Htû̌sò̌htò̌ 98 - Kawyaw New Testament

Cǒmaradû̌ mî̌ pwa̤pǒǐ hǎkhû̌nǎ̤khû̌

Ta̤sǎwǐhtû̌sò̌htò̌

¹ Sǎwǐhtû̌sò̌htò̌ Cǒmara tûjû̌pwa̤ kû̌ lî̤sǎwǐ asa. A ma̤hto ta̤ dǒ acô̌klî̌cô̌sè nutokhlǒ hǒ. Apô̤aphǎ, asiwisòwò̤ shû̌sho akhû̌akhî, a ma̤pè̤̌ ta̤ hǒ.

² Cǒmara tûjû̌pwa̤ dǐsî̌yalṳ̌ a ma̤hǎplǎge ta̤ kû̌ apô̤phǎshû̌sho. A dǔlṳ̌ a ma̤ ta̤cǒta̤tè̤ tokhlǒ dǒ kòyò khlilèphû̌ tokhlǒ alô̤mô̤̌.

³ Cǒmara gènè̤̌htò̌bǎ ata̤mô̤nṳ̌ dǒ ahǎbòjò tô̤̌ kû̌ ata̤cǒ kû̌ ayô̤̌ dǒ Isôrě̤laphû̌ aya. Hǎkhû̌ tôběbò kè̌shǐ pa Cǒmaradû̌ ata̤ma̤hǎplǎge hǒ.

⁴ Ǒ hǎkhû̌phû̌ lǒ̤bò sî, sǎlě̤sǎlò̤ sǎwǐhtò̌ lô̌khô Cǒmara tûjû̌pwa̤. Sǎlě̤sǎlò̤ yî̤̌kǒ htû̌sò̌htò̌mò̌, sǎwǐsǎshô̌ htû̌sò̌htò̌mò̌ lû̌û.

⁵ Sǎwǐ htû̌sò̌htò̌mò̌ Cǒmara tûjû̌pwa̤ kû̌ tǐtutegwe. Dǒpwe̤lṳ̌ ta̤sǎwǐ dǒ alě̤nǐ̤ wô̌nu.

⁶ Ǔmò̌ kǐlû kû̌ sû̌phû̌no̤. Sǎlě̤sǎlò̤ htû̌sò̌htò̌mò̌ lô̌khô dǒ Cǒmara tûjû̌pwa̤ mî̌ khwǐdû̌nu alô̤mô̤̌.

⁷ No pwe̤ te̤we̤shû̌ bò shidû̌te̤we̤ kû̌ lǒ̤bò ta̤ dǒ a ô̌ bǎ shikû nutokhlǒ. No sǎwǐpwe̤ pi̤ti̤pûtṳ̂ hǎkhû̌ kû̌ kòyò dǒ a ô̌ bǎ hǎkhû̌ nutakhlǒ.

⁸ No plǎ̤bò shilô̤̌mǒ̤ tokhlǒ acǔde. No sǎlě̤sǎlò̤ sǎwǐ wô̤̌wô̤̌ khômǔkhôlô.

⁹ Cǒmara tûjû̌pwa̤ hèlò̤ cî̌htò̌ hǎkhû̌ akhû̌akhî, no sǎwǐbò asî dǒ alô̤mô̤̌. A glè̌ cî̌htò̌cǒ cî̌htò̌tè̤ hǎkhû̌. A glè̌ cî̌htò̌tô cî̌htò̌bǎ khlilèphû̌ tokhlǒ.