Htû̌sò̌htò̌ 87 - Kawyaw New Testament

Wî̤̌yarǔshôle ata̤sîdû̌sîrîhtû

Phakû̌ri akhlialè tokhlǒ ata̤sǎwǐ htû̌sò̌htò̌

¹ Cǒmara tûjû̌pwa̤ bô̌htò̌ awî̤̌ Wî̤̌yarǔshôle dǒ khôlôplò̌shǐ akhû̌.

² Cǒmara tûjû̌pwa̤ mô̤ǐ khlo Wî̤̌sǐûnu kû̌ a mô̤ǐ wî̤̌ dǒ ashǔshawa̤ bǎ Isôrě̤lagǎkû nutokhlǒ.

³ Ǒ Wî̤̌yarǔshale amè̤̌kû̌ Cǒmaradû̌ awî̤̌, kòyò hî̌ǐ nawe̤nakè dǒ awô̌ cô̌klǐcô̌sè tokhlǒ.

⁴ Cǒmara tûjû̌pwa̤ hî̌ kû̌, “Bǎ he wě̤mǎnǎ shigǎ dǒ a jûlě̤phǐ heyô̤̌ nutokhlǒ akha pěnu, he gǔ bè̌nṳ̌ Ijǐgǎ kû̌ Babǔlûgǎ pě. “Phǐlǐtǐgǎphû̌ tokhlǒ bǎbǎ, Wî̤̌htuyǔphû̌ tokhlǒ bǎbǎ, Kǔshǎgǎphû̌ tokhlǒ bǎbǎ, he gǔ bè̌nṳ̌bò asî bǎ Wî̤̌ya̤rǔshalephû̌ nutokhlǒ akla pě.”

⁵ Kòyò gǔ hî̌ Wî̤̌yarǔshale awe̤akè kû̌, “Khlilèphû̌ lǒ̤꤮ bònu a ô̌phijǎlò̤ lô̌khô bǎ wî̤̌nu tôwî̤̌ akû. “Cǒmara dǒ adû̌ahtûlǒ nutôpwa̤ gǔ shǒǐ tònòwô̌ wî̤̌nu tôwî̤̌ kû̌ anǎ̤ sanǎ̤ pě.”

⁶ Cǒmara tûjû̌pwa̤ wě̤mǎnǎ khlilèphû̌ hǒtokhlǒ dě a hî̌ kû̌, “Asî mî̌ a htûhtò̌bò Wî̤̌yarǔshalephû̌ hǒ.”

⁷ Pwa̤sǎwǐ kû̌ pwa̤kalî̌, sǎwǐ lô̌khô kû̌, “Pa ta̤ǐshôwî̤shôwô̌ akòshî̌kòtṳ̌ lǒ̤bò mî̌ a ô̌ dǒ Wî̤̌yarǔshale ahè pwǎ.”