Mǎ̤riko 7 - Kawyaw New Testament

Yeshǔ sû̌ǐ kòyò kû̌ ta̤mṳ̂̌plî awe̤akè kû̌ ta̤mṳ̂̌plî tô̤̌ awe̤akè

¹ Bǎnu akha pwa̤sû̌ǐ ta̤sû̌ta̤tòwò asara kû̌ Pharishè̌phû̌ dǒ a ô̌ lô̌khô dǒ Wî̤̌yarǔshôle akû hè tokhlǒnu, a hè ô̌plǒô̌cu te̤we̤ bò bǎ Yeshǔ kòshî̌.

² Asî kè̌shǐ Běcǎ akhôphijǎ tokhlǒ ǎshǎǎ dě a cǔbò gû̌ kòyò acǔde tô̤̌. Amûasǎ mî̌ asî sǎyṳ hî̌ kû̌ pô̤̌ ta̤cubucaba alǎ̤klô ô̌ kû̌ bǎ ǎ shǎǎ khôtô̤̌ akha tôbǎ cǔbò wǐ cǔde bǎbǎkǎlè akhôphijǎ tokhlǒ ma̤gû̌ pô̤̌nu tô̤̌.

³ (Ma̤titèmî̌ Pharishè̌phû̌ tokhlǒ kû̌ lǒ̤꤮ bò Yǔdaphû̌ tokhlǒnu a bǎ cǔbò lô̌khô acǔde dě asî phî̌ǎ nô̌ shǎǎshǎô pwǎ, asî pṳ̂̌měǐ lô̌khô asî phiphu lǎ̤klô tokhlǒ.

⁴ Asî kè̌ ô̌ dǒ klǎ ge dě a kè̌ shǔbòmò̌ acǔde tô̤̌ hî̌nu, asî ǎô tocǒ꤮ tô̤̌. Htokhôtô̤̌ asî pṳ̂̌měǐ pe lǎ̤klô dǒ ashǔshawa̤ tokhlǒ nî̌ a ô̌ dû̌ pe. Kwè̌꤮ mî̌titè nu dě, asî cǔbò wô̌ shiba tokhlǒ, gopo̤ tokhlǒ, kû̌ batṳ̌balě tilibò sîtokhlǒ).

⁵ Htodě Pharishè̌phû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ gwè̌ Yeshǔ kû̌, “Nakhôphijǎ tokhlǒ dě a gû̌ma̤ pô̤̌ phiphu lǎ̤klô ta̤sû̌ǐnu tô̤̌ ya? Bǎ asî ǎshǎôshi akhanu, a cǔbò kòyò acǔde tô̤̌ ma̤titè?”

⁶ Yeshǔ hî̌shěshu asî kû̌, “Piwi̤pèshè Khûyashǎya hî̌nǎ sîwe̤sîkè numî̌ a tôtǐ꤮ hǒ. Sî mî̌ pwa̤ jî̌cǒjî̌tè̤ anǎ̤ tokhlǒ. Piwi̤pèshè Khûyashǎya wě̤ dǒ awǐkha dě a hî̌ kû̌, Cǒmara hî̌ kû̌, ‘kòyò hǒtokhlǒ bè̌dubè̌nǎ̤ lô̌khô he kû̌ akhû̌phě bǎbǎkǎlè asǎphlǒ numî̌ a ô̌tepheyî̤ kû̌ he pwǎ.

⁷ Asî cabahtò̌ henu yô̤̌mṳ̂yô̤̌sǎ ô̌ tocǒ꤮ tô̤̌. Asî sû̌ǐtòwòǐ pwǎ kòyò kû̌ kòyòhǎkhû̌phû̌ alǎ̤klô tokhlǒ pwǎ bǎbǎkǎlè a hî̌ tûû̌ lô̌khô kû̌ a sû̌ǐtòwòǐ kòyò kû̌ Cǒmara a ta̤mǎlò̤ tokhlǒ.’

⁸ Sî dò̌tephe khô̌kè Cǒmara a ta̤mǎlò̤ tokhlǒ dě sî pṳ̂̌mě ǐtûû̌ lô̌khô kòyòhǎkhû̌phû̌ a lǎ̤bû̌lǎ̤klô tokhlǒ.”

⁹ Htodě a hî̌ asî kû̌, “Pô̤̌khô sî gǔ pṳ̂̌mě ǐtûû̌ sî lǎ̤klô ta̤sû̌ta̤tòwò tokhlǒ ayanudě, Cǒmara ta̤mǎlò̤ tokhlǒnu, sî lîmò htè̌shěshu jò mî̌ca.

¹⁰ Khûmṳ̂shě hî̌ kû̌, ‘bè̌dubè̌nǎ̤ namǒ̤napha nî̌꤮,’ dě ‘kòyò dǒ a ǐsho amǒ̤apha tôpwa̤pwa̤nu bǎ ma̤sikè yǎ꤮.’

¹¹ Bǎbǎkǎlè sî nohî̌ kòyòmǒ̤pha kû̌, ‘Ǒ mǒ̤, ǒ pha, ruhta dǒ he bǎ kè̌ǐ ma̤jè̌ kû̌ sînu a ô̌ kǎ, bǎbǎkǎlè he gǔ bè̌ǐ yǎ kû̌ Cǒmara ta̤ma̤lṳ,’ Sî nohî̌ kòyò kû̌ amǒ̤apha pô̤̌nu,

¹² Htodě sî noma̤jè̌ kè̌pǒ̤ǐ pe asî kû̌ amǒ̤apha tô̤̌.

¹³ Pô̤̌nu akhû̌akhî sî ma̤pî̌kèbò Cǒmara alě̤ayô̤̌ hî̌nǎ nutokhlǒ hǒ, ma̤titè̌hî̌dě sî pṳ̂̌měǐ sî lǎ̤klô dě sî ǐlò̤ tṳtṳ̌ kòyò. Sî ma̤sô̌sô̌ pô̤̌o dǒ ashǔshawa̤ tokhlǒnu a ô̌ dû̌pe.”

¹⁴ Dě Běcǎ Yeshǔ kaǎ hèphǔ kòyò saprṳ̂saphǎ dǒ akòshî̌ dě a hî̌ asî kû̌, “Pṳ̂̌tôpwa̤ ganǎ̤de lô̌khô he hî̌ sînu dě jî̌pwǐ̤ kè̌lǎ sî̌ya tě̤tě̤mè̤̌mè̤̌ lô̌khô.

¹⁵ Ta̤ dǒ a ô̌ dǒ akhlo dě a hènṳ̌ dǒ kòyò tôpwa̤pwa̤ akû tokhlǒ nî̌ a ma̤ phû̌mò̤̌ jò lû̌û tô̤̌, bǎbǎkǎlè ta̤ dǒ a ô̌ dǒ kòyò sǎphlǒkû dě a hǎhtò̌ tokhlǒ numî̌ a ma̤ phû̌mò̤̌ lû̌ pwǎ.”

¹⁶ (“Lǒ̤꤮ bò sî hǒtokhlǒ, sî kè̌ sǎyṳ sî̌ya dě, sî ganǎ̤de lô̌khô pû.”)

¹⁷ Yeshǔ hǎhtò̌cû̌ tephekè dǒ kòyò saprṳ̂saphǎkla dě bǎ a cû̌nṳ̌ dǒ hǐdǒkû akhanu, akhôphijǎ tokhlǒ gwè̌ lû̌ yô̤̌sǎkhěkhô̌ amûasǎ tokhlǒ.

¹⁸ Dě a hî̌ bǎ asî kû̌, “Sî sî̌ya gû̌ kòyò tô̤̌ ya? Sî tôbǎ sî̌ya kû̌, shǎǎ titètè̌꤮ bǎbǎ, a ô̌ dǒ akhlo dě a hènṳ̌ dǒ kòyòkû tokhlǒ numî̌, a ma̤ phû̌mò̤̌ jò tô̤̌.

¹⁹ Ma̤titèhî̌dě shǎǎ hǒonu, a nṳ̌ dǒ sǎphlǒkû mè̤̌tô̤̌, a nṳ̌ dǒ phutôgô̌kû dě a bǎ cû̌ sûhtò̌kè lû̌û dǒ dokhlo pwǎ.” (A hî̌ pô̤̌hî̌numî̌, a sǎyṳ hî̌ kû̌, shǎǎ titètè̌꤮ bǎbǎ, ǎ mî̌ a nǐ̤ bòpwǎ.)

²⁰ Htodě a hî̌ kû̌, “Ta̤ dǒ a ô̌ bǎ kòyò sǎphlǒkû dě a hǎhtò̌ tokhlǒ numî̌ a ma̤ phû̌mò̤̌ jò lû̌û pwǎ.

²¹ Ta̤ dǒ a ô̌ dǒ kòyò sǎphlǒkû hǎhtò̌ tokhlǒ numî̌ amè̤̌kû̌ ta̤gènè̤ phû̌mò̤̌shî̌htô sî, cû̌sǔnṳ̌plěnṳ̌ pwa̤mǒ̤pwa̤khû ô̌pili̤, ǎhǔǎhî̌, ma̤si kòyò, cû̌sǔnṳ̌plěnṳ̌ kòyòphû̌kòyòma,

²² Ta̤sǎyṳsǎbǎ tûlû̌ ta̤, ta̤sǎkhěkhû̌khwè kòyò, tili̤tôlô̌ kòyò, ma̤ putupatǎ pǔlǔpǐlî anǎ̤, sǎkhwè̌nǐ̤kòyòta̤, pîjî̌shǐcô̌ kòyò, ta̤bè̌dû̌bè̌pwǎ̤nǎ̤, ta̤gènè̤ shapwǎ̤ tô̤̌dě ma̤ phô̌phô̌.

²³ Lǒ̤꤮ bò ta̤ dǒ awô̌tô̤̌ tokhlǒnu a ô̌ dǒ kòyò sǎphlǒkû hǎhtò̌ dě a ma̤ phû̌mò̤̌ kòyò pwǎ.”

Yǔdaphû̌ mè̤̌tô̤̌ tôpwa̤ yṳ̌ǎ kû̌ Yeshǔ gǔ ma̤jè̌ yǎ

²⁴ Yeshǔ hǎhtò̌cû̌kè kû̌ gûlǎ̤ bǎnutûkû dě a hǎhtò̌cû̌tǒ̤ dǒ gûlǎ̤ tôkû dǒ aphǔ kû̌ Wî̤̌tǔrǔ kû̌ Wî̤̌shǐdṳ̂. Htodě a cû̌nṳ̌ dǒ hǐtômè akû dě a sǎyṳ dǔsî̌ya anǎ̤ kû̌ kòyò saprṳ̂saphǎ nutokhlǒ tô̤̌ bǎbǎkǎlè a ô̌û̌ bǐjò tô̤̌.

²⁵ Pwa̤mǒ̤ tôpwa̤ ganǎ̤de Yeshǔ awe̤akè kû̌ taplǎnô̤̌ a hè dô̌gînî̤û̌lò̤ caba dǒ Yeshǔ khò̌lôpô̤̌kòshî̌. Dě pwa̤mǒ̤ tôpwa̤ nî̌ a phû̌pwa̤mǒ̤ pî̌tî̌phû̌ ô̌ tôpwa̤ dě khînǎkhîno ma̤bǎ yǎ.

²⁶ Pwa̤mǒ̤ hǒtôpwa̤ mî̌ Yǔdaphû̌ mè̤̌tô̤̌, a ô̌ dǒ Shurǐ gǎmǒ̤ alǎ̤, Bûnǐke gǎkû, dě a ô̌ kû̌ a phû̌pwa̤mǒ̤ tôpwa̤. Dě a hè kwisǎyṳ gutṳ̌glǎ Yeshǔ kû̌ a gǔ wṳ̂̌hǎhtò̌kè bǎ khînǎkhîno dǒ a phû̌pwa̤mǒ̤ nu akû.

²⁷ Htodě Yeshǔ hî̌ a kû̌, “Phû̌ tokhlǒnu a tôbǎ ǎkǒôbe wǐ, pa phî̌kè phû̌ tokhlǒ ashǎǎ dě dǐǎ kû̌ shǐ tokhlǒ numî̌ a gwǎtô̤̌.” (Yeshǔ hî̌ kû̌ phijǎphû̌ nu amûasǎ mî̌ Yǔdaphû̌ dě shǐ a hî̌ numî̌ Yǔdaphû̌ mè̤̌tô̤̌ tokhlǒ).

²⁸ Bǎbǎkǎlè a hî̌shěshu Yeshǔ kû̌, “Amè̤̌kǎ Běcǎ, shǐ dǒ a ô̌ dǒ dîjowǎ̤ alǎ̤ tokhlǒnu a ǎnô̌ pwǎ phû̌ tokhlǒ ashǎǎ lò̤gǔlò̤wṳ̂̌ nutokhlǒ pwǎ.”

²⁹ Yeshǔ hî̌ lû̌ kû̌, “Na hî̌shěshu getîkhî ta̤hǒo awô̌ jî̌꤮ lî akhû̌akhî, na ge dǒ hǐ mî̌ anǐ̤ hǒ. Khînǎkhîno ô̌ dǒ na phû̌pwa̤mǒ̤ akû nutôdo hǎhtò̌cû̌kè hǒ.”

³⁰ A ge dǒ ahǐ dě a kè̌shǐ bǎ a phû̌pwa̤mǒ̤ hǎmôô̌ lò̤ dǒ lǎ̤dakhû̌ dě a sî̌ya kû̌ khînǎkhîno hǎhtò̌kè dǒ lû̌kû hǒ.

Yeshǔ ma̤hǎmǎbǎ kòyò nò̌kukoo dě a pè̌ tôpwa̤

³¹ Htodě Yeshǔ ô̌phǔte̤we̤ bǎ Wî̤̌tǔrǔ nu dě a nṳ̌ cû̌tûlû̌ Wî̤̌shǐdṳ̂, htodě a gesô̌ dǒ Galilè̤̌ shidû̌shite̤we̤. Shidû̌shite̤we̤ nu a ô̌phǔ kû̌ Wî̤̌kòshî̌ dǒ kòyò kaǎ kû̌ Dekapòlǐ nu tôgǎ akû.

³² Kòyò tokhlǒ kaǎhènǐ̤ kòyòpha nò̌kukoo dě apè̌asho hî̌bǎ hǎhtò̌ pò̤̌yǎ̤ tôpwa̤ dǒ Yeshǔ a ô̌ dě asî kwisǎyṳ gutṳ̌glǎ Yeshǔ dǒ a gǔ dò̌htò̌ acǔde dǒ lû̌lô̤.

³³ Dě Yeshǔ kaǎhtò̌ tephecû̌khô̌kè tûû̌ kòyòpha nutôpwa̤ dǒ kòyò saprṳ̂saphǎkla dě a shû̌nṳ̌ acǔmṳ̌ dǒ kòyòpha nutôpwa̤ a nò̌kukû dě a htǔplî̌cô̌ aplî̌shi kû̌ acǔmṳ̌ tômè dě a tô̌ba kû̌ kòyòpha nutôpwa̤ aplî̤.

³⁴ Htodě a kè̌htò̌ dǒ mǒkhû̌ dě a sǎbò̌htò̌, dě a hî̌ lû̌ kû̌, “Ěphǎsǎ!” amûasǎ mî̌ “Lîhtò̌mò̌!” nupwǎ.

³⁵ Dě kòyòpha nutôpwa̤ nò̌ku phlôtîkhîsô̌ dě aplî̤jǎ gesô̌ dě a hî̌bǎjò wô̌꤮ gesô̌.

³⁶ Yeshǔ hî̌ asî kû̌ shôbǐǐ bǎ tǎ̤ kòyò tôpwǎ̤ tǎ̤mǎ̤ nî̌꤮, a hî̌ asî pô̤̌nu bǎbǎkǎlè Yeshǔ nohî̌lṳ̌ tô̤̌ shû̌shû̌, asî lî̤̌꤮ hî̌lṳ̌ shû̌shû̌.

³⁷ Dě lǒ̤꤮ bò kòyò dǒ a ganǎ̤de tokhlǒnu, a ǒò̌ kiti̤kaa lô̌khô jî̌꤮ lî. Dě asî hî̌ lô̌khô kû̌, “Lǒ̤꤮ bò a ma̤ta̤ tokhlǒ numî̌ awô̌ gutṳ̌! kòyò nò̌kukoo mî̌ a ma̤phlôtîkhî, kòyò pè̌ mî̌ a ma̤hî̌bǎ jòwô̌ gesô̌ bǎ kòyò,” a hî̌ lô̌khô pô̤̌nu.