Lǔka 24 - Kawyaw New Testament

Yeshǔ Khrǐ htûpwa̤ getîkhî dǒ ta̤si

¹ Mǒ̤ni̤ susô̌tôni̤ sakhû̌lû̌ tôni̤ bǎ lṳmṳ̌lîwî̤sò akhanu, pwa̤mǒ̤ tokhlǒ phî̌nǐ̤ shinumû̌ dǒ asî tîwî̌tòwò nǎnu dě a hè lô̌khô dǒ lṳ̌khû̌.

² Dě lǒ̤ dǒ kòyò htǒbǐ lû̌û kû̌ lṳ̌kû nutômènu, asî kè̌shǐ kû̌ kòyò htǔmô tephe cû̌kè lû̌û.

³ Asî nṳ̌kè̌ bǎbǎkǎlè a kè̌shǐ bǎ Yeshǔ alṳ̌tṳ̂̌ tô̤̌.

⁴ Bǎ asî ihtǒ gènè̤ ta̤we̤ta̤kè hǒo akhanu, kòyò dǒ a kusô̌ jejû rakha sò̌ginǐ̤ ô̌lṳ̌htò̌ sumṳ̌ bǎ asî dě ahèihtǒ dǒ asî kòshî̌.

⁵ Pwa̤mǒ̤ hǒtokhlǒ ǐsha tûlû̌shû̌lě dě a dô̌gînîlò̤ dě û̌lò̤ amǐ̤sǎ dǒ hǎkhû̌, dě kòyò sò̌ginǐ̤ hî̌ asî kû̌, “Sî cû̌kè̌lǎ kòyò htûpwa̤ dǒ kòyò si tokhlǒ akla ma̤titè?

⁶ Yeshǔ ô̌pe bǒo tô̤̌, a ihtǒ htûpwa̤ge tîkhî hǒ, gènè̤htò̌ sô̌ lô̌khô bǎ a ô̌ bǎ Galilè̤̌gǎ akha dě a shôbǐǐ hto sî yô̤̌sǎ nutokhlǒnu.

⁷ ‘Kòyòphû̌khû mî̌he, kòyò glè̌ ǐlò̤kè he dǒ kòyò pwa̤ma̤sǔphû̌ tokhlǒ acǔdekû pě. Kòyò glè̌ ma̤sihtò̌ he dǒ nò̌dò̌htǔ alô̤ pě, dě bǎ suni̤tôni̤ pěnu, he glè̌ ihtǒ htûpwa̤ gesô̌ pě.’”

⁸ Hǒtaplǎdě pwa̤mǒ̤ tokhlǒ gènè̤htò̌bǎ sô̌ a ta̤hî̌bǎnǎ nutokhlǒ.

⁹ Dě asî hǎhtò̌ge dǒ ahǐ dě a geshôbǐǐ bǎ bò ta̤we̤ta̤kè hǒo kû̌ pwa̤nophû̌ shǐtôpwa̤ nu kû̌ kòyò dǒ ashǔshawa̤ dǒ a ô̌kè kû̌ asî lǒ̤꤮ bò bǎnu tokhlǒ.

¹⁰ Pwa̤mǒ̤ nutokhlǒ mî̌ Magadalǎ dokûmǒ̤ Mǒ̤ma̤rǐ, mǒ̤ Yṳ̂hana kû̌ Khûya̤kû amǒ̤ Mǒ̤ma̤rǐ sînu tokhlǒ hǒ. Asî kû̌ pwa̤mǒ̤ dǒ ashǔshawa̤ tokhlǒ shôbǐǐlṳ̌ bǎ pwa̤nophû̌ tokhlǒ kû̌ ta̤we̤ta̤kè .

¹¹ Bǎbǎkǎlè pwa̤nophû̌ gènè̤ lô̌khô kû̌ pwa̤mǒ̤ tokhlǒ hî̌bǐhî̌ô̌ phô̌phô̌ pwǎ akhû̌akhî, a yṳ̌ǎ kû̌ asî tô̤̌.

¹² Bǎbǎkǎlè Khûpetarǔ ihtǒkhlè̌hè dǒ lṳ̌khû̌ dě bǎ ahèûjogokè̌ nṳ̌ akhanu, a kè̌shǐ pwǎtǒ̤ hugò̌pwǐ bô̌plîhtû nutûpṳ nô̤̌ pwǎ. A hèkè̌ hto pô̤̌nudě a getîkhî sô̌ dǒ hǐ. A cû̌htûhtò̌ pô̤̌hǒo ma̤titè̤̌ a gènè̤ dě a ǒò̌ kiti̤kaa kè.

Kòyò tokhlǒ cû̌ dǒ do Ěmò̌

¹³ Bǎnutini̤, Yeshǔ akhôphijǎ sò̌ginǐ̤ cû̌ dǒ do Ěmò̌ dě a ô̌ yî̤ kû̌ Wî̤̌yarǔshôle dě a phǔ ô̌ susô̌tô mi̤la.

¹⁴ Dě asî shôbǐǐcû̌ kè̌khî lû̌û kû̌ lǒ̤bò Ta̤ma̤htûhtò̌ awe̤akè nu tokhlǒ.

¹⁵ Bǎ asî shôbǐǐlṳ̌ kè̌khî tûû̌ lû̌û akhanu, Yeshǔ hèphǔ dǒ asî ô̌ dě a cû̌ wô̤̌wô̤̌ kû̌ asî.

¹⁶ Asî kè̌shǐ lû̌û bǎbǎkǎlè a sî̌ya lô̌khô lû̌û tô̤̌.

¹⁷ Yeshǔ hî̌ asî kû̌, “Sî hî̌bǎ kwè̌ lû̌û kû̌ ta̤we̤ta̤kè mî̌titè̤̌?” Hǒtaplǎdě asî ihtǒ ô̌kǔ lô̌khô dě asî mi̤sǎnu a sǎplǎ̤sǎyṳ lǒ̤bò.

¹⁸ Bǎnu akla tôpwa̤ dǒ ami̤ kû̌ Khûkalòphǎ hǒtôpwa̤nu a gwè̌ lû̌û kû̌, “Dǒ Wî̤̌ Wî̤̌yarǔshôle akû nu, kòyò htû shǐtèmè̤ mî̌ tǒ̤ pwǎ na nô̤̌ pwǎ. Pyǎhǎlṳnô̤̌ nu dě kòyò ma̤kwè̌꤮ titè numî̌ na sî̌ya gû̌ kòyò tocǒ꤮ tô̤̌ ya?”

¹⁹ Dě Yeshǔ gwè̌ lû̌û kû̌, “Kòyò ma̤kwè̌꤮ titèya?” Dě asî hî̌shěshu lû̌û kû̌, “Wî̤̌ Na̤sôrè̤̌phû̌ Yeshǔ awe̤akè nu nî̌. A mî̌ piwi̤pèshè tôpwa̤. A ta̤hî̌buhî̌bǎ kû̌ a ta̤phî̌ta̤ma̤ dǒ Cǒmara kû̌ kòyòhǎkhû̌phû̌ lǒ̤bò alô̤mô̤̌, a ô̌ kû̌ ta̤pô̤ta̤phǎ hǒ.

²⁰ Pô̤̌khô pa pwa̤shû̌gǎ ikǒlǒkò tokhlǒ kû̌ pa kòyò wè̤̌pwǎ̤ tokhlǒ glè̌ cî̌htò̌ sikè lû̌û ayanu, a ilò̤kè lû̌û dǒ Khwǐpǐlǎ a cudekû dě a ma̤sihtò̌kè̌ lû̌û dǒ nò̌dò̌htǔlô̤.

²¹ Bǎbǎkǎlè pa kè̌shu nǎla̤ǐ a kû̌ a glè̌ ma̤hǎplǎkè Isôrělaphû̌ tokhlǒ pě. Kǎkhôtô̤̌, hǒtôni̤mî̌ ta̤ma̤htûhtò̌ anǎ̤ behtò̌hǒ suni̤ hǒ.

²² Pwa̤mǒ̤ dǒ pakla tokhlǒnu, asî hè wôsò lô̌khô dǒ lṳ̌khû̌ dě a ge hî̌ sǎgònò̤̌ bò pa.

²³ Ma̤titè̤̌hî̌dě asî hè dě a hè kè̌shǐ lṳ̌tṳ̂̌ nu tô̤̌ ahî̌꤮. Asî getîkhî dě a ge hî̌ kû̌ asî kè̌shǐ mǒkhû̌ tanaphû̌ tokhlǒ ô̌lṳ̌htò̌ bǎ asî, dě a hî̌ asî kû̌ Yeshǔ htûpwa̤ tîkhî sô̌ hǒ, hî̌ pô̤̌nu ahî̌.

²⁴ Pwa̤khû dǒ pakla tokhlǒkhlǒ khlè̌hèkè̌ lô̌khô dǒ lṳ̌khû̌ dě a kè̌shǐ Yeshǔ lṳ̌kû ô̌kôkhûkè sô̌kû̌ pwa̤mǒ̤ nutokhlǒ hî̌nupwǎ. Dě asî kè̌shǐ Yeshǔ tô̤̌, ahî̌.”

²⁵ Pô̤̌nu dě Yeshǔ hî̌ asî kû̌, “Kòyò ô̌lǒô̌khlo sî꤮ piwi̤pèshè tokhlǒ hî̌ nǎ yô̤̌sǎ tokhlǒnu, sî yṳ̌ǎ pò̤̌yǎ̤ jî̌꤮ he!

²⁶ Khrǐ tôbǎ khò ta̤jî̌ta̤jû̌ htodě a glè̌ cû̌nṳ̌ dǒ a ta̤bwǐdû̌sîrîhtû akû pě mè̤̌tô̤̌ ya?”

²⁷ Htodě Yeshǔ shôbǐǐlṳ̌ bǎ asî kû̌ lî̤plò̌shǐ hî̌ nǎ hto a awe̤akè sahtò̌ dǒ Khûmṳ̂shě wě̤nǎ lî̤ nutôbǎ kû̌ lǒ̤꤮ bò piwi̤pèshè wě̤ nǎ nutokhlǒ.

²⁸ Bǎ asî cû̌tǒ̤phǔ kû̌ do dǒ aglè̌cû̌ nutôdo akhanu, Yeshǔ ma̤ pô̤̌ a glè̌ cû̌ tûlû̌kè kû̌ do hǒonu.

²⁹ Bǎbǎkǎlè asî kaǎ lû̌û dě a hî̌ lû̌û kû̌, “Nṳ̌ ô̌kǔgû̌ pa bǒo, lṳmṳ̌ glè̌ phǔlò̤tě̤ hǒ, hî̌pěmî̌ lṳmṳ̌khǐ lǎ napě.” pô̤̌nu akhû̌akhî Yeshǔ cû̌nṳ̌ ô̌kǔgû̌ kû̌ asî bǎnu.

³⁰ Bǎ a hǎnòò̌ ǎ kû̌ asî akhanu, a phî̌ mû̌ dě a hî̌bwǐhî̌sîrîhtò̌ Cǒmara htodě a běphwǐ mû̌ dě a yṳ̂̌lò̤ǎ bǎ kû̌ asî.

³¹ Htodě asî mi̤sǎ lîhè dě a sî̌ya tǒ̤mǎǐ ge Yeshǔ, dě taplǎnô Běcǎ Yeshǔ hǎmǎ bǎkè dǒ asî lô̤mô̤̌.

³² Asî hî̌ nǐ̤tû̌ kè̌khilû̌û kû̌, “Bǎ a hî̌bǎ kû̌ pa dǒ klè̌lô̤ akhanu bǎbǎ, bǎ a shôbǐǐphlô bǎ pa kû̌ lî̤plò̌shǐ ta̤hî̌bǎô̌nǎ sîtokhlǒ akhanu bǎbǎ, dǒ pa sǎphlǒkû nu, a gònò̤̌gôglè sǎlě̤sǎlò̤htò̌ pô̤̌nu tô̤̌ya?”

³³ Tôplǎnô̌ asî ihtǒge dǒ Wî̤̌ Wî̤̌yarǔshôle. Dě asî gekè̌shǐ kû̌ pwa̤nophû̌ shǐtôpwa̤ kû̌ kòyòshǔshawa̤ tokhlǒ ô̌plǒ tǒ̤bò lû̌û bǎnu.

³⁴ Pwa̤nophû̌ hî̌ bǎ kòyò hètǒ̤ mǒ̤pe hǒsò̌ginǐ̤ kû̌, “Běcǎ ihtǒ htûpwa̤ge tîkhî mè̤̌mî̌ca hǒ nî̌. A dǔlè̌lṳ̌ bǎ htohǒ anǎ̤ kû̌ Khûshǐmṳ̂ hǒ!”

³⁵ A hî̌htopô̤̌nu dě kòyò hǒsò̌ginǐ̤ shôbǐǐlṳ̌ bǎpô̤̌ asî kû̌ bǎ asî cû̌ dǒ klè̌lô̤ akhanu, a ma̤kwè̌ bǎ asî titè̤, htodě asî sî̌ya nô̌ pwǎ Yeshǔ bǎ a běphwǐ mû̌ akhanu pwǎ, a shôbǐǐ bǎkè asî pô̤̌nu.

Yeshǔ dǔlè̌lṳ̌ bǎ anǎ̤ kû̌ akhôphijǎ tokhlǒ

³⁶ Bǎ kòyò hǒsòginǐ̤ shôbǐǐbǎ asî kû̌ ta̤we̤ta̤kè hǒ akhanu, Yeshǔ anǎ̤ Běcǎ nǐ̤tû̌ hèihtǒ ô̌lṳ̌htò̌ sǎgònò̤̌ bǎ dǒ asî kǎmakû dě a hî̌ asî kû̌, “Sǎphlǒ ta̤gûjû̌kabǎ ô̌ pû kû̌ sî nî̌꤮.”

³⁷ Asî gènè̤ lô̌khô kû̌ a kè̌shǐ kò yôla dě a ǐsha sǎgònò̤̌ lô̌khô.

³⁸ Dě Yeshǔ hî̌ asî kû̌, “Sî gènè̤ ǐsha bò lô̌khô ma̤titè̤? Sî sǎphlǒ tôhtôtôlò̤ ma̤titè̤̌?

³⁹ Pô̤̌khô sî glè̌ kè̌shǐsî̌ya tě̤tě̤mè̤̌mè̤̌ kû̌ he nǎ̤glǒ ô̌ mè̌mî̌ca ayanu, kè̌mò̤̌ lô̌khô he cǔde kû̌ he khò̌lôpô̤̌hǒo, hèpṳ̂̌kè̌kè̌ lô̌khô mò̤̌ henǎ̤hǒo, ma̤titè̤̌hî̌dě, kòyôla numî̌, aphěayî̌ ayô̤agî̌ ô̌gû̌ kòyò pô̤̌ henu tô̤̌.”

⁴⁰ A hî̌hto bǎ asî pô̤̌nudě a dǔlè̌lṳ̌ bǎ asî kû̌ acǔde kû̌ khò̌lôpô̤̌.

⁴¹ Asî sǎlě̤sǎlò̤ lô̌khô dě a ǒò̌ kiti̤kaa bò lô̌khô akhû̌akhî, a yṳ̌ǎwô̌ lô̌khô khôtô̤̌. Htodě Yeshǔ gwè̌ asî kû̌, “Sî shǎǎshǎô ô̌ tocǒcǒ ya?”

⁴² Asî ǐ lû̌û tò̤̌phû̌ shû̌ǎ tôkû̌kòphû̌.

⁴³ Dě a phî̌shǐshu dě a ǎhtò̌lṳ̌ bǎ dǒ asî lô̤mô̤̌.

⁴⁴ Htodě a hî̌ asî kû̌, “Bǎ he ô̌gû̌pe kû̌ sî akhanu, lǒ̤꤮ bò kòyò wě̤ô̌ htohǒ hewe̤hekè dǒ Khûmṳ̂shě alî̤kû nutokhlǒ bǎbǎ, piwi̤pèshè wě̤ô̌nǎ nutokhlǒ bǎbǎ, dǒ htû̌sò̌htò̌ akû nutokhlǒ bǎbǎ, a bǎ lǒbehtò̌ lǒ̤bò pṳ̂̌꤮ tocǒ pěnu, he shôbǐǐlṳ̌ bǎ htobòhǒ sî hǒ.”

⁴⁵ Htodě pô̤̌khô asî glè̌ sî̌yaphlôphǎwô̌ lî̤plò̌shǐ tokhlǒ ayanu, a bǔmôhtò̌ bǎ asî sǎphlǒta̤gènè̤ tokhlǒ hǒ.

⁴⁶ Dě a hî̌ asî kû̌, “Lî̤plò̌shǐ hî̌nǎ, Khrǐ glè̌ khòbǎ ta̤jî̌ta̤jû̌ pě htodě suni̤tôni̤ pěnu, a glè̌ ihtǒhtûpwa̤ gesô̌ dǒ ta̤si pě.

⁴⁷ Htodě dǒ ami̤ akû dě kòyò glè̌ shôbǐǐlṳ̌ yò̤lǎ̤plǎdî̌ sîsǎphlǒ awe̤akè kû̌ ta̤plûkè ta̤sǔta̤plě hǒnutokhlǒ awe̤akè pě. Kòyò glè̌ shôbǐǐ a dǒ kòyòkhlilè pṳ̂̌tocǒ aya pě, dě kòyò glè̌ sahtò̌ shôbǐǐlṳ̌ wǐlǒ dǒ Wî̤̌ Wî̤̌yarǔshôle akû nupě.

⁴⁸ Sî mî̌ pwa̤khòlṳ̌ sǎphlǒ dǒ a htû bǎ ta̤we̤ta̤kè aya tokhlǒ hǒ.

⁴⁹ Dě he glè̌ nohèlò̤ bǎ sî pô̤̌ hepha olò̤ ô̌nǎ htohǒ nutôcǒ dǒ sîlô̤ pě. Bǎbǎkǎlè sî kè̌ nǐ̤bǎ ta̤siwi̤sòwò̤ dǒ a ô̌ dǒ mǒkhû̌hǒo hèlò̤ tǒ̤ dǒ sîlô̤ khôtô̤̌ nu, sî bǎ ô̌pǒ̤kudǔ bǎ wî̤̌kû nu pě.”

Jo kahtò̌ge Yeshǔ dǒ mǒkhû̌

⁵⁰ Htodě dǒnô̌kònu, a kaǎcû̌ akhôphijǎ tokhlǒ dǒ Wî̤̌khlo, dě a kaǎcû̌tǒ̤ asî dǒ do Betanǐ akòshî̌, dě a yò̌htò̌ acǔde dě a ǐshowî̤ asî.

⁵¹ Bǎ a ǐshowî̤ pepwǎ asî akhanu, kòyò jokahtò̌ taphekè lû̌û dǒ mǒkhû̌ dě a bè̌ô̌kè akhôphijǎ tokhlǒ.

⁵² Asî cubucabahtò̌ hto lû̌û dě asî sǎlě̤sǎlò̤ getîkhî lô̌khô dǒ Wî̤̌ Wî̤̌yarǔshôle akû.

⁵³ Htodě asî ô̌dǒ ta̤lṳhtò̌hôkû pṳ̂̌꤮ taplǎ dě htû̌sò̌htò̌ hî̌bwǐsîrîhtò̌ Cǒmara bǎnu.