Matěo 14 - Kawyaw New Testament

Jushi Khûyṳ̂ha si ma̤hî̌tè awe̤akè

¹ Bǎnuakha pwa̤pǒta̤ Herû ganǎ̤de Běcǎ Yeshǔ awe̤akè.

² Dě a hî̌ a pwa̤ma̤ta̤phû̌ tokhlǒ kû̌, “A mî̌ pwa̤jushi Khûyṳ̂ha pwǎ, a ihtǒgesô̌ dǒ ta̤si hǒ, htodě a ma̤jò ta̤cô̌klǐcô̌sè nutokhlǒ hǒ.”

^3-4 Khwǐherû cû̌phî̌ sô̌ tûû̌ akhi Mǒ̤heròdǐ. A mî̌ apṳ̌ Khûphǐlǐpǔ ama, pô̤̌nu akhû̌akhî, Khûyṳ̂ha hî̌htohî̌sô̌ lû̌û kû̌, “Na cû̌phî̌ sô̌ nakhi pô̤̌nu mî̌ atô kû̌ ta̤sû̌ta̤tòwò tô̤̌.” A hî̌ lû̌û pô̤̌nudě a no cû̌pṳ̂̌ akliphû̌ tokhlǒ kû̌ Khûyṳ̂ha dě a nodǒlò̤tě̤kè lû̌û dǒ apô̤kû.

⁵ Khwǐherû sǎyṳ ma̤sikè Khûyṳ̂ha bǎbǎkǎlè Yǔdaphû̌ tokhlǒ yṳ̌ǎ kû̌ Khûyṳ̂ha mî̌ piwi̤pèshè tôpwa̤ akhû̌akhî, a ǐsha asî alǎ̤ dě a ma̤si bǔ lû̌û tô̤̌.

⁶ Bǎbǎkǎlè bǎ Khwǐherû ô̌phijǎlò̤ alṳmṳ̌ni̤ hètǒ̤ akhanu, Mǒ̤heròdǐ aphû̌pwa̤mǒ̤ kalǐ dǒ Khwǐherû alô̤mô̤̌ kû̌ shǐpwǎ̤shǐmè̤ tokhlǒ alô̤mô̤̌ dě Khwǐherû sǎphlǒmô̤ jòjî̌ tô̤̌ akhû̌akhî,

⁷ A olò̤ kû̌ a sǎyṳ kwi titètè̌꤮ nu, a gǔ ǐ lû̌û a hî̌ lû̌û pô̤̌nu.

⁸ Dě bǎkwi mî̌titènu amǒ̤ hî̌ bǎ lû̌û dě a cû̌ hî̌ Khwǐherû kû̌, “Pě̤tṳ̌ bǎ he jushi Khûyṳ̂ha agô̌bô dě bè̌nṳ̌ bǎ he a ikǒnu dǒ balětaa dû̌kû dě hèǐ he bǒo,” A hî̌ pô̤̌nu.

⁹ Khwǐnu a sǎphlǒmô̤ tô̤̌ bǎbǎkǎlè a olò̤ hto dǒ ashǐtèmè̤ tokhlǒ alô̤mô̤̌ akhû̌akhî, a no akliphû̌ tokhlǒ kû̌ a gǔ cû̌ma̤pô̤̌ phǐjǎpwa̤mǒ̤ nutôpwa̤ kwi yǎnu.

¹⁰ Asî cû̌ dǒ kò lǎ̤dǒô̌ kòyò apô̤kû dě a cû̌pě̤tṳ̌ ge Khûyṳ̂ha agô̌bô.

¹¹ Asî bè̌nṳ̌ Khûyṳ̂ha a ikǒnu dǒ balětaa akû dě a hèǐ kû̌ phijǎpwa̤mǒ̤ nutôpwa̤ dě phijǎpwa̤mǒ̤ joge dǒ amǒ̤ ô̌.

¹² Khûyṳ̂ha akhôphijǎ tokhlǒ hèphǐkè a nǎ̤glǒ ô̌kènu dě ge lǔǐkè lû̌û. Htodě asî cû̌ shôbǐǐ Běcǎ Yeshǔ.

Běcǎ Yeshǔ dǐǎ kòyò yè̤̌rî̌ a shǎǎ

¹³ Bǎ Běcǎ Yeshǔ ganǎ̤de kû̌ kòyò ma̤si kèhto Khûyṳ̂ha akhanu, a kû̌ akhôphijǎ tokhlǒ cû̌nṳ̌ dò̌ sǒkhli dě hǎhtò̌cû̌kè lô̌khô tû̌ dǒ gûlǎ̤ sǔtukǔ dǒ kòyò ô̌ tôpwǎ̤꤮ tô̤̌ tûkû. Dě bǎ kòyò saprṳ̂ ganǎ̤de akhanu, a ô̌ lô̌khô bǎ wî̤̌kû nutokhlǒ dě a hǎhtò̌ cû̌ lô̌khô kû̌ khò̌lôpô̤̌ dǒ khôkhû̌ tôkhô.

¹⁴ Bǎ Běcǎ Yeshǔ ô̌ dǒ sǒkhlikû hǎhtò̌ akhanu, a kè̌shǐ kòyò saprṳ̂dû̌ cû̌ ô̌pǒ̤ nǎ wǐ bòkè dǒ lômô̤̌. Bǎ a kè̌shǐ asî akha a sǎyṳgwèbǎǐ asî dě a ma̤hǎmǎbǎ bò kòyòsha dǒ asîkla nutokhlǒ.

¹⁵ Bǎ lṳmṳ̌hǎ lṳmṳ̌ glè̌ lò̤tě̤phǔhǒ akhanu, akhôphijǎ tokhlǒ hè dǒ lû̌ô̌ dě a hèhî̌ lû̌û kû̌, “Gûlǎ̤ bǒo tûkû mî̌ do ô̌phǔ tôdǒ꤮ tô̤̌, kǎtô̤̌ lṳmṳ̌khǐ pô̤lô̤̌ akhû̌akhî, pô̤̌khô asî gǔ cû̌pwî̤ ǎ tûû̌ lô̌khô a lǎ̤ǎlǎ̤ô dophû̌shô̌phû̌ nutokhlǒ akû dě nogemò̌ kòyò nutokhlǒ.”

¹⁶ Běcǎ Yeshǔ hî̌shěshu asî kû̌, “Lǎ̤lû noge asî tô̤̌. Kè̌ dǐǎdǐô mò̌ asî tocǒcǒnu.”

¹⁷ Dě asî hî̌shěshu lû̌û kû̌, “Pata ô̌ pwǎtǒ̤ mû̌ yè̤̌phlǒ kû̌ tò̤̌phû̌ ginǐ̤bǎ nô̤̌pwǎ.”

¹⁸ Dě a hî̌ asî kû̌, “Phî̌hè dǒ he ô̌ bǒo.”

¹⁹ Dě a nohǎnòò̌lò̤ bò kòyò nutokhlǒ dǒ mi̤khû̌. A phî̌ mû̌ yè̤̌phlǒ kû̌ tò̤̌phû̌ ginǐ̤bǎ dě a kè̌htò̌ dǒ mǒlǎ̤ dě a hî̌bwǐhî̌sîrîhtò̌ Cǒmara htodě a běphwǐ mû̌. Htodě a ǐlò̤ dǒ akhôphijǎ tokhlǒ a ô̌. Dě akhôphijǎ tokhlǒ yṳ̂̌lò̤ tutṳ̌ dǒ kòyò saprṳ̂ tokhlǒ a ô̌.

²⁰ Asî ǎ pô̌ǎpô̌ô ǎkǒôbe bò pṳ̂̌꤮ tôpwa̤. A khôphijǎ tokhlǒ phî̌plǒ gesô̌ a kashǎ ô̌kè tokhlǒnu a ô̌be pe kû̌ phû̌běnu shǐginǐ̤phû̌bě.

²¹ Dô̌ còcè̌pwǎ pwa̤khûdû̌ dǒ a ǎ shǎ tokhlǒnu a phǔ ô̌tònò̤̌ yè̤̌rî̌. Pwa̤mǒ̤ kû̌ phijǎphû̌ tokhlǒnu dô̌bǎpa lû̌û tô̤̌.

Běcǎ Yeshǔ cû̌ dǒ shikhû̌

²² Asî htǔplǒ htohto kû̌ Yeshǔ no cû̌nṳ̌ dò̌ bò akhôphijǎ tokhlǒ sǒkhli dě a nohǎhtò̌cû̌ wǐkè asî dǒ shikoǒ lô̤̌bò̌. Dě bǎ akhôphijǎ htò̌dò̌ sǒkhli akhanu, a dě a plûgekè bò kòyò saprṳ̂ nutokhlǒ.

²³ A plûgehto kòyò saprṳ̂ dě, a cû̌htò̌ kwicaba tûû̌ dǒ khôlôkhû̌ tôpwa̤ nô̤̌pwǎ. Bǎ lṳmṳ̌khǐpô̤lô̤̌ akhanu, a ô̌ tûû̌ bǎnu tôpwa̤nô̤̌.

²⁴ Bǎbǎkǎlè bǎ sǒkhli nutôbǎ hǎhtò̌cû̌ yî̤kè dǒ shikoǒdû̌kû akhanu, gili̤sǎdû̌ hèshěbǎ asî dě shipěpǒ hè pǒbǎ bò asî sǒkhli.

²⁵ Bǎ shîû̌ lṳmṳ̌ glè̌ lîbû akhanu, Běcǎ Yeshǔ cû̌ dǒ shikhû̌ dě a hè tô bǎ asî ô̌.

²⁶ Bǎ akhôphijǎ tokhlǒ kè̌shǐ a cû̌ dǒ shikhû̌ akhanu, asî ǐsha gònò̤̌gòglè dě a kaǎgǔ lô̌khô kû̌, “Ǒ꤮ kòyò yômǔyôla.”

²⁷ Bǎbǎkǎlè tôplǎnô̤̌, Běcǎ Yeshǔ hî̌ asî kû̌, “Bè̌khubè̌he lô̌khô sî sǎphlǒ. Ǐsha lô̌khô tǎ̤mǎ̤, hǒo mî̌ he pwǎ.”

²⁸ Dě Khûpetarǔ hî̌ kû̌, “Běcǎ, kè̌ na mè̤̌mî̌ca hî̌dě hî̌mò̌ he dǒ he gǔ hè dǒ shikhû̌ bǎ na ô̌.”

²⁹ Dě a hî̌ lû̌û kû̌, “Hèmò̌.” Dě Khûpetarǔ hǎtě̤ dǒ sǒkhlikû dě a cû̌ dǒ Yeshǔ a ô̌ dǒ shikhû̌.

³⁰ Bǎbǎkǎlè bǎ a kè̌shǐ gili̤sǎ shipěpǒ akhanu, a ǐsha dě a lò̤cǔkè, dě a kaǎgǔ kû̌, “Běcǎ, ma̤jè̌ mò̌ he.”

³¹ Běcǎ Yeshǔ yṳ̂̌hè acǔde tôplǎnô̤̌ dě a cî̌htò̌ lû̌û dě a hî̌ lû̌û kû̌, “Na ta̤yṳ̌ pî̌tî̌ shû̌lě, na sǎphlǒ wò̌wè̌ ma̤titè?”

³² Bǎ asî htò̌nṳ̌ dǒ sǒkhlikû akhanu, gili̤sǎ ô̌kǔ hèkè.

³³ Bǎnuakha kòyò ô̌ dǒ sǒkhlikû nutokhlǒ cabahtò̌ Běcǎ Yeshǔ dě a hî̌ kû̌, “Na mî̌ Cǒmara aphû̌khû tôpwa̤ mè̤̌mî̌ca hǒ.”

Běcǎ ma̤hǎmǎ ta̤shǐta̤sha dǒ Genashèrè̤̌gǎ

³⁴ Asî cû̌bò̌ hto shikoǒdû̌ nudě a cû̌tǒ̤ lô̌khô dǒ Genashèrè̤̌gǎ.

³⁵ Dophû̌shô̌phû̌ bǎnu tokhlǒ to̤ǐ Yeshǔ dě asî cû̌ pwe̤ǐbǎ bò kòyò dǒ a ô̌ lô̌khô dǒ gǎkû bǎnu tokhlǒ dě kòyò kaǎ hèbò kòyòshǐ kòyòsha tokhlǒ dǒ Yeshǔ ô̌.

³⁶ Asî kwisǎyṳ Běcǎ kû̌ notô̌bǎ pwǎ na jejûgòpwè̤nu kû̌ pwa̤shǐ pwa̤sha tokhlǒnu tîkî̌phû̌ nô̤̌pwǎ. Dě kòyò dǒ a tô̌bǎ lû̌ jejûgòpwè̤ tokhlǒnu, a ta̤shǐta̤sha hǎmǎ bòkè.