Jowǎ̤ni̤ 21 - Kawyaw New Testament

Běcǎ Yeshǔ ô̌lṳ̌htò̌ bǎ akhôphijǎ susô̌tôpwa̤.

¹ Dǒ nô̌kò yî̤khôtô̤̌nu, Běcǎ Yeshǔ ô̌lṳ̌htò̌ bǎ akhôphijǎ tokhlǒ dǒ Tiberǐ shikoǒdû̌htu. A ô̌lṳ̌htò̌ bǎ lû̌û hî̌tè hî̌dě,

² Khûshǐmû Petarǔ, Khûtû̌mǎ dǒ kòyò kaǎpô̤̌ lû̌mi̤ kû̌ Khûdǐdimǔ, Kû̌ Galilè̤̌gǎ Wî̤̌kana̤phû̌ Khûnasaněla kû̌ Phasebedè̌ aphû̌pwa̤khû sò̌ginǐ̤ kû̌ Yeshǔ akhôphijǎ dǒ ashǔshawa̤ sò̌ginǐ̤ cû̌ ô̌plǒ wô̤̌wô̤̌ lû̌û.

³ Khûshǐmû Petarǔ hî̌ asî kû̌, “He cû̌pṳ̂̌ǎ tò̤̌phû̌,” A hî̌ dě, asî hî̌ lû̌û kû̌, “Pa cû̌ kû̌ na,” A hî̌ lû̌û pô̤̌nu. Pô̤̌nudě asî dò̌ sǒkhli dě hǎhtò̌cû̌ pṳ̂̌ǎ lô̌khô tò̤̌phû̌ bǎbǎkǎlè tanǎ̤mṳ̌shě anǐ̤ tôbǎ tô̤̌.

⁴ Lṳmṳ̌lîbû dě Běcǎ Yeshǔ ihtǒô̌ dǒ shihtunu, bǎbǎkǎlè akhôphijǎ tokhlǒ sî̌ganǎ̤ kû̌ Yeshǔ tô̤̌.

⁵ A gwè̌ asî kû̌, “Khôbǒsû̌ sî, tò̤̌phû̌ nǐ̤ ya?” Dě asî hî̌shěshu lû̌û kû̌, “Anǐ̤ tôbǎ꤮ tô̤̌.”

⁶ Dě Yeshǔ hî̌ asî kû̌, “Shî̌tě̤ sî tǐ̤ dǒ sî sǒkhli cǔtômû nutôkhô, tò̤̌phû̌ nǐ̤ tûû̌ pě.” Dě bǎ asî ma̤pô̤̌ a hî̌ akhanu, tò̤̌phû̌nǐ̤ dû̌wî̤ akhû̌akhî, a cî̌htò̌ bò̌ pe a tǐ̤ dǒ sǒkhlikû tô̤̌.

⁷ Hǒtôplǎdě Yeshǔ akhôphijǎ dǒ a mô̤nṳ̌ wô̌ lû̌û tôpwa̤ hî̌ Khûpetarǔ kû̌, “A mî̌ Běcǎ hò꤮.” A hî̌ bǎ lû̌û pô̤̌nu. Bǎ Khûshǐmû Petarǔ ganǎ̤de lû̌û hî̌ kû̌, “A mî̌ Běcǎ hò̌꤮,” Pô̤̌nu akha, tôplǎnô̤̌ a sô̌htò̌ sô̌ aje dǒ a plû̌kè lû̌û nutôpṳ htodě a pě̤tě̤ dǒ shikû.

⁸ A khô dǒ a ô̌kè dǒ sǒkhlikû tokhlǒnu, a gû̌gekû̌ lû̌û. Asî khlò sǒkhli kû̌ cî̌jûgrû̌ genǐ̤ tǐ̤ dǒ a nǐ̤betǐpǐ kû̌ tò̤̌phû̌ nutôpṳ dǒ shihtu. Asî ô̌yî̤ bǎ kû̌ shihtu tô̤̌, a ô̌yî̤ pwǎ aplǎ̤ ginǐ̤ya̤ nô̤̌pwǎ.

⁹ Bǎ asî gebè̌ ô̌kǔ asǒkhli dǒ hǎdûkhû̌ akhanu, asî kè̌shǐ kòyò shû̌ǎ tò̤̌phû̌ dǒ mî̌klû̌khû̌ kû̌ mû̌ tokhlǒ.

¹⁰ Běcǎ Yeshǔ Khrǐ hî̌ asî kû̌, “Phî̌ hèkè̌bǎ he tò̤̌phû̌ dǒ sî pṳ̂̌nǐ̤ nutokhlǒ bǒo.”

¹¹ Dě Khûshǐmû Petarǔ cû̌htò̌nṳ̌ dǒ sǒkhlikû dě a cî̌jûgrû̌htò̌ tǐ̤ dǒ a nǐ̤betǐpǐ kû̌ tò̤̌phû̌ dǒ hǎdûkhû̌. Lǒ̤bò tò̤̌phû̌pǎdû̌ dǒ a nǐ̤ numî̌ a ô̌ tôya̤ kû̌ yè̤̌shi kû̌ subǎ. Tò̤̌phû̌ nǐ̤ dû̌wî̤ bǎbǎkǎlè tǐ̤ hǎyè̌ tîkî̌ tô̤̌.

¹² Běcǎ Yeshǔ hî̌ asî kû̌, “Hè ǎmò̌ lô̌khô.” Asî sî̌ganǎ̤nǎhto lô̌khô kû̌ a mî̌ Běcǎ Yeshǔ akhû̌akhî, “Na mî̌ mò̌pè?” Asî gwè̌ bǔ lô̌khô lû̌û tôpwǎ̤ tô̤̌.

¹³ Běcǎ Yeshǔ phî̌nṳ̌ mû̌ dě a cû̌ bǎ asî ô̌ dě a yṳ̂̌ǎ bǎ asî. Dě a phî̌nṳ̌ tò̤̌phû̌ dě a cû̌ yṳ̂̌ǎ padô̌ asî pô̤̌nu.

¹⁴ Běcǎ Yeshǔ si ihtǒhtûpwa̤ getîkhîsô̌ htodě a dǔlè̌lṳ̌ bǎ anǎ̤ kû̌ akhôphijǎ tokhlǒnu, hǒtôplǎ mî̌ suplǎtôplǎ hǒ.

Běcǎ Yeshǔ kû̌ Khûpetarǔ

¹⁵ Asî ǎ htodě, Běcǎ Yeshǔ gwè̌ Khûshǐmû Petarǔ kû̌, “Phayṳ̂ha Aphû̌khû Khûshǐmû, na mô̤nṳ̌ khlo mè̤̌mî̌ca he kû̌ kòyò tokhlǒ mô̤nṳ̌ he ya?” a gwè̌ lû̌û dě. Khûshǐmû hî̌shěshu lû̌û kû̌, “O, Běcǎ, he mô̤ na numî̌ na sî̌ganǎ̤ tû̌ hǒ,” A hî̌ lû̌û pô̤̌nu. Běcǎ Yeshǔ hî̌ lû̌û kû̌, “Kè̌ bǔǎ he sû̌phû̌ nutokhlǒ nî̌.”

¹⁶ Dě Běcǎ Yeshǔ gwè̌ sô̌ lû̌û kû̌, “Phayṳ̂ha aphû̌khû Khûshǐmû, na mô̤nṳ̌ mè̤̌mî̌ca he ya?” A gwè̌ lû̌û dě. A hî̌shěshu Běcǎ kû̌, “O, Běcǎ, he mô̤nṳ̌ na numî̌ na sî̌ganǎ̤ tûû̌.” Dě Běcǎ Yeshǔ hî̌shěshu yǎkû̌, “Kè̌khwè̌ǐ he sû̌phû̌ nutokhlǒ nî̌.”

¹⁷ Htodě a gwè̌ pô̤̌ lû̌û suplǎtôplǎ kû̌, “Phayṳ̂ha aphû̌khû Khûshǐmû, na mô̤nṳ̌ he ya?” Běcǎ Yeshǔ gwè̌ lû̌û kû̌, “Na mô̤nṳ̌ he ya?” agwè̌ suplǎhǒ akhû̌akhî, a mô̤ lû̌sǎphlǒ tô̤̌. Dě a hî̌shěshu lû̌û kû̌, “Běcǎ, na sî̌ganǎ̤ bò ta̤pṳ̂̌tocǒ hǒ, he mô̤ǐ na numî̌ na sî̌ganǎ̤ hǒ,” A hî̌ lû̌û pô̤̌nu. Dě Běcǎ Yeshǔ hî̌ lû̌û kû̌, “Kè̌ bǔǎbǔô he sû̌phû̌dû̌ nutokhlǒ nî̌.

¹⁸ He hî̌cǒcǒ na, bǎ na phijǎpe akha, na wṳ̂̌htò̌bò̌ tûû̌ nasǎto̤, na sǎyṳcû̌ bǎtètè̌ nu na cû̌bò̌. Bǎbǎkǎlè htû̌ na mǒ̤pwǎ̤ pěnu, na gǔ yṳ̂̌htò̌ na cǔde ginǐ̤khô pě. Kòyò gǔ comě na cǔde dě kòyò gǔ jocû̌ na dǒ ta̤lǎ̤ dǒ na sǎyṳ cû̌ tô̤̌ nupě.”

¹⁹ Běcǎ Yeshǔ hî̌ lû̌û pô̤̌o numî̌, a sǎyṳ hî̌lṳ̌ lû̌û kû̌ Khûpetarǔ gǔ si hî̌tè pě dě Cǒmara ata̤bwǐdû̌sîrîhtû gǔ ô̌lṳ̌htò̌ hî̌tè pě ayanu pwǎ. Htodě Běcǎ Yeshǔ hî̌ lû̌û kû̌, “Gû̌ kû̌ hekò.”

Běcǎ Yeshǔ kû̌ akhôphijǎ dǒ ashǔshawa̤ tokhlǒ

²⁰ Bǎ Khûpetarǔ kè̌tîkhî akhanu, a kè̌shǐ Běcǎ Yeshǔ akhôphijǎ dǒ a mô̤nṳ̌ lû̌û nutôpwa̤ gû̌ kû̌ asîkò. (A mî̌ kòyò dǒ a ô̌ gètè̤ Běcǎ Yeshǔ bǎ asî ǎshǎǎ lṳmṳ̌hǎ akha nutôpwa̤, dě a gwè̌ lû̌û kû̌, “Běcǎ, mò̌pè glè̌ shaǎlò̤kè na pě ya?” Nṳtôpwa̤ hǒ. Hǒomî̌ Běcǎ Yeshǔ si nò̌khôtô̤̌ akha)

²¹ Bǎ Khûpetarǔ kè̌shǐ lû̌û akhanu, a gwè̌ Yeshǔ kû̌, “Běcǎ, alè, a gǔ htûhtò̌ hî̌tè pě?” A gwè̌ Yeshǔ pô̤̌nu.

²² Běcǎ Yeshǔ hî̌shěshu lû̌û kû̌, “He kè̌ sǎyṳ nohtûpwa̤ lû̌û dǒ he hèlò̤pě kè̌hî̌dě, jû̌ he sǎphlǒ pwǎ. Hǒnumî̌ na ta̤ma̤ mè̤̌tô̤̌, na ta̤ma̤ mî̌ na bǎ gû̌ kû̌ he kòpwǎ,” A hî̌ lû̌û pô̤̌nu.

²³ Dǒ Běcǎ Yeshǔ hî̌ pô̤̌o akhû̌akhî, ayô̤̌sǎ lṳ̌peshecû̌ phô̌phô̌bò dǒ pṳ̌wè̤̌ pwa̤yṳ̌ǎta̤phû̌ tokhlǒ akla kû̌ akhôphijǎ nutôpwa̤ a sibǎtô̤̌, a hî̌ lô̌khô pô̤̌nu. Bǎbǎkǎlè Běcǎ Yeshǔ hî̌ kû̌ a sitô̤̌ ahî̌bǎtô̤̌. A hî̌ kû̌, “He kè̌ sǎyṳ nohtûpwa̤ lû̌û tǒ̤dǒ he hèlò̤pě hî̌nudě jû̌ he pwǎ, numî̌ na ta̤ma̤ mè̤̌tô̤̌,” A hî̌ pô̤̌nu pwǎ.

²⁴ Pwa̤ wě̤mǎnǎ ta̤ hǒtokhlǒ mî̌ he dǒ a htû Běcǎ Yeshǔ akhôphijǎ nutôpwa̤ pwǎ, dě a kè̌shǐ bò̌꤮ bò ta̤ma̤htûhtò̌ anǎ̤ nutokhlǒ dě a wě̤mǎnǎ pwǎ. A ta̤hî̌bǎlṳ̌ bǎ tokhlǒ numî̌ atô lǒ̤bò pwǎnu pa sî̌ganǎ̤.

Ta̤hî̌bǎ dǒ nô̌kò gutṳ̌

²⁵ Khònò̤̌, Běcǎ Yeshǔ ma̤ta̤ dǒ ashǔshawa̤ tokhlǒnu a ô̌dû̌wî̤pe. Kè̌ wě̤mǎnǎ bòmò̌ a ma̤ nutokhlǒ numî̌, he gènè̤ kû̌ hǎkhû̌ tôbǎbònu, lǎ̤bè̌lî̤ agûlǎ̤ ô̌ jòpenô̌tô̤̌.