Mǎ̤riko 13 - Kawyaw New Testament

ta̤ma̤lò̤tě̤pro̤kè ta̤lṳhtò̌hô awe̤akè

¹ Bǎ Yeshǔ hǎhtò̌cû̌kè dǒ ta̤lṳhtò̌hô we̤kû akhanu, akhôphijǎ tôpwa̤ hî̌ lû̌û kû̌, “Sara꤮ na kè̌mò̌ lǒ̤dû̌ kû̌ hǐdû̌htûwî̤ dǒ nutokhlǒ awî̤̌꤮ lîlè.”

² Dě Yeshǔ hî̌shěshu lû̌û kû̌, “Hǐdû̌htûwî̤ dǒnu tokhlǒnu, sî kè̌shǐ pwǎya hî̌? Lǒ̤꤮ bò lǒ̤dû̌ nutokhlǒ nî̌ kòyò gǔ hèlò̤ de lò̤tě̤pro̤kè bò a pě. Lǒ̤ tokhlǒnu a imě pe lû̌û tômè kû̌ tômè꤮ tô̤̌ pě.”

Ta̤pò̤̌ta̤sha kû̌ ta̤ma̤jî̌ma̤jû̌

³ Bǎ Yeshǔ hǎnòò̌ dǒ òlǐba khôlôkhû̌ dě a kè̌cû̌ tôtǐ dǒ ta̤lṳhtò̌hô ô̌ akhanu, Khûpetarǔ, Khûya̤kû, Khûyṳ̂ha, Khûîdru, cû̌ gwè̌ hǔ tû̌ lû̌û kû̌,

⁴ “Na hî̌ nutokhlǒ nî̌ a gǔ htûhtò̌ bǎkhò̌tè pě? Bǎ lǒ̤꤮ bò ta̤nutokhlǒ glè̌ behtò̌ bò pěnu ta̤cô̌klǐcô̌sè dòmǎǐ tocǒcǒ gǔ ô̌lṳ̌htò̌ wǐ pě ya?”

⁵ Yeshǔ hî̌ asî kû̌, “Ô̌sè̌rè̌ lô̌khô sînǎ̤ kû̌ kòyò dǒ a gǔ hè lô̌ǐplò̤ǐ sî pě nutokhlǒ nî̌꤮.

⁶ Kòyò saprû glè̌ jî̌hè anǎ̤ sô̌sô̌kû̌ he nupě dě a gǔ dǒkôǐ lòhôlò̤ lô̌khô anǎ̤ kû̌, ‘he mî̌ Khrǐ dǒ a ma̤hǎplǎge kòyò nutôpwa̤’ htodě a gǔ lô̌ǐplò̤ǐnǐ̤ dû̌wî̤ kòyò pě.

⁷ Bǎ sî ganǎ̤de kòyò shěpě̤ pi̤ti̤pṳ̂tṳ̂ lû̌û dǒ aphǔ bǎbǎ, sî ganǎ̤de kòyò shôbǐǐ bǎ sî ta̤shěta̤pě̤ awe̤akè dǒ ayî̤ tokhlǒnu bǎbǎ, ǐsha lô̌khô tǎ̤mǎ̤ nî̌꤮. Ma̤titèhî̌dě pô̤̌o tokhlǒ numî̌ a bǎ htûhtò̌ nò pě, bǎbǎkǎlè hǒnumî̌ hǎkhû̌ glè̌ gutṳ̌ amè̤̌ nò̌khôtô̤̌.

⁸ Ma̤titèhî̌dě kòyò khlilèphû̌ tocǒ kû̌ tocǒ, shigǎ tôgǎ kû̌ tôgǎ gǔshěpě̤ lû̌û pě. Tanahtû̌de tokhlǒ glè̌ dǎlô̤̌dǎkhô bò dǒ hǎkhû̌ nutûkû hto tûkû pě. Gǎko gǔ ô̌htò̌ pě. Ta̤htûhtò̌ hǒtokhlǒ numî̌ amè̤̌mô̤̌ pepwǎ ta̤jî̌ta̤jû̌ a kòshî̌ dǒ asô̌sô̌kû̌ pwa̤mǒ̤ glè̌ phû̌ô̌ hǐphushanu hètǒ̤ mô̤̌pepwǎ.

⁹ “Sî bǎ sè̌rè̌ lô̌khô sînǎ̤. Dǒ hekhû̌khî dě kòyò gǔ pṳ̂̌ sî pě, dě kòyò gǔ sûhtò̌ sî dǒ pwa̤cî̌htò̌ ikǒlǒkòdû̌ tokhlǒ a lô̤mô̤̌ pě. Kòyò glè̌po̤ sî dǒ ta̤cabahǐkû pě. Sî bǎ ihtǒô̌ dǒ pwa̤pǒǐ tokhlǒ kû̌ côphǎ tokhlǒ alômô̤̌ pě dě a gǔ cî̌htò̌ sî pě dě sî gǔ shôbǐǐlṳ̌ nǐ̤ asî kû̌ ta̤sǎlě̤we̤kè pě.

¹⁰ Bǎbǎkǎlè bǎ hǎkhû̌ gutṳ̌ khôtô̤̌ akhanu, sî tôbǎ cû̌ shôbǐǐlṳ̌ bǎ kòyò pṳ̂̌꤮ tocǒ kû̌ ta̤sǎlě̤we̤kè.

¹¹ Kòyò pṳ̂̌cû̌ sî dǒ khwǐpwa̤jwètôta̤hǐ bǎkhò̌tè bǎbǎ, sî tôbǎ hî̌bǎ hî̌tènu bǎgû̌gè̌nǎ wǐ tǎ̤ lô̌khô tǎ̤mǎ̤ nî̌꤮. Ma̤titèhî̌dě shěkhǎ hètǒ̤ pě dě sî gǔ hî̌bǎ tû̌ mè̤̌tô̤̌, Yôla Plò̌shǐ Běcǎ glè̌ shôbǐǐ ma̤jè̌ tû̌ sî pě.

^12-13 “Bǎnuakha pěnu, pṳ̌ glè̌ noma̤si tûû̌ awè̤̌ kû̌ kòyò pě, dě wè̤̌ noma̤si tûû̌ apṳ̌ kû̌ kòyò pě, pha glè̌ noma̤si tûû̌ aphû̌ kû̌ kòyò pě, phû̌ tokhlǒ shěgeshěshu tûû̌ amǒ̤apha tokhlǒ pě, dě a noma̤si tûû̌ kòyò kû̌ amǒ̤apha pě. Dǒ sîgû̌ kû̌ hekò akhû̌akhî, dě kòyò pṳ̂̌꤮ tôpwa̤ gǔ sǎkhě bò sî pě. Bǎbǎkǎlè kòyò dǒ a ihtǒ ô̌měô̌gle dǒ a ta̤yṳ̌ta̤nǎ̤ akû tǒ̤dǒ agutṳ̌ tokhlǒnu Cǒmara glè̌ ma̤hǎplǎge asî pě.”

Ta̤tirǐsò̌ ǐsha gǔ ma̤phǔmò̤̌shǐhtô Cǒmara a ta̤lṳhtò̌hǐ pě.

¹⁴ Yeshǔ hî̌ pô̤̌ kû̌, “Sî gǔ kè̌shǐ kû̌ ta̤phǔmò̤̌shǐhtô tô ihtǒô̌ dǒ ta̤lṳhtò̌hǐkû tô̤̌ bǎbǎkǎlè a ihtǒô̌ bǎnu pě. Dǒ hǒo akhû̌akhî, kòyò gǔ bè̌kè tǒ̤ ta̤cabahǐ pě (kòyò dǒ a dô̌ lî̤ hǒtokhlǒ tôbǎ sî̌yaphlô lô̌khô). Bǎ sî kè̌shǐ a htûhtò̌ hto pô̤̌o akha pěnu, kòyò ô̌ dǒ Yǔdagǎkû nutokhlǒ bǎ khlè̌htò̌ hǎplǎ lô̌khô anǎ̤ dǒ khôlôkhû̌.

¹⁵ Kòyò ô̌ dǒ hǐgutadǎkhû̌ tokhlǒnu, bǎ a khlè̌hǎtě̤ akha a tôbǎ cû̌nṳ̌phî̌ a ta̤kî̌ta̤krû̌ dǒ hǐkû tocǒ꤮ tô̤̌.

¹⁶ Kòyò ma̤ta̤ dǒhǔklakhû̌ tokhlǒnu a bǎ khlè̌ge phî̌nṳ̌ aje dǒ a hǐ tô̤̌.

¹⁷ Bǎnutini̤ pěmî̌ pwa̤mǒ̤ mǒ̤do kû̌ aphû̌ ô nû̌ pepwǎ nutokhlǒ ayamî̌ shěkhǎ jî̌jû̌ jî̌jî̌ dǒ asîya pě.

¹⁸ Pô̤̌khô ta̤jî̌ta̤jû̌ hǒo gǔ lò̤tě̤tô kû̌ gǎwô̤̌kha tô̤̌nu, sî tô kwicaba lô̌khô Cǒmara pṳ̂̌꤮ tôpwa̤.

¹⁹ Asî tôbǎ kwicaba lô̌khô ma̤titè̌hî̌dě, ta̤jî̌ta̤jû̌ alṳmṳ̌ni̤ hǒtokhlǒ pě nu, sahtò̌ dǒ Cǒmara bô̌lò̤sakhû̌lû̌ta̤ tǒ̤lò̤ khònò̤̌ nu a ma̤nô̌ pô̤̌nu tôkhò̌꤮ tô̤̌. Bǎnuakhapě ta̤jî̌ta̤jû̌ nutokhlǒ nî̌ a gǔ jî̌khlo pe dě dǒ nô̌kòpěnu a gǔ htûhtò̌nô̌ pô̤̌nu tôkhò̌꤮ tô̤̌ pě.

²⁰ Běcǎ kè̌ ma̤phǔtǔ ta̤jî̌ta̤jû̌ alṳmṳ̌ni̤mṳ̌sa tô̤̌ numî̌ kòyò hǎplǎbò̌ pěnu a ô̌ tôpwǎ̤꤮ tô̤̌. Bǎbǎkǎlè kòyò dǒ Cǒmara rû̌htò̌ nǎ hto lû̌û tokhlǒ ayanu Běcǎ gǔ ma̤phǔtǔ bǎ asî alṳmṳ̌ni̤mṳ̌sa pě.

²¹ A htûhtò̌ pô̤̌nu htopědě kòyò tôpwa̤pwa̤ kè̌ hî̌ sî kû̌, ‘kè̌mò̌ lô̌khô, hǒo mî̌ Khrǐ dǒ a ma̤hǎplǎge kòyò nu tôpwa̤ hǒ,’ mè̤̌tô̤̌dě a gǔ hî̌ sî kû̌, ‘cû̌ kè̌mò̌ lô̌khô, Khrǐ dǒ a ma̤hǎplǎge kòyò nutôpwa̤ a ô̌ dǒnu,’ a gǔ hî̌ sî pô̤̌nu pě bǎbǎ yṳ̌ǎ lô̌khô tǎ̤mǎ̤ nî̌꤮.

²² Ma̤titèhî̌dě kòyò dǒ a jî̌lòhô anǎ̤ pô̤̌ Khrǐ dǒ a ma̤hǎplǎge kòyò nutôpwa̤ tokhlǒnu kû̌ kòyò dǒ ajî̌lòhô anǎ̤ pô̤̌ piwi̤pèshè tokhlǒnu, a gǔ ô̌lṳ̌htò̌ pě. Pô̤̌khô asî glè̌ lô̌ǐplò̤ǐ kòyò dǒ Cǒmara rû̌htò̌hto lû̌û tokhlǒnu, asî kè̌ ma̤jò dě, a gǔ ma̤lṳ̌htò̌ ata̤ma̤ cô̌klǐcô̌sè tokhlǒ kû̌ ata̤ma̤ sû̌pǐ̤sò̌pǐ̤ ǒò̌ kiti̤kaa kòyò nutokhlǒ pě.

²³ Ô̌sè̌rè̌ lô̌khô sînǎ̤ nî̌꤮. Bǎ ta̤tokhlǒ htûhtò̌ khôtô̤̌nu, he shôbǐǐ nǎ wǐ bǎ bò hto sî pṳ̂̌꤮ tocǒ hǒ,” Yeshǔ hî̌ pô̤̌nu.

Kòyòphû̌khû glè̌ hè pě

²⁴ Dě Yeshǔ hî̌ sělě pô̤̌ kû̌, “Bǎ ta̤jî̌ta̤jû̌ alṳmṳ̌ni̤ lṳmṳ̌sasî cû̌ tûlûhto pě nu, ‘Cǒmara gǔ ma̤khǐkè lṳmṳ̌ pě, la gǔ lî petô̤̌.

²⁵ Shǎ dǒ mǒlǎ̤ tokhlǒ gǔ lò̤tě̤pro̤ bòkèpě. Cǒmara glè̌ ma̤ guyṳ̌wṳ̌wè̤ bò mǒlǎ̤ a ta̤pô̤ta̤phǎ nutokhlǒ pě.’

²⁶ “Htodě asî gǔ kè̌shǐ lô̌khô Kòyòphû̌khû mî̌ he gǔ hèlò̤ dǒ poǒlṳ̌kla pě, dě a gǔ ô̌lǒô̌be kû̌ a ta̤pô̤ta̤phǎ kû̌ a ta̤bwǐdû̌sîrîhtû dǒ ashû̌asho nutokhlǒ pě.

²⁷ Htodě Kòyòphû̌khû mî̌ he, he gǔ nohèlò̤ mǒkhû̌ tanaphû̌ tokhlǒ pě, he nocû̌ asî pě dě asî glè̌ cû̌ kaǎplǒ bò kòyò dǒ Cǒmara rû̌htò̌ hto asî nutokhlǒ dǒ gûlǎ̤ pṳ̂̌tûkû pě. Asî sahtò̌ cû̌ dǒ mǒkhû̌ kòshî̌ tǒ̤dǒ hǎkhû̌ gutṳ̌ pě.

²⁸ “Phî̌nṳ̌ lô̌khô ta̤sû̌ǐ dǒ dǐshimṳ̌ ô̌nu. Bǎ aphò tokhlǒ dô̌jǎhtò̌ dě alǎ tokhlǒ hǎhtò̌ akhanu, sî sî̌ya lô̌khô pû kû̌ gǎgû̌kha phǔhètǒ̤hǒ.

²⁹ Pô̤̌nudě bǎ sî kè̌shǐ ta̤ tokhlǒ htûhtò̌ akhapěnu, sî̌ya lô̌khô kû̌ Kòyòphû̌khû mî̌ he a hèphǔtǒ̤ dǒ takhakòshî̌ hǒ nî̌꤮.

³⁰ He hî̌cǒcǒ꤮ sî, kòyò lǒ̤bò dǒ a ô̌htûpwa̤ khònò̤̌tôhtu tokhlǒ sibò nò̌khôtô̤̌nu, ta̤ tokhlǒ gǔ htûhtò̌ bò pě.

³¹ Mǒkhû̌ kû̌ hǎkhû̌ gǔ hǎmǎkè pě bǎbǎkǎlè helě̤heyô̤̌ tokhlǒnu a hǎmǎkè pě tôkhò̌꤮ tô̤̌.

³² “Bǎbǎkǎlè ta̤hǒo tokhlǒ gǔ htûhtò̌ lṳmṳ̌ni̤ lṳmṳ̌sa, mè̤̌tô̤̌dě ashěakhǎ bǎkhò̌tè pěnu kòyò sî̌ya tôpwǎ̤꤮ tô̤̌. Mǒkhû̌tanaphû̌ ô̌ dǒ꤮ mǒkhû̌ nutokhlǒ bǎbǎ, a sî̌ya tô̤̌. Aphû̌khû kû̌ anǎ̤ nutôpwa̤ bǎbǎ, a sî̌ya tô̤̌. A sî̌ya pwǎtǒ̤ hepha tôpwa̤꤮ nô̤̌pwǎ.

³³ Ô̌sè̌rè̌ lô̌khô sînǎ̤, sòklò caba ô̌pǒ̤ lô̌khô sînǎ̤ nî̌꤮, ma̤titè̌hî̌dě a gǔ htûhtò̌ pě bǎkhò̌tè nu sî sî̌ya tô̤̌.

³⁴ Hǒomî̌ asô̌sô̌kû̌ kòyò tôpwa̤ dǒ a glè̌ hǎhtò̌cû̌ klè̌ dǒ shigǎ ashǔshawa̤ tôgǎ dě a no kè̌pǒ̤kè ahǐ kû̌ a jû̌ tokhlǒ dě a hǎhtò̌cû̌. A ǐlò̤ khô̌kè asî tôpwa̤ kû̌ tôpwa̤ ata̤ma̤ dě a hî̌kè pwa̤ô̌pǒ̤ takha nutôpwa̤ kû̌ a gǔ sòklò ô̌pǒ̤shěshu pû pô̤̌nu.

³⁵ “Hǐběcǎ gǔ gesô̌ bǎkhò̌tè pě nu sî sî̌ya tô̤̌. Mî̌ a gesô̌ htû̌꤮ lṳmṳ̌hǎ pě ya, mè̤̌tô̤̌dě mî̌ a gesô̌ htû̌꤮ lṳmṳ̌khǐklama pě ya, mè̤̌tô̤̌dě mî̌ a gesô̌ htû̌꤮ shîû̌ pě ya, mè̤̌tô̤̌dě htû̌꤮ lṳmṳ̌lî pě ya nu, sî sî̌ya tô̤̌ akhû̌akhî, sòklòshěshu lô̌khô pûnî̌꤮.

³⁶ Ma̤titèhî̌dě hǐběcǎ kè̌ getǒ̤ sumṳ̌htò̌ pě dě, no kè̌shǐ tǎ̤ kû̌ sî hǎmôô̌ shepě̤ tǎ̤mǎ̤ nî̌꤮.

³⁷ Ta̤ dǒ he hî̌ bǎ sî tokhlǒ numî̌, he pwe̤ǐbǎbò he khôphijǎ pṳ̂̌tôpwa̤hǒ, pô̤̌nudě ‘sòklò ô̌pǒ̤shěshu lô̌khô pûnî̌꤮.’”