Mǎ̤riko 16 - Kawyaw New Testament

Yeshǔ htûpwa̤ gesô̌

¹ Bǎ Yǔdaphû̌ a lṳmṳ̌dǔ tûlû̌kè hto nutôwô̤nu, do Magadalǎphû̌ Mǒ̤ma̤rǐ, Khûya̤kû amǒ̤ Mǒ̤ma̤rǐ kû̌ Mǒ̤salû pwî̤nṳ̌ lô̌khô shinumû̌ dě a glè̌ cû̌plṳ̌ lô̌khô Běcǎ Yeshǔanǎ̤.

² Tôshô̌bě akû awǐlǒ nutini̤ bǎ lṳmṳ̌wî̤sò lṳmṳ̌ khǐpô̤lô̤pe akhanu, asî hè lô̌khô dǒ lṳ̌khû̌.

³ Bǎ asî hè dǒ klè̌lô̤ akhanu, asî hî̌ kè̌khî lû̌û kû̌, “Mò̌pè glè̌ htû̌toklo tephekè bǎ pa lǒ̤bědû̌ dǒ kòyò htû̌toklobǐ kû̌ lṳ̌kû nutômè ya?” Ma̤titèhî̌dě lǒ̤běnu tômè mî̌ adû̌môti̤ lîlè.

⁴ Bǎbǎkǎlè bǎ asî kè̌cû̌ akhanu, a kè̌shǐ kû̌ kòyò shò̌toklo tephenǎkè hto lǒ̤bědû̌ nutômè hǒ.

⁵ Bǎ asî nṳ̌ dǒ lṳ̌kû akhanu, a kè̌shǐ pwa̤khûphû̌sǎ sô̌ jebû tôpwa̤ hǎnòò̌ dǒ lṳ̌kû cǔtômû nutôkhô dě asî sǎgònò̤̌ bòkè.

⁶ Dě a hî̌ asî kû̌, “Sǎgònò̤̌ lô̌khô tǎ̤mǎ̤꤮, sî kè̌lǎǐ Na̤sôrè̤̌phû̌ Yeshǔ dǒ kòyò htǎsihtò̌kè lû̌û dǒ nò̌dò̌htǔlô̤ nutôpwa̤ pwǎ numî̌ he sî̌ganǎ̤. A ihtǒhtûpwa̤ gesô̌ hǒ. A ô̌pe bǒo tô̤̌. Hèkè̌mò̌ lô̌khô, hǒomî̌ agûlǎ̤ dǒ kòyò bè̌nṳ̌ yǎ alǎ̤nuhǒ.

⁷ Geshôbǐǐ pû Khûpetarǔ kû̌ Yeshǔ akhôphijǎ dǒ ashǔshawa̤ nutokhlǒ kû̌ Yeshǔ cû̌ ô̌nǎwǐ hto sî dǒ Galilè̤̌gǎ kû nu hǒ. Pô̤̌ a hî̌nǎ hto sînu sî gǔ kè̌shǐ tûû̌ a bǎnu pě.”

⁸ Asî ǒò̌ kiti̤kaa dě anǎ̤ gònò̤̌gòglè bò akhû̌akhî, asî khlèhǎhtò̌kè dǒ lṳ̌kû. Asî ǐsha tûlû̌shû̌lě dě bǎ a hǎhtò̌cû̌ akhanu, a hî̌bǎ pe kòyò tôpwǎ̤꤮ tô̤̌.

Yeshǔ ô̌lṳ̌htò̌ bǎ anǎ̤ kû̌ Magadalǎ dokûphû̌ Mǒ̤ma̤rǐ

⁹ Yeshǔ ihtǒ htûpwa̤ gesô̌ bǎ tôshô̌bě akû awǐlǒ nutini̤ lṳmṳ̌wî̤sò nutôwô̤. Htodě dǒnô̌kònu a cû̌dǔlè̌lṳ̌ wǐ anǎ̤ kû̌ Magadalǎ dokûphû̌ Mǒ̤ma̤rǐ. Dě Mǒ̤ma̤rǐ nutôpwa̤ nî̌ a mî̌ pwa̤mǒ̤ dǒ Yeshǔ wṳ̂̌hǎhtò̌pè̤̌kè bǎ lû̌û khînǎkhîno susô̌tôdo dǒ alô̤ nutôpwa̤ hǒ.

¹⁰ Pô̤̌nudě, Mǒ̤ma̤rǐ cû̌ shôbǐǐlṳ̌ bǎ kòyò dǒ a cû̌cukhacu kû̌ Yeshǔ nutokhlǒ kû̌ Yeshǔ ô̌lṳ̌htò̌ bǎ lû̌û awe̤akè. Bǎnuakha asî sǎplǎ̤sǎyṳ dě ô̌yî̤̌ô̌hǎ pepwǎ lô̌khô.

¹¹ Asî ganǎ̤de Mǒ̤ma̤rǐ shôbǐǐ bǎ asî kû̌, “Yeshǔ htûpwa̤ pwǎ, he kè̌shǐ sanǎ̤ a kû̌ henǎ̤,” a shôbǐǐ bǎ asî pô̤̌nu bǎbǎkǎlè asî yṳ̌ǎtô̤̌.

Yeshǔ ô̌lṳ̌htò̌ bǎ akhôphijǎ sò̌ginǐ̤.

¹² Dǒnô̌kònu akhôphijǎ sò̌ginǐ̤ hǎhtò̌cû̌ dǒ dolǎ̤shô̌kû akha asî kè̌shǐ Yeshǔ htû̌tèplè̌khô̌kè bǎ anǎ̤ dě a dǔlè̌lṳ̌ bǎ asî sò̌ginǐ̤.

¹³ A khôphijǎ nusò̌ginǐ̤ ge shôbǐǐ bǎ akhôphijǎ dǒ ashǔshawa̤ tokhlǒ bǎbǎkǎlè asî yṳ̌ǎ lô̌khô kòyò sò̌ginǐ̤ ayô̤̌ tô̤̌.

Yeshǔ ô̌lṳ̌htò̌ bǎ akhôphijǎ shǐtôpwa̤

¹⁴ Dǒ nô̌kòpě tôplǎ dě bǎ akhôphijǎ shǐtôpwa̤ ǎshǎ akhanu, a dǔlè̌lṳ̌ bǎ sô̌ asî kû̌ anǎ̤. Kòyò dǒ a kè̌shǐ Yeshǔ si ihtǒ htûpwa̤ gesô̌ tokhlǒ shôbǐǐ bǎ asî bǎbǎkǎlè asî ikǒpwǐ̤ dě a yṳ̌ǎ lô̌khô kòyò yô̤̌tô̤̌ akhû̌akhî, Yeshǔ sǎhtǎ asî.

¹⁵ Dě a hî̌ asî kû̌, “Cû̌ dǒ hǎkhû̌ pṳ̂̌tôbě dě cû̌lè shôbǐǐ padô̌pû, lǒ̤bò kòyò pṳ̂̌tôpwa̤ kû̌ ta̤sǎlě̤we̤kè nu nî̌꤮.

¹⁶ Kòyò dǒ a yṳ̌ǎ ta̤sǎlě̤we̤kè nudě a ju anǎ̤ kû̌ shi tôpwa̤pwa̤ nî̌ a gǔ nǐ̤bǎ ta̤ma̤hǎplǎge pě. Bǎbǎkǎlè kòyò dǒ a yṳ̌ǎ tô̤̌ tokhlǒnu a gǔ khòbǎ ta̤cî̌htò̌ pě.

¹⁷ Kòyò dǒ a yṳ̌ǎ tokhlǒnu he gǔ ǐ asî ta̤siwi̤sòwò̤ dǒ a gǔ ma̤jò lô̌khô ta̤cô̌klǐcô̌sè tokhlǒ pě. Asî gǔ wṳ̂̌htò̌bò̌ lô̌khô khînǎkhîno tokhlǒ kû̌ hemi̤ pě, asî gǔ hî̌bǎ jò yô̤̌sǎ dǒ asî hî̌bǎ jò nô̌꤮ tô̤̌ nutokhlǒ pě.

¹⁸ Asî glè̌ pṳ̂̌ wṳ̂̌phǔmò̤̌ tokhlǒ bǎbǎ, a glè̌ cû̌ǎbǎ ôbǎ ta̤wè̤̌ta̤htòshi dǒ ama̤si jònu tokhlǒ bǎbǎ, a ma̤pò̤̌ma̤sha nô̌ asî tocǒ꤮ tô̤̌. Asî kè̌ dò̌htò̌ acǔde dǒ kòyòshǐkòyòsha tokhlǒ alô̤ hî̌nu, asî ta̤shǐta̤sha gǔ hǎmǎkè bò pě.”

Cǒmara kaǎ gehtò̌ Yeshǔ dǒ mǒkhû̌

¹⁹ Běcǎ Yeshǔ hî̌bǎhto kû̌ akhôphijǎ tokhlǒ dě Cǒmara kaǎ gehtò̌kè yǎ dǒ mǒkhû̌ dě a htò̌hǎnòò̌ dǒ Cǒmara cǔtômû tôkhô.

²⁰ Yeshǔ akhôphijǎ tokhlǒ cû̌lè shôbǐǐlṳ̌ bǎ kòyò kû̌ Cǒmara alě̤ayô̤̌ dǒ ta̤lǎ̤ pṳ̂̌꤮ tûkû. Pô̤̌khô kòyò gǔ yṳ̌nǐ̤nǎ̤nǐ̤ lô̌khô kû̌ ta̤sǎlě̤we̤kè dǒ asî shôbǐǐ bǎ kòyò numî̌ a mè̤̌mî̌ca ayanu, Běcǎ ǐ lò̤ asî dǒ a gǔ ma̤jò lô̌khô ta̤ma̤ ta̤cô̌klǐcô̌sè tokhlǒ pṳ̂̌tocǒ.