Lǔka 17 - Kawyaw New Testament

Ta̤sǔ

¹ Yeshǔ hî̌ akhôphijǎ tokhlǒ kû̌, “Ta̤lô̌ǎplò̤ǎ kòyò tokhlǒ a bǎ ô̌htò̌nò pě ma̤hî̌nudě kòyò dǒ a ma̤ htûhtò̌ ta̤lô̌ǎplò̤ǎ tôpwa̤pwa̤ nî̌, a bǎ khòbǎ mè̤̌mî̌ca ta̤jî̌ta̤jû̌ pě.

² Kòyò dǒ a noma̤ ta̤sǔ dǒ phijǎ akla tôpwa̤pwa̤ nu, kò kè̌ comě lǒ̤dû̌ dǒ a gôbôlô̤ dě tě̤lò̤tě̤kè a dǒ shidû̌shite̤we̤kû numî̌ awô̌khlo bǎ lû̌û ya.

³ Ô̌sèrè̌ lô̌khô sînǎ̤ nî̌꤮. “Sî pṳ̌wè̤̌ dǒ a yṳ̌ǎ Yeshǔ tôpwa̤ kè̌ ma̤ta̤sǔ hî̌dě, bǎ sû̌ǐtòwòǐ yǎ. A kè̌ yò̤lǎ̤plǎdî̌ getîkhî sô̌ asǎphlǒ hî̌dě plûkè a ta̤sǔ nî̌꤮.

⁴ Tôni̤ akû, a kè̌ ma̤sǔ na susô̌taplǎ hî̌dě, a kè̌ hè hto hè sô̌ dǒ na ô̌ susô̌taplǎ dě a kè̌ hè hî̌ kû̌, ‘he yò̤lǎ̤plǎdî̌ sô̌ hesǎphlǒ hǒ’ kè̌hî̌dě, na bǎ plûkè lû̌û ta̤sǔ.”

Ta̤yṳ̌ǎ

⁵ Pwa̤nophû̌ tokhlǒ hî̌shěshu Běcǎ kû̌, “Ma̤shû̌htò̌ bǎ pa ta̤yṳ̌ta̤nǎ̤.”

⁶ Dě Běcǎ hî̌shěshu asî kû̌, “Sî ta̤yṳ̌ kè̌ ô̌ tǐ꤮ saplǎphlǒ tôphlǒ nupwǎ bǎbǎ sî kè̌ hî̌ sǒmṳ̌dû̌ hǒtômṳ̌ kû̌, yò̌htò̌ nakhò̌wǐ̤nu, dě cû̌shǒlò̤ nanǎ̤ dǒ shidû̌shite̤we̤ akûnu, sî kè̌ hî̌ a nu, a glè̌ jûǎ sîyô̤̌ pě.

Ta̤ma̤ lò̤bǎ jû̌ tôpwa̤

⁷ “Hî̌kǔlǎ, kòyò dǒ sîkla tôpwa̤pwa̤nu, a kè̌ ô̌ kû̌ ajû̌ dǒ a htě hǔkla tôpwa̤, mè̤tô̤̌dě pwa̤kè̌ sû̌phû̌ ô̌ tôpwa̤ hî̌mò̌nu. Bǎ ajû̌ ô̌ dǒ hǔkla getǒ̤ akha, taplǎnô̤̌ sî kaǎ hènè kû̌, ‘hè hǎnòò̌ ǎphwè mò̌ dî bǒo,’ a hî̌ pô̤̌ nu mî̌ a ô̌ pû tôpwa̤pwa̤ ya?

⁸ Sî glè̌ hî̌ a kû̌ ‘phôǎmò̌ dî, lè̌tèplè̌ mò̌ na jenu dě khwè̌ǎ bǎ he dî dě ô̌pǒ̤kè̌ǐ dǐǎdǐô he bǒo, he ǎhtopě dě ǎnô̌ dǒ nô̌kò pě.’

⁹ Jû̌ tôpwa̤ ma̤pô̤̌ aběcǎ hî̌ lû̌û nu bǎbǎkǎlè aběcǎ lṳ̂bǎ hî̌bwǐhî̌sîrî lû̌û tô̤̌.

¹⁰ Sî bǎbǎ sô̌sô̌ pô̤̌nu hǒ, sî ma̤htobò ta̤ dǒ kòyò no sî nutokhlǒ akhanu, sî tô hî̌ kû̌, ‘pa mî̌ jû̌ dǒ agwǎ tô̤̌ tokhlǒ, pa ma̤hto kè pwǎ ta̤ma̤ dǒ pa tô ma̤ tokhlǒ nupwǎ.’”

Yeshǔ ma̤hǎmǎ kòyò pwa̤shǐ dǒ a ta̤shǎ krôǎ tokhlǒ

¹¹ Bǎ Yeshǔ cû̌ dǒ Wî̤̌yarǔshôle akhanu, a cû̌ bǎ Shamarǐgǎ kû̌ Galilè̤̌gǎ kû nu.

¹² A cû̌nṳ̌ dǒ dotôdo akû dě a glǎ kû̌ kòyòpha pwa̤shǐ dǒ a tṳ̌bǎ lô̌khô ta̤sha akrôǎ tokhlǒ. Asî ihtǒô̌ tepheyî̤ dě,

¹³ A kaǎgǔ htò̌ kû̌, “Ǒ꤮ Běcǎ Yeshǔ! gwèbǎǐ mò̌ pa nî̌꤮!”

¹⁴ Yeshǔ kè̌shǐ asî dě a hî̌ asî kû̌, “Cû̌ dǔlè̌lṳ̌ kè̌kè̌ lô̌khô sînǎ̤ dǒ pwa̤shû̌gǎ tokhlǒ a ô̌ nu.” Bǎ asî cû̌ dǒ klè̌lô̤ akha, asî ta̤sha hǎmǎbòkè.

¹⁵ Dǒ asî akla tôpwa̤nu, a kè̌shǐlò̤ anǎ̤ kû̌ Yeshǔ ma̤hǎmǎkè bǎ yǎ akhû̌akhî, a getîkhî dě kaǎgǔ htû̌sò̌htò̌ Cǒmara.

¹⁶ Htodě a dô̌gînî̤ cabalò̤ dǒ Yeshǔ khò̌lôpô̤̌ kòshî̌ dě a hî̌bwǐhî̌sîrîhtò̌ lû̌û. A mî̌ shamarǐphû̌ tôpwa̤.

¹⁷ Dě Yeshǔ hî̌ lû̌û kû̌, “Kòyò dǒ he ma̤hǎmǎ bǎ asî tokhlǒ numî̌ a ô̌ pwa̤shǐ hî̌ta! lǐ̤sô̌tôpwa̤ pe lè꤮ a ô̌ bǎtè?

¹⁸ Ma̤titè̌hî̌dě a getîkhî hî̌bwǐhî̌sîrî htû̌sò̌htò̌ sô̌ Cǒmara nî̌ Yǔdaphû̌ mè̤̌tô̤̌nu tôpwa̤ pwǎ dě ma̤hî̌tè?”

¹⁹ Htodě Yeshǔ hî̌ a kû̌, “Ihtǒ cû̌mò̌, na ta̤yṳ̌ta̤nǎ̤ ma̤hǎmǎkè bǎ na ta̤sha hǒ.”

Cǒmara glè̌ hèshǒlò̤ ashigǎ pě

²⁰ Pharishè̌phû̌ tokhlǒ gwè̌ Yeshǔ kû̌ Cǒmara ashiagǎ glè̌ hètǒ̤ bǎkhò̌tè pě. Dě a hî̌shěshu asî kû̌, “Cǒmara shǒlò̤ ashiagǎ nu kòyò kè̌shǐ jò bǎ tô̤̌.

²¹ Kòyò tôpwa̤ hî̌ kû̌, ‘kè̌mò̌ bǒo, kè̌mò̌ dǒnu,’ ahî̌ pô̤̌nu a ô̌ tôpwǎ̤꤮ tô̤̌, ma̤titè̌hî̌dě Cǒmara ashiagǎ nu a hèshǒlò̤ hto dǒ sî sǎphlǒkû hǒ.”

²² Htodě Yeshǔ hî̌ a khôphijǎ tokhlǒ kû̌, “Kòyòphû̌khû mî̌ he alṳmṳ̌ni̤ lṳmṳ̌sa dǒ sî sǎyṳ kè̌shǐ jî̌ yǎ nu, a glè̌ hètǒ̤ tôni̤ni̤ pě, bǎbǎkǎlè sî kè̌shǐ jò a tô̤̌.

²³ Kòyò glè̌ hî̌shěshu asî kû̌, ‘kè̌mò̌ dǒnu,’ mè̤̌tô̤̌dě kè̌mò̌ bǒo pô̤̌nu pě! bǎbǎ cû̌ yṳ̌ǎ gû̌ tǎ̤ asî tǎ̤mǎ̤.

²⁴ He cû̌hî̌tǒ̤ sî pô̤̌o ma̤titè̌hî̌dě, bǎ Kòyòphû̌khû mî̌ he glè̌ hè sô̌ pě akhanu, kòyò pṳ̂̌꤮ tôpwa̤ glè̌ kè̌shǐ a pě. A glè̌ sô̌sô̌kû̌ shî̌lî̌bǒ dǒ mǒlǎ̤ dě a glè̌ shělîrakha cû̌ bò mǒlǎ̤ tabǎbò pě.

²⁵ Bǎbǎkǎlè he glè̌ khòbǎ wǐ dû̌wî̤ ta̤jî̌ta̤jû pě, dě kòyò hǒtôhtu yṳ̌ǎ he tô̤̌ pě.

²⁶ “Kòyòphû̌khû mî̌ he glè̌ hèpě akhanu, a glè̌ htûhtò̌ sô̌sô̌kû̌ pô̤̌ Phanṳ̂̌a htukha nu pě.

²⁷ Bǎnukha kòyò tokhlǒ ǎô lô̌khô, nǐ̤phû̌nǐ̤ma lô̌khô tǒ̤dǒ bǎ Phanṳ̂̌a nṳ̌ dǒ sǒkhlidû̌kû nutini̤ pě. Dě shidû̌htò̌ sikèbò kòyò ô̌kè dǒ akhlo nutokhlǒ.

²⁸ “Bǎ he hè sô̌ akhapěnu, a glè̌ sô̌sô̌kû̌ kòyò dǒ PhaAbraha aphû̌dû̌ Khûlòtǎ htukha nu pě. Khûlòtǎ htukha kòyò tokhlǒnu, aǎ aô lô̌khô, shaǎ pwî̤ǎ, shǒǎ ma̤ǎ dě bô̌htò̌ma̤htò̌ lô̌khô ahǐaphò.

²⁹ Bǎbǎkǎlè bǎ Phalòtǎ hǎhtò̌cû̌ taphekè kû̌ Wî̤̌sadû nutôni̤ akhanu, Cǒmara no julò̤ mî̌ kû̌ lǒ̤mî̌ dǒ mǒkhû̌ dě mî̌u sikè bò asî pṳ̂̌꤮ tôpwa̤.

³⁰ “Bǎ Kòyòphû̌khû mî̌ he glè̌ hè pě akhanu, a glè̌ htûhtò̌ sô̌sô̌kû̌ pô̤̌nu pě.

³¹ Lṳmṳ̌ni̤ bǎnu tôni̤ pě mî̌, kòyò ô̌ dǒ a hǐgutadǎkhû̌ tokhlǒnu bǎ hǎtě̤ phî̌nṳ̌ a ta̤kî̌ta̤krû̌ tokhlǒ dǒ hǐdǒkû tocǒ꤮ tô̤̌! kòyò ô̌ dǒ hǔkla tôpwa̤pwa̤nu a bǎ khlè̌ge phî̌nṳ̌ atě̤ta̤ dǒ a hǐ tô̤̌.

³² Gènè̤htò̌ bǎ lô̌khô dǒ Phalòtǎ ama nu.

³³ Ma̤titè̌hî̌dě kòyò dǒ a sǎyṳ ma̤hǎplǎge tûû̌ a ta̤htûpwa̤ tôpwa̤pwa̤nu, a ta̤htûpwa̤ glè̌ hǎmǎkè pě. Bǎbǎkǎlè kòyò dǒ a ǐlò̤kè a ta̤htûpwa̤ dǒ hekhû̌hekhî tôpwa̤pwa̤nu, a glè̌ nǐ̤bǎ ta̤htûpwa̤ tûjû̌pwa̤ talakhǎ pě.

³⁴ He hî̌ sî, bǎnu tôsa pěmî̌, kòyò sò̌ginǐ̤ glè̌ hǎmôô̌plǒ lû̌û dǒ lǎ̤môô̌ tôkû pě. Dě Cǒmara glè̌ kaǎgekè tôpwa̤ pě, tôpwa̤dě a glè̌ bè̌kè lû̌û pě.

³⁵ Pwa̤mǒ̤ sò̌ginǐ̤ glè̌ shěǎ plǒ lû̌û bǔ pě. Dě Cǒmara glè̌ kaǎge lû̌ pě tôpwa̤, dě a glè̌ bè̌kè lû̌ tôpwa̤ pě.

³⁶ (Pwa̤khû ô̌ dǒ hǔkla sò̌ginǐ̤ nu, tôpwa̤dě Cǒmara glè̌ kaǎgekè lû̌û pě, tôpwa̤nu Cǒmara glè̌ bè̌kè yǎ pě.)”

³⁷ Yeshǔ a khôphijǎ tokhlǒ gwè̌lû̌û kû̌, “Běcǎ, a glè̌ htûhtò̌ tô bǎtè̤ tûkû pě?” Dě Yeshǔ hî̌ shěshu bǎ asî yô̤̌sǎ tômṳ̂ kû̌, “Ta̤sota̤û ô̌tô bǎtènu lě̤dû̌ ô̌tewe̤plǒ bǎnu pě.”