Htû̌sò̌htò̌ 96 - Kawyaw New Testament

Cǒmara mî̌ khwǐ dǒ asîrîdû̌sîrîhtû

¹ Sǎwǐhtò̌ Cǒmara tûjû̌pwa̤ kû̌ ta̤sǎwǐ dǒ asa. Ǒ hǎkhû̌phû̌ lǒ̤bò sî, sǎwǐhtò̌ bòmò̌ Cǒmara tûjû̌pwa̤.

² Sǎwǐhtò̌ Cǒmara tûjû̌pwa̤, htû̌sò̌htò̌mò̌ ami̤. Pṳ̂̌ni̤ni̤ shôbǐǐlṳ̌mò̌ ata̤ma̤hǎplǎge.

³ Shôbǐǐlṳ̌ bòmò̌ ata̤sîdû̌sîrîhtû kû̌ khlilèphû̌ tokhlǒ. Shôbǐǐlṳ̌ bòmò̌ ata̤ma̤ cô̌klǐcô̌sè nutokhlǒ kû̌ kòyò lò̤̌bò.

⁴ Cǒmara tûjû̌pwa̤ mî̌ adû̌ahtû, agwǎ htû̌sò̌htò̌. Kòyò tô ǐsha bè̌dubè̌nǎ̤ khlo lû̌û kû̌ Cǒmara dǒ ashǔshawa̤ lǒ̤bò.

⁵ Kòyò khlilèphû̌ ashǔshawa̤ tokhlǒ a Cǒmara mî̌ pwa̤yô̤pwa̤gî̌ lǒ̤bò pwǎ. Cǒmara tûjû̌pwa̤ dě a bô̌lò̤ mǒkhû̌.

⁶ Ta̤lîta̤kakha kû̌ ta̤pô̤phǎ tokhlǒnu aô̌bò dǒ alô̤mô̤̌. Ta̤khû̌ta̤ǎ kû̌ ta̤sîrîdû̌sîrîhtû tokhlǒ ô̌bò dǒ ta̤lṳhtò̌ta̤hô aplò̌shǐ akû.

⁷ Ǒ khlilèphû̌ ô̌ dǒ hǎkhû̌ nutokhlǒ lǒ̤bò sî, htû̌sò̌htò̌ lô̌khô Cǒmara tûjû̌pwa̤. Htû̌sò̌htò̌ lô̌khô Cǒmara tûjû̌pwa̤ ata̤sîdû̌sîrîhtû kû̌ ata̤pô̤pwǎ̤shû̌sho.

⁸ Htû̌sò̌htò̌mò̌ Cǒmara tûjû̌pwa̤ dǒ a ta̤siwi̤dû̌sòwò̤htû̌ nutôpwa̤ ami̤. Phihènṳ̌mò̌ ta̤lṳ̌tòhtò̌, hènṳ̌mò̌ dǒ ta̤lṳhtò̌htò̌hô we̤kû.

⁹ Dô̌gînî̤ cabahtò̌mò̌ Cǒmara tûjû̌pwa̤ dǒ a ô̌ kû̌ ata̤plò̌ta̤shǐ dǒ lîkakhanu. Ǒ hǎkhû̌phû̌ lǒ̤bò sî, ǐsha gònò̤̌gòglè bò lô̌khô.

¹⁰ Shôbǐǐlṳ̌mò̌ dǒ khlilèphû̌ tokhlǒ akla kû̌, “Cǒmara tûjû̌pwa̤ pǒ ta̤.” A bô̌lò̤ měglewô̌ hǎkhû̌ akhû̌akhî, a kuyṳ̌jò pe tô̤̌. A gǔ cî̌htò̌cǒ cî̌htò̌tè̤ kòyò lǒ̤bò bò.

¹¹ Ǒ mǒkhû̌ sǎlě̤sǎlò̤ mò̌, hǎkhû̌ mô̤sû̌mô̤sò̌ mò̌. No yî̤̌kǒ htû̌sò̌htò̌ bòmò̌ shidû̌te̤we̤ kû̌ lǒ̤bò ta̤phû̌ta̤wè̤ ô̌ bǎ shikû nutokhlǒ.

¹² No yî̤̌kǒ sǎlě̤sǎlò̤ bò mò̌ yadakhû̌ kû̌ lǒ̤bò ta̤ dǒ a ô̌ bǎ yadakhû̌ nutokhlǒ. No sǎlě̤sǎlò̤ sǎwǐhtò̌ bò mò̌ lǒ̤bò sǒmṳ̌wû̌bô ô̌ dǒ mi̤kla nutokhlǒ.

¹³ Cǒmara tûjû̌pwa̤ hè akhû̌akhî, asî sǎwǐ htû̌sò̌htò̌ bò dǒ alô̤mô̤̌ pě. A glè̌ hècî̌htò̌tô cèròbǎ hǎkhû̌. A glè̌ hèlò̤ pǒ kòyò nutokhlǒ kû̌ ata̤cǒta̤tè̤ pě.