Jowǎ̤ni̤ 19 - Kawyaw New Testament

¹ Pô̤̌nudě Khwǐpǐlǎ kaǎ Běcǎ Yeshǔ dě a nopo̤ kòyò kû̌ sǒpli̤ lǎ̤plè.

² Kliphû̌ tokhlǒ hte te̤we̤ ta̤shî̌shô̌mṳ̌ sô̌sô̌kû̌ khû̌glû̌ nudě a glû̌htò̌ bǎ kû̌ Yeshǔ. Dě a sô̌htò̌ bǎ lû̌û jejû alî̤lǒso dǒ asô̌sô̌kû̌ khwǐ lǎ̤sô̌ tôpṳ htodě,

³ A hètô dǒ a ô̌ dě a hè hî̌hto hî̌sô̌ lû̌û kû̌, “Ǒ Yǔda akhwǐdû̌, ô̌htûpwa̤ nědû̌lahtû pû nî̌!” A hî̌ lò̤wě̤lò̤sô hto lû̌û pô̤̌nu dě asî plǎ̤ lû̌û nò̌shî̌.

⁴ Khwǐpǐlǎ hǎhtò̌ sô̌ dě a hî̌ Yǔdaphû̌ tokhlǒ kû̌, “Pô̤̌khô sî gǔ sî̌ganǎ̤ lô̌khô kû̌ he gwè̌kè̌kè̌ a dě he kè̌shǐ a ma̤ ta̤sǔ tôcǒ tô̤̌ ayanu, he gǔ kaǎhtò̌lṳ̌ bǎ sô̌ sî bǒo.”

⁵ Běcǎ Yeshǔ glû̌htò̌ khû̌glû̌ ta̤shî̌shô̌ dě sô̌htò̌nṳ̌ jejû alî̤lǒsu tôpṳ dě a hǎhtò̌bǎ asî. Dě Khwǐpǐlǎ hî̌ asî kû̌, “Hǒolè, a mî̌ kòyò hǐnu tôpwa̤ hǒ.” A hî̌ asî pô̤̌nu.

⁶ Pwa̤shû̌gǎ ikǒlǒkòdû̌ tokhlǒ kû̌ kliphû̌ dǒ a ô̌pǒ̤ ta̤lṳhtò̌hô tokhlǒ kè̌shǐ lû̌û kû̌, “Htǎsihtò̌kè a dǒ nò̌dò̌htǔlô̤ nu, htǎsihtò̌kè a dǒ nò̌dò̌htǔlô̤ nu,” A yî̤̌kǒhtò̌ lô̌khô pô̤̌nu. Bǎbǎkǎlè Khwǐpǐlǎ hî̌ asî kû̌, “Kaǎcû̌ tûû̌ lô̌khô dě htǎsihtò̌ tûû̌ lô̌khô dǒ nò̌dò̌htǔlô̤ nu. Dǒ heya dě, ta̤sǔ dǒ he gǔ cî̌htò̌ a nu, he cî̌htò̌ yǎ nu aya he kè̌shǐ tôcǒ꤮ tô̤̌,” A hî̌ asî pô̤̌nu.

⁷ Yǔdaphû̌ tokhlǒ hî̌ lô̌khô kû̌, “Pa ta̤sû̌ta̤tòwò ô̌ kû̌ a bǎsi pwǎ, ma̤titèhî̌dě a dǒkôǐlò̤ tûû̌ anǎ̤ kû̌ he mî̌ Cǒmara aphû̌khû, a hî̌ tûû̌ anǎ̤ pô̤̌nu.” A hî̌htò̌ kudǔdǔ lô̌khô pô̤̌nu.

⁸ Khwǐpǐlǎ ganǎ̤de pô̤̌ yô̤̌sǎ pô̤̌o dě a lî̤̌ ǐsha shû̌shû̌.

⁹ A genṳ̌ sô̌ dǒ ahôkû dě a nṳ̌ gwè̌ Yeshǔ kû̌, “Na ô̌ dǒbǎtè hè?” Bǎbǎkǎlè Yeshǔ hî̌shěshǔ lû̌û tôcǒ꤮ tô̤̌.

¹⁰ Dě a hî̌ Yeshǔ kû̌, “Na hî̌shěshǔ he tôcǒ꤮ tô̤̌ ma̤titè? He nǐ̤bǎ ta̤shû̌ta̤sho dǒ he gǔ plûkè na mî̌ anǐ̤nǐ̤, mè̤̌tô̤̌dě he gǔ po̤sihtò̌kè na dǒ nò̌dò̌htǔlô̤ numî̌ anǐ̤nǐ̤ pwǎ numî̌ na sî̌ganǎ̤ tô̤̌ ya?” A hî̌ lû̌û pô̤̌nu.

¹¹ Dě Běcǎ Yeshǔ hî̌shěshu lû̌û kû̌, “Cǒmara kè̌ ǐlò̤ na ta̤siwi̤sòwò̤ tô̤̌nu, na nǐ̤bǎ jò tô̤̌. Pô̤̌nudě kòyò dǒ a ǐlò̤kè he dǒ na cǔdekû tokhlǒnu, ata̤sǔ dû̌khlo pe na.”

¹² Sahtò̌ bǎ a hî̌hto pô̤̌nu dě, Khwǐpǐlǎ jî̌pwǐ̤ kè̌lǎ klè̌ dǒ a gǔ plûhǎhtò̌kè Yeshǔ. Bǎbǎkǎlè Yǔdaphû̌ tokhlǒ kaǎgǔ sělě kû̌, “Na kè̌ plûhǎhtò̌kè kòyò nutôpwa̤ mî̌, na mî̌ khwǐcôphǎ Kè̌sha akhô mè̤̌tô̤̌. Kòyò tôpwa̤pwa̤ dǒ a dǒkôǐlò̤ tûû̌ anǎ̤ kû̌ khwǐnu, amè̤̌kû̌ kòyò dǒ a htè̌shěshu Khwǐkè̌sha hǒ.”

¹³ Bǎ Khwǐpǐlǎ ganǎ̤de asî hî̌pô̤̌o akhanu, a kaǎhtò̌ Yeshǔ dě a hǎnòò̌lò̤ dǒ ta̤cî̌htò̌ lǎ̤hǎnòò̌ gûlǎ̤ dǒ kòyò kaǎ kû̌, kòyò lǎ̤cû̌ dǒ kòyò bô̌sî̌ kû̌ lǒ̤. Hebrǔyô̤̌ mî̌ a hî̌ kû̌, “Gabata.”

¹⁴ Bǎnu tôni̤ mî̌ atô bǎ lṳmṳ̌htǔkha kòyò tîwî̌ nǎ ta̤cû̌bò̌tûlû̌pwè aya nutini̤. Dě Khwǐpǐlǎ hî̌ Yǔdaphû̌ tokhlǒ kû̌, “Hǒo mî̌ sî khwǐ,” A hî̌ asî pô̤̌nu.

¹⁵ Bǎbǎkǎlè asî yî̤̌kǒhtò̌ lô̌khô kû̌, “Ma̤sikè yǎ, htǎsihtò̌kè yǎ dǒ nò̌dò̌htǔlô̤nu.” Dě Khwǐpǐlǎ gwè̌ asî kû̌, “Sî sǎyṳ no htǎsihtò̌kè he kû̌ sî khwǐnu dǒ nò̌dò̌htǔlô̤ ya?” Dě pwa̤shû̌gǎ ikǒlǒkòdû̌ tokhlǒ hî̌ kû̌, “Pa khwǐ ô̌pwǎtǒ̤ Khwǐkè̌sha tôpwa̤ nô̤̌. Pa khwǐ dǒ ashǔshawa̤ mî̌ a ô̌ tôpwǎ̤꤮ tô̤̌,” Asî hî̌ lô̌khô pô̤̌nu.

¹⁶ Dǒnô̌kògutṳ̌ dě Khwǐpǐlǎ ǐlò̤kè Yeshǔ dǒ asî cǔdekû dǒ asî gǔ htǎsihtò̌kè lû̌û dǒ nò̌dò̌htǔlô̤. Pô̤̌nudě kliphû̌ tokhlǒ pṳ̂̌cû̌kè Yeshǔ.

Kòyò htǎsihtò̌ Běcǎ Yeshǔ dǒ nò̌dò̌htǔlô̤.

¹⁷ Dě a ò̌cû̌ tûû̌ a nò̌dò̌htǔ dě a hǎhtò̌cû̌ dǒ ikǒkhwǐ agûlǎ̤. Gûlǎ̤ nutôkû mî̌ Hebrǔyô̤̌ hî̌ kû̌, “Gòlǎgòtǎ.”

¹⁸ Kòyò htǎsihtò̌kè yǎ dǒ nò̌dò̌htǔlô̤ bǎnu. Kòyò htǎsihtò̌ lû̌û kû̌ kòyò sò̌ginǐ̤, tôkhô mî̌ tôpwa̤. Yeshǔ dě a ô̌ dǒ aklǎmakû.

¹⁹ Khwǐpǐlǎ nowě̤ kòyò ta̤ma̤mǎnǎ alî̤phlǒ dě a nohtǎsihtò̌kè kòyò dǒ nò̌dò̌htǔlô̤. Asî wě̤ lî̤phlǒnu kû̌, “Yǔdaphû̌ tokhlǒ akhwǐ, Wî̤̌na̤sôrè̤̌phû̌ Yeshǔ” Pô̤̌nu.

²⁰ Kòyò htǎsihtò̌ Yeshǔnu, a ô̌phǔpwǎ kû̌ wî̤̌ akhû̌akhî, Yǔdaphû̌ tokhlǒ dô̌ dû̌wî̤ lî̤nu. Dě lî̤nu kòyò wě̤bò kû̌ Hebrǔyô̤̌ dǒ Yǔdaphû̌ hî̌bǎǐ tûû̌ yǎnu, kû̌ Latîyô̤̌ kû̌ Grě yô̤̌.

²¹ Pwa̤shû̌gǎ ikǒdû̌ tokhlǒ hî̌ Khwǐpǐlǎ kû̌, “‘Yǔdaphû̌ tokhlǒ akhwǐ,’ wě̤pô̤̌nu tǎ̤mǎ̤. Wě̤ tèplè̌ sô̌ kû̌ kòyò nutôpwa̤ mî̌ a dǒkôǐ tûû̌ anǎ̤ kû̌ Yǔdaphû̌ tokhlǒ akhwǐ,” Wě̤ tèplè̌ sô̌ pô̤̌nu.

²² Bǎbǎkǎlè Khwǐpǐlǎ hî̌ lû̌û kû̌, “Ta̤ dǒ he wě̤htohǒ numî̌, a htohǒ.”

²³ Bǎ kliphû̌ tokhlǒ htǎsihtò̌ hto lû̌û dǒ nò̌dò̌htǔlô̤ akhanu, kliphû̌ sò̌lǐ̤ nî̌ a phî̌ Běcǎ Yeshǔ jejû tokhlǒ dě, a ǐpè̤̌ kè̌khî lû̌û tôpwa̤ tôpṳ. Dě asî phî̌ pô̤̌ lû̌û jejûhtû dǒ kòyò bǒhtu lò̤htûphlǔ pwǎ lû̌û dě kòyò lǎ̤shò̌mě lû̌û ô̌tô̤̌ nutôpṳ.

²⁴ Asî tôpwa̤ kû̌ tôpwa̤ hî̌ kè̌khî lû̌û kû̌, “Pa cî̌hǎyè̌ a je tô̤̌ tǎ, mò̌pè tô nǐ̤bǎpû pěnu, pa bǒ ta̤bèbwǐ tôcǒ tǎ!” A hî̌ǐ tûû̌ lû̌û pô̤̌nu. Pô̤̌khô lî̤plò̌shǐkû gǔ lǒhtò̌behtò̌ dě ta̤htû anǎ̤ pô̤̌o pwǎ. Lî̤plò̌shǐkû hî̌ kû̌, “Asî bèpè̤̌ phî̌ǐ lô̌khô heje tokhlǒ hǒ. Pô̤̌khô asî gǔ phî̌nṳ̌ heje dě a bǒ lô̌khô ta̤bèbwǐ hǒ.” Dě kliphû̌ tokhlǒnu, a ma̤ lô̌khô pô̤̌nu.

²⁵ Bǎ Běcǎ Yeshǔ a nò̌dò̌htǔ kòshî̌nu, Běcǎ amǒ̤ kû̌ Běcǎ amǒ̤ apṳ̌pwa̤mǒ̤, kû̌ Khûklòphǎ ama Mǒ̤marǐ kû̌ Magadalǎ dokûphû̌ Mǒ̤ma̤rǐ ihtǒ ô̌ lô̌khô bǎnu.

²⁶ Bǎ Běcǎ Yeshǔ kè̌shǐ amǒ̤ kû̌ akhôphijǎ dǒ a mô̤nṳ̌ lû̌û tôpwa̤ ihtǒ ô̌phǔ kû̌ lû̌û akha, a hî̌ cû̌ amǒ̤ kû̌, “Mǒ̤꤮ khònò̤̌nu kòyò tôpwa̤ mî̌ a htûhto naphû̌ hǒ,” A hî̌ cû̌ amǒ̤ pô̤̌nu.

²⁷ Htodě a hî̌lò̤ akhôphijǎ nutôpwa̤ kû̌, “Khònò̤̌ hemǒ̤dě a htûhto namǒ̤ hǒ.” Sahtò̌ bǎnu dě akhôphijǎ nutôpwa̤ kaǎgeô̌ Běcǎ amǒ̤nu dǒ ahǐ.

Běcǎ Yeshǔ si

²⁸ A hî̌hto pô̤̌nu dě Běcǎ Yeshǔ sî̌ganǎ̤ kû̌ a ma̤htobò ta̤pṳ̂̌꤮ tocǒ hǒ. Dě pô̤̌khô lî̤plò̌shǐ gǔ lǒbehtò̌ ayanu, Běcǎ Yeshǔ hî̌ kû̌, “He sǎôshi” A hî̌ pô̤̌nu.

²⁹ Bǎnu tôkûnu, shisî̌yô̤̌ ashî̌ ô̌ tôsô. Dě asî khlè̌cû̌phî̌ ta̤tôcǒ dǒ asô̌sô̌kû̌ sèphè̌ dě a cû̌junṳ̌ dǒ shisî̌yô̤̌ ashî̌ pû̌kû dě a comě dǒ sǒphò dǒ kòyò kaǎ kû̌ Hǐsû̌phònu alô̤ dě a tû̌htò̌ dǒ Běcǎ akhû̌phělô̤.

³⁰ Bǎ Běcǎ Yeshǔ lî̌kè̌bǎ akhanu, a hî̌ kû̌, “A htohǒ.” Dě a û̌lò̤kè ikǒ, htodě a ǐlò̤kè ata̤htûpwa̤ dǒ Cǒmara a cǔdekû.

Kòyò shu a wě̤khwǐ kû̌ sòbò

³¹ Bǎnu tôni̤nu atô kû̌ lṳmṳ̌ni̤ dǒ kòyò tîwî̌tòwò nǎ htû̌ pe̤wô̤pě Yǔdaphû̌ a lṳmṳ̌dǔ nutini̤ aya. Lṳmṳ̌dǔ numî̌ lṳmṳ̌dǔ dǒ a lò̤tě̤tô khô̌tû̌ bǎ pwè dǒ kòyò kaǎ kû̌ ta̤cû̌bò̌tûlû̌pwè akhanu. Pô̤̌nudě Yǔdaphû̌ ikǒdû̌ kûshû̌htû tokhlǒnu, bǎ lṳmṳ̌dǔ agûlǎ̤, asî sǎyṳ dǐô̌ lṳ̌tṳ̂̌ tokhlǒnu dǒ nò̌dò̌htǔlô̤ tô̤̌. Pô̤̌khô asî gǔ siphwènu dě, asî cû̌ kwi Khwǐpǐlǎ dǒ a gǔ no degǎkè kòyò kû̌ asî nutokhlǒ akhò̌lô̤pô̤̌ dě gǔ phî̌tě̤kè asî dǒ nò̌dò̌htǔlô̤.

³² Pô̤̌nudě kliphû̌ tokhlǒ hèdegǎ wǐ kòyò htǎsihtò̌ kû̌ Yeshǔ sò̌ginǐ̤ akla tôpwa̤. Htodě a cû̌ degǎ pô̤̌ kû̌ a ô̌kè nutôpwa̤.

³³ Bǎbǎkǎlè bǎ asî cû̌tǒ̤ dǒ Yeshǔ ô̌ akhanu, asî kè̌shǐ kû̌ a si htohǒ akhû̌akhî, a degǎ lû̌û akhò̌lôpô̤̌ tôkhô꤮ tô̤̌.

³⁴ Bǎbǎkǎlè kliphû̌ nutokhlǒ akla tôpwa̤nu, a shu Yeshǔ wě̤lǎ̤ kû̌ sòbò dě tôplǎnô̤̌ sǐ kû̌ shi hǎhtò̌.

³⁵ Kòyò dǒ a kè̌shǐ a htûhtò̌ pô̤̌o tôpwa̤nu a shôbǐǐlṳ̌ bǎ kòyò. Dě a shôbǐǐlṳ̌ tôbǎ kòyò pwǎ. A sî̌ganǎ̤ tě̤tě̤mè̤̌mè̤̌ǐ tûû̌ kû̌ a hî̌ numî̌ acǒatè̤ pwǎ. Pô̤̌khô sî gǔ yṳ̌ǎ kû̌ kòyònu, a shôbǐǐlṳ̌ bǎ sî pwǎ.

³⁶ Pô̤̌khô lî̤plò̌shǐ gǔ lǒbehtò̌ ayanu, ta̤hǒtokhlǒ htûhtò̌ hǒ. Lî̤plò̌shǐkû hî̌ kû̌, “Akhwǐ glè̌ lǎ̤gǎ tôbô̌꤮ tô̤̌,” A hî̌ pô̤̌nu.

³⁷ Lî̤plò̌shǐ dǒ ashǔshawa̤ tûkû hî̌ pô̤̌ kû̌, “Asî shu lû̌û kû̌ sòbò tôpwa̤nu, asî gǔ kè̌shǐ lû̌û pě.”

Kòyò lǔ Yeshǔ

³⁸ Htodě wî̤̌ Arǐmatè̌phû̌ Khûyṳ̂tǎ cû̌kwi Yeshǔ alṳ̌tṳ̂̌nu dǒ Khwǐpǐlǎ a ô̌. Khûyṳ̂tǎ mî̌ Běcǎ Yeshǔ akhôphijǎ tôpwa̤, bǎbǎkǎlè a ǐsha Yǔdaphû̌ tokhlǒ alǎ̤ akhû̌akhî, a htûhǔhtûsè̌ pwǎ a khôphijǎ pwǎ. A cû̌kwi Khwǐpǐlǎ nu, a jû lû̌û dě a hè phî̌wô̌ cû̌kè Běcǎ alṳ̌tṳ̂̌ hǒo.

³⁹ Khûnǐkôdemǔ gû̌ cû̌kû̌ yǎ. Khûnǐkôdemǔ mî̌ kòyò dǒ a hè ô̌lè gû̌ Běcǎ Yeshǔ dǒ lṳmṳ̌khǐkha dǒ awǐkha nutôpwa̤. A phî̌hèǐ lǎ̤plṳ̌ ta̤numû̌ ginǐ̤cǒ dǒ kòyò kaǎ kû̌, Mǔra kû̌ Alṳ̌shô. Alò̤jwè̌, phǔ ô̌ ginǐ̤shi kû̌ yè̤̌jwè̌.

⁴⁰ Asînu sò̌ginǐ̤ phî̌ Yeshǔ a lṳ̌tṳ̂̌ nudě a bô̌ tûlû kû̌ hugò̌pwǐ plî tôpṳ dě a bô̌bǐ tûlû sada lû̌û kû̌ ta̤numû̌ nutokhlǒ. Yǔdaphû̌ alǎ̤klô lǔǐ lṳ̌ numî̌ a ma̤ lô̌khô pô̤̌nu.

⁴¹ Bǎ kòyò lǎ̤htǎsihtò̌ Yeshǔ dǒ nò̌dò̌htǔlô̤ akòshî̌nu, we̤ ô̌ tôwe̤. Dǒ we̤ nutalǎ̤ akûnu, kòyò pho sa nǎ lṳ̌kû tôkû dǒ lǒ̤kû, dě kòyò lǔǐ kû̌ lṳ̌tôtṳ̂̌ nò̌khôtô̤̌nu.

⁴² Bǎnu tôni̤nu atô kû̌ lṳmṳ̌ni̤ dǒ kòyò tîwî̌tòwò nǎ Yǔdaphû̌ a lṳmṳ̌dǔ nutini̤ htû̌ pe̤wô̤pě, htokhôtô̤̌ lṳ̌kû ô̌phǔ bǎnu tôkû akhû̌akhî, asî cû̌ lǔnṳ̌kè lû̌û bǎnu.