Lǔka 23 - Kawyaw New Testament

Kòyò kaǎcû̌ Yeshǔ dǒ Khwǐ Pǐlǎ alô̤mô̤̌

¹ Htodě kòyò lǒ̤꤮ bò htû ikǒlǒkòdû̌ nu, a ihtǒ dě a kaǎcû̌ Yeshǔ dǒ Khwǐ Pǐlǎ alô̤mô̤̌.

² Asî bè̌ lô̤̌khô ta̤sǔ dǒ Yeshǔ alô̤̌ dě a hî̌ kû̌, “Pa pṳ̂̌nṳ̌ kòyò hǒtôpwa̤, ma̤titè̤̌hî̌dě a sûsǔ dû̌wî̤ kòyò tokhlǒ aklè̌, dě a hî̌ kû̌ lǎ̤lṳ̂ ǐ Rûmekhwǐ akûamṳ̂̌ tô̤̌, htotô̤̌ a hî̌lò̤nǐ̤ pô̤̌ anǎ̤ kû̌ he mî̌ khrǐ dǒ a mî̌ khwǐ tôpwa̤, ahî̌ pô̤̌nu.”

³ Khwǐ Pǐlǎ gwè̌ lû̌û kû̌, “Na mî̌ Yǔdaphû̌ akhwǐ tôpwa̤ mè̤̌mî̌ca ya?” Dě a hî̌shěshu khwǐ kû̌, “O, a mè̤̌mî̌ca pô̤̌ na hî̌nu hǒ.”

⁴ Htodě Khwǐ Pǐlǎ hî̌ pwa̤shû̌gǎ ikǒlǒkò tokhlǒ kû̌ kòyò saprṳ̂ tokhlǒ kû̌, “He glè̌ cî̌htò̌ kòyò hǒtôpwa̤nu, he kè̌shǐ ata̤sǔ tocǒ tô̤̌.”

⁵ Bǎbǎkǎlè, asî lě̤꤮ kaǎgǔhtò̌ shû̌shû̌ pô̤̌ kû̌, “A cû̌ lè ma̤lṳ̌peshe bò Yǔdagǎ tagǎlǎ̤ kû̌ a ta̤sû̌ǐtòwòǐ nu, A sahtò̌ ma̤ dǒ Galilè̤̌gǎ dě a hètǒ̤dǒ bǒo hǒ.”

Kòyò sûcû̌ Yeshǔ dǒ Khwǐherû alô̤mô̤̌

⁶ Bǎ Khwǐ Pǐlǎ ganǎ̤de asî hî̌ kû̌ Galilè̤̌gǎ akha, dě a gwè̌ asî kû̌, “Kòyò hǒotôpwa̤ mî̌ Galilè̤̌gǎphû̌ ya?”

⁷ Bǎ a sî̌ya kû̌ Yeshǔ mî̌ Galilè̤̌phû̌ dǒ a ô̌ dǒ Khwǐherû ata̤pǒ agûlǎ̤ akhanu, a nosû getîkhî lû̌û dǒ Khwǐherû a ô̌. Bǎnukha mî̌ Khwǐherû ô̌ dǒ Wî̤̌yarǔshôle.

⁸ Bǎ Khwǐherû kè̌shǐ Yeshǔ akhanu, a sǎlě̤sǎlò̤ jî̌jî̌, ma̤titè̤̌hî̌dě a ganǎ̤de hto Yeshǔ awe̤akè dě a sǎyṳ kè̌shǐ lû̌û nu ayî̤hǒ. A sǎyṳ kè̌shǐ kû̌ a glè̌ ma̤ ta̤cô̌klǐcô̌sè tôcǒcǒ.

⁹ Hǒo akhû̌akhî Khwǐherû gwè̌ dû̌wî̤ Yeshǔ, bǎbǎkǎlè Yeshǔ hî̌shěshu lû̌û tômṳ̂̌꤮ tô̤̌.

¹⁰ Pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara dǒ a ihtǒô̌ lô̌khô bǎnu tokhlǒ, kè̌lǎ pè̤̌wǎ̤ Yeshǔ ta̤sǔ.

¹¹ Khwǐherû kû̌ akliphû̌ tokhlǒ sǎyǎ̤ Yeshǔ, hî̌takǎ lǒ̤bò Yeshǔ, dě a sô̌htò̌ bǎ lû̌û jejûtwè̤ jejûwô̌ tôpṳ, dě Khwǐherû nosû getîkhî asî dǒ Khwǐ Pǐlǎ a ô̌.

¹² Bǎnutôni̤nu, Khwǐherû kû̌ Khwǐpǐlǎ htohtò̌ kè̌khilû̌û khô. Dǒ awǐkha numî̌ asî sǎkhě kè̌khî lû̌û.

Kòyò cî̌htò̌ Yeshǔ kû̌ a tôbǎsi

¹³ Khwǐ Pǐlǎ kaǎplǒ pwa̤shû̌gǎ ikǒlǒkò tokhlǒ kû̌ kòyò htû pwa̤pǒta̤ ikǒlǒkò tokhlǒ kû̌ kòyò saprṳ̂.

¹⁴ Dě a hî̌ asî kû̌, “Sî hèsû kòyò hǒtôpwa̤ dǒ he ô̌, dě sî hî̌ kû̌ a sûsǔ kòyò saprṳ̂ tokhlǒ aklè̌, sî hî̌ pô̤̌nu. Khònò̤̌, he gwè̌kè̌kè̌ mò̌ a dǒ sî lô̤mô̤̌ bǎbǎ pô̤̌ sî yṳ̂̌ lû̌û nu, he kè̌shǐ ata̤sǔ tocǒ꤮ tô̤̌.

¹⁵ Khwǐherû nosû getîkhî sô̌ lû̌û dǒ pa ô̌, ma̤titè̤̌hî̌dě a kè̌shǐ lû̌û ta̤sǔ tocǒ꤮ tô̤̌tô̤̌. Kòyò hǒtôpwa̤nu, ata̤sǔ ô̌ dǒ a tôbǎ sinu a ô̌ tocǒ꤮ tô̤̌.

¹⁶ Pô̤̌nu akhû̌akhî, he glè̌ nopo̤plè kòyò kû̌ a, htodě he glè̌ plûhtò̌gekè lû̌û.”

^17-18 Kòyò saprṳ̂ kaǎgǔhtò̌ bò kû̌, “Ma̤sihtò̌kè a, plûhtò̌ bǎ pa dǒ Khûbarabǎ nu.” Dǐ ta̤cû̌bò̌tûlû̌pwè ashěakhǎ hètǒ̤hǒ hǒnu, pwèhǒo alǎ̤klô ô̌ kû̌ Khwǐ Pǐlǎ bǎ plûhtò̌ bǎ asî kòyò dǒ kòyò dǒlò̤tě̤ lû̌û dǒ apô̤kû tokhlǒ akla tôpwa̤.

¹⁹ (Kòyò ma̤shû̌shǎ dǒ wî̤̌kû akhanu, Khûbarabǎ hǒo cû̌ma̤shû̌shǎ padô̌kû̌ kòyò akhû̌akhî, kòyò dǒtě̤ lû̌û dǒ apô̤kû, htodě anu a ma̤sibǎ kòyò tôpwa̤pwa̤.)

²⁰ Khwǐ Pǐlǎ sǎyṳ plûhtò̌kè Yeshǔ dě a hî̌ gesô̌pô̤̌ kû̌ kòyò saprṳ̂ tokhlǒ,

²¹ Bǎbǎkǎlè asî kaǎgǔshû̌htò̌ kudǔdǔ pô̤̌ kû̌, “Ma̤sihtò̌kè a dǒ nò̤̌dòhtǔlô̤ nu! ma̤sihtò̌kè a dǒ nò̌dò̌htǔlô̤ nu!”

²² Dě Khwǐ Pǐlǎ hî̌pô̤̌ asî suplǎtaplǎ kû̌, “Ma̤titè̤̌dě bǎ ma̤sihtò̌kè yǎ? A ma̤sǔ mî̌titè̤? A ma̤sǔta̤ dǒ a tôbǎ si nu, he kè̌shǐ tocǒ꤮ tô̤̌. He glè̌ noma̤ kòyò kû̌ a dě he glè̌ plûgekè a pě.”

²³ A hî̌ pô̤̌nu bǎbǎkǎlè asî lě̤꤮ kaǎgǔhtò̌shû̌ lǒkhlo pô̤̌ kû̌ glè̌ ma̤sihtò̌kè Yeshǔ dǒ nò̌dò̌htǔlô̤, dě nô̌khîkònu, asî pè̤̌kè.

²⁴ Pô̤̌nu akhû̌akhî, Khwǐpǐlǎ cî̌htò̌kè Yeshǔ pô̤̌ asî kwi lû̌û nu pwǎ.

²⁵ Khwǐpǐlǎ plûhtò̌ bǎ asî kòyòpha dǒ asî sǎyṳ noplûhtò̌ lû̌û nutôpwa̤. Kòyòpha hǒtôpwa̤ mî̌ a pwa̤ma̤shû̌shushû̌shǎ pwǎ, a ma̤si kòyò dě kòyò dǒô̌ lû̌û dǒ apô̤kû. Htodě sô̌sô̌kû̌ asî glè̌ ma̤ lû̌û jû̌ tûû̌ asî sǎyṳ ma̤nu dě a bè̌lò̤kè Yeshǔ dǒ asî acǔdekû.

Kòyò ma̤sihtò̌ Yeshǔ dǒ nò̌dò̌htǔ alô̤

²⁶ Bǎ kliphû̌ kaǎcû̌ Yeshǔ akhanu, asî cû̌ glǎ kû̌ kòyò tôpwa̤ dǒ ami̤ kû̌ Khûshǐmṳ̂. A mî̌ Wî̤̌ Kurenephû̌ tôpwa̤, dě a ô̌ dǒ do hè pwǎ dě a hènṳ̌ dǒ wî̤̌kû. Bǎ a hènṳ̌ akhanu, kliphû̌ pṳ̂̌shǔ lû̌û dě asî bè̌htò̌ Yeshǔ nò̌dò̌htǔ dǒ lû̌û plîdò̌khû̌, dě a noò̌ lû̌û dě a no cû̌ gû̌ lû̌û dǒ Yeshǔ akò.

²⁷ Kòyò gû̌cû̌plṳ̂ gû̌cû̌phǎ gû̌bò Yeshǔ akò, dě dǒ kòyò aklanu, pwa̤mǒ̤ dǒ a sǎplǎ̤nǎ̤bǎ tokhlǒnu, a ô̌pa bǎnu, dě a hǎsihǎô̌ lô̌khô.

²⁸ Yeshǔ htû̌ti̤wǐ̤cû̌ tô asî dě a hî̌cû̌ asî kû̌, “Wî̤̌yarǔshôle phû̌pwa̤mǒ̤ sî꤮, hǎ tǎ̤ heya tǎ̤mǎ̤, hǎǐ tûû̌ lô̌khô dǒ sîya kû̌ sîphû̌sîli̤ tokhlǒ ayanu.

²⁹ Ma̤titè̌hî̌dě, ta̤jî̌ta̤jû̌ alṳmṳ̌ni̤ lṳmṳ̌sa tokhlǒ glè̌ hètǒ̤ pě dě kòyò glè̌ hî̌ lô̌khô kû̌, ‘pwa̤mǒ̤shôdôphû̌ kû̌ pwa̤mǒ̤ dǒ aphû̌ ô̌nô̌ kû̌ lô̌khô tôpwa̤ tô̤̌, kû̌ pwa̤mǒ̤ dǒ a dǐûnû̌ bǎ phijǎ taplǎ tô̤̌ tokhlǒ glè̌ nǐ̤bǎ ta̤ǐshowî̤ pě!’ kòyò glè̌ hî̌ lô̌khô pô̤̌ hǒo pě.

³⁰ Bǎnukhapě ‘Kòyò glè̌ hî̌ lô̌khô khôlô tokhlǒ pě kû̌, “Lò̤tě̤pro dǒ pakhû̌bǒo!” htotô̤̌ a glè̌ hî̌ lô̌khô khôlôphû̌ tokhlǒ kû̌, “Ô̌ tûdûbǐ pa nî̌꤮!”’

³¹ He dǒ asô̌sô̌kû̌ sǒsǐso nu, asî kè̌ ma̤jî̌ma̤jû̌ he pô̤̌o kè̌hî̌dě, kòyò dǒ ashǔshawa̤ dǒ a sô̌sô̌ lô̌khô pwǎ kû̌ sǒkhwe tokhlǒnu, asî glè̌ ma̤jî̌ma̤jû̌khlo pěpě.”

³² Asî cî̌cû̌ kòyò sò̌ginǐ̤ dǒ a ma̤sǔ shigǎ a ta̤sû̌ta̤tòwò dǒ a glè̌ ma̤si htò̌ kû̌ Yeshǔ nu.

³³ Asî cû̌tǒ̤ dǒ gûlǎ̤ tûkû dǒ kòyò kaǎyǎ kû̌, ikǒkhwǐ gûlǎ̤ nu. Htodě asî htǎsihtò̌ kòyò sò̌ginǐ̤ dǒ a ma̤sǔ shigǎ a ta̤mǎlò̤ kû̌ Yeshǔ dǒ a nò̌dò̌htǔlô̤. Tôpwa̤ dě a htǎsihtò̌ lû̌û dǒ Yeshǔ cǔtômû tôkhô, tôpwa̤ dě a ma̤si htò̌ lû̌û dǒ cǔcôcî̌ tôkhô.

³⁴ Yeshǔ hî̌ kû̌, “Pha꤮, plûkè asî ta̤sǔ nî̌꤮, ma̤titè̌hî̌dě asî ma̤ta̤ pô̤̌nu, a sî̌ya khôtô̤̌.” Dě kliphû̌ tokhlǒ bèpè̤̌ lû̌û kû̌ Yeshǔ je nudě asî bǒ lô̌khô ta̤bèbwǐ tacǒ dǒ je dǒ alò̤tě̤tô bǎtè tôpwa̤ tô phî̌ bǎtè tôpwa̤ tô phî̌ pô̤̌nupwǎ.

³⁵ Kòyò tokhlǒ ihtǒ kè̌ lô̌khô pepwǎ bǎnu akha, kòyò dǒ a htû ikǒlǒkò tokhlǒ pijî̌ǐsho ma̤yǒma̤lè sǎyǎ̤ lô̌khô Yeshǔ, dě a hî̌ takǎ lô̌khô kû̌, “A mî̌ a ma̤hǎplǎ jò pwǎ tû̌ kòyò nî. A kè̌ mè̤̌mî̌ca Khrǐ dǒ Cǒmara rû̌htò̌ a nutôpwa̤ kè̌hî̌dě, noma̤hǎplǎkè tû̌ mò̌ anǎ̤nu tǎ.”

³⁶ Kliphû̌ nutokhlǒ bǎbǎ, a ma̤yǒma̤lè bò lû̌û. Asî cû̌ dǒ Yeshǔ a ô̌ dě a cû̌dǐô lû̌û shisî̌yô̤̌shî̌.

³⁷ Dě asî hî̌ lû̌û kû̌, “Na kè̌ mè̤̌mî̌ca Yǔdaphû̌ tokhlǒ akhwǐ kè̌hî̌dě ma̤hǎplǎkè tû̌ mò̌ nanǎ̤ ta.”

³⁸ Dǒ a ikǒkhû̌nu, kòyò wě̤htò̌ kû̌, “A mî̌ Yǔdaphû̌ tokhlǒ akhwǐ.”

³⁹ Kòyò dǒ a ma̤sǔ shigǎ a ta̤sû̌ǐtòwòǐ dě kòyò ma̤sihtò̌ pa lû̌û kû̌ Yeshǔ sò̌ginǐ̤ akla tôpwa̤ nu a pîjî̌ǐsho Yeshǔ kû̌, “Na mî̌ Khrǐ mè̤̌tô̤̌ ya? Ma̤hǎplǎkè tû̌ mò̌ nanǎ̤nu, dě ma̤hǎplǎkè pa dô̌ pa!”

⁴⁰ Bǎbǎkǎlè kòyò ma̤sǔ shigǎ a ta̤mǎlò̤ dǒ ashǔshawǎ̤ tôpwa̤ sǎhtǎ lû̌û dě a hî̌ lû̌û kû̌, “Na ǐsha Cǒmara tô̤̌ ya? Na mî̌ na khòbǎ ta̤cî̌htò̌ sô̌sô̌sî lû̌û nî.

⁴¹ Pa hǒsò̌ginǐ̤ khòbǎ ta̤cî̌htò̌ pô̤̌ ma̤sǔhto nutokhlǒ akhû̌akhî, atôabǎ pwǎ. Bǎbǎkǎlè a nu, a ma̤sǔ ta̤ tocǒ꤮ tô̤̌.”

⁴² Htodě a hî̌ Yeshǔ kû̌, “Ǒ꤮ Yeshǔ꤮, bǎ na hèpǒ pô̤̌ Khwǐ tôpwa̤ akhanu, gènè̤htò̌bǎ pûdô̌ he pě nî̌꤮.”

⁴³ Dě Yeshǔ hî̌shěshu a kû̌, “He hî̌cǒcǒ na, hǒtôni̤ pěnu, na glè̌ geô̌ kû̌ he dǒ Paradǐsǔ gǎkû pě.”

Yeshǔ si awe̤akè

⁴⁴ Bǎ lṳmṳ̌htǔ shǐginǐ̤ nare phǔbǎhǒ akhanu, lṳmṳ̌ khǐlò̤ tagǎlǎ̤ tǒ̤ dǒ lṳmṳ̌hǎlò̤ sunare bǎ nu hǒ.

⁴⁵ Dě hugò̌pwǐpṳdû̌ dǒ kòyò cotě̤tṳ̌bǐ dǒ ta̤lṳhtò̌hô akû hǒtôpṳnu, a lò̤tě̤hǎyè̌ kòhtò̌kòlò̤ kè ginǐ̤khô.

⁴⁶ Yeshǔ jî̌pwî̤̌ kaǎgǔhtò̌ dě a hî̌ kû̌, “Ǒ꤮ pha꤮, he ilò̤kè he ta̤htûpwa̤ dǒ na cǔdekû hǒ,” A hî̌ pô̤̌nu htodě asǎlò̤tě̤kè.

⁴⁷ Rûme klitôya̤ ikǒdû̌ tôpwa̤ kè̌shǐ ta̤ma̤ anǎ̤ dě a htû̌sò̌htò̌ Cǒmara dě a hî̌ kû̌, “Kòyò hǒtôpwa̤ mî̌ kòyòcǒkòyòtè̤ mè̤̌mî̌ca hǒ.”

⁴⁸ Kòyò saprṳ̂ dǒ a hè ô̌pǒ̤kè̌ dě a kè̌shǐ ta̤ma̤ htûhtò̌ anǎ̤ nu, a sǎplǎ̤ lǒ̤bò akhû̌akhî, asî plǎ̤lò̤ tûû̌ lô̌khô asôô dě a ge lô̌khô dǒ ahǐ.

⁴⁹ Kòyò lǒ̤꤮ bò dǒ a sî̌ya Yeshǔ tokhlǒ kû̌ pwa̤mǒ̤ dǒ a ô̌ dǒ Galilè̤̌gǎ kû dě a gû̌ hèkû̌ lû̌û tokhlǒnu, a cû̌ ihtǒô̌ tûcû dě a kè̌ lô̌khô lǒ̤꤮ bò a htûhtò̌ .

Kòyò lǔ Yeshǔ.

^50-51 Kòyò dǒ ami̤ kû̌ Khûyṳ̂tǎ ô̌ tôpwa̤. A ô̌ dǒ wî̤̌ Arǐmatè̌, Yǔda gǎkû. A mî̌ kòyòwô̌, kòyòcǒtè̤ dǒ a ô̌pǒ̤kè̌ǐ Cǒmara ashiagǎ glè̌ hè pě tôpwa̤. A mî̌ a ô̌pa dô̌ gû̌ dǒ kòyò ikǒlǒkò aprṳ̂aphǎ tôpwa̤ bǎbǎkǎlè bǎ kòyò olò̤ bò kû̌ kòyò glè̌ cî̌htò̌ Yeshǔ akhanu, a olò̤ padô̌ kû̌ kòyò tô̤̌.

⁵² A cû̌ dǒ Khwǐpǐlǎ a ô̌ dě a cû̌kwi Yeshǔ alṳ̌tṳ̂̌.

⁵³ Htodě a cû̌ jotě̤ Yeshǔ a lṳ̌tṳ̂̌ dǒ nò̌dò̌htǔ alô̤ dě a bôbǐ lû̌û kû̌ hugò̌pwǐ bôplî pwî̤dû̌ tôpṳ htodě a cû̌bè̌nṳ̌ lû̌û dǒ lṳ̌kû dǒ kòyò khǔkûsa lû̌û dǒ khôlôlô̤ dǒ kòyò bè̌ kû̌ lṳ̌ tôplǎ khôtô̤̌ nu tûkû.

⁵⁴ Mǒni̤ nutôni̤ mî̌ mô̤yè̤̌ni̤ dǒ kòyò tîwî̌tòwò nǎ lô̌khô Yṳ̌daphû̌ a lṳmṳ̌dǔ aya. Yṳ̌daphû̌ a lṳmṳ̌dǔ phǔhètǒ̤hǒ.

⁵⁵ Pwa̤mǒ̤ ô̌ dǒ Galilè̤̌gǎ dě a gû̌ hè kû̌ Yeshǔ akò nu, a gû̌ hè kû̌ Khûyṳ̂tǎ dě a kè̌nǎ kòyò lǎ̤bè̌nṳ̌ Yeshǔ agûlǎ̤ hǒtûkû.

⁵⁶ Htodě asî getîkhî dǒ hǐ, a ge tîwî̌tòwò nǎ lô̌khô shinumû̌ kû̌ mǔra dǒ a glè̌ hè plṳ̌ bǎ lô̌khô kû̌ lṳ̌tṳ̂̌ aya. Bǎbǎkǎlè bǎ Yṳ̌daphû̌ a lṳmṳ̌dǔ nutini̤nu, Yṳ̌daphû̌ tokhlǒ a ta̤mǎlò̤ ô̌ kû̌ asî bǎ ô̌kǔ akhû̌akhî, asî ô̌kǔ bò lô̌khô.