Htû̌sò̌htò̌ 94 - Kawyaw New Testament

Cǒmara tûjû̌pwa̤ mî̌ pwa̤cèrò ta̤ lǒ̤꤮ bò

¹ Ǒ꤮ Cǒmara tûjû̌pwa̤, na mî̌ Cǒmara dǒ ama̤lǐ̤ge tîkhîshǔ kòyò, ǒ Cǒmaradû̌ dǒ a ma̤ge shěshǔ ta̤. Dǐ lṳ̌htò̌mò̌ na ta̤sîrîdû̌sîrîhtû.

² Ǒ pwa̤ dǒ acî̌htò̌ hǎkhû̌, ma̤mò̌. Ma̤lǐ̤ geshî̌shǔ mò̌ kòyò dǒ a bè̌dû̌bè̌pwǎ̤ anǎ̤ nutokhlǒ pô̤̌ asî tô khòbǎnu.

³ Ǒ Cǒmara tûjû̌pwa̤, kòyòphû̌mò̤̌ nutokhlǒ glè̌ sǎlě̤sǎlò̤ yî̤ pe pwǐtè? Ǒ Cǒmara, a yî̤ pe pwǐtè?

⁴ Asî glè̌ bè̌dû̌bè̌pwǎ̤ anǎ̤ yî̤ pe pwǐtèpě? Lǒ̤bò kòyòkhu phû̌mò̤̌ tokhlǒ hî̌bǎ htò̌mǒhtò̌yô̤̌ yî̤ pe pwǐtè?

⁵ Ǒ Cǒmara tûjû̌pwa̤, asî ma̤jî̌ma̤jû̌, ma̤numa̤cî̌ jî̌jû̌ na kòyò.

⁶ Asî ma̤sima̤hǎmǎ pwa̤mǒ̤khwè̌, phû̌ dǒ shôdôpha, shilǎ̤gǎkhlophû̌ nutokhlǒ.

⁷ Asî hî̌ kû̌, “Cǒmara tûjû̌pwa̤ kè̌shǐ bǎ tô̤̌. “Phayakû a Cǒmara sî̌ganǎ̤ bǎ tô̤̌tô̤̌.”

⁸ Ǒ kòyòô̌lǒô̌khlo sî, bèyòjò mò̌ lô̌khô ta̤nu. Kòyò ǒò̌phuhtò sî, sî glè̌ bèyòjò gû̌ kò htû̌꤮ bǎkhòtè pě?

⁹ Cǒmara mî̌ a bô̌lò̤ nò̌ku, a ganǎ̤dejò tô̤̌ sî shò̌tò̤̌ ya? A mî̌ pwa̤bô̌lò̤ mǐ̤sǎphlǒ, a kè̌shǐjò tô̤̌ sî shò̌tò̤̌ ya?

¹⁰ A mî̌ pwa̤sû̌ǐwô̌ge khlilèphû̌ tokhlǒ, sî shò̌tò̤̌ kû̌ a plèjò kòyò tô̤̌ya? A mî̌ pwa̤ dǒ a sû̌ǐ bǎ kòyò ta̤sî̌ta̤jò̌, sî shò̌tò̤̌ kû̌ ata̤sî̌khû̌sî̌ya ô̌ tô̤̌ya?

¹¹ Cǒmara tûjû̌pwa̤ sî̌ganǎ̤ kòyò hǎkhû̌phû̌ ata̤gènè̤ tokhlǒ. A sî̌ganǎ̤ kû̌ asî ta̤gènè̤ tokhlǒnu atṳ̌dè pwǎ.

¹² Ǒ꤮ Cǒmara tûjû̌pwa̤, kòyò dǒ na sû̌ǐwô̌ge lû̌û dě na sû̌ǐ bǎ asî kû̌ na ta̤sû̌ǐ nutokhlǒ mî̌ a nǐ̤bǎ ta̤ǐshôwî̤.

¹³ Na takabǐnṳ̌ asî dǒ ata̤pò̤̌ta̤sha akû tǒ̤dǒ kòyò pho hǎkûyô̤̌ dǒ kòyòphû̌mò̤̌ lǎ̤lò̤tě̤si ayanupě.

¹⁴ Cǒmara tûjû̌pwa̤ wîkè a kòyò tokhlǒ tô̤̌. A bè̌kè nô̌ kòyò dǒ a rû̌htò̌ǐ nutokhlǒ tîkî̌ tô̤̌.

¹⁵ Ta̤cî̌htò̌nu atôabǎ gesô̌ pě. Lǒ̤bò kòyòcǒkòyòtè̤ tokhlǒ jûlě̤phhǐ bò pě.

¹⁶ Mò̌pè tôpwa̤ ihtǒ takatě̤tṳshǔ bǎ he kû̌ kòyòphû̌mò̤̌ nutokhlǒ pě ya? Mò̌pè tôpwa̤ ihtǒ shěshǔ bǎ he kû̌ kòyò ma̤ ta̤phû̌mò̤̌shǐhtô nutokhlǒ pě ya?

¹⁷ Cǒmara tûjû̌pwa̤ kè̌ ma̤jè̌ he tô̤̌ mî̌, he sikè htohǒ.

¹⁸ Ǒ Cǒmara tûjû̌pwa̤, bǎ he hî̌ kû̌, “He glè̌ si hǒ” akhanu, na ta̤mô̤ dǒ ahǎbòjò tô̤̌nu a ma̤jè̌ he hǒ.

¹⁹ Bǎ he bǎgû̌bǎgè̌ jî̌jû̌ akhanu, na ma̤mô̤ hesǎphlǒ, na ma̤sǎlě̤sǎlò̤ he.

²⁰ Pwa̤ pǒ ta̤ dǒ aphû̌mò̤̌ tokhlǒnu, a htûjò na sû̌khô tô̤̌. Asî htû̌tèplè̌ noǎtô noǎbǎ gû̌ kòyò ta̤sû̌ta̤tòwò tô̤̌.

²¹ Asî glè̌ ma̤si kòyòcǒkòyòtè̤ tokhlǒ. Asî cî̌htò̌si kòyò dǒ ata̤sǔ ô̌tô̤̌ nutokhlǒ.

²² Bǎbǎkǎlè Cǒmara tûjû̌pwa̤ mî̌ he wî̤̌we̤dû̌ dǒ atònò. He Cǒmara mî̌ a htû lǒ̤dû̌ dǒ he lǎ̤ô̌tûdû.

²³ Cǒmara ma̤ geshî̌shu kòyòphû̌mò̤̌ nutokhlǒ pô̤̌ asî ta̤sǔ ô̌nu pě. Dǒ asî ta̤sǔ akhû̌akhî Cǒmara gǔ ma̤si kèbò asî pě. Cǒmara tûjû̌pwa̤, pa Cǒmara ma̤hǎmǎ kèbò asî pě.