Mǎ̤riko 5 - Kawyaw New Testament

Yeshǔ ma̤hǎmǎ bǎ kòyòpha tôpwa̤ dǒ khînǎ dò̌ yǎnu

¹ Yeshǔ kû̌ akhôphijǎ tokhlǒ cû̌tǒ̤ dǒ shikoǒdû̌ lô̤̌bò̌ Garasaphû̌ tokhlǒ a shigǎkû nu.

² Bǎ a ô̌ dǒ sǒkhlikû hǎhtò̌ akhanu, kòyòpha dǒ khînǎ dò̌ yǎ tôpwa̤nu a ô̌ dǒ lṳ̌kû hǎhtò̌ dě a hǎhtò̌cû̌ kè̌shěshu kû̌ Yeshǔ.

³ Kòyòpha hǒtôpwa̤ nî̌ a cû̌ô̌ pwǎ bǎ khokû kòyò lǎ̤lǔǐlṳ̌ lṳ̌gûlǎ̤ nu pwǎ. Dě kòyò comě pè̤̌ lû̌ tôpwǎ̤꤮ tô̤̌, kòyò comě yǎ kû̌ sǒpli̤tè̤glè kǎlè a pè̤̌tô̤̌.

⁴ Kòyò comě taga lû̌cǔde kû̌ sǒpli̤tè̤glè bǎbǎkǎlè a htò̌tṳ̌kè. Akhò̌lôpô̤̌ dě kòyò comě kû̌ sǒpli̤tè̤glè, bǎbǎkǎlè a cî̌tṳ̌kè pwǎ. Dě kòyò dǒ a ma̤pè̤̌ lû̌ nu, a ô̌ tôpwǎ̤꤮ tô̤̌.

⁵ Bǎ a ô̌ dǒ khokû lṳ̌gûlǎ̤ akha, kû̌ bǎ a ô̌ dǒ shô̌kû akhanu, a yî̤̌kǒyî̤̌sa dě a ma̤shama̤htò taga tûû̌ sô̌ bò anǎ̤ kû̌ lǒ̤ pṳ̂̌taplǎ.

⁶ Bǎ a kè̌shǐcû̌ tûcû pepwǎ Yeshǔ akhanu, a khlè̌hètô dǒ lû̌ô̌ dě a hè dô̌gînî̤lò̤ dǒ alô̤mô̤̌.

⁷ Dě a kaǎgǔhtò̌ dě a hî̌ kû̌, “Ta̤dû̌ta̤htû gutṳ̌ Cǒmara aphû̌khû Yeshǔ꤮ na glè̌ hèma̤ kwè̌꤮ he titè? Olò̤ he dǒ Cǒmara ami̤kû kû̌, ma̤jî̌ma̤jû̌ tǎ̤ he tǎ̤mǎ̤ nî̌꤮.”

⁸ Ma̤titèmî̌ Yeshǔ hî̌hto lû̌ kû̌, “Khînǎkhîno, hǎhtò̌cû̌ tephekè dǒ pwa̤khû nutôpwa̤ alô̤,” a hî̌hto lû̌ pô̤̌nu hǒ.

⁹ Yeshǔ gwè̌ yǎ kû̌, “Nami̤ kû̌ mò̌pè?” Dě a hî̌shěshu kû̌, “Hemi̤ kû̌ Lě̤ku, ma̤titè̌hî̌dě pa ô̌wô̤̌ô̌plṳ̂,” a hî̌shěshu pô̤̌nu.

¹⁰ Pô̤̌khô Yeshǔ gǔ wṳ̂̌hǎhtò̌kè asî tô̤̌nu, dě nohǎhtò̌cû̌ô̌kè asî dǒ gǎkhlo tô̤̌nu, asî kwisǎyṳ gutṳ̌glǎ Yeshǔ.

¹¹ Bǎnukha, htô̌ tôprṳ̂ konû̌ǎ te̤we̤phǔ ashǎ bǎ khôlôlô̤nu.

¹² Khînǎkhîno nutokhlǒ kwisǎyṳ Yeshǔ kû̌, “Nocû̌nṳ̌ ô̌ pû pa dǒ htô̌ nutokhlǒ akû dě plûnṳ̌ pû pa dǒ htô̌ nutokhlǒ akû nî̌,” a kwisǎyṳ lû̌ pô̤̌nu.

¹³ Htodě Yeshǔ nohǎhtò̌cû̌ asî, dě asî hǎhtò̌cû̌kè dǒ kòyòpha nutôpwa̤ anǎ̤lô̤ dě a cû̌nṳ̌ô̌kè dǒ htô̌ nutûprṳ̂ akû. Htô̌ nutûprṳ̂ mî̌ a ô̌ a do ginǐ̤rǐ dě a pě̤lò̤tě̤kè dǒ gòpò̤̌lô̤ dě a lò̤tě̤cǔ sikè bò dǒ shidû̌shite̤we̤kû.

¹⁴ Pwa̤kè̌pǒ̤ htô̌ nutokhlǒ khlè̌ge shôbǐǐlṳ̌ peshe cû̌ bǎ bò kòyò dǒ Wî̤̌kû kû̌ dophû̌shô̌phû̌ tokhlǒ akû kû̌ ta̤we̤ta̤kè hǒtokhlǒ. Dě a ma̤kwè̌ anǎ̤ hî̌tènu kòyò hèkè̌ lô̌khô bǎnu.

¹⁵ Dě asî hè dǒ Yeshǔ a ô̌ dě a kè̌shǐ kòyòpha dǒ khînǎ hǎhtò̌cû̌kè dǒ akû nutôpwa̤ hǎnòò̌ bǎnu dě a kuhtò̌sô̌htò̌ wô̌gesô̌ aje dě asǎphlǒ wô̌tîkhî sô̌. Kòyò tokhlǒ kè̌shǐ yǎ dě a ǐsha bò lû̌lǎ̤.

¹⁶ Kòyò dǒ a kè̌shǐ khînǎkhîno hǎhtò̌cû̌kè dǒ kòyòpha nutôpwa̤ akû kû̌ htô̌ nutokhlǒ ma̤kwè̌ anǎ̤ hî̌tè nu, asî cû̌ shôbǐǐ bǎ bò kòyò dǒ ashǔshawa̤.

¹⁷ Kòyò tokhlǒ sahtò̌ kwisǎyṳ Yeshǔ kû̌ a gǔ hǎhtò̌cû̌ tephekè kû̌ asî gǎkû bǎnu.

¹⁸ Bǎ Yeshǔ nṳ̌ dǒ sǒkhlikû akhanu, kòyòpha dǒ khînǎ hǎhtò̌cû̌kè dǒ akû nutôpwa̤ kwisǎyṳ lû̌ kû̌, “Khòsǎdô kaǎcû̌ nṳ̌dô̌ he.”

¹⁹ Bǎbǎkǎlè Yeshǔ kaǎnṳ̌ yǎ tô̤̌, a hî̌ lû̌ kû̌, “Tô̤̌, ge dǒ na hǐnu dě gehî̌lṳ̌ bǎ pû na pṳ̌wè̤̌mǒ̤pha kû̌ Běcǎ ma̤wô̌ bǎ jò na hî̌tènu kû̌ a ta̤sǎyṳgwèbǎǐ na hî̌tè nu nî̌꤮,” a hî̌hto lû̌ pô̤̌nudě,

²⁰ Kòyò dǒ khînǎ hǎhtò̌cû̌kè dǒ lû̌kû nutôpwa̤ hǎhtò̌cû̌ dě a sahtò̌ cû̌ shôbǐǐ bǎ kòyò pṳ̂̌todo dǒ gǎtôgǎ kòyò kaǎ kû̌ “Dekapòlǐ” akû dě Yeshǔ ma̤ bǎ kwè̌꤮ a hî̌tènu kû̌ kòyò lǒ̤꤮ bò ǒò̌ kiti̤kaa bò kwè̌ hî̌tènu a cû̌ shôbǐǐlṳ̌ bǎ bò kòyò bǎnu.

Pwa̤mǒ̤ dǒ a ta̤sha ô̌ tôpwa̤ kû̌ phijǎ pwa̤mǒ̤phû̌ tôpwa̤ si awe̤akè

²¹ Bǎ Yeshǔ getîkhîsô̌ dǒ shikoǒdû̌ lô̤̌bò̌ tôkhô kû̌ sǒkhli akhanu, kòyò saprṳ̂saphǎ hè ô̌plǒô̌cu ô̌wô̤̌ dǒ shikoǒdû̌ htu nu.

²² Dě ta̤cabahǐ ikǒlǒkòdû̌ tôpwa̤, ami̤ kû̌ Phaya̤irǔ hèkè̌shǐ Yeshǔ dě a dô̌gînî̤lò̤ dǒ akhò̌lô̤pô̤̌ kòshî̌.

²³ Dě a kwisǎyṳ lû̌ kû̌, “He phû̌pwa̤mǒ̤ tôpwa̤ glè̌ sihǒ dě pô̤̌khô ata̤sha gǔ hǎmǎkè dě a gǔ ô̌htûpwa̤ nu, cû̌ dò̌htò̌ pû bǎ he na cǔde dǒ alô̤.”

²⁴ Dě Yeshǔ gû̌ge kû̌ yǎ. Kòyò saprṳ̂saphǎ tîdî̌tòshò̌ cû̌ bò kû̌ Yeshǔ akò.

²⁵ Bǎnu akla pwa̤mǒ̤ dǒ a khòbǎ ta̤shasǐlò̤ dǒ ayî̤ shǐginǐ̤něnu a ô̌ tôpwa̤.

²⁶ Ta̤khû̌sara pṳ̂̌pwa̤ kè̌ǐma̤ǐ lû̌û bǎbǎkǎlè a yǎkhè̌ tô̤̌. A yabǎ tûû̌ anǎ̤ dě aruahta hǎbòkè bǎbǎkǎlè a yǎkhè̌hè lû̌ tô̤̌, ata̤sha nî̌ sǔ htûhtò̌ kû̌ sǔ a ma̤shû̌hè pwǎ.

²⁷ A ganǎ̤de Yeshǔ awe̤akè dě a tîdî̌hènṳ̌ dǒ kòyò ô̌wô̤̌ô̌prṳ̂kla dě a hètǒ̤ dǒ Yeshǔ nô̌kò dě a hètô̌ lû̌ jejû.

²⁸ A hî̌ anǎ̤ kû̌, “He kè̌ tô̌bǎ pwǎ ajejû nupwǎ mî̌ he ta̤shasǐlò̤ nî̌ a gǔ hǎmǎ pě,” a hî̌ dě,

²⁹ Taplǎnô̤̌ a sǐlò̤ ô̌kǔ dě a sî̌ya tûû̌ anǎ̤ kû̌ ata̤sha nu a hǎmǎkèhǒ.

³⁰ Hǒtaplǎdě Yeshǔ sî̌ya lò̤tûû̌ anǎ̤ kû̌ a ta̤pô̤ta̤phǎ hǎhtò̌cû̌kè dǒ anǎ̤lô̤. A htû̌tiwǐ anǎ̤ dǒ kòyò ô̌wô̤̌ô̌prṳ̂kla dě, a gwè̌ kòyò kû̌, “Mò̌pè tô̌bǎ he jejû ya?”

³¹ Dě akhôphijǎ hî̌shěshu lû̌ kû̌, “Na kè̌shǐ tûû̌ kû̌ kòyò ô̌ te̤we̤plǒte̤we̤phǎ tîdî̌tòshò̌ bò na hǒ dě ma̤titèdě na cû̌gwè̌ tǒ̤ kû̌, ‘mò̌pè tô̌bǎ he jejû ya hî̌tè?’”

³² Pô̤̌khô a gǔ kè̌shǐ kòyò dǒ a hè tô̌bǎ lû̌ nutôpwa̤ dě a kè̌le̤kè̌ge pe tûû̌.

³³ Dě pwa̤mǒ̤ nutôpwa̤ nî̌ bǎ a hètô̌bǎ lû̌ jejû akha, ta̤htûhtò̌ anǎ̤ kû̌ a hî̌tènu a sî̌yahèlò̤ ǐtûû̌ anǎ̤ akhû̌akhî, a ǐsha gònò̤̌gòglè dě a hèdô̌gînî̤û̌lò̤ dǒ Yeshǔ lô̤mô̤̌ dě a shôbǐǐlṳ̌ cǒtè̤ bò Yeshǔ.

³⁴ Dě Yeshǔ hî̌ lû̌ kû̌, “Phû̌pwa̤mǒ̤꤮, na ta̤yṳ̌ta̤nǎ̤ nî̌, a ma̤hǎmǎkè na ta̤shahǒ, gemô̤mô̤ gewô̌wô̌ pû nî̌꤮, na ta̤sha hǒo a hǎmǎ lò̤tûû̌hǒ.”

³⁵ Bǎ Yeshǔ hî̌bǎpepwǎ akhanu, kòyò tokhlǒ ô̌ dǒ Phaya̤irǔ dǒ a htû ta̤cabahǐ ikǒlǒkòdû̌ nutôpwa̤ ahǐ dě ahè, dě a hèpwe̤ǐ bǎ Phaya̤irǔ kû̌, “Naphû̌mǒ̤ sikèhǒ. Dě sî cû̌ma̤shû̌shǎ ma̤dǐdòpe tǎ̤ sara tǎ̤mǎ̤?”

³⁶ Bǎbǎkǎlè Yeshǔ ganǎ̤de asî ata̤hî̌bǎ tô̤̌. A hî̌ ta̤cabahǐ ikǒlǒkòdû̌ nutôpwa̤ kû̌, “Bǎyô̤ tǎ̤mǎ̤, tûlû̌ yṳ̌ǎ henu nî̌꤮.”

³⁷ Htodě a kaǎnṳ̌ pwǎtǒ̤ Khûpetarǔ, Khûya̤kû kû̌ apṳ̌ Khûyṳ̂ha nô̤̌pwǎ. A kaǎnǐ̤ kòyò dǒ ashǔshawa̤ tôpwǎ̤꤮ tô̤̌.

³⁸ Asî cû̌tǒ̤ dǒ ta̤cabahǐ ikǒlǒkòdû̌ nutôpwa̤ ahǐ dě a kè̌shǐ kòyò ma̤pwe̤nǎ̤sǎgô̌ pi̤ti̤pṳ̂tṳ̂ tokhlǒ, kòyòhǎkòyòwô tokhlǒ.

³⁹ Bǎ a nṳ̌ dǒ hǐdǒkû akha, a hî̌ asî kû̌, “Sîhǎsîwô ma̤pwe̤nǎ̤sǎgô̌ pi̤ti̤pṳ̂tṳ̂ ma̤titè? Phijǎpwa̤mǒ̤phû̌ nutôpwa̤ nî̌ a si bǎtô̤̌ a hǎmôô̌nṳ̌ shepe̤ pwǎ.”

⁴⁰ Dě asî sǎyǎ̤ bò Yeshǔ. Htodě Yeshǔ wṳ̂̌hǎhtò̌kè bò kòyò nutokhlǒ dǒ akhlo dě a kaǎnǐ̤ phijǎpwa̤mǒ̤phû̌ nutôpwa̤ amǒ̤apha kû̌ akhôphijǎ sò̌su dě a genṳ̌ dǒ phijǎphû̌ nutôpwa̤ a ô̌.

⁴¹ Dě a pṳ̂̌mě phijǎphû̌ nutôpwa̤ acǔde dě a hî̌ lû̌ kû̌, “Tali takumi” (amûasǎ mî̌, “Ǒ phijǎpwa̤mǒ̤phû̌꤮ he hî̌ na ihtǒmò̌꤮.”)

⁴² Dě taplǎnô̤̌ phijǎpwa̤mǒ̤phû̌ a ô̌ shǐginǐ̤ně nutôpwa̤ ihtǒcû̌ dě asî ǒò̌ kiti̤kaa jî̌꤮ lô̌khô.

⁴³ Dě Yeshǔ mǎnǎ tě̤tě̤mè̤̌mè̤̌ asî kû̌, tôbǎ shôbǐǐlṳ̌ tǎ̤ kòyò tôpwǎ̤꤮ tǎ̤mǎ̤, htodě a hî̌ asî kû̌, “Dǐǎ pè̤̌ phijǎpwa̤mǒ̤phû̌ nutôpwa̤ lǎ̤ǎlǎ̤ô tocǒcǒ nî̌꤮.”