Htû̌sò̌htò̌ 84 - Kawyaw New Testament

Sǎyṳ cubucaba dǒ Cǒmara ata̤lṳhtò̌hôkû

Phakû̌ri akhlialè tokhlǒ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě tôbǎ sǎwǐ wô̤̌wô̤̌ kû̌ pwa̤dǒ ta̤dǒta̤ǔ amè̤kû̌ ta̤dǒta̤ǔ dǒ apli̤ô̌ nutokhlǒ.

¹ Ǒ꤮ Cǒmara tûjû̌pwa̤ dǒ a pǒ ta̤ lǒ̤꤮ bò, ta̤lṳhtò̌hô dǒ na ô̌ nu awî̤tè̤̌sǐ gutṳ̌.

² He sǎlě̤ cubucaba mî̌ca dǒ Cǒmara tûjû̌pwa̤ lǎ̤ô̌gûlǎ̤ akûnu, he sǎphlǒshû̌ mè̤mè̤̌. Henǎ̤ tôpwa̤bò kû̌ he sǎphlǒ tômèbò glè̌ sǎlě̤sǎlò̤ sǎwǐhtò̌ Cǒmaradû̌ dǒ ahtûpwa̤ nutôpwa̤.

³ Ǒ Cǒmara tûjû̌pwa̤ dǒ a pǒ ta̤ lǒ̤bò, he khwǐ, he Cǒmaradû̌, htû̌pwǐphû̌ tokhlǒ dě a kè̌lǎ ô̌ agûlǎ̤. Htû̌lǐ̤ tokhlǒ dě a ma̤ǐ api̤ dǒ aphû̌ tokhlǒ aya bǎ na ta̤lṳhtò̌wǎ̤ tokhlǒ akòshî̌.

⁴ Kòyò ô̌ dǒ na ta̤lṳhtò̌hôkû tokhlǒnu, a nǐ̤bǎ ta̤ǐshôwî̤. Asî sǎwǐ htûsò̌htò̌ na pṳ̂̌꤮ tôplǎ.

⁵ Kòyò dǒ aphǐkhû̌phǐǎ dǒ naô̌ tokhlǒnu na ǐshôwî̤ asî. Asî sǎphlǒshû̌ hǎhtò̌cû̌ htò̌ cubucaba na dǒ Sǐû khôlôkhû̌.

⁶ Bǎ asî cû̌nṳ̌ bǎ Bakha lô̤̌te̤khwekû akhanu, shipǒ̤htò̌bò dǒ hǎlǎ̤. Bǎ gǎjugǎcî̌ sakhû̌lû̌ akhanu, a julò̤be bò lô̤̌te̤kû, shikoǒphû̌ tokhlǒ ô̌htò̌.

⁷ Bǎ asî cû̌ akhanu, sǔ sǔ asî khû̌ǎ shû̌htò̌. Asî pṳ̂̌꤮ tôpwa̤ hèdǔlṳ̌ bò anǎ̤ bǎ Cǒmaradû̌ dǒ a pǒǐ lǒ̤꤮ bò Cǒmara dǒ ashǐshawa̤ tokhlǒ nutôpwa̤ alô̤mô̤̌, bǎ Sǐû khôlôkhû̌nu.

⁸ Ǒ Běcǎ Cǒmara tûjû̌pwa̤ dǒ a pǒ ta̤ lǒ̤꤮ bò, ganǎ̤de he ta̤kwicabanu nî̌. Ǒ꤮ Phayakò a Cǒmaradû̌, ganǎ̤de mò̌ nî̌꤮.

⁹ Ǒ꤮ Cǒmaradû̌, kè̌dû̌ mò̌ na khwǐ amè̤̌kû̌ pwa̤takabǐ pa sô̌sô̌kû̌ ta̤takanu. Kè̌dû̌ mò̌ kòyò dǒ na rû̌htò̌ lû̌û nutôpwa̤ nî̌꤮.

¹⁰ Ô̌ dǒ na ta̤lṳ̌htò̌hôkû tôni̤nu awô̌khlo pe kû̌ ô̌ dǒ ashǔshawa̤ ani̤ tôrǐ. He htû pwǎ pwa̤ô̌pǒ̤ bǎ Cǒmaradû̌ ahǐ takhakûnu, amô̤ khlope kû̌ he ô̌ dǒ kòyòphû̌mò̤̌ ahǐdǒkû.

¹¹ Běcǎ Cǒmara tûjû̌pwa̤ mî̌ asô̌sô̌kû̌ lṳmṳ̌, pwa̤takabǐ pa. Cǒmara tûjû̌pwa̤ gwèbǎǐ pa, a bè̌dû̌bè̌htûǐ pa. Kòyò dǒ a ma̤tôma̤bǎ ta̤ tokhlǒnu, Cǒmaradû̌ sǎphlǒô̌ ǐ asî ta̤twèta̤wô̌.

¹² Ǒ Cǒmara tûjû̌pwa̤ dǒ a pǒ ta̤ lǒ̤꤮ bò, lǒ̤bò꤮ kòyò dǒ a yṳ̌ǎnṳ̌ na tokhlǒnu a nǐ̤bǎ ta̤ǐshôwî̤.