̌lǎ ma̤si phijǎphû̌ tôpwa̤nu, a sikèhǒ.”

²¹ Dě a pě̤ihtǒ, dě a ihtǒ kaǎnṳ̌ phijǎphû̌ kû̌ amǒ̤ dě a getîkhîsô̌ dǒ Isôrěla gǎ.

²² Bǎbǎkǎlè bǎ Phayṳ̂tǎ ganǎ̤de kû̌ Khwǐherû aphû̌khû Khwǐakhelǎ htò̌pǒ apha gûlǎ̤ dǒ Yǔdagǎ akhanu, a ǐsha dě a ge bǔtô̤̌. Cǒmara ǐsè̌rè̌ Phayṳ̂tǎ dǒ a ta̤hǎmimò̤̌ akû dě a ge cû̌ô̌kè dǒ Galilè̤̌gǎ kû.

²³ Asî geô̌ tûû̌ wî̤̌nu tîwî̤̌ mî̌ kòyò kaǎ kû̌ Wî̤̌na̤sôrè̤̌. Hǒomî̌ a ma̤lǒhtò̌behtò̌ piwi̤pèshè tokhlǒ hî̌nǎ kû̌, “Kòyò gǔ kaǎ lû̌û kû̌ Nasèrè̌phû̌ pě,” nuhǒ.