Lǔka 9 - Kawyaw New Testament

Yeshǔ plûcû̌ pwa̤nophû̌ shǐsò̌ginǐ̤

¹ Yeshǔ kaǎhè plǒbò a khôphijǎ shǐsò̌ginǐ̤ dě pô̤̌khô pwa̤nophû̌ gǔ wṳ̂̌hǎhtò̌pè̤̌kè khînǎkhîno tokhlǒ dě a gǔ ma̤hǎmǎbǎ bò ta̤shǐta̤sha tokhlǒ ayanudě, a ǐpè̤̌ asî ta̤pô̤ta̤phǎ kû̌ ta̤siwi̤sòwò̤ tokhlǒ.

² Htodě a plûcû̌ asî dǒ a gǔ cû̌ shôbǐǐlṳ̌ bǎ kòyò kû̌ Cǒmara ashiagǎ, kû̌mî̌ a gǔ ma̤hǎmǎ bǎ kòyòshǐ kòyòsha tokhlǒ.

³ Yeshǔ hî̌ asî kû̌, “Sî hǎhtò̌cû̌klè̌ dě phî̌cû̌nṳ̌ tǎ̤ tocǒ tǎ̤mǎ̤ nî̌꤮, nò̌htô̌ bǎbǎ, khûkhi bǎbǎ, shǎǎ bǎbǎ, ruhta bǎbǎ phǐnǐ̤ tǎ̤mǎ̤. Phî̌cû̌lǒphî̌cû̌khlo tǎ̤ je tôpṳ̌꤮ tǎ̤mǎ̤.

⁴ Ô̌sayè̤ bǎ hǐ dǒ a kaǎmô̤shǔ sî nutômè akû tǒ̤dǒ sî hǎhtò̌cû̌kè bǎ wî̤̌kûnu nî̌꤮.

⁵ Kòyò kè̌ kaǎmô̤shǔ sî tôkû̌꤮ tô̤̌ kè̌hî̌dě, tuphlǔlò̤tě̤kè hǎkumṳ̌ dǒ sî khǎlǎlô̤ nutokhlǒ dě hǎhtò̌cû̌kè dǒ wî̤̌nu tôwî̤̌ akû nî̌꤮. Sî kè̌ ma̤pô̤̌nu mî̌ asô̌sô̌kû̌ sî dǔlè̌lṳ̌nǎ ta̤dòǐ tocǒ dǒ Cǒmara gǔ cî̌htò̌ asî pě nuhǒ.”

⁶ Pwa̤nophû̌ tokhlǒ hǎhtò̌cû̌ dě cû̌nṳ̌ tôdo hto tôdo dě a cû̌ shôbǐǐ bǎ kòyò ta̤sǎlě̤we̤kè, dě a cû̌ ma̤hǎmǎbǎ kòyò ta̤shǐta̤sha dǒ ta̤lǎ̤ pṳ̂̌꤮ tûkû.

Yeshǔ mî̌ mò̌pè nu Khwǐherû gènè̤̌phlô tô̤̌

⁷ Bǎnuakha Galilè̤̌gǎ a Khwǐherû ganǎ̤de kû̌ Yeshǔ ma̤ta̤nu, dě a shû̌shǎ bò lû̌û sǎphlǒ, ma̤titèhî̌de, kòyò tokhlǒkhlǒ hî̌ kû̌ pwa̤jushǐ Khûyṳ̂ha si ihtǒhtûpwa̤tîkhî hǒ.

⁸ Tokhlǒkhlǒ dě a hî̌ kû̌ Khûělǐya hèô̌lṳ̌htò̌ gesô̌hǒ, tokhlǒkhlǒ dě a hî̌ kû̌ piwi̤pèshè dǒ꤮ nukha akla tôpwa̤pwa̤ htûpwa̤ getîkhîsô̌ hǒ.

⁹ Dě Khwǐherû hî̌ kû̌, “He nopě̤tṳ̌kè hto Khûyṳ̂ha aikǒ hǒ dě kòyò dǒ he ganǎ̤de awe̤akè tôpwa̤ numî̌ mò̌pè?” Dě, “He kè̌shǐ jò Yeshǔ hî̌tè kǎ꤮,” a gènè̤ pô̤̌nu.

Yeshǔ dǐǎdǐô kòyò yè̤̌rǐ

¹⁰ Pwa̤nophû̌ tokhlǒ getîkhî dě geshôbǐǐ bò Yeshǔ kû̌ lǒ̤꤮ bò asî ma̤hto ta̤nutokhlǒ awe̤akè. Yeshǔ kaǎnṳ̌ asî dě a hǎhtò̌cû̌ tûû̌ lô̌khô dǒ wî̤̌tôwî̤̌ dǒ kòyò kaǎ kû̌ Wî̤̌bètôsè̌da nutôwî̤̌.

¹¹ Bǎ kòyò saprṳ̂ ganǎ̤de kû̌ Běcǎ Yeshǔ kû̌ akhôphijǎ tokhlǒ cû̌ dǒ wî̤̌nutôwî̤̌ akha, asî gû̌cû̌kû̌ lû̌û kò bǎnu. Yeshǔ kaǎmô̤shǔ asî dě shôbǐǐlṳ̌ bǎ asî kû̌ Cǒmara ashigǎ awe̤akè dě a ma̤hǎmǎ bǎ kòyò tokhlǒ a ta̤shǐta̤sha.

¹² Bǎ lṳmṳ̌ glè̌ lò̤tě̤ akhanu, akhôphijǎ shǐsò̌ginǐ̤ hè dǒ a ô̌ dě a hèhî̌ lû̌û kû̌, “Pô̤̌khô̌ asî glè̌ cû̌ kè̌lǎǎ kè̌lǎô, gǔ cû̌kè̌lǎ ǐtûû̌ lô̌khô kû̌ asî lǎ̤môô̌ gûlǎ̤gûbò̌ ayanudě, nogekè mò̌ asî dǒ dokûshô̌kû bǎ a ô̌ phǔte̤we̤ bǒo tûkû nu, ma̤titè̌hî̌dě gûlǎ̤ bǒotûkûmî̌ do ô̌phǔ tôdo꤮ tô̤̌.”

¹³ Bǎbǎkǎlè Yeshǔ hî̌ asî kû̌, “Kè̌ dǐǎdǐô asî tocǒcǒ nu.” Dě asî hî̌shěshu kû̌, “Pata ô̌ pwǎtǒ̤ khûmò yè̤̌phlǒ kû̌ tò̤̌phû̌ ginǐ̤bǎ nô̤̌. Mî̌ na sǎyṳ no cû̌pwî̤ pa shǎǎshǎô dǒ kòyò saprṳ̂saphǎ aya ya?”

¹⁴ Dô̌bǎpwǎ pwa̤khûwè̤̌pwǎ̤ nî̌ a phǔ ô̌ yè̤̌rǐ hǒ. Dě Yeshǔ hî̌lò̤ akhôphijǎ tokhlǒ kû̌, “Kòyò saprṳ̂ nu, nohǎnòò̌ ô̌plǒ asî tôprṳ̂ kû̌ pwa̤yè̤̌shi, tôprṳ̂ kû̌ pwa̤yè̤̌shi nu.”

¹⁵ A khôphijǎ tokhlǒ nohǎnòò̌ kòyò saprṳ̂ pô̤̌ ahî̌lò̤ asî nu.

¹⁶ Dě Yeshǔ phî̌ mû̌ yè̤̌phlǒ kû̌ tò̤̌phû̌ ginǐ̤bǎ dě a kè̌htò̌ dǒ mǒlǎ̤ dě a hî̌bwǐhî̌sîrî Cǒmara. Htodě a běphwǐ mû̌ kû̌ tò̤̌phû̌ nudě a ǐlò̤ kû̌ akhôphijǎ nutokhlǒ. Dě akhôphijǎ tokhlǒ yû̌lò̤ǎ pè̤̌ kû̌ kòyò saprṳ̂ nutokhlǒ.

¹⁷ Asî pô̌ǎpô̌ô ǎkǒôbe bò pṳ̂̌꤮ tôpwa̤ dě a khôphijǎ tokhlǒ phî̌plǒ gesô̌ mû̌ kû̌ tò̤̌phû̌ dǒ a běphò̌nu dě a ô̌kèkashǎ tokhlǒnu a ô̌be pe kû̌ phû̌běnu shǐginǐ̤phû̌bě.

Khûpetarǔ hî̌htò̌ kû̌ Yeshǔmî̌ Khrǐ

¹⁸ Tini̤kha, bǎ Yeshǔ kwicaba tûû̌ tôpwa̤ nô̤̌ akhanu, akhôphijǎ tokhlǒ ô̌phǔ kû̌ lû̌û dě Běcǎ Yeshǔ gwè̌ asî kû̌, “Kòyò saprṳ̂ tokhlǒ hî̌kwè̌ lô̌khô he kû̌ hemî̌ mò̌pè?”

¹⁹ Dě asî hî̌shěshu kû̌, “Tokhlǒkhlǒdě a hî̌ na kû̌ pwa̤jushi Khûyṳ̂ha, tokhlǒkhlǒ a hî̌ kû̌ piwi̤pèshè Khûělǐya, tokhlǒkhlǒ a hî̌ kû̌ piwi̤pèshè dǒ꤮ wǐkha tokhlǒ akla tôpwa̤pwa̤ ihtohtûpwa̤ gesô̌ pwǎ,” a hî̌ lô̌khô pô̤̌nu.

²⁰ Dě Yeshǔ gwè̌ sô̌ asî, dě a hî̌ asî kû̌, “Sî lè, sî hî̌ he kû̌ mò̌pè?” Dě Khûpetarǔ hî̌shěshu lû̌û kû̌, “Na mî̌ Khrǐ dǒ Cǒmara rû̌htò̌ a kû̌ a gǔ ma̤hǎplǎge kòyòhǎkhû̌phû̌ nutôpwa̤ hǒ.”

²¹ Dě Yeshǔ mǎ tě̤tě̤mè̤̌mè̤̌ ayô̤̌ dě a hî̌ asî kû̌ sî bǎ cû̌ shôbǐǐlṳ̌ tǎ̤ kòyò tôpwǎ̤꤮ tǎ̤mǎ̤ nî̌꤮.

Yeshǔ shôbǐǐlṳ̌ a ta̤khòjî̌khòjû̌ awe̤akè kû̌ ata̤si awe̤akè

²² Htodě a hî̌ pô̤̌ asî kû̌, “Kòyòphû̌khû mî̌ henu, a bǎ khòbǎ jî̌ ta̤jî̌ta̤jû̌ pṳ̂̌mi̤shicǒ pě, dě Yǔdaphû̌ ta̤ô̌plǒô̌cu ikǒdû̌ tokhlǒ kû̌ pwa̤shû̌gǎ ikǒlǒkò tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ jû he tô̤̌, a shò̌tephecû̌kè he pě. Kòyò ma̤sikè he pě dě suni̤susa pěnu Cǒmara gǔ ma̤ htûpwa̤ge tîkhîsô̌ he pě.”

²³ Htodě Yeshǔ hî̌shěshu asî pṳ̂̌꤮ tôpwa̤ kû̌, “Kòyò tôpwa̤pwa̤ kè̌ sǎyṳ gû̌ hekò nu, a tôbǎ ma̤ pô̤̌ he sǎyṳnoma̤ yǎ nutokhlǒ, a ma̤ jû̌꤮ asǎphlǒ mî̌ anǐ̤tô̤̌. A bǎ ò̌htò̌tûû̌ a nò̌dò̌htǔ pṳ̂̌ti̤ni dě abǎ gû̌ hekò.

²⁴ Ma̤titèhî̌dě kòyò dǒ a sǎyṳ ma̤hǎplǎge tûû̌ a ta̤htûpwa̤ tôpwa̤pwa̤ nu, a ta̤htûpwa̤ glè̌ hǎmǎkè pě. Bǎbǎkǎlè dǒ hekhû̌hekhî dě kòyò tôpwa̤pwa̤ kè̌ ǐlò̤kè tûû̌ a ta̤htûpwa̤ nu, a gǔ nǐ̤bǎ a yôla htûpwa̤ tûjû̌pwa̤ pě.

²⁵ Kòyò tôpwa̤pwa̤ kè̌ nǐ̤bǎbò pwǎ hǎkhû̌ a ta̤dû̌yò̤̌htò̌sa tokhlǒ, bǎbǎkǎlè a kè̌ lò̤jû̌kè a yôla htûpwa̤ tûjû̌pwa̤ nu abwǐ ô̌ lû̌ûya hî̌tè?

²⁶ Kòyò tôpwa̤pwa̤ dǒ a sòwò̤̌ he kû̌ helě̤heyô̤̌ tôpwa̤pwa̤ nu, htû̌꤮ Kòyòphû̌khû mî̌ he gǔ hè kû̌ ta̤bwǐdû̌sîrîhtû kû̌mî̌ apha a ta̤bwǐdû̌sîrîhtû kû̌ mǒkhû̌ tanaphû̌ plò̌shǐ tokhlǒ a ta̤bwǐdû̌sîrîhtû pě akhanu, he gǔ sòwò̤̌ tûû̌ yǎ pě.

²⁷ He hî̌ mè̤̌mî̌ca sî, kòyò dǒ a ihtǒô̌ bǎ sîkla tokhlǒkhlǒnu, bǎ asî si khôtô̤̌ kha, asî gǔ kè̌shǐnô̌ lô̌khô Cǒmara hè pǒshipǒgǎ pě.”

Yeshǔ nǎ̤glǒ htû̌lè̌ khô̌kè awe̤akè

²⁸ Bǎ Yeshǔ hî̌bǎhto a phǔ be ni̤lǐ̤sô̌ akhanu, a kaǎnǐ̤ Khûpetarǔ, Khûyṳ̂ha kû̌ Khûya̤kû dě asî cû̌htò̌ dǒ khôlô tômè alô̤ dě Běcǎ Yeshǔ glè̌ cû̌kwicaba bǎnu.

²⁹ Bǎ a kwicaba akhanu, amǐ̤sǎ htû̌lè̌htò̌ khô̌kèbò dě a jejû tokhlǒnu abûsǔlǔ kakhahtò̌ lǒ̤꤮ bò.

³⁰ Kòyò hè ô̌lṳ̌htò̌sumṳ̌ bǎnu sò̌ginǐ̤ dě a hî̌bǎ kû̌ Yeshǔ. Asî mî̌ Khûmṳ̂shě kû̌ piwi̤pèshè Khûělǐya.

³¹ Dě a ô̌lṳ̌htò̌ tǒ̤ kû̌ mǒkhû̌ a ta̤bwǐdû̌sîrîhtû tokhlǒ dě a hî̌bǎ kû̌ Yeshǔ. Asî hî̌bǎ kè̌khîlû̌û titè awe̤kè mî̌ Yeshǔ gǔ ma̤lǒhtò̌behtò̌ Cǒmara a ta̤yè̤lò̤nǎ nu pě, dě a gǔ sikè bǎ Wî̤̌yarǔshôle akû pěnu awe̤akè.

³² Khûpetarǔ kû̌ a khô sî tokhlǒ hǎmôô̌shôpe̤ bǎbǎkǎlè bǎ asî sî̌yahtò̌ akhanu, a kè̌shǐ Yeshǔ a ta̤bwǐdû̌sîrîhtû tokhlǒ htodě kòyò sò̌ginǐ̤ ihtǒ ô̌tǒ̤ kû̌ lû̌û.

³³ Bǎ Khûmṳ̂shě kû̌ piwi̤pèshè Khûělǐya hǎhtò̌cû̌kè akhanu, Khûpetarǔ hî̌ Yeshǔ kû̌, “Běcǎ꤮ gûlǎ̤ bǒo tôkû nî̌ awî̤ amô̤wô̌ lîlè. Pa gǔ ma̤bǎ sî hǐphû̌ sumè, tômèdě naya, tômèdě Khûmṳ̂shě aya, tômèdě piwi̤pèshè ělǐya aya.” (A hî̌ pô̤̌nu bǎbǎ a hî̌kwè̌ titènu a sî̌ya lò̤ anǎ̤ tô̤̌.)

³⁴ Bǎ Khûpetarǔ hî̌bǎ pepwǎ akhanu, poǒlṳ̌ tôbě hè ô̌lṳ̌htò̌ dě a lò̤jobǐkè asî. Bǎ poǒlṳ̌ lò̤jobǐ asî akhanu, akhôphijǎ tokhlǒ ǐsha bò kè.

³⁵ Dě lě̤pwe̤htò̌ dǒ poǒlṳ̌ akû dě a hî̌ kû̌, “A mî̌ hephû̌khû dǒ he rû̌htò̌ a tôpwa̤ hǒ. Ganǎ̤de lô̌khô ayô̤̌ nî̌꤮.”

³⁶ Bǎ lě̤pwe̤ ô̌kǔhto akhanu, akhôphijǎ nusò̌su kè̌shǐ kû̌ Yeshǔ ô̌kè pwǎ tôpwa̤nô̤̌꤮ pwǎ. Lǒ̤꤮ bò ta̤we̤ta̤kè dǒ asî kè̌shǐ a htûhtò̌ nu a shôbǐǐlṳ̌ bǎ kòyò tôpwǎ̤꤮ tô̤̌, bǎnukha pwǎpwǎ asî ô̌ bò pwǎ.

Yeshǔ ma̤hǎmǎ phijǎ pwa̤khûphû̌ dǒ khînǎkhîno ma̤bǎ lû̌û tôpwa̤

³⁷ Dǒnô̌kòtôni, bǎ asî ô̌dǒ khôlôkhû̌ hǎtě̤ akhanu, kòyò saprṳ̂dû̌ hèkè̌shǔǐ asî tôprṳ̂tôphǎ.

³⁸ Dǒ kòyò saprṳ̂ akla tôpwa̤nu a kaǎgǔ kû̌, “Sara꤮! he kwisǎyṳ na, na kè̌mò̌ hephû̌ pwa̤khû hǒo. He phû̌khû ô̌pwǎ tôpwa̤꤮ nô̤̌ pwǎ.

³⁹ Khînǎkhîno ma̤bǎ yǎ pṳ̂̌plǎplǎ dě kaǎgǔ sumṳ̌htò̌. Htodě a ma̤htò̌ lû̌û dě agô̌kû bǒbè̌htò̌. Khînǎkhîno hǒtôdonu, a ma̤jî̌ma̤jû̌ lû̌û, a hǎhtò̌ yûkǎkwe tô̤̌.

⁴⁰ He kwisǎyṳ nakhôphijǎ tokhlǒ gǔ wṳ̂̌htò̌kè bǎ lû̌û khî̌nǎkhînonu bǎbǎ asî wṳ̂̌hǎhtò̌ pè̤̌kètô̤̌.”

⁴¹ Běcǎ Yeshǔ hî̌ asî kû̌, “Sî ta̤yṳ̌ta̤nǎ̤ ô̌tô̤̌, sî nò̌kudu shû̌lě! he bǎ ô̌yî̤ pe kû̌ sî pwǐtè pě? He tôbǎ khòsǎdô yî̤ kû̌ sî pwǐtè pě?” A hî̌hto pô̤̌nudě a hî̌ kòyòpha nutôpwa̤ kû̌, “Kaǎhè na phû̌khû bǒo.”

⁴² Bǎ phijǎphû̌ nutôpwa̤ hè akhanu, khînǎkhîno ma̤lò̤khǔpo̤ lû̌û dǒ hǎkhû̌ dě a ma̤htò̌ lû̌û. Dě Yeshǔ sǎhtǎ khînǎ nudě a ma̤hǎmǎkè bǎ lû̌û, dě a ǐ tîkhîsô̌ kû̌ apha.

⁴³ Kòyò ô̌ bǎnu pṳ̂̌꤮ tôpwa̤ ǒò̌ kiti̤kaa bò kè Cǒmara a ta̤pô̤ta̤phǎ shû̌sho nu. Bǎ kòyò pṳ̂̌꤮ tôpwa̤ ǒò̌ kiti̤kaa bò Yeshǔ ma̤ ta̤cô̌klǐcô̌sè akhanu, Yeshǔ shôbǐǐlṳ̌ bǎ akhôphijǎ tokhlǒ kû̌,

Yeshǔ hî̌bǎ pô̤̌ ata̤si awe̤akè

⁴⁴ “Ganǎ̤de tě̤mè̤̌ lô̌khô yô̤̌ dǒ he gǔ shôbǐǐ lṳ̌ bǎ sî khònò̤̌ nî̌꤮. Kòyòphû̌khû mî̌ he, kòyò gǔ shaǎ lò̤kè a dǒ kòyòhǎkhû̌phû̌ a cǔdekû pě.”

⁴⁵ Bǎbǎkǎlè a khôphijǎ tokhlǒ sǎganǎ̤phlô lû̌û ta̤hî̌bǎ nutômû amûasǎ tô̤̌. Pô̤̌khô asî gǔ sî̌ya tô̤̌ nu, kòyò bè̌hǔbè̌bî̌kè amûasǎ pwǎ. Asî gwè̌bǔ Běcǎ Yeshǔ tôpwǎ̤꤮ tô̤̌.

Mò̌pè htûdû̌gutṳ̌ pěya?

⁴⁶ Běcǎ akhôphijǎ tokhlǒ gǔ htè̌kè̌khî lû̌û kû̌ dǒ asî aklanu, mò̌pè gǔ htûdû̌gutṳ̌ pěya, pô̤̌nu.

⁴⁷ Yeshǔ sî̌ganǎ̤ asî ata̤gènè̤ dǒ a sǎphlǒkû tokhlǒ akhû̌akhî a kaǎhè phijǎ tôpwa̤ dě a nohè ihtǒô̌ lû̌û dǒ akòshî̌,

⁴⁸ Dě a hî̌ asî kû̌, “Kòyò tôpwa̤pwa̤nu dǒ a kè̌ hemǐ̤sǎ dě a kè̌ kaǎmô̤shǔ phijǎphû̌ sô̌sô̌kû̌ hǒtôpwa̤nu a kaǎmô̤shǔ he hǒ. Dě kòyò tôpwa̤pwa̤ dǒ a kaǎshǔ he numî̌ a kaǎshǔ pwa̤ dǒ a nohèlò̤ he tôpwa̤nu hǒ. Ma̤titè̌hî̌de, kòyò dǒ a gènè̤pî̌tî̌ anǎ̤ dǒ sîkla tôpwa̤pwa̤ numî̌ kòyò dǒ a htûdû̌gutṳ̌ hǒ.”

Kòyò dǒ a shěpò̤̌yò̤̌kè sî tô̤̌ numî̌, kòyò dǒ a ô̌pa kû̌ sî tôkhô hǒ.

⁴⁹ Khûyṳ̂ha hî̌htò̌ kû̌, “Běcǎ pa kè̌shǐ kòyò tôpwa̤ dǒ a cû̌ wṳ̂̌hǎhtò̌pè̤̌kè khînǎkhîno tokhlǒ kû̌ nami̤. A ô̌ dǒ pa saprṳ̂kû mè̤̌tô̤̌ dě pa hî̌ tě̤tṳ̌kè yǎ.”

⁵⁰ Bǎbǎkǎlè Yeshǔ hî̌shěshu Khûyṳ̂ha kû̌, “Cû̌ ma̤ tě̤tṳ tǎ̤ a tǎ̤mǎ̤. Ma̤titè̌hî̌dě kòyò shěpò̤̌yò̤̌kè sî tô̤̌ tokhlǒ numî̌ kòyò dǒ a ô̌pa kû̌ sî tôkhô hǒ.”

Shamarǐdo tôdo dǒ a kaǎmô̤shǔ Yeshǔ tô̤̌

⁵¹ Bǎ lṳmṳ̌ni̤ lṳmṳ̌sa phǔhtò̌ kû̌ kòyò gǔ kaǎhtò̌ Yeshǔ dǒ mǒkhû̌ akhanu, a bè̌lò̤ asǎphlǒ kû̌ a gǔ cû̌ dǒ Wî̤̌yarǔshôle.

⁵² Yeshǔ nocû̌ô̌nǎ wǐ pwa̤sû ta̤we̤ta̤kè tokhlǒ dǒ alô̤mô̤̌nu, dě pô̤̌khô asî gǔ tîwî̌tòwò nǎbò Běcǎ aya nudě, asî hǎhtò̌cû̌ nṳ̌ ô̌kǔlǎ dǒ shamarǐ do tôdo akû.

⁵³ Bǎbǎkǎlè dophû̌shô̌phû̌ tokhlǒ kaǎmô̤shǔ Yeshǔ tô̤̌, ma̤titè̌hî̌dě asî sî̌ganǎ̤ tě̤tě̤mè̤̌mè̤̌ kû̌ a gǔ cû̌ dǒ Wî̤̌yarǔshôle hǒ.

⁵⁴ Bǎ akhôphijǎ Khûya̤kû kû̌ Khûyṳ̂ha kè̌shǐ asî ma̤pô̤̌nudě, asî hî̌ Běcǎ kû̌, “Běcǎ, pa kaǎlò̤ mî̌ dǒ mǒkhû̌ dě nohèlò̤ ukè bò asî pě numî̤̌ na sǎphlǒ ô̌ tô̤̌ ya?”

⁵⁵ Yeshǔ kè̌tîkhî dě a sǎhtǎ asî.

⁵⁶ Dě asî hǎhtò̌cû̌ sělě khô̌kè dǒ ashǔshawa̤ tôdo.

⁵⁷ Bǎ asî cû̌ dǒ klè̌lô̤ akhanu, kòyò tôpwa̤ hî̌ Yeshǔ kû̌, “Na cû̌ bǎtè꤮ tôkû bǎbǎ, he gǔ cû̌kû̌ na dě he htû nakhôphijǎ.”

⁵⁸ Dě Yeshǔ hî̌shěshu a kû̌, “Htwǐmi̤ tokhlǒ ô̌ kû̌ akû, htû̌phû̌ wi̤dǒ mǒlǎ̤ tokhlǒ ô̌ kû̌ api̤, bǎbǎkǎlè Kòyòphû̌khû mî̌ he, bǎ he lǎ̤hǎmôô̌ ô̌kǔ tòshò̌phû̌ aya pwǎnu aô̌ tôkû꤮ tô̤̌.”

⁵⁹ A hî̌ geshǔ kòyò dǒ ashǔshawa̤ tôpwa̤ kû̌, “Gû̌kû̌ hekò dě htûkû̌ he khôphijǎ.” Bǎbǎkǎlè hǒtôpwa̤ hî̌shěshu lû̌û kû̌, “Běcǎ, ǐ mò̌ he ta̤shěkhǎ dǒ he gǔ ge lǔwǐ mò̌ hepha nî̌꤮.”

⁶⁰ Yeshǔ hî̌shěshu lû̌û kû̌, “Kòyòsi nu, nocû̌lǔ tûû̌ yǎ kû̌ kòyò dǒ a si dǒsû̌dǒsò̌ nutokhlǒ. Bǎbǎkǎlè nanî̌, cû̌ shôbǐǐlṳ̌wǐ kòyò kû̌ Cǒmara shigǎ awe̤akè.”

⁶¹ Dǒ ashǔshawa̤ tôpwa̤ dě ahî̌ kû̌, “Běcǎ he htûkû̌ nakhôphijǎ, bǎbǎkǎlè plûge wǐ he kû̌ dǐ ge hî̌mô̤hî̌wô̌ kû̌lǎ he kû̌ he hǐphû̌phòphû̌ tokhlǒ.”

⁶² Yeshǔ hî̌shěshu a kû̌, “Kòyò tôpwa̤pwa̤ dǒ a pṳ̂̌mě htě dě a tiwǐgetîkhî mò̌nu, abwǐsîrî ô̌ dǒ Cǒmara ashiagǎ aya tocǒ꤮ tô̤̌.”