Mǎ̤riko 10 - Kawyaw New Testament

Yeshǔ sû̌ǐtòwòǐlò̤ kòyò kû̌ bè̌kèma awe̤akè

¹ Htodě Yeshǔ ô̌ bǎnu dě a hǎhtò̌cû̌kè dǒ Yǔdagǎ dě a cû̌ dǒ Jòda shilô̤̌mǒ̤ lô̤̌bò̌ tôkhô. Kòyò saprṳ̂saphǎ hèô̌plǒ te̤we̤ bò sô̌ yǎ tôprṳ̂tôphǎ dě a sû̌ǐlò̤ bǎ kòyò pô̤̌ alǎ̤klô sû̌ǐ bǎ kòyò pṳ̂̌꤮ plǎ nu.

² Pharishè̌phû̌ tokhlǒkhlǒnu a hè padô̌ dǒ Yeshǔ a ô̌ dě asî sǎyṳ hè kè̌lǎ pṳ̂̌ Běcǎ Yeshǔ ata̤sǔ dě a hè gwè̌ takǎ lû̌û kû̌, “Kòyò tôpwa̤pwa̤ bè̌kè mò̌ ama mî̌ anǐ̤ pwǎ pa ta̤sû̌ta̤tòwò hî̌mè̤̌ca pô̤̌nu ya?”

³ Dě Yeshǔ gwè̌ asî kû̌, “Khûmṳ̂shě mǎnǎ sî ayô̤̌ hî̌tè?”

⁴ Asî hî̌shěshu kû̌, “Kòyò dǒ a bè̌kè ama tokhlǒnu Khûmṳ̂shě jûpwǎ asî dǒ a glè̌ wě̤ lî̤bè̌kèma a ta̤wě̤mǎnǎ tôbǎ dě a ǐ kû̌ ama dě a kè̌ bè̌kè ama numî̌ anǐ̤ pwǎ.”

⁵ Dě Yeshǔ hî̌shěshu asî kû̌, “Khûmṳ̂shě wě̤ bǎ sî ta̤mǎlò̤ pô̤̌o, ma̤titè̌hî̌dě sî ikǒpwǐ̤ tûû̌ sîya nupwǎ.

⁶ Bǎbǎkǎlè dǒ Cǒmara bô̌lò̤ wǐ hǎkhû̌ kû̌ mǒkhû̌ akhanu ‘Cǒmara bô̌lò̤ pwǎ pwa̤mǒ̤ tôpwa̤ kû̌ pwa̤khû tôpwa̤ nô̤̌pwǎ’

⁷ ‘Dǒ ta̤we̤ta̤kè hǒo akhû̌akhî pwa̤khû nî̌ a bǎ bè̌kè amǒ̤apha dě a bǎ cû̌ ô̌plǒ kû̌ ama,

⁸ dě kòyò hǒo sò̌ginǐ̤ nî̌ a htûhtò̌kè tôpwa̤꤮ nô̤̌.’ Pô̤̌nudě asî mî̌ kòyò sò̌ginǐ̤ mè̤̌petô̤̌. A htûhtò̌kè tôpwa̤ nô̤̌.

⁹ Pô̤̌nudě ta̤ dǒ Cǒmara bè̌cu yǎnu, kòyòhǎkhû̌phû̌ bǎ bè̌yò yǎ tôpwǎ̤꤮ tô̤̌.”

¹⁰ Bǎ asî getǒ̤ dǒ hǐ akhanu, akhôphijǎ tokhlǒ gwè̌pô̤̌ lû̌û kû̌ ta̤bè̌kèma awe̤akè.

¹¹ Dě a hî̌shěshu asî kû̌, “Pwa̤khû tôpwa̤ kè̌ bè̌kè ama dě a kè̌ cû̌phî̌ tèplè̌ kû̌ pwa̤mǒ̤ dǒ ashǔshawa̤ numî̌ a cû̌ma̤sǔkè amawǐ nuhǒ.

¹² Htodě pwa̤mǒ̤ tôpwa̤ kè̌ bè̌kè awṳ̂ dě a gǔ cû̌phî̌ tèplè̌ kû̌ pwa̤khû dǒ ashǔshawa̤ numî̌ a cû̌ma̤sǔkè awṳ̂wǐ nu tôpwa̤ hǒ.”

Yeshǔ ǐshowî̤ phijǎphû̌ tokhlǒ

¹³ Ma̤pô̤̌ Yeshǔ gǔ bè̌htò̌ acǔde dǒ phijǎphû̌ tokhlǒ alô̤ nu, kòyò tokhlǒ kaǎhèǐ lô̌khô phijǎphû̌ dǒ Yeshǔ a ô̌. Bǎbǎkǎlè akhôphijǎ tokhlǒ sǎhtǎshěshu kòyò cî̌hèǐ phijǎphû̌ nutokhlǒ.

¹⁴ Yeshǔ kè̌shǐ asî ma̤pô̤̌nudě a sǎphlǒdû̌ asî dě a hî̌ asî kû̌, “Plûhè phijǎphû̌ nutokhlǒ dǒ he ô̌ bǒo. Ma̤tě̤tṳ̌ tǎ̤ asî tǎ̤mǎ̤, ma̤titè̌hî̌dě Cǒmara ashiagǎ numî̌ kòyò dǒ a shò̌lò̤ asǎphlǒ sô̌sô̌kû̌ phijǎphû̌ nutokhlǒ atahǒ.

¹⁵ He hî̌cǒcǒ sî, sî kè̌ nopǒ sînǎ̤ kû̌ Cǒmara, pô̤̌ phijǎphû̌ tokhlǒ nopǒǐ anǎ̤ tô̤̌nu, sî genṳ̌jò dǒ Cǒmara shilǎ̤gǎkû tôkhò̌꤮ tô̤̌.”

¹⁶ Htodě a phô̌htò̌ phijǎphû̌ dǒ anǎ̤lô̤ tôpwa̤ hto tôpwa̤ dě a bè̌htò̌ acǔde dǒ phijǎphû̌ tokhlǒ alô̤ dě a ǐshowî̤ asî.

Kòyò dû̌yò̤̌shtò̌sa tôpwa̤ hî̌bǎ kû̌ Yeshǔ

¹⁷ Bǎ Yeshǔ sahtò̌ hǎhtò̌cû̌hto akhanu, kòyò tôpwa̤ khlè̌hè dǒ aô̌ dě a hè dô̌gînilò̤ dǒ alô̤mô̤̌ dě a gwè̌ Yeshǔ kû̌, “Ǒ꤮ sarawô̌, pô̤̌khô he gǔ nǐ̤bǎ yôla htûpwa̤ tûjû̌pwa̤ talakhǎ nudě, he tôbǎ ma̤kwè̌꤮ mî̌titè?”

¹⁸ Yeshǔ gwè̌ lû̌û kû̌, “Na cû̌ kaǎ tǒ̤ he kû̌ sarawô̌ ma̤titè? Kòyòwô̌ ô̌ tôpwǎ̤꤮ tô̤̌, a ô̌ pwǎtǒ̤ Cǒmara tôpwa̤nô̤̌ pwǎ.

¹⁹ Na sî̌ya Cǒmara ta̤mǎlò̤ tokhlǒ hî̌ kû̌, ‘ma̤si tǎ̤ kòyò tǎ̤mǎ̤, cû̌sǔnṳ̌ tǎ̤ kòyòphû̌kòyòma tǎ̤mǎ̤, ǎhǔǎhě tǎ̤ kòyò ta tǎ̤mǎ̤, khò lòhǎlòhô tǎ̤ ta̤ tǎ̤mǎ̤, cû̌ǎtṳ̌ma̤tṳ̌ tǎ̤ kòyòkhû̌ tǎ̤mǎ̤, bè̌dubè̌nǎ̤ namǒ̤napha.’”

²⁰ Dě a hî̌shěshu Yeshǔ kû̌, “Sara hǒtokhlǒnu he to̤ǐ htobò dě he gû̌ ma̤ htobò dǒ he phijǎkha nu pe hǒ.”

²¹ Dě Yeshǔ kè̌ tě̤mè̤̌ lû̌û dě a gwèbǎǐ lû̌û dě a hî̌ kû̌, “Ta̤ dǒ na lǎ̤lṳ̂ma̤nu a ô̌ pe tocǒ, ge shaǎkèbò na ta̤kî̌ta̤krû̌ nutokhlǒ dě ǐ kè kû̌ kòyòshèwè̤phû̌ nu. Na kè̌ ma̤pô̤̌nu hî̌dě na gǔ nǐ̤bǎ ta̤dû̌yò̤̌htò̌sa dǒ mǒkhû̌ pě. Gema̤hto pô̤̌nu dě hè gû̌kû̌ hekò.”

²² A dû̌yò̤̌htò̌sa tûlû̌shû̌lě akhû̌akhî, bǎ a ganǎ̤de hto Běcǎ Yeshǔ hî̌ lû̌û pô̤̌o akhanu, a kitikaakè dě a mǐ̤sǎkûpî̌kè dě a hǎhtò̌gekè.

²³ Yeshǔ kè̌ te̤we̤lû̌ dě a hî̌ akhôphijǎ tokhlǒ kû̌, “Kòyò dû̌yò̤̌htò̌sa tokhlǒ glè̌nṳ̌ dǒ Cǒmara ashiagǎkû nu, apò̤̌jî̌ shû̌lě asîya.”

²⁴ A khôphijǎ tokhlǒ ganǎ̤de lû̌û hî̌bǎ pô̤̌o dě a ǒò̌ kiti̤kaa bò lû̌û htodě a hî̌ khô̌pô̤̌ asî kû̌, “Hephû̌ sî, kòyò glè̌ nṳ̌ dǒ Cǒmara ashiagǎkû numî̌ apò̤̌yǎ̤ jî̌jî̌.”

²⁵ Tîsî̌budû̌ tôdo glè̌ plî̌nṳ̌ dǒ htò̌nè̌kûnu ayû khlope kû̌ kòyò dû̌yò̤̌htò̌sa tôpwa̤ glè̌ nṳ̌ dǒ mǒkhû̌ shilǎ̤gǎkûnu.

²⁶ A khôphijǎ tokhlǒ a ǒò̌ kiti̤kaabò lû̌û dě asî hî̌ lû̌û kû̌, “Kè̌ ma̤pô̤̌nudě mò̌pè tôpwa̤ glè̌ nǐ̤bǎjò ta̤ma̤hǎplǎge pě?”

²⁷ Yeshǔ kè̌ asî dě a hî̌ asî kû̌, “Kòyòhǎkhû̌phû̌ ma̤hǎplǎge jò tûû̌ anǎ̤tô̤̌ bǎbǎkǎlè Cǒmara ma̤jòta̤ pṳ̂̌꤮ tocǒ akhû̌akhî, a ma̤hǎplǎge jò pwǎ.”

²⁸ Khûpetarǔ hî̌ lû̌û kû̌, “Kè̌mò̌, pa bè̌kè bò hto ta̤pṳ̂̌꤮ tocǒ dě pa gû̌kû̌ nakòhǒ.”

²⁹ Yeshǔ hî̌ lû̌û kû̌, “He hî̌mî̌ca sî, dǒ heya kû̌ he ta̤sǎlě̤we̤kè aya dě kòyò tôpwa̤pwa̤ kè̌ bè̌kè ahǐaphò kû̌ apṳ̌pwa̤khû, apṳ̌pwa̤mǒ̤, amǒ̤apha, aphû̌ali̤, kû̌ ahǔkla sîtokhlǒ hî̌nu,

³⁰ A ô̌htûpwa̤ hǒtôhtu nî̌ a gǔ nǐ̤bǎ dû̌htò̌ khlo pô̤̌ ahǐ, apṳ̌pwa̤khû, apṳ̌pwa̤mǒ̤, amǒ̤apha, aphû̌ali̤, ahǔkla sîtokhlǒ dǒ aplǎ tôya̤ pě. Bǎbǎkǎlè kòyò gǔ ma̤jî̌ma̤jû̌ a pě. Nô̌kòpě tôhtu dě a gǔ nǐ̤bǎ yôla htûpwa̤ tûjû̌pwa̤ talakhǎ pě.

³¹ Pwǎtadě kòyò ô̌ dǒ alô̤mô̤̌lǒ tokhlǒnu, a gǔ ô̌kè dǒ nô̌kòlǒ pě, dě kòyò ô̌kè dǒ nô̌kòlǒ tokhlǒnu a gǔ ô̌ dǒ alô̤mô̤̌lǒ pě,” Yeshǔ hî̌ asî pô̤̌ nu.

Yeshǔ shôbǐǐ kòyò kû̌ a bǎsi pě awe̤akè suplǎtaplǎ

³² Yeshǔ kû̌ akhôphijǎ tokhlǒ htò̌ lô̌khô dǒ Wî̤̌yarǔshôle dě bǎ a htò̌ dǒ klè̌lô̤ akhanu, Yeshǔ cû̌ wǐ asî dǒ alômô̤̌. Yeshǔ htò̌ bǎ asî dǒ Wî̤̌yarǔshôle akhû̌akhî, akhôphijǎ tokhlǒ ǒò̌ kiti̤kaa bò yǎ, dě kòyò dǒ a gû̌htò̌ kû̌ lû̌û tokhlǒnu, a ǐsha bò lô̌khô. Dě Yeshǔ kaǎplǒ sô̌ akhôphijǎ shǐsò̌ginǐ̤ dě a sahtò̌ shôbǐǐlṳ̌ bǎ asî kû̌ htû̌ asî cû̌tǒ̤ dǒ Wî̤̌yarǔshôle pěnu a glè̌ htûhtò̌ kwè̌ anǎ̤ hî̌tè pě nutokhlǒ awe̤akè.

³³ Dě a hî̌ asî kû̌, “Gana̤de tě̤tě̤mè̤̌mè̤̌ lô̌khô, khònò̤̌ dě pa htò̌ dǒ Wî̤̌yarǔshôle. Bǎnu hî̌pě kòyò glè̌ shaǎlò̤kè Kòyòphû̌khû mî̌ he nu dǒ pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ a cǔdekû pě. Dě asî gǔ sǎphlǒ tô bò lû̌û dǒ a gǔ ma̤sikè he pě. A gǔ ǐlò̤kè he dǒ Yǔdaphû̌ mè̤̌tô̤̌ tokhlǒ a cǔdekû pě.

³⁴ Pô̤̌nudě Yǔdaphû̌ mè̤̌tô̤̌ tokhlǒ gǔ hî̌bǎ pî̤jî̌pèshè̌ bò he pě, asî gǔ htǔplî̌yô̤̌shi bò he pě, a gǔ po̤plè he pě, dě asî glè̌ ma̤sikè he pě bǎbǎkǎlè a behtò̌hto suni̤ pěnu he ihtǒhtûpwa̤ getîkhî sô̌ pě.”

Khûya̤kû kû̌ Khûyṳ̂ha a ta̤kwi

³⁵ Phasebedè̌ aphû̌khû Khûya̤kû kû̌ Khûyṳ̂ha hèphǔ dǒ Yeshǔ a ô̌ dě a hî̌ lû̌û kû̌, “Sara pa kwi na titètè̌꤮ bǎbǎ, pa sǎyṳ no ma̤ na.”

³⁶ Yeshǔ hî̌shěshu asî kû̌, “Sî sǎyṳ noma̤ he titèya?”

³⁷ Dě asî hî̌shěshu lû̌û kû̌, “Bǎ na htò̌ hǎnòò̌hto dǒ nashinagǎ dě na ô̌ kû̌ na ta̤bwǐdû̌sîrîhtû akû pěnu, dǐ hǎnòò̌ pè̤̌ pa dǒ na cǔtômû tôkhô tôpwa̤, kû̌ dǒ na cǔcôcî̌ tôkhô tôpwa̤ pě nî̌.”

³⁸ Dě Yeshǔ hî̌shěshu asî kû̌, “Sî hèkwi ta̤hǒonî̌ sî sî̌ya ǐtûû̌ awe̤akè tô̤̌. Ta̤jî̌ta̤jû̌ ashiba dǒ he glè̌ ô nu sî ô bò̌ gû̌ he pěya? Htodě ta̤khò̌jî̌khòjû̌ dǒ he glè̌ khò pě numî̌ sî khòbò̌ gû̌ he pě ya?”

³⁹ Dě asî hî̌shěshu lû̌û kû̌, “Pa khòbò̌ pwǎ.” Dě Yeshǔ hî̌shěshu asî kû̌, “Shiba dǒ he glè̌ ô nu sî gǔ ô bǎ pě, htodě ta̤jî̌ta̤jû̌ dǒ he glè̌ khòbǎ nu sî gǔ khòbǎ nô̌ pě.”

⁴⁰ Bǎbǎkǎlè lǎ̤hǎnòò̌ agûlǎ̤ dǒ cǔcôcî̌ tôkhô nu bǎbǎ, dǒ cǔtômû tôkhô nu bǎbǎ, a ô̌ dǒ he cǔdekû mè̤̌tô̤̌, Cǒmara gǔ dǐ hǎnòò̌ gûlǎ̤nu kû̌ kòyò dǒ a tîwî̌tòwò nǎ bǎ lû̌û nutokhlǒ aya pě.

⁴¹ Bǎ akhôphijǎ dǒ a ô̌kè pwa̤shǐ tokhlǒ ganǎ̤de a gwè̌ pô̤̌o akhanu, asî sǎphlǒdû̌ Khûya̤kû kû̌ Khûyṳ̂ha.

⁴² Pô̤̌nudě Yeshǔ kaǎ plǒbò asî dǒ a ô̌ dě a hî̌ asî kû̌, “Sî sî̌ya kû̌ Yǔdaphû̌ mè̤̌tô̤̌ tokhlǒnu a ô̌ kû̌ a ikǒlǒkòdû̌ dǒ a pǒǐ asî tokhlǒ. Htodě shigǎphû̌ ikǒlǒkòdû̌ tokhlǒnu a noǎ lô̌khô a ta̤siwi̤sòwò̤ nu dǒ shiphû̌gǎphû̌ tokhlǒ akhû̌.

⁴³ Bǎbǎkǎlè lǒ̤bò sî hǒtokhlǒnu sî tôbǎ ma̤pô̤̌nu tô̤̌. Dǒ sîklanu, kòyò tôpwa̤pwa̤ kè̌ sǎyṳ htûdû̌htûpwǎ̤ dě a tôbǎ htû sî pwa̤ma̤ta̤phû̌.

⁴⁴ Dǒ sîklanu, kòyò tôpwa̤pwa̤ kè̌ sǎyṳ htû kòyò dǒ kòyò lǎ̤lṳ̂dû̌lǒ kè̌hî̌dě a tôbǎ htû kòyò lǒ̤bò ajû̌.

⁴⁵ Ma̤titèhî̌dě Kòyòphû̌khû mî̌ he, he hè dǒ kòyò gǔ ma̤ bǎ heya nu mè̤̌tô̤̌. He hè dǒ he gǔ ma̤ bǎ kòyòya pwǎ. Dě pô̤̌khô he gǔ htè̌ge asî ayanudě, he ǐlò̤kè he ta̤htûpwa̤ dǒ kòyò saprṳ̂saphǎ aya.”

Yeshǔ dǐkè̌shǐsô̌ Khûbatimè̤̌ amǐ̤sǎ

⁴⁶ Yeshǔ kû̌ akhôphijǎ tokhlǒ cû̌tǒ̤ dǒ Wî̤̌yarikhò̌ dě bǎ asî hǎhtò̌cû̌hto kû̌ Wî̤̌yarikhò̌ akhanu, kòyò saprṳ̂dû̌ bǎ wî̤̌kû nutokhlǒ hǎhtò̌cû̌ kû̌ asî. Bǎ asî hǎhtò̌cû̌ akhanu, kòyòpha mǐ̤sǎkhǐ hǎnòò̌lò̤ kwiǎshǎ bǎ klè̌htunu tôpwa̤. Ami̤ kû̌ Khûbatimè̤̌, a mî̌ Phatimè̤̌ aphû̌khû tôpwa̤.

⁴⁷ Bǎ a ganǎ̤de kû̌ Wî̤̌na̤sôrè̤̌phû̌ Yeshǔ hè dǒ klè̌lô̤ akhanu, a sahtò̌ kaǎgǔ kû̌, “Ǒ꤮ Phadawi̤ aphû̌khû Yeshǔ gwèbǎǐ mò̌ he.”

⁴⁸ Kòyò saprṳ̂saphǎ sǎhtǎ lû̌û dě a hî̌ lô̌khô lû̌û kû̌, “Sǔtukǔ ô̌” bǎbǎkǎlè a lî̤̌ yî̤̌gǔhtò̌ shû̌shû̌ kû̌, “Ǒ꤮ Phadawi̤ aphû̌khû Yeshǔ gwèbǎǐ mò̌ he.”

⁴⁹ Yeshǔ ô̌kǔ dě a hî̌ kû̌, “Cû̌kaǎhè a bǒo” dě asî cû̌ kaǎ lû̌û dě a hî̌ lû̌û kû̌, “Bǎyô̤ tǎ̤mǎ̤, ihtǒmò̌, Yeshǔ kaǎ na hǒ.”

⁵⁰ Dě a plû̌htò̌ ajekhlo dě a pǎ̤lò̤kè lû̌û. Htodě a pě̤ihtǒ dě a hè dǒ Yeshǔ a ô̌.

⁵¹ Yeshǔ gwè̌ lû̌û kû̌, “Na sǎyṳ noma̤ he mî̌titè?” Kòyò mǐ̤sǎkhǐ nutôpwa̤ hî̌shěshu lû̌û kû̌, “Sara꤮ he sǎyṳ kè̌shǐ jò gû̌ kòyò.”

⁵² Dě Yeshǔ hî̌ lû̌û kû̌, “Na ge anǐ̤ hǒ. Na ta̤yṳ̌ta̤nǎ̤ ma̤hǎmǎbǎ na hǒ.” Bǎnu taplǎnô̤̌ amǐ̤sǎ lîhtò̌ dě a gû̌cû̌kû̌ Yeshǔ kò.