Htû̌sò̌htò̌ 92 - Kawyaw New Testament

Ta̤htû̌sò̌htò̌ lî̤sǎwǐ

Sǎwǐ ta̤sǎwǐ nutôshǒ bǎ lṳmṳ̌dǔ akhanu

¹ Hî̌bwǐhî̌sîrî htò̌ Cǒmara tûjû̌pwa̤, sǎwǐ htû̌sò̌htò̌ Cǒmara dǒ adû̌ahtûlǒ kòyò numî̌ awô̌ mî̌ca.

² Lṳmṳ̌lî dě pweǐlṳ̌ nata̤mô̤ dǒ ahǎbòjò tô̤̌. Lṳmṳ̌hǎ dě shôbǐǐlṳ̌ nata̤cǒkû̌yô̤̌ numî̌ awô̌ mî̌ca.

³ Sǎwǐhtû̌sò̌htò̌ a kû̌ ta̤dǒta̤ǔ dǒ apliô̌ abôshǐ, tǐtutegwe dǒ apwe̤nǐ̤wô̌꤮ numî̌ awô̌ mî̌ca.

⁴ Ǒ꤮ Cǒmara tûjû̌pwa̤, na ma̤ sǎlě̤sǎlò̤ he kû̌ nata̤ma̤. Nacǔde ata̤ma̤ tokhlǒ akhû̌akhî, he sǎlě̤sǎlò̤ sǎwǐ htû̌sò̌htò̌ na.

⁵ Ǒ Cǒmara tûjû̌pwa̤, nata̤ma̤ tokhlǒnu adû̌ahtû mî̌ca. Nata̤gènè tokhlǒ numî̌ acǒayô̤̌ lele.

⁶ Ta̤dǒ kòyò giti̤ tokhlǒ sî̌ganǎ̤ kû̌ kòtô̤̌, Kòyò ǒò̌phuhtò tokhlǒ bè̌yòjò kû̌kò tô̤̌ numî̌,

⁷ Amè̤̌kû̌ kòyòkhu phû̌mò̤̌ tokhlǒ dô̌htò̌ asô̌sô̌kû̌ mi̤mṳ̌, Lǒ̤bò kòjî̌kòjû̌ tokhlǒ phuhtò asô̌sô̌kû̌ ta̤phô tokhlǒ bǎbǎkǎlè, Cǒmara glè̌ ma̤pî̌kèbò asî tûjû̌pwa̤ pě nuhǒ.

⁸ Ǒ Cǒmara tûjû̌pwa̤, na khû̌dayadě, kòyò bè̌dû̌bè̌htû pû na tûjû̌pwa̤ nî̌.

⁹ Ǒ Cǒmara tûjû̌pwa̤, kè̌mò̌ pwa̤sǎkhě na nutokhlǒ. Asî pè̤̌kè mè̤̌mî̌ca hǒ. Lǒ̤bò pwa̤ ma̤ ta̤phû̌mò̤̌shǐhtô tokhlǒnu, a lûcû̌peshebò hǒhǒ.

¹⁰ Na bè̌shû̌ ǐshohtò̌ he sô̌sô̌kû̌ pṳ̂̌mi̤. Na plṳ̌ he kû̌ htǒshi cè̌.

¹¹ He kè̌shǐ kû̌ pwa̤sǎkhě he tokhlǒ lò̤jû̌bò kè. He ganǎ̤de kòyòphû̌mò̤̌ dǒ a hèshě he tokhlǒ a yî̤̌kǒ kû̌ a lò̤jû̌hǒ.

¹² Bǎbǎkǎlè kòyòcǒkòyòtè̤ tokhlǒ gǔ dû̌htò̌ sô̌sô̌kû̌ sǒmṳ̌ dǒ a sǎhtò̌phôhtò̌ wô̌ nupě. A dû̌htò̌ asô̌sô̌cǎkû̌ sǒmṳ̌dû̌tònò dǒ Lebanû khôlôlô̤ nupě.

¹³ Kòyò cû̌shǒô̌ asî dǒ Cǒmara tûjû̌pwa̤ ahǐwe̤kû. Asî gǔ mṳ̌wî̤mṳ̌wô̌ a mṳ̌dû̌mṳ̌htû bǎ Cǒmara we̤kû.

¹⁴ Asî mǒ̤pwǎ̤hǒ bǎbǎkǎlè a sǎhtò̌phôhtò̌bò̌ pe. Asî gǔ a mṳ̌dû̌mṳ̌tònò sǒsǎ dô̌jǎ pe.

¹⁵ Asî gǔ hî̌lṳ̌htò̌ kû̌ Cǒmara tûjû̌pwa̤ mî̌ acǒatè̤. A mî̌ he lǒ̤dû̌, a ma̤tô̤ma̤bǎ lǒ̤bò.