Jowǎ̤ni̤ 3 - Kawyaw New Testament

Yeshǔ kû̌ Khûnǐkôdemǔ

¹ Yǔdaphû̌ ikǒdû̌ dǒ ami̤ kû̌ Khûnǐkôdemǔ ô̌ tôpwa̤. A mî̌ a ô̌plǒ dǒ Pharishè̌phû̌ aprṳ̂aphǎ tokhlǒ akû.

² Tôhǎnu Khûnǐkôdemǔ hè dǒ Yeshǔ ô̌ dě a hî̌ lû̌û kû̌, “Sara, pa sî̌ganǎ̤ kû̌ na mî̌ sara dǒ a ô̌ dǒ Cǒmara ô̌ a hè tôpwa̤. Pa sî̌ganǎ̤ kû̌ Cǒmara kè̌ ô̌cu kû̌ kòyò tôpwa̤pwa̤ tô̤̌ numî̌ a ma̤jò ta̤cô̌klǐ pô̤̌ na ma̤nu tôpwa̤꤮ tô̤̌.”

³ Yeshǔ hî̌shěshu lû̌û kû̌, “He hî̌cǒcǒ na, kòyò dǒ a ô̌phû̌jǎlò̤ sô̌ tôplǎ꤮ tô̤̌ tokhlǒnu, a kè̌shǐbǎ Cǒmara ashiagǎ tôpwǎ̤꤮ tô̤̌.”

⁴ Khûnǐkôdemǔ gwè̌ lû̌û kû̌, “Kòyò wè̤̌pwǎ̤ tôpwa̤nu a cû̌ ô̌phû̌jǎlò̤ jò sô̌ hî̌tè? A genṳ̌ sô̌ dǒ a mǒ̤hǐphukû dě a ô̌phû̌jǎlò̤ ginǐ̤plǎtôplǎ mî̌ a jò pě ya?”

⁵ Yeshǔ hî̌shěshu lû̌û kû̌, “He hî̌cǒcǒ na, kòyò dǒ a ô̌phû̌jǎlò̤ sô̌ kû̌ shi kû̌ Yôla Plò̌shǐ Běcǎ tô̤̌ tokhlǒnu a nṳ̌ jò dǒ Cǒmara ashiagǎ kû tô̤̌.

⁶ Kòyò hǎkhû̌phû̌ ô̌phijǎlò̤ sô̌ kòyò hǎkhû̌phû̌ pwǎ. Bǎbǎkǎlè ta̤ô̌phijǎlò̤ kû̌ Yôla Plò̌shǐ Běcǎnu, a dǐ ô̌htûhtò̌ tèplè̌ kòyò dǒsû̌dǒsò̌ tôkhô.

⁷ Dǒ he hî̌bǎ na kû̌, ‘sî tôbǎ ô̌phû̌jǎlò̤ pô̤̌ taplǎ,’ pô̤̌onu akhû̌akhîdě, ǒò̌ kiti̤kaa tǎ̤mǎ̤.

⁸ Gili̤sǎ nî̌ a sǎcû̌ jû̌ tûû̌ ata pwǎ. Na ganǎ̤de apwe̤ bǎbǎkǎlè a ô̌ bǎtèhè mè̤̌tô̤̌dě a glè̌ cû̌tǒ̤ bǎtènu na sî̌ganǎ̤ tô̤̌. Kòyò lǒ̤bò ô̌phijǎlò̤ kû̌ Yôla Plò̌shǐ Běcǎ tokhlǒ numî̌ a sô̌sô̌kû̌ nuhǒ.”

⁹ Khûnǐkôdemǔ gwè̌ lû̌û kû̌, “A cû̌ htûhtò̌ jò hî̌tè?”

¹⁰ Yeshǔ hî̌shěshu a kû̌, “Na htû꤮ Isôrěla a saradû̌ tôpwa̤ amè̤̌tô̤̌ya, pô̤̌opwǎ dě na cû̌ sî̌ganǎ̤ tô̤̌ ma̤titè?

¹¹ He hî̌cǒcǒ na, pa hî̌ bǎ kòyò ta̤ dǒ pa sî̌ganǎ̤ tokhlǒ, pa dǔlè̌lṳ̌ bǎ kòyò ta̤ dǒ pa kè̌shǐ tokhlǒ bǎbǎkǎlè sî phî̌shěshu pa ta̤hî̌bǎnu tôpwa̤꤮ tô̤̌.

¹² He shôbǐǐ hto sî kû̌ hǎkhû̌ awe̤akè nutokhlǒ bǎbǎkǎlè sî yṳ̌ǎ he tô̤̌. He kè̌ shôbǐǐ bǎ pô̤̌ sî kû̌ mǒkhû̌ awe̤akè tokhlǒ numî̌ sî glè̌ yṳ̌ǎ jò he hî̌tè?

¹³ Kòyò htò̌tǒ̤nô̌ dǒ mǒkhû̌nu a ô̌ tôpwa̤ tô̤̌. Kòyòphû̌khû dǒ a ô̌ dǒ mǒkhû̌ hèlò̤ nutôpwa̤ htò̌tǒ̤ tûû̌ pě.

¹⁴ Pô̤̌khô Khûmṳ̂shě dǒwǐkha a bè̌htò̌ wṳ̂̌tili̤bò yô̤ dǒ nò̌dò̌htǔlô̤nu Kòyòphû̌khû mî̌ henu, kòyò glè̌ bè̌htò̌yǎ pô̤̌nupě.

¹⁵ Pô̤̌khô lǒ̤꤮ bò kòyò dǒ a yṳ̌nǐ̤nǎ̤nǐ̤ he tokhlǒ, a gǔ nǐ̤bǎ yôla htûpwa̤ tûjû̌pwa̤ talakhǎ pě.

¹⁶ “Cǒmara mô̤nṳ̌bò kòyò hǎkhû̌phû̌ lǒ̤bò. Lǒ̤꤮ bò kòyò dǒ a yṳ̌nǐ̤nǎ̤nǐ̤ aphû̌khû tokhlǒnu, pô̤̌khô a gǔ nǐ̤bǎ yôla htûpwa̤ tûjû̌pwa̤ dě a gǔ tǒ̤ dǒ ta̤pî̌ta̤lṳ̂̌ tô̤̌nu, a ǐlò̤kè aphû̌khû tôpwa̤ nô̤̌nu dǒ kòyò hǎkhû̌phû̌ tokhlǒ ayahǒ.

¹⁷ Ma̤titèhî̌dě, Cǒmara nohèlò̤ aphû̌khû dǒ a gǔ cî̌htò̌ kòyò hǎkhû̌phû̌ ayanu mè̤̌tô̤̌. Mè̤̌mè̤̌tôkhônu a nohè lû̌û dǒ a gǔ hè ma̤hǎplǎge kòyò hǎkhû̌phû̌ aya nupwǎ.

¹⁸ Kòyò dǒ a yṳ̌ǎ phû̌khû tokhlǒnu, Cǒmara cî̌htò̌ asî tô̤̌. Kòyò dǒ a yṳ̌ǎ phû̌khû tô̤̌ tokhlǒnu, Cǒmara cî̌htò̌ asî hǒ, ma̤titè̌hî̌dě, a yṳ̌ǎ gû̌ kòyò Cǒmara aphû̌khû dǒ a ô̌ tôpwa̤nô̤̌ nutôpwa̤ tô̤̌ akhû̌akhî, a cî̌htò̌hto asîhǒ.

¹⁹ Ma̤titèhî̌dě asî khòbǎ ta̤cî̌htò̌ numî̌, Cǒmara ata̤lî hènṳ̌ dǒ hǎkhû̌nu bǎbǎkǎlè kòyò hǎkhû̌phû̌ tokhlǒ sǎyṳ ta̤lî nutô̤̌, ma̤titè̌hî̌dě asî lî̤̌ ma̤ ta̤phû̌mò̤̌shǐhtô tokhlǒ akhû̌akhî, a mô̤ǐ khlo dǒ ta̤khǐsiwi̤.

²⁰ Lǒ̤꤮ bò kòyò dǒ a ma̤ ta̤phû̌mò̤̌shǐhtô tokhlǒnu, a sǎkhě ta̤lî dě a hè dǒ ta̤lî a ô̌tô̤̌, ma̤titè̌hî̌dě kòyò dǒ a ma̤ ta̤phû̌mò̤̌shǐhtô tokhlǒnu, a ǐsha kû̌ a ta̤sǔta̤plě tokhlǒ ô̌lṳ̌htò̌ dě a hè tô̤̌.

²¹ Bǎbǎkǎlè kòyò dǒ a ma̤ ta̤tě̤ta̤mè̤̌ tokhlǒnu, a hè dǒ ta̤lî a ô̌, ma̤titè̌hî̌dě pô̤̌khô kòyò pṳ̂̌꤮ tôpwa̤ gǔ kè̌shǐ lṳ̌wô̌ kû̌ a ma̤ta̤ tokhlǒnu, atô kû̌ Cǒmara asǎphlǒ ayanu, a hè dǒ ta̤lî ô̌.”

Yeshǔ kû̌ jushi Khûyṳ̂ha

²² A hî̌hto lû̌û dě, Yeshǔ kû̌ akhôphijǎ tokhlǒ hǎhtò̌cû̌ dǒ Yǔda gǎ. Dě a cû̌ô̌ yî̤wò̌wè̌ kû̌ akhôphijǎ tokhlǒ bǎnu dě a cû̌ju bǎ kòyò shi.

²³ Khûyṳ̂ha ju bǎ pô̤̌ kòyò shi bǎ gûlǎ̤ dǒ kòyò kaǎ kû̌ Ènû nutûkû. Ènû mî̌ a ô̌phǔ kû̌ Doshali htodě shi ô̌dû̌wî̤. Kòyò hè dǒ lû̌ô̌ dě a ju bǎ asî shi.

²⁴ (Hǒomî̌ bǎ kòyò dǒtě̤ Khûyṳ̂ha dǒ apô̤kû khôtô̤̌ akhanu)

²⁵ Bǎnuakha Khûyṳ̂ha akhôphijǎ tokhlǒ kû̌ Yǔdaphû̌ tôpwa̤ htè̌ kè̌khîlû̌û kû̌ lǎ̤bû̌lǎ̤klô ô̌ kû̌ ta̤ma̤mṳ̂̌plî hî̌tènu awe̤akè.

²⁶ Asî cû̌ dǒ Khûyṳ̂ha a ô̌ dě a hî̌ lû̌û kû̌, “Sara kòyò dǒ a ô̌cu kû̌ na bǎ Jòda shilô̤̌mǒ̤ lô̤̌bò̌ dě na khòlṳ̌ bǎ kòyò kû̌ a awe̤akè nutôpwa̤ nî̌꤮, khònò̤̌ a cû̌ju tǒ̤ kòyò shi dě kòyò cû̌ bò dǒ aô̌ hǒ.”

²⁷ Dě Khûyṳ̂ha hî̌shěshu lû̌û kû̌, “Mò̌pè bǎbǎ Cǒmara kè̌ ǐlò̤ lû̌û tô̤̌nu, a nǐ̤bǎ jò ta̤ tocǒ꤮ tô̤̌.

²⁸ He hî̌hto sî kû̌, ‘he mî̌ Khrǐ mè̤̌tô̤̌ bǎbǎkǎlè Cǒmara nohè wǐ he dǒ alômô̤̌ pwǎ.’ He hî̌hto akhû̌akhî, sî htûhto he pwa̤khòlṳ̌ tokhlǒ hǒ.

²⁹ He mî̌ asô̌sô̌kû̌ pwa̤gû̌ khòmò̤̌ phû̌khû tôpwa̤nu. Khòmò̤̌ phû̌mǒ̤ mî̌ khòmò̤̌ phû̌khû ata. Bǎbǎkǎlè pwa̤gû̌ nutôpwa̤ ihtǒ ganǎ̤de khòmò̤̌ phû̌khû hî̌bǎ. A ganǎ̤de lû̌ûyô̤̌ akhû̌akhî, a sǎlě̤sǎlò̤ jî̌le. Pô̤̌nudě he ta̤sǎlě̤sǎlò̤nu a lǒhtò̌behtò̌ hǒ.

³⁰ A mî̌ a tôbǎ lṳ̂dû̌gutṳ̌, he mî̌ a tôbǎ lǎ̤lṳ̂ pî̌tî̌lǒ.

³¹ “Kòyò ô̌ dǒ mǒkhû̌ hè tôpwa̤nu, adû̌khlo kû̌ kòyò lǒ̤bò. Kòyò ô̌ dǒ hǎkhû̌ tôpwa̤nu a sî̌ganǎ̤ hî̌bǎ pwǎtǒ̤ hǎkhû̌ awe̤akè pwǎ. Kòyò ô̌ dǒ mǒkhû̌ hè tôpwa̤nu adû̌khlo kòyò lǒ̤bò.

³² A shôbǐǐlṳ̌ bǎ kòyò kû̌ lǒ̤bò a kè̌shǐ nutokhlǒ kû̌ lǒ̤bò a ganǎ̤de nutokhlǒ. Bǎbǎkǎlè a shôbǐǐlṳ̌ bǎ kòyònu kòyò ganǎ̤de phî̌shǐshu lû̌ûta tôpwa̤ tô̤̌.

³³ Kòyò dǒ a ganǎ̤de phî̌shěshu lû̌û ta̤hî̌bǎlṳ̌ tokhlǒnu a yṳ̌ǎ tě̤tě̤mè̤̌mè̤̌ lô̌khô kû̌ Cǒmara mî̌ acǒatè̤.

³⁴ Kòyò dǒ Cǒmara nolò̤ a tôpwa̤nu, Cǒmara ǐ lǒlǒbebe lû̌û Yôla Plò̌shǐ Běcǎ akhû̌akhî, a hî̌bǎpwǎ Cǒmara alě̤ayô̤̌ tokhlǒ pwǎ.

³⁵ Pha Cǒmara mô̤ǐ aphû̌khû dě a ǐbò lû̌ ta̤pṳ̂̌tocǒ dǒ a cǔdekû hǒ.

³⁶ Kòyò dǒ a yṳ̌nǐ̤nǎ̤nǐ̤ phû̌khû tôpwa̤ tokhlǒnu, a nǐ̤bǎ yôla htûpwa̤ tûjû̌pwa̤. Dě kòyò dǒ a ganǎ̤de gû̌ kòyò tô̤̌ dě a yṳ̌nǐ̤nǎ̤nǐ̤ gû̌ kòyò phû̌khûnu tô̤̌ tokhlǒnu, a nǐ̤bǎ gû̌ kòyò ta̤htûpwa̤ tô̤̌. Cǒmara a ta̤cî̌htò̌ lò̤tě̤ ô̌ dǒ kòyò nutokhlǒ alô̤.”