Mǎ̤riko 9 - Kawyaw New Testament

¹ Yeshǔ hî̌ akhôphijǎ kû̌ kòyò tokhlǒ kû̌, “He hî̌ mè̤̌mî̌ca sî, kòyò dǒ a ihtǒô̌ bǎ sîkla tokhlǒkhlǒnu, bǎ asî si khôtô̤̌ kha, asî gǔ kè̌shǐ bǎ lô̌khô Cǒmara hè pǒshipǒgǎ kû̌ a ta̤pô̤ta̤phǎ pě.”

Yeshǔ nǎ̤glǒ htû̌lè̌tèplè̌khô̌kè

² Lṳmṳ̌ni̤ susô̌ behtò̌hto dě Běcǎ Yeshǔ kaǎnṳ̌ Khûpetarǔ, Khûya̤kû kû̌ apṳ̌ Khûyṳ̂ha dě a cû̌htò̌ dǒ khôlôhtò̌yô̤̌ tômè alô̤. Bǎ a ô̌ tûû̌ kû̌ asî akhanu, Běcǎ Yeshǔ anǎ̤glǒ htû̌lè̌tèplè̌ khô̌bò dǒ asî lô̤mô̤̌.

³ A jejû tokhlǒnu abûrakha htò̌bò dě a bûsǔlǔ khlope kû̌ kòyò shǔpǒ̤ jejû dǒ hǎkhû̌nu.

⁴ Pô̤̌nuhtodě akhôphijǎ nu sò̌su kè̌shǐ piwi̤pèshè Khûělǐya dǒ awǐkhanu nutôpwa̤ kû̌ Khûmṳ̂shě ô̌lṳ̌htò̌ dě asî hî̌bǎ lô̌khô kû̌ Běcǎ Yeshǔ.

⁵ Khûpetarǔ hî̌ Yeshǔ kû̌, “Sara꤮ gûlǎ̤ bǒo tûkû nî̌ awî̤ amô̤wô̌ lîlè. Pa gǔ ma̤bǎ sî hǐphû̌ sumè, tômèdě naya, tômèdě Khûmṳ̂shě aya, tômèdě piwi̤pèshè Khûělǐya aya.”

⁶ Asî ǐsha tûlû̌ shû̌lě dě Khûpetarǔ tôbǎ hî̌ hî̌tènu a sî̌ya petô̤̌ akhû̌akhî a hî̌hǎhtò̌ pô̤̌nu pwǎ.

⁷ Dě poǒlṳ̌ tôbě lò̤plû̌ bǐkè asî dě alě̤pwe̤htò̌ dǒ poǒlṳ̌kû dě a hî̌ kû̌, “Hǒtôpwa̤ mî̌ hephû̌pwa̤khû dǒ he mô̤ǐyǎ tôpwa̤, dě ganǎ̤de lô̌khô ayô̤̌ nî̌꤮.”

⁸ Ô̌ tòshò̌phû̌ dě asî kè̌te̤we̤ dě kè̌shǐ pwǎtǒ̤ Yeshǔ tôpwa̤nô̤̌ dǒ ashǔshawa̤ sò̌ginǐ̤nu kè̌shǐ pelû̌ûtô̤̌.

⁹ Bǎ asî ô̌ dǒ khôlôlô̤ hǎtě̤ akhanu, Yeshǔ mǎnǎ asî kû̌, “Lǒ̤bò sî kè̌shǐ ta̤hǒtokhlǒ nî̌ shôbǐǐlṳ̌ bǎ tǎ̤ kòyò tôpwǎ̤ ta̤mǎ̤ nî̌, Kòyòphû̌khû mî̌ he ihtǒhtûpwa̤ gesô̌ dǒ ta̤si pě dě hî̌lṳ̌ bǎ nô̌ kòyò nî̌꤮,” a mǎnǎ asî pô̤̌nu.

¹⁰ Dě asî ma̤pô̤̌ Yeshǔ mǎnǎ asî nu bǎbǎ asî hî̌bǎǐ tûû̌ kè̌khîlû̌û tôpwa̤ kû̌ tôpwa̤ dě a hî̌ lô̌khô kû̌, “Ta̤si ihtǒhtûpwa̤ gesô̌ amûasǎ mî̌ titè ya?” A gwè̌ ǐ bò lû̌û pô̤̌nu.

¹¹ Asî gwè̌ Yeshǔ kû̌, “Pwa̤sû̌ǐ ta̤sû̌ta̤tòwò asara tokhlǒ hî̌ kû̌ piwi̤pèshè Khûělǐya bǎhè wǐkhlo kû̌ Me̤shǐya dǒ a gǔ ma̤hǎplǎge kòyònu tôpwa̤ pě, a cû̌hî̌tǒ̤ pô̤̌nu ma̤titè?”

¹² Dě a hî̌shěshu asî kû̌, “Piwi̤pèshè Khûělǐya bǎ hè wǐlǒpě dě a bǎ hè tîwî̌tòwò ma̤wô̌ ta̤lǒ̤꤮ bò numî̌ amè̤̌na̤cè̌ kǎ, bǎbǎkǎlè lî̤plò̌shǐ hî̌ kû̌ Kòyòphû̌khû a tôbǎ tṳ̌bǎkhòbǎ dû̌wî̤ ta̤jî̌ta̤jû̌ pě dě kòyò gǔ sǒcû̌tephekè a pě a cû̌hî̌tǒ̤ pô̤̌hǒo ma̤titè?

¹³ Bǎbǎkǎlè he hî̌ sî, piwi̤pèshè Khûělǐya hèhtohǒ dě kòyò tokhlǒ ma̤ lû̌û jû̌ asî sǎphlǒ sǎyṳ ma̤ lû̌û nupwǎ. Hǒomî̌ a htûhtò̌ hto pô̤̌ lî̤plò̌shǐ wě̤ nǎ a awe̤akè nu hǒ.”

Yeshǔ ma̤hǎmǎ phijǎpwa̤khûphû̌ dǒ khînǎkhîno ma̤bǎ nutôpwa̤

¹⁴ Bǎ Yeshǔ kû̌ akhôphijǎ sò̌su cû̌tǒ̤ dǒ akhôphijǎ ashǔshawa̤ tokhlǒ a ô̌ akhanu, a kè̌shǐ kòyò saprṳ̂dû̌ hèô̌plǒô̌cu te̤we̤ bò asî dě pwa̤sû̌ǐ ta̤sû̌ta̤tòwò asara tokhlǒ hèhtè̌còwò lô̌khô kû̌ asî.

¹⁵ Bǎ kòyò saprṳ̂saphǎ kè̌shǐ Yeshǔ akha, taplǎnô̤̌ asî ǒò̌ kiti̤kaa lô̌khô dě asî khlè̌cû̌ hî̌bǎ gòyò̤̌mò̤̌mô̤ lô̌khô Yeshǔ.

¹⁶ Dě Yeshǔ gwè̌ akhôphijǎ tokhlǒ kû̌, “Mî̌ sî htè̌còwò lô̌khô asî kû̌ ta̤we̤ta̤kè titè?”

¹⁷ Dǒ kòyò saprṳ̂saphǎ aklanu kòyòpha ô̌ tôpwa̤ dě a hî̌shěshu Yeshǔ kû̌, “Sara he kaǎhèǐ he phû̌pwa̤khû dǒ khînǎkhîno dò̌ yǎ dě a hî̌bǎ jò tô̤̌ tôpwa̤ dǒ naô̌.

¹⁸ Khînǎkhîno dò̌ yǎ bǎkhò̌tè nu bǎbǎ a bò̌ lòkhǔpo̤ anǎ̤ dǒ hǎkhû̌ dě agô̌kûnu bô̌bè̌hǎhtò̌ lǒ̤bò. Htodě a gwî̌ akhû̌khî dě anǎ̤ shotuklǔ bòkè. He kwisǎyṳ nakhôphijǎ tokhlǒ glè̌ wṳ̂̌hǎhtò̌pè̤̌kè bǎ lû̌û khînǎkhînonu bǎbǎkǎlè asî wṳ̂̌hǎhtò̌pè̤̌kè bǎ lû̌û tô̤̌.”

¹⁹ Dě Běcǎ Yeshǔ hî̌ asî kû̌, “Kòyò shôdô ta̤yṳ̌ta̤nǎ̤ sî mî̌ he bǎ ô̌yî̤ gû̌pe kû̌ sî pwǐtè pě? He tôbǎ khòsǎdô ô̌yî̤pekû̌ sî pwǐtè? Kaǎ hè a dǒ he ô̌.”

²⁰ Dě asî kaǎ hè phijǎpwa̤khûphû̌ nutôpwa̤ dǒ Yeshǔ ô̌. Bǎ khînǎkhîno kè̌shǐ Yeshǔ akha taplǎnô̤̌ a ma̤ tṳplṳ̌ htò̌shû̌ phijǎpwa̤khûphû̌ nutôpwa̤ dě ama̤ lò̤khǔpo̤ phijǎ dǒ hǎkhû̌ dě a htû̌toklotèplè̌ anǎ̤ bǎnu dě agô̌kû nî̌ bô̌bè̌hǎhtò̌ bò kè.

²¹ Dě Yeshǔ gwè̌ phijǎphû̌ nutôpwa̤ apha kû̌, “A ma̤ pô̤̌o numî̌ ayî̤ hǒ ya?” Dě a hî̌shěshu lû̌û kû̌, “A ma̤ dǒ a phijǎkha nupe.

²² Khînǎkhîno sǎyṳ ma̤si yǎ dě a ma̤ lò̤khǔpo̤nṳ̌ sǎla̤la̤ lû̌û dǒ mî̌kla, a ma̤ lò̤tě̤nṳ̌ sǎla̤la̤ lû̌û dǒ shikla. Na kè̌ ma̤jò nu gwèbǎǐ dě ma̤jè̌ pû pa nî̌꤮.”

²³ Dě Yeshǔ hî̌ lû̌û kû̌, “Ma̤titè̌hî̌dě na cû̌ hî̌tǒ̤ kû̌, ‘na kè̌ ma̤jò,’ pô̤̌nu ma̤titè? Kòyò tôpwa̤pwa̤ dǒ a yṳ̌ǎ Cǒmara numî̌ a ma̤jò bò ta̤ pṳ̂̌꤮ tocǒ pwǎ.”

²⁴ Tôplǎnô̤̌ phijǎ apha kaǎgǔhtò̌ kû̌, “He yṳ̌ǎ, bǎbǎkǎlè he ta̤yṳ̌ ô̌ pî̌tî̌ akhû̌akhî, pô̤̌khô he ta̤yṳ̌ gǔměgle ayanu, ma̤jè̌ pû he!” a kaǎgǔhtò̌ pô̤̌nu.

²⁵ Bǎ Yeshǔ kè̌shǐ kû̌ kòyò saprṳ̂ khlè̌hètôphǔ plṳ̂ lû̌ akhanu, a sǎhtǎ khînǎkhîno phû̌mò̌ nu kû̌, “Ǒ khînǎkhîno phû̌mò̤̌ dǒ a ma̤koo kòyò anò̌ku dě a ma̤pè̌ kòyò hǒtôpwa̤, he nohǎhtò̌cû̌ tephekè na dǒ phijǎpwa̤khûphû̌ nutôpwa̤ akû hǒ, na bǎ gesô̌ pe tôkhò̌꤮ tô̤̌ nî̌,” a hî̌hto pô̤̌nu dě.

²⁶ Khînǎkhîno nî̌ a yî̤̌kǒhtò̌ dě a ma̤ tṳplṳ̌shû̌tṳplṳ̌sho hto phijǎpwa̤khûphû̌ nutôpwa̤ dě a hǎhtò̌cû̌kè dǒ lû̌ûkû. Dě phijǎpwa̤khûphû̌ hǒtôpwa̤nu, a sô̌sô̌ kè kû̌ a sinu. Dě kòyò tokhlǒ hî̌ lô̌khô kû̌, “A sikèhǒ hò̌꤮” a hî̌ lô̌khô pô̤̌nu.

²⁷ Bǎbǎkǎlè Yeshǔ cî̌ ihtǒ lû̌û dě a ihtǒbò̌ tîkhîsô̌.

²⁸ Yeshǔ ma̤hto pô̤̌nudě, bǎ a kû̌ akhôphijǎ tokhlǒ ge tîkhîsô̌ dǒ hǐ dǒ kòyò ô̌ tôpwǎ̤꤮ tô̤̌ nutômè akû akhanu, akhôphijǎ tokhlǒ gwè̌ lû̌û kû̌, “Pa wṳ̂̌hǎhtò̌ bò̌kè khînǎ tô̤̌mî̌ a ma̤titè?”

²⁹ Dě Yeshǔ hî̌ asî kû̌, “Khînǎkhîno pô̤̌o tokhlǒ numî̌ sî wṳ̂̌hǎhtò̌pè̤̌kè pwǎ a kû̌ ta̤kwicaba tocǒnô̤̌ pwǎ.”

Yeshǔ hî̌ sô̌ kû̌ ata̤si awe̤akè

³⁰ Yeshǔ kû̌ akhôphijǎ tokhlǒ hǎhtò̌cû̌kè hto kû̌ ta̤lǎ̤ bǎnu dě asî cû̌bò̌ tûlû̌ Galilè̤̌gǎ kûnu Yeshǔ sǎyṳ nosî̌ya kòyò tôpwǎ̤꤮ tô̤̌,

³¹ ma̤titè̌hî̌dě a sû̌ǐtòwòǐ akhôphijǎ tokhlǒ dě a hî̌ asî kû̌, “Kòyòphû̌khû mî̌ he, kòyò gǔ shaǎ lò̤kè yǎ dǒ kòyòhǎkhû̌phû̌ a cǔdekû pě dě asî gǔ ma̤si he pě. He sihto suni̤ pě dě, he gǔ htûpwa̤ getîkhî sô̌ pě.”

³² A khôphijǎ sî̌yaphlô wô̌ a ta̤sû̌ǐtòwòǐ amûasǎ tô̤̌ bǎbǎ asî gwè̌bǔ lû̌û tôpwǎ̤ tô̤̌.

Kòyò dǒ a glè̌ dû̌htûgutṳ̌ mî̌ mò̌pè?

³³ Yeshǔ kû̌ akhôphijǎ cû̌tǒ̤ dǒ Wî̤̌kaperanò̤ dě bǎ asî cû̌nṳ̌ô̌ dǒ hǐkû akhanu, Yeshǔ gwè̌ akhôphijǎ tokhlǒ kû̌, “Bǎ sî cû̌ dǒ klè̌lô̤ akhanu, sî hî̌bǎ cû̌ kwè̌꤮ lû̌û titè?”

³⁴ Bǎ asî cû̌ dǒ klè̌lô̤ akhanu, asî htè̌cû̌ kè̌khî lû̌û kû̌ dǒ pakla nu, mò̌pè htûdû̌gutṳ̌ pě awe̤akè akhû̌akhî, asî ô̌ sǔtukǔ lô̌khô pwǎ, a hî̌ geshěshu lû̌û tocǒ꤮ tô̤̌.

³⁵ Yeshǔ hǎnòò̌ dě a kaǎ hè asî dǒ akòshî̌ dě a hî̌ asî kû̌, “Kòyò dǒ a sǎyṳ dû̌htûgutṳ̌ tôpwa̤ numî̌ a tôbǎ ô̌ dǒ kòyò lǎ̤ dě a bǎ htû bò bǎ kòyò pṳ̂̌tôpwa̤ a pwa̤ma̤ta̤phû̌.”

³⁶ Htodě a kaǎ hè phijǎphû̌ tôpwa̤ dě a nohè ihtǒô̌ lû̌û dǒ asîkla dě a phô̌htò̌ lû̌û dě a hî̌ asî kû̌,

³⁷ “Kòyò dǒ a kè̌ hemǐ̤sǎ dě a kè̌ gòyò̤̌mò̤̌mô̤ phijǎphû̌ sô̌sô̌kû̌ hǒtôpwa̤ tôpwa̤pwa̤nu a gòyò̤̌mò̤̌mô̤ he hǒ. Htodě kòyò dǒ a gòyò̤̌mò̤̌mô̤ he tôpwa̤pwa̤nu asô̌sô̌kû̌ a gòyò̤̌mò̤̌mô̤ pwa̤ dǒ a nohè he bǒo nutôpwa̤ hǒ.”

Kòyò dǒ a shěpò̤̌yò̤̌kè pa tô̤̌ numî̌ a ô̌plǒ kû̌ pa tôprṳ̂

³⁸ Khûyṳ̂ha shôbǐǐlṳ̌ bǎ Yeshǔ kû̌, “Sara pa kè̌shǐ kòyò tôpwa̤ dǒ a cû̌ wṳ̂̌hǎhtò̌pè̤̌kè khînǎkhîno tokhlǒ kû̌ nami̤. A ô̌plǒ dǒ pa saprṳ̂kû mè̤̌tô̤̌ dě pa hî̌ dǐdòkè yǎ.”

³⁹ Bǎbǎkǎlè Yeshǔ hî̌shěshu asî kû̌, “Hî̌ dǐdò tǎ̤ a ta̤mǎ̤, kòyò tôpwa̤pwa̤ dǒ a ma̤ htûhtò̌ ta̤cô̌klǐ tocǒcǒ kû̌ he mi̤nu dǒ nô̌kòpě a pî̤jî̌shǐcô̌ yûkǎkwe pe he tô̤̌.

⁴⁰ Kòyò dǒ a sǎkhě pa tô̤̌ tokhlǒ numî̌ a ô̌plǒ dǒ pa tôkhô pwǎ.

⁴¹ He hî̌mè̤mè̤̌ sî, dǒ sî gû̌ hekò akhû̌akhîdě, kòyò tôpwa̤pwa̤ kè̌ dǐôshěshu sî shi tôba numî̌ a gǔ nǐ̤bǎ mè̤̌mî̌ca ta̤ma̤khû̌kǎ pě.

kòyò dǒ a ma̤sǔ phijǎphû̌

⁴² “Kòyò tôpwa̤pwa̤ kè̌ noma̤sǔ phijǎpî̌tî̌lǒ dǒ a yṳ̌ǎ he tokhlǒ akla tôpwa̤pwa̤ hî̌nu, comě shǔtò̤̌ lǎ̤wî̤̌lǒ̤dû̌ dǒ a gô̌bôlô̤nu dě wîtě̤kè a dǒ shidû̌shite̤we̤kû numî̌ awô̌khlo bǎ lû̌ûya.

⁴³ Na cǔde kè̌ noma̤ na ta̤sǔ dě pě̤tṳ̌kè yǎ. Na cǔdetṳ̌ tôkhô dě na genṳ̌jò dǒ mǒkhû̌nu, awô̌khlo pe kû̌ na cǔde ô̌pṳ̂̌bò ginǐ̤khô. Na genṳ̌ dǒ mǒkhû̌ kû̌ na cǔde ô̌ tôkhô pwǎ nu, awô̌khlo pe kû̌ na cǔde ô̌pṳ̂̌bò ginǐ̤khô dě na lò̤tě̤ dǒ larakû dǒ mî̌ hǎpǐ̤ jò pe tôkhò̌ tô̤̌ nu akû.

⁴⁴ (Bǎnu tûkû pěnu lǒgwǎ gǔ ǎ asî yî̌ dě lǒgwǎ tokhlǒnu a sipè̤̌tô̤̌ dě mî̌ dǒ a u asî nu, a pǐ̤pè̤̌ pe tôkhò̌ tô̤̌)

⁴⁵ Na khò̌lôpô̤̌ kè̌ noma̤sǔ na dě pě̤tṳ̌kè yǎ. Na nṳ̌ dǒ mǒkhû̌ kû̌ na khò̌lôpô̤̌ tôkhô pwǎ nu, awô̌khlo pe kû̌ na khò̌lôpô̤̌ ô̌pṳ̂̌bò ginǐ̤khô dě kòyò wîtě̤kè na dǒ larakû nu.

⁴⁶ (Bǎnu tûkû pě nu, lǒgwǎ gǔ ǎ asî yî̌ pě dě lǒgwǎ hǒtokhlǒ nu a sipè̤̌ tôkhò̌ tô̤̌ dě mî̌ dǒ a u asî nu, a hǎpǐ̤jò pe tôkhò̌ tô̤̌)

⁴⁷ Namǐ̤sǎ kè̌ noma̤ na ta̤sǔ hî̌dě cewehtò̌kè yǎ dě wîkè yǎ. Namǐ̤sǎ ô̌pwǎ tôkhô dě na genṳ̌jò dǒ mǒkhû̌nu awô̌khlo pe kû̌ namǐ̤sǎ ô̌pṳ̂̌bò ginǐ̤khô dě kòyò bǎ wîtě̤kè na dǒ larakû pěnu.

⁴⁸ Bǎnu tûkû pě nu, ‘Lǒgwǎ gǔ ǎ asî yî̌ pě dě lǒgwǎ hǒtokhlǒnu, a sipè̤̌ tôkhò̌ tô̤̌. Mî̌ dǒ a u asî nu, a pǐ̤jò pe tôkhò̌ tô̤̌.’

⁴⁹ Kòyò pṳ̂̌tôpwa̤ bǎ ma̤mṳ̂̌plî gesô̌ a kû̌ mî̌, pô̤̌khô kòyò lṳhtò̌tòhtò̌ ta̤phû̌ta̤wè̤ dě a ma̤mṳ̂̌plî lû̌û kû̌ îsǎ nupě.

⁵⁰ “Îsǎ numî̌ awô̌ pwǎ bǎbǎkǎlè a kè̌ shukaha petô̤̌ hî̌nu ma̤shukaha gesô̌ anu anǐ̤ petô̤̌. Sî bǎ ô̌ǐ lô̌khô îsǎ, îsǎ mî̌ ta̤bǒshû̌khǎkhôǐ lû̌û tôpwa̤ kû̌ tôpwa̤, htokhôtô̤̌ ô̌cuô̌plǒ mô̤klaǐ pû lû̌û tôpwa̤ kû̌ tôpwa̤ nu nî̌꤮.”