Htû̌sò̌htò̌ 90 - Kawyaw New Testament

Lî̤htû̌sû̌htò̌ lî̤̌bǎ tôbǎ Cǒmara dǒ ahtûpwa̤ tûjû̌pwa̤ kû̌ kòyò hǎkhû̌phû̌ dǒ ahtûpwa̤ tashò̌phû̌nô̤̌ awe̤akè

Cǒmaradû̌ akòyò Phamṳ̂shě ata̤kwicaba

¹ Ǒ Běcǎdû̌, na htû pa lǎ̤ô̌tûdû gûlǎ̤ pṳ̂̌꤮ tôhtu hǒ.

² Dǒ khôlô sîtokhlǒ ô̌htûhtò̌ khôtô̤̌, na bô̌lò̤ hǎkhû̌ khôtô̤̌ akhanu, Na mî̌ Cǒmaradû̌ dǒ a ô̌ hto tûjû̌pwa̤hǒ, a ô̌ pô̤̌ tûjû̌pwa̤ pě.

³ Na no htûhtò̌ getîkhî sô̌ kòyò hǎkhû̌phû̌ kû̌ hǎkumṳ̌. Na hî̌ kû̌, “Kòyò sijò sî, ge tîkhîsô̌ dǒ hǎkumṳ̌nu.”

⁴ Dǒ nayanu, aně tôrǐ mî̌ asô̌sô̌pwǎ kû̌ pyǎnô̤̌ dǒ a cû̌ tûlû̌phwèkènu hǒ. Asô̌sô̌pwǎ kû̌ tôkû̌na̤ tashò̌phû̌nô̤̌ pwǎ.

⁵ Na no si sumṳ̌ kòyò hǎkhû̌phû̌ sô̌sô̌kû̌ hǎmimò̤̌nu. Asî sô̌sô̌pwǎkû̌ ta̤phô dǒ aphôhtò̌ lṳmṳ̌wô̤, anôkè lṳmṳ̌htǔ.

⁶ Lṳmṳwô̤ dě phôhtò̌wî̤wô̌, lṳmṳ̌hǎ dě anôkhwesi.

⁷ Dǒ na ta̤sǎphlǒdû̌ akhû̌akhî, pa tǒ̤bòkè dǒ ta̤pî̌ta̤lṳ̂̌. Dǒ na sǎphlǒdû̌ akhû̌akhî, pa gònò̤̌gòglè ǐsha lǒ̤bò.

⁸ Na kè̌shǐ tǒ̤ ta̤sǔta̤plě dǒ pa cû̌ma̤sǔma̤plě numî̌ mè̤̌tô̤̌. Na kè̌shǐ tû̌ ta̤sǔta̤plě dǒ pa ma̤hǔma̤sè̌ ǐtû̌nu.

⁹ Na sǎphlǒdû̌ pa akhû̌akhî, lǒ̤bò paněpala tokhlǒ aphǔtǔkè. Paněpala tokhlǒnu, a hǎbòphwè asô̌sô̌kû̌ sǎbò̌htò̌ tôhu.

¹⁰ Paněpala mî̌ ahtû gutṳ̌pwǎ susô̌ tôshi. Pa kè̌ shû̌shokhò̌sho mî̌ paněpala mǒ̤ni̤ htûtǒ̤ ashilǐ̤shi. Bǎbǎkǎlè alǒbe còcè̌ pwǎ kû̌ ta̤bǎgû̌bǎgè̌, ta̤jî̌ta̤jû̌. Yî̤khôtô̤̌ paněpala mǒ̤ni̤ phǔkè dě pasipahǎmǎ̤ kèbò.

¹¹ Mò̌pè tôpwa̤ sî̌ganǎ̤ lǒbebò̌ nata̤sǎphlǒdû̌ asîrîshû̌sho nuya? Na sǎphlǒdû̌ mî̌canu a htûhtò̌bò kòyò lǎ̤ǐsha bè̌dubè̌nǎ̤ na.

¹² Pô̤̌khô pa gǔ sî̌ganǎ̤ ǐtû̌ paněpala phǔtǔlò̤ pwǐ tè ayanu, sû̌ǐtòwòǐ pa. Tǒ̤꤮ dě pa nǐ̤bǎ ta̤sî̌ta̤jò̌ dǒ pasǎphlǒkû.

¹³ Ǒ Cǒmara tûjû̌pwa̤, htû̌ti̤wǐ̤ gtô sô̌ mò̌ pa. Pa bǎ khòjî̌khòjû̌ yî̤ pô̤̌ pe pwǐ tè? Sǎyṳ gwèbǎǐ tû̌ napwa̤ma̤ta̤phû̌nu tokhlǒ tô̤̌ya.

¹⁴ Pô̤̌khô pa gǔ Sǎwǐhtò̌ kû̌ ta̤sǎlě̤sǎlò̤ ta̤mô̤sû̌mô̤sò̌ pṳ̂̌ tôni̤ ayanu, lṳmṳ̌lîlî꤮ ma̤mô̤ pasǎphlǒ kû̌ nata̤mô̤ dǒ ahǎbòjò tô̤̌nu.

¹⁵ Ma̤ sǎlě̤sǎlò̤ lṳmṳ̌ni̤ lṳmṳ̌sa yî̤ bǎgesô̌ pa pô̤̌꤮ na no khòbǎ pa ta̤jî̌ta̤jû̌, ta̤pò̤̌ta̤sha aněala yî̤nu.

¹⁶ Dǔlṳ̌ bǎ napwa̤ma̤ta̤phû̌ tokhlǒ kû̌ nata̤ma̤ cô̌klǐcô̌sè. Dǔlṳ̌ bǎ nasîrîdû̌sîrîhtû kû̌ asîphû̌asîli̤.

¹⁷ Pa gǔ nǐ̤bǎtû̌ Běcǎdû̌, pa Cǒmara ata̤ma̤mô̤ma̤wô̌ pa. Pa ma̤ titètè̌ bǎbǎ, no htûhtò̌dû̌htò̌ bǎtû̌ pa. Pa ma̤ titètè̌ bǎbǎ, no htûhtò̌dû̌htò̌ mè̤̌caca bǎtû̌ pa nî̌.