Bìoball air-loidhne

Htû̌sò̌htò̌ 85 - Kawyaw New Testament

Ta̤kwicaba dǒ shiphû̌gǎphû̌ ô̌shû̌ô̌mô̤ aya
Phakû̌ri akhlialè tokhlǒ ata̤sǎwǐ. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya.

¹ Ǒ꤮ Cǒmara tûjû̌pwa̤, na kè̌dû̌ ǐ tûû̌ nashinagǎ. Na ǐ ǎbǎôbǎ Isôrě̤la khlilèphû̌.

² Na plûkèbò na kòyò tokhlǒ ata̤ma̤sǔma̤plě. Na phǐtephekè bò asî ta̤sǔta̤plě.

³ Na sǎphlǒdû̌ hǎmǎkè lǒ̤bò hǒ. Na ta̤sǎphlǒdû̌ li̤pisǐ꤮ nî̌, tôplǎnô̤̌ a gûjû̌ gelò̤ bò.

⁴ Ǒ Cǒmaradû̌ dǒ a ma̤hǎplǎge pa, dǐ ǎbǎôbǎ sô̌ pa. Sǎphlǒdû̌ tǎ̤ pa mǎ̤.

⁵ Na glè̌ sǎphlǒdû̌ pa tûjû̌pwa̤ pe ya? Na glè̌ sǎphlǒdû̌ sělě pô̤̌ pa tôhtu hto tôhtu pěya?

⁶ Pô̤̌khô na kòyò tokhlǒ gǔ sǎlě̤sǎlò̤ dǒ na ma̤htûbǎ pa nutokhlǒ ayanu, ǐshû̌htò̌shohtò̌ sô̌ pa.

⁷ Ǒ꤮ Cǒmara tûjû̌pwa̤, bè̌lṳ̌mò̌ pa kû̌ nata̤mô̤ dǒ a bòpe jòtô̤̌ hǒo. Ma̤hǎplǎkèmò̌ pa.

⁸ Běcǎ Cǒmara tûjû̌pwa̤ hî̌ hî̌tènu, he ganǎ̤de. Ma̤titèhî̌dě a olò̤ kû̌ a gǔ ǐ a kòyò dǒ acǒ kû̌ yô̤̌ tokhlǒ ata̤ô̌gûjû̌kabǎ. Bǎbǎkǎlè no ma̤bǐma̤ô̌ sô̌ tǎ̤ asî mǎ̤.

⁹ Pô̤̌khô kòyò glè̌ kè̌shǐ Cǒmaradû̌ asîrîpô̤phǎ dǒ pagǎkû ayanu, kòyò dǒ a ǐsha bè̌dubè̌nǎ̤ lû̌û tokhlǒ nǐ̤bǎ mè̤̌caca Cǒmara ata̤ma̤hǎplǎge pě.

¹⁰ Ta̤mô̤ kû̌ ta̤cǒ kû̌ yô̤̌ kè̌shǐshěshu lû̌û hǒ. Ta̤cǒta̤tè̤ kû̌ ta̤ô̌gûjû̌kabǎ gômô̤ kè̌khî lû̌û.

¹¹ Hǎkhû̌phû̌ ata̤cǒ kû̌ yô̤̌ ô̌ lṳ̌htò̌ dǒ hǎkhû̌. Cǒmara ata̤cǒta̤tè̤ ô̌ dǒ mǒkhû̌ kè̌lò̤ pě.

¹² Cǒmara tûjû̌pwa̤ gǔ glǒlò̤lò̌lò̤ mè̤̌caca ata̤ǐshôwî̤ pě. Sǒmṳ̌wû̌bô sǎhtò̌phôhtò̌ pô̤̌ dǒ pa gǎkû.

¹³ Ta̤cǒta̤tè̤ cû̌wǐ dǒ Cǒmara tûjû̌pwa̤ alô̤mô̤̌ pô̤̌ pwa̤sû ta̤we̤ta̤kè tôpwa̤nu pě. A gǔ tîwî̌tòwò nǎwǐ bǎ aklè̌lǎ̤hè aya pě.

« Roimhe

Air adhart »

Wycliffe USA

The Seed Company

Lean sinn:

Ceanglaichean taic

Sanasan