Mǎ̤riko 2 - Kawyaw New Testament

Yeshǔ ma̤hǎmǎbǎ kòyò nǎ̤sitôkhô

¹ Nô̌kò ginǐ̤suni̤nu Yeshǔ gesô̌ dǒ Wî̤̌kaperanò̤ akû dě kòyò tokhlǒ ganǎ̤de lô̌khô kû̌ a ô̌ dǒ hǐdǒkû.

² Pô̤̌nudě kòyò hè tîdî̌tòshò̌ dû̌ tûlû̌shû̌lě dě bǎ takhakhlo pwǎnu dě agûlǎ̤ ô̌ pe tûkû꤮ tô̤̌. Yeshǔ shôbǐǐlṳ̌ sû̌ǐtòwòǐlò̤ bǎ asî kû̌ Cǒmara alě̤ayô̤̌ tokhlǒ.

³ Bǎnu akha pwa̤khû sò̌lǐ̤ ò̌hènṳ̌ kòyònǎ̤ si tôkô̌ke dǒ Yeshǔ a ô̌ tôpwa̤.

⁴ Bǎbǎkǎlè kòyò ô̌dû̌ tûlû̌shû̌lě akhû̌akhî, asî hènṳ̌phǔjò pe dǒ Yeshǔ a ô̌ tô̤̌ dě a htò̌ ma̤phlô gukhû̌tadǎkhû̌ bǎ Yeshǔ ô̌ akhû̌nu dě a jèlò̤tě̤ kòyò sitôkô̌ke nutôpwa̤ kû̌ hujǒ.

⁵ Bǎ Yeshǔ kè̌shǐ asî a ta̤yṳ̌ta̤nǎ̤ ô̌ pô̤̌nu dě a hî̌ kòyò si tôkô̌ke nutôpwa̤ kû̌, “He phû̌pwa̤khû he plûkè na ta̤sǔ hǒ,” a hî̌ lû̌ pô̤̌nu.

⁶ Bǎnu akha pwa̤sû̌ǐ ta̤sû̌ta̤tòwò asara tokhlǒ hǎnòò̌ lô̌khô bǎnu dě a gènè̤ lô̌khô dǒ a sǎphlǒkû kû̌,

⁷ “Kòyò hǒtôpwa̤ a cû̌ hî̌tǒ̤ pô̤̌o ma̤titè? A hî̌bǎsǔ hî̌bǎplěkè Cǒmara hǒ. Mò̌pè tôpwa̤ glè̌ plûkè jò ta̤sǔ pě? Pwa̤ plûkè jò ta̤sǔ mî̌ Cǒmara tôpwa̤nô̤̌ pwǎ.”

⁸ Tôplǎnô̤̌ Yeshǔ sî̌ya asî ta̤gènè̤ dǒ sǎphlǒkû dě a hî̌ asî kû̌, “Sî cû̌gènè̤ tǒ̤ lô̌khô dǒ sî sǎphlǒkû pô̤̌numî̌ ma̤titè?

⁹ He hî̌ kòyò sitôkhô tôpwa̤ kû̌, ‘he plûkè na ta̤sǔta̤plě hǒ’ mè̤̌tô̤̌dě ‘ihtǒ phî̌nṳ̌ na khlô̌lǎ̤danu dě cû̌ mò̌’ hî̌mò̌mî̌ ayûkhlo bǎtè tocǒya?

¹⁰ Bǎbǎkǎlè Kòyòphû̌khû mî̌ he, ma̤pô̤̌ sî gǔ sî̌ya lô̌khô kû̌ dǒ hǎkhû̌nu, he ô̌ kû̌ ta̤siwi̤sòwò̤ dǒ he bǎ plûkè kòyò ta̤sǔta̤plě tokhlǒnudě, he gǔ dǔlè̌lṳ̌ bǎ sî,” a hî̌ htopô̤̌nudě, a hî̌ kòyò sitôkô̌ke tôpwa̤ kû̌,

¹¹ “He hî̌ na, ihtǒ tûlûnṳ̌ na khlô̌lǎ̤da nudě gemò̌ dǒ na hǐnu.”

¹² Dě taplǎnô̤̌ a ihtǒ tûlûnṳ̌ a khlô̌lǎ̤da dě a hǎhtò̌cû̌ dǒ kòyò lǒ̤bò a lô̤mô̤̌. Kòyò pṳ̂̌tôpwa̤ ǒò̌ kiti̤kaabò dě htû̌sò̌htò̌ lô̌khô Cǒmara dě a hî̌ lô̌khô kû̌, “Ta̤ma̤anǎ̤ pô̤̌onu, pa kè̌shǐbǎnô̌ tôkhò̌꤮ tô̤̌,” a hî̌ lô̌khô pô̤̌nu.

Yeshǔ kaǎ Khûle̤wǐ

¹³ Yeshǔ hǎhtò̌cû̌ tîkhîsô̌ dǒ Galǐlè̤̌ shikoǒ kòshî̌ dě kòyò saprṳ̂saphǎ hè ô̌te̤we̤ bò kè yǎ dě a sahtò̌ sû̌ǐtòwòǐ sô̌ asî bǎnu.

¹⁴ Bǎ a cû̌ akhanu, a kè̌shǐ PhaAlaphè̌ aphû̌ Khûle̤wǐ. A mî̌ pwa̤kwita̤kûta̤mṳ̂̌ tôpwa̤. A kè̌shǐ Le̤wǐ hǎnòò̌ dǒ lǎ̤kwi ta̤kûta̤mṳ̂̌ hǐkû dě Běcǎ Yeshǔ hî̌ yǎ kû̌, “Gû̌kû̌ hekò,” dě Khûle̤wǐ ihtǒ gû̌cû̌kû̌ akò.

¹⁵ Bǎ Yeshǔ kû̌ akhôphijǎ ǎdî lṳmṳ̌hǎta̤ǎ dǒ Khûle̤wǐ hǐ akha, pwa̤kwi ta̤kûta̤mṳ̂̌ tokhlǒ kû̌ pwa̤ma̤sǔphû̌ tokhlǒ ǎ ô kû̌ asî, ma̤titè̌hî̌dě kòyò dǒ a gû̌ Yeshǔ akò tokhlǒnu, a sô̌sô̌pwǎ kû̌ pwa̤ma̤sǔphû̌nu a ô̌dû̌pe.

¹⁶ Bǎ Pharishè̌phû̌ dǒ a sû̌ǐ ta̤sû̌ta̤tòwò asara nutokhlǒ kè̌shǐ Yeshǔ ǎcuôcu kû̌ pwa̤ma̤sǔphû̌ tokhlǒ kû̌ pwa̤kwi ta̤kûta̤mṳ̂̌ tokhlǒ akhanu, a gwè̌ Yeshǔ akhôphijǎ tokhlǒ kû̌, “Ma̤titèdě a cû̌ ǎcuôcu tǒ̤ kû̌ pwa̤kwi ta̤kûta̤mṳ̂̌ kû̌ pwa̤ma̤sǔphû̌ nutokhlǒ ma̤titè?” A gwè̌ lô̌khô pô̤̌nu.

¹⁷ Bǎ Yeshǔ ganǎ̤de asî gwè̌ pô̤̌o akhanu, a hî̌shěshu asî kû̌, “Kòyò dǒ a ô̌shû̌ô̌mô̤ tokhlǒnu, a lǎ̤lṳ̂ bǎ ta̤khû̌saradû̌ tô̤̌. Kòyò dǒ ashǐasha tokhlǒnu mî̌ a lǎ̤lṳ̂bǎ nò ta̤khû̌saradû̌ pwǎ. He hè kaǎge kòyò dǒ acǒatè̤ nutokhlǒ mè̤̌tô̤̌. He hè kaǎgepwǎ pwa̤ma̤sǔphû̌ nutokhlǒ pwǎ.”

Kòyò gwè̌ Yeshǔ dǔǎshǎ awe̤akè

¹⁸ Bǎnu akha Khûyṳ̂ha akhôphijǎ kû̌ Pharishè̌phû̌ tokhlǒ a dǔǎdǔô lô̌khô. Dě kòyò tokhlǒkhlǒ hè gwè̌ Yeshǔ kû̌, “Khûyṳ̂ha akhôphijǎ kû̌ Pharishè̌phû̌ akhôphijǎ tokhlǒ dǔǎ shǎǎshǎô, bǎbǎkǎlè nakhôphijǎ tokhlǒdě a dǔǎ gû̌ kòyò shǎǎshǎô tô̤̌ ma̤titè?” A hè gwè̌ lû̌ pô̤̌nu.

¹⁹ Běcǎ Yeshǔ hî̌shěshu asî kû̌ yô̤̌sǎkhěkhô̌ tômû dě a hî̌ kû̌, “Bǎ khòmò̤̌phû̌khû ô̌cu pe kû̌ akhô shǐpwǎ̤shǐmè̤ akhanu, akhô shǐpwǎ̤shǐmè̤ nutokhlǒ cû̌dǔǎdǔô jò hî̌tè? Bǎ khòmò̤̌phû̌khû cû̌kè khôtô̤̌, a kè̌ ô̌cupe kû̌ asû̌akhô tokhlǒ hî̌nu, asî dǔǎ jò shǎǎshǎô tô̤̌.

²⁰ Bǎ kòyò kaǎcû̌ tephekè khòmò̤̌phû̌khû pě akhanu, asî glè̌ dǔǎdǔô lô̌khô pě.

²¹ “Kòyò shò̌phǎdǎ gò̌pwǐyò̤̌ kû̌ gò̌pwǐsa dǒ a sutǔ nò̌khôtô̤̌ nu a ô̌ tôpwǎ̤ tô̤̌. Kè̌ shò̌phǎdǎ pô̤̌numî̌ gò̌pwǐsa nî̌ a gǔ htò̌sutǔkè dě a lě̤ cî̌sutǔ hǎyè̌ lè̤̌kè pô̤̌ gò̌pwǐyò̤̌nu pě.

²² Kòyò tènṳ̌ sîpî̌ shisî̌yô̤̌sa dǒ shiôkobě ali̤kûnu a ô̌ tôpwǎ̤ tô̤̌. Kòyò kè̌ tènṳ̌ pô̤̌nudě shisî̌yô̤̌ nî̌ a ma̤ hǎphò̌kè shiôkobě ali̤ tômè pě, dě shisî̌yô̤̌ gǔ lò̤gǔlò̤wṳ̂̌kèbò bò pě. Shisǐyô̤̌ asanu kòyò bǎ tènṳ̌ pwǎ dǒ shikoběsa akû pwǎ.”

Yeshǔ mî̌ lṳmṳ̌dǔ a Běcǎ

²³ Bǎ lṳmṳ̌dǔ nutini̤ akhanu, Yeshǔ kû̌ akhôphijǎ tokhlǒ cû̌nṳ̌bò̌ kòyò bǔjû̌ hǔklakhû̌ tokhlǒ, dě akhôphijǎ tokhlǒ phû̌ǎ cû̌ kòyò bǔjû̌sǎ.

²⁴ Dě Pharishè̌phû̌ tokhlǒ hî̌ Yeshǔ kû̌, “Kè̌mò̌, ta̤ma̤ dǒ asî tôbǎ ma̤ tô̤̌ dǒ lṳmṳ̌dǔ tokhlǒnu, asî cû̌ma̤tǒ̤ lô̌khô aya pô̤̌nu ma̤titè?”

²⁵ Dě a hî̌shěshu asî kû̌, “Dǒ awǐkha bǎ Khûdawi̤ kû̌ asû̌akhô tokhlǒ sǎǎsǎô jî̌ lû̌û dě a lǎ̤ǎlǎ̤ô ô̌ tô̤̌ akhanu, a ma̤kwè̌ titè numî̌ sî dô̌ nô̌ gû̌ kòyò tô̤̌ ya?

²⁶ Asî cû̌nṳ̌ lô̌khô dǒ Cǒmara ahǐkû dě mû̌ dǒ kòyò lṳhtò̌ kû̌ Cǒmara tokhlǒ numî̌ a ô̌ bǎnu, dě a ǎnǐ̤ pwǎtǒ̤ pwa̤shû̌gǎ tokhlǒ pwǎ bǎbǎkǎlè Khûdawi̤ kû̌ akhôphijǎ tokhlǒ cû̌nṳ̌phî̌ǎ bǎ tô̤̌ya? Bǎnukha numî̌ atô kû̌ Khûabyata htû pwa̤shû̌gǎ ikǒlǒkò.”

²⁷ Běcǎ Yeshǔ hî̌ asî kû̌, “Kòyò numî̌ lṳmṳ̌dǔ aya mè̤̌tô̤̌, lṳmṳ̌dǔ numî̌ kòyò lǒ̤bò aya.

²⁸ Kòyòphû̌khû nî̌ lṳmṳ̌dǔ a Běcǎ cǒ tôpwa̤hǒ,” a hî̌shěshu asî pô̤̌nu.