Jowǎ̤ni̤ 17 - Kawyaw New Testament

Běcǎ Yeshǔ kwicabaǐ tûû̌ aya

¹ Běcǎ Yeshǔ hî̌hto pô̤̌o dě a kè̌htò̌ dǒ mǒkhû̌ dě a kwicaba dě a kwi pô̤̌o, “Pha꤮, shěkhǎ hètǒ̤hǒ. Pô̤̌khô he dǔlè̌lṳ̌htò̌ na ta̤bwǐdû̌sîrîhtûnu, dǔlè̌lṳ̌ mò̌ na phû̌khû ata̤bwǐdû̌sîrîhtû.

² Ma̤titèhî̌dě pô̤̌khô kòyò lǒ̤꤮ bò dǒ na ǐ he tokhlǒ gǔ nǐ̤bǎ yôla htûpwa̤ tûjû̌pwa̤ ayanu, na ǐ htobò he ta̤siwi̤sòwò̤ dǒ he gǔ pǒ bò kòyò nutokhlǒ hǒ.

³ Cǒmara mî̌ na tôpwa̤ nô̤̌pwǎ, dě kòyò tokhlǒ dǒ a sî̌ganǎ̤ na dě a sî̌ganǎ̤ kû̌ he mî̌ Yeshǔ Khrǐ dǒ na sûhè yǎ tôpwa̤ numî̌ amè̤̌kû̌ ta̤sî̌ya dǒ a ǐ asî yôla htûpwa̤ tûjû̌pwa̤ hǒ.

⁴ He ma̤ bǎ htobò na ta̤ma̤ dǒ na noma̤ he nutokhlǒ akhû̌akhî, he ǐlò̤ htona ta̤bwǐdû̌sîrîhtû dǒ hǎkhû̌nu hǒ.

⁵ Pha꤮, pô̤̌ he ta̤bwǐdû̌sîrîhtû ô̌ kû̌ na dǒ hǎkhû̌ htûhtò̌ nò̌khôtô̤̌ pe akhanu, ǐ sô̌ mò̌ he ta̤bwǐdû̌sîrîhtûnu dǒ nalô̤mô̤̌ khònò̤̌.”

Běcǎ Yeshǔ kwicaba bǎ akhôphijǎ tokhlǒ aya

⁶ “Kòyò dǒ na rû̌htò̌khô̌ asî dǒ hǎkhû̌nu dě na ǐ kû̌ he tokhlǒnu he dǔlè̌lṳ̌ hto asî kû̌ na hǒ. Asî tokhlǒ numî̌ nata hǒ. Asî tokhlǒnu, na ǐ kû̌ he dě asî ganǎ̤de lô̌khô nayô̤̌.

⁷ Khònò̤̌dě lǒ̤꤮ bò ta̤ dǒ hehî̌hema̤ tokhlǒnu, a ô̌ dǒ naô̌ dě a hè pwǎnu asî sî̌ganǎ̤ hǒ.

⁸ Ma̤titèhî̌dě, ta̤we̤ta̤kè dǒ na ǐ he tokhlǒnu, he ǐ kû̌ asî dě asî phî̌shǐshu htohǒ. Asî sî̌ganǎ̤ tě̤tě̤mè̤̌mè̤̌ kû̌ he ô̌ dǒ na ô̌ hè dě asî yṳ̌ǎ kû̌ na nohè he.

⁹ He kwicaba bǎ asîya. He kwicaba bǎ kòyò hǎkhû̌phû̌ nutokhlǒ aya mè̤̌tô̤̌. Bǎbǎkǎlè kòyò dǒ na ǐhto he tokhlǒnu, nata akhû̌akhî, he kwicaba bǎ asîya.

¹⁰ Lǒ̤bò a ô̌ kû̌ he tokhlǒnu, nata hǒ, dě lǒ̤꤮ bò a ô̌ kû̌ na tokhlǒnumî̌, heta hǒ. Asî dǔlṳ̌hto he ta̤bwǐdû̌sîrîhtû hǒ.

¹¹ He ô̌ sělě pe dǒ hǎkhû̌ tô̤̌, bǎbǎkǎlè asî hǒtokhlǒ gǔ ô̌ gutṳ̌ dǒ hǎkhû̌ pě. He dě, he gǔ getîkhî sô̌ dǒ naô̌ pě. Ǒ pha plò̌shǐ! Pô̤̌khô asî gǔ ô̌lû̌û kû̌ sǎphlǒ tômè pô̤̌ he kû̌ na ô̌lû̌û kû̌ sǎphlǒ tômè akûnu, kè̌khwè̌ǐtû̌ asî kû̌ nami̤ dǒ apô̤aphǎ, nami̤ dǒ na ǐ he nunî̌꤮.

¹² Bǎ he ô̌plǒ kû̌ asî akhanu, he takabǐ ǐtûû̌ asî hǒ, he ô̌pǒ̤ kè̌khwè̌ǐ asî kû̌ mi̤ dǒ na ǐ he nuhǒ. A hǎmǎkè nô̌ tôpwǎ̤꤮ tô̤̌. Pô̤̌khô lî̤plò̌shǐ gǔ lǒbehè ayanu, a hǎmǎkè pwǎtǒ̤ kòyò nutôpwa̤ dǒ kòyò bè̌ nǎkè a dǒ a gǔ pî̌pě nutôpwa̤ nô̤̌ pwǎ.”

¹³ “He hè dǒ naô̌ khònò̤̌ hǒ. Pô̤̌khô asî gǔ ô̌lǒô̌be kû̌ ta̤sǎlě̤sǎlò̤ ayanu, bǎ he ô̌pe bǎ hǎkhû̌ akhanu, he shôbǐǐlṳ̌ bǎ asî kû̌ ta̤nutokhlǒ hǒ.

¹⁴ He dǐsî̌ganǎ̤ hto asî kû̌ nalě̤nayô̤̌, dě kòyò dǒ a yṳ̌ǎ he tô̤̌ tokhlǒnu, a sǎphlǒdû̌ bò asî ma̤titèhî̌dě pô̤̌ he ô̌ icu kû̌ kòyò hǎkhû̌phû̌ tô̤̌nu, asî sô̌sô̌kû̌ kû̌ he akhû̌akhî, kòyò sǎphlǒdû̌ bò asî.

¹⁵ He kwicaba kû̌ phî̌htò̌ tephekè asî kû̌ hǎkhû̌ pô̤̌nu mè̤̌tô̤̌. Mè̤̌takhônu he kwicaba kû̌ na gǔ tôgô̌bǐ asî kû̌ kòyòkhu kòyòhe dǒ kòyò kaǎ lû̌û kû̌ Setò̤ nutôdo.

¹⁶ Pô̤̌ he ô̌ cu kû̌ kòyò hǎkhû̌phû̌ tô̤̌nu, asî sô̌sô̌ kû̌ he hǒ.

¹⁷ Ma̤mṳ̂̌ma̤plî khô̌tû̌ asî kû̌ nalě̤nayô̤̌ dǒ a cǒtè̤nu nî̌꤮.

¹⁸ Pô̤̌ na nohè he dǒ hǎkhû̌nu, he nocû̌hto asî dǒ kòyòhǎkhû̌phû̌ tokhlǒ a ô̌ hǒ.

¹⁹ Pô̤̌khô asî gǔ bè̌mṳ̂̌plî lô̌khô kû̌ nalě̤nayô̤̌ a ta̤tě̤ta̤mè̤̌nu dě, he ǐlò̤ bò mǔtegle hto he ta̤htûpwa̤ dǒ asî agûlǎ̤ hǒ.”

Běcǎ Yeshǔ kwicaba dǒ ta̤dòkûphû̌ tokhlǒ aya

²⁰ “He kwicaba pwǎtǒ̤ he khôphijǎ tokhlǒ ayanu mè̤̌tô̤̌. Asî tokhlǒ cû̌ khòlṳ̌ bǎ dě kòyò dǒ a ganǎ̤de a yṳ̌nǐ̤nǎ̤nǐ̤ ge he pě tokhlǒ ayabǎbǎ, he kwicaba bǎ bò dǒ asîyaya.

²¹ Ǒ꤮ pha, pô̤̌ na kû̌ he htû tôcǒnô̤̌, dě he kû̌ na htû tôcǒnô̤̌nu, pô̤̌khô asî lǒ̤꤮ bò gǔ htûhtò̌ ta̤tôcǒnô̤̌ dě, he kwisǎyṳ cabahtò̌ na hǒ. Htokhôtô̤̌ pô̤̌khô kòyò hǎkhû̌phû̌ tokhlǒ gǔ yṳ̌ǎ kû̌ na nohèlò̤ he nudě, he kwicaba kû̌ asî gǔ htû kû̌ pa tôcǒnô̤̌ nî̌.

²² Pô̤̌khô asî gǔ ô̌ pû kû̌ sǎphlǒ tômènô̤̌ pô̤̌ he kû̌ na ô̌ lû̌û kû̌ sǎphlǒ tômènô̤̌ akûnu dě, he ǐ hto asî ta̤bwǐdû̌sîrîhtû dǒ na ǐ he nuhǒ.

²³ He sǎyṳ asî kû̌ asî gǔ htû lû̌û tôcǒnô̤̌, pô̤̌khô he kû̌ asî htû lû̌û tôcǒnô̤̌ dě he kû̌ na htû lû̌û tôcǒnô̤̌nu. Htokhôtô̤̌ pô̤̌khô kòyò hǎkhû̌phû̌ tokhlǒ gǔ sî̌ganǎ̤ kû̌ na nohèlò̤ he dě na mô̤nṳ̌ kòyò dǒ a yṳ̌ǎ he tokhlǒ, pô̤̌ na mô̤nṳ̌ henu dě, he ǐ hto asî ta̤bwǐdû̌sîrîhtû hǒ.

²⁴ “Ǒ꤮ pha, kòyò dǒ na ǐ kû̌ he hǒtokhlǒnu, he ô̌ bǎtè tôkûnu, he sǎyṳ kaǎ ô̌cu asî bǎnu. He sǎyṳ dǒ asî gǔ kè̌shǐ he ta̤bwǐdû̌sîrîhtû dǒ na ǐ he nutokhlǒ, ma̤titèhî̌dě, na mô̤nṳ̌ pe he dǒ pa bô̌lò̤ hǎkhû̌ nò̌khôtô̤̌ akha penu.”

²⁵ “Pha dǒ acǒatè̤, kòyòhǎkhû̌phû̌ tokhlǒ sî̌ganǎ̤ na tô̤̌ bǎbǎkǎlè he sî̌ganǎ̤ na, htokhôtô̤̌ kòyò dǒ a yṳ̌ǎ he nutokhlǒ sî̌ganǎ̤ kû̌ na nohè he.

²⁶ Pô̤̌khô na ta̤mô̤ǐ he gǔ ô̌ dǒ asîkû, htokhôtô̤̌ pô̤̌khô he gǔ ô̌cu dǒ asîkû ayanu, he dǐsî̌ganǎ̤ hto asî kû̌ na, dě he gǔ dǐsî̌ganǎ̤ hènè bǎ pô̤̌ asî kû̌ na pě,” Běcǎ Yeshǔ kwicaba dě a hî̌ pô̤̌nu.