Htû̌sò̌htò̌ 99 - Kawyaw New Testament

Cǒmaradû̌ mî̌ khwǐ dǒ asiwi̤dû̌sòwò̤htû

¹ Cǒmara tûjû̌pwa̤ mî̌ khwǐ akhû̌akhî, no gònò̤̌gèglèbò khlilèphû̌ tokhlǒ. A hǎnòò̌ dǒ gûlǎ̤ htò̌yô̤̌khlo kû̌ mǒkhû̌tanaphû̌ dǒ kòyò kaǎ lû̌û kû̌ Kherǔbe akhû̌nu akhû̌akhî, no kuyṳ̌bò hǎkhû̌běkhû̌.

² Dǒ Sǐû khôlôkhû̌ nî̌ Cǒmara tûjû̌pwa̤ mî̌ apô̤pwǎ̤shû̌sho gutṳ̌. A pǒǐbò khlilèphû̌ lǒ̤bò.

³ No htû̌sò̌htò̌bò asî kû̌ ami̤ dǒ adû̌ahtû, agwǎ ǐshanu. a mî̌ aplò̌ashǐ.

⁴ Khwǐdû̌ nî̌ asiwi̤dû̌sòwòhtû, na mô̤nṳ̌ ta̤cǒta̤tè̤, na bè̌htò̌ ta̤tôta̤bǎ. Na cî̌htò̌tô cî̌htò̌bǎ, na cî̌htò̌cǒ cî̌htò̌tè̤ bǎ Phayakò akhlialè lò̤ tokhlǒ.

⁵ Htû̌sò̌htò̌mò̌ lô̌khô Cǒmara tûjû̌pwa̤ mî̌ pa Cǒmaradû̌nu. Cubucabahtò̌mò̌ lô̌khô dǒ ata̤lṳhtò̌hôkû bǎ agògǒhtò̌yô̤̌lǒ lô̤mô̤̌nu. A mî̌ aplò̌ashǐ.

⁶ Phamṳ̂shě kû̌ Pha Arṳ̂ mî̌ a htû Cǒmara apwa̤lṳhtò̌ta̤. Kòyò dǒ a kwicabahtò̌ lû̌û tokhlǒ akla, Khûshamuěla mî̌ apa tôpwa̤. Asî kwisǎyṳhtò̌ Cǒmara tûjû̌pwa̤ dě a ganǎ̤de asîta̤kwi.

⁷ A hî̌bǎlò̤ asî yô̤̌sǎ dǒ poǒlṳ̌ tûlûhtûkû. A mǎnǎ asî ta̤mǎlò̤ kû̌ ta̤sû̌ta̤tòwò dě asî ganǎ̤de jûlě̤phǐbò yô̤̌nu.

⁸ Ǒ Cǒmara tûjû̌pwa̤ amè̤̌kû̌ pa Cǒmaradû̌, na ganǎ̤deshǔ na kòyò tokhlǒ. Na mî̌ Cǒmaradû̌ dǒ a plûkè asî ta̤sǔ bǎbǎkǎlè bǎ asî ma̤sǔ ta̤ akhanu na cî̌htò̌ asî.

⁹ Htû̌sò̌htò̌ lô̌khô Cǒmara tûjû̌pwa̤, dǒ amè̤̌ pa Cǒmaradû̌. Cubucabahtò̌ a dǒ akhôlô plò̌shî̌khû̌. Cǒmara tûjû̌pwa̤ mî̌ pa Cǒmaradû̌ numî̌ aplò̌ashî̌.