Htû̌sò̌htò̌ 83 - Kawyaw New Testament

Ta̤kwicaba dǒ pwa̤sǎkhě Isôrělaphû̌ tokhlǒ glè̌ lò̤jû̌ kè aya

Pha Asa ata̤sǎwǐ htû̌sò̌htò̌

¹ Ǒ Cǒmaradû̌, ô̌ sǔtukǔ tǎ̤mǎ̤, jî̌koo tǎ̤mǎ̤. Ǒ Cǒmaradû̌, sǔsǔ꤮ ô̌ tǎ̤mǎ̤ nî̌꤮.

² Kè̌mò̌, pwa̤sǎkhě na tokhlǒ ma̤ pi̤ti̤pṳ̂tṳ̂ bò hǒ. Kòyò dǒ a sǎkhěkhû̌khwè na nutokhlǒ a shěshǔ lô̌khô na hǒ.

³ Asî tîwî̌tòwò hǔsè̌ ta̤ dǒ a glè̌ hèshě lô̌khô na kòyò tokhlǒ. Asî gènè̤kě ma̤phǔmò̤̌ lô̌khô kòyò dǒ na tugǔtaka ǐ nutokhlǒ.

⁴ Asî hî̌ lô̌khô kû̌, “Cû̌꤮, pô̤̌khô kòyò glè̌ shôpe̤ kèbò Isôrěla khlilè tajû̌꤮ pwa̤, pa cû̌ma̤pî̌ma̤lṳ̂̌ bò asî khlilèphû̌ tǎ꤮.”

⁵ Asî sǎphlǒjû wô̤̌wô̤̌ lû̌ dǒ asî ta̤gènè̤hǔ gènè̤sè̌nu akû. Asî sǎphlǒ tô wô̤̌wô̤̌ lû̌û dǒ a glè̌ shěpě̤ shěshu lô̌khô na.

⁶ A ô̌pe kwè̌ khlilè titè hî̌dě, Ědûgǎphû̌ kû̌ Ǐshômelǎ khlilè, Mò̤bǎgǎphû̌, Haka khlilèphû̌,

⁷ Kebalǎgǎphû̌, Amṳ̂gǎphû̌, Amalè̌ khlilèphû̌, Phǐlǐsitǐgǎphû̌, Wî̤̌htutǔphû̌ sîtokhlǒ hǒ.

⁸ Ashǔrǎgǎphû̌ tokhlǒ mî̌ asǎphlǒ jû kû̌ asîsî. Asî ma̤jè̌ padô̌ Phalòtǎ akhlialè amè̤̌kû̌ Amṳ̂phû̌ kû̌ Mò̤̌bǎphû̌ sîtokhlǒ.

⁹ Ma̤mò̌ asî pô̤̌ na ma̤ Mǐdiya khlilèphû̌, Khwǐsǐsèrǎ kû̌ Khwǐcabi dǒ Bǐshû shilô̤̌mǒ̤htunu.

¹⁰ Asî si kèbò dǒ Wî̤̌edò̌rǎ nutôkû, asî nǎ̤glǒ tokhlǒnu, asoalǒ kèbò bǎ hǎkhû̌nu.

¹¹ Ma̤mò̌ asî ikǒlǒkò tokhlǒ pô̤̌ na ma̤ Khwǐûrǐbǎ kû̌ Khwǐsebǎnu. Ma̤ bò mò̌ asîkhwǐ aphû̌pwa̤khû tokhlǒ pô̤̌ na ma̤ Khwǐseba kû̌ Khwǐsalamǔnanu.

¹² Pwa̤sǎkhě nutokhlǒ hî̌ lô̌khô kû̌, “Cǒmaradû̌ agǎ tokhlǒnu pa phî̌ kû̌ paya tǎ.”

¹³ Ǒ꤮ Cǒmaradû̌, no lûcû̌ kèbò asî pô̤̌ gili̤piwi̤ sǎcû̌kè hǎkumṳ̌nu. No lûcû̌ kèbò asî pô̤̌ gili̤sǎ sacû̌kè phîmṳ̂̌.

¹⁴ Gû̌lṳ̂ pṳ̂̌ mò̌ asî pô̤̌ mî̌ lěu gǎpwǎ̤gono̤, pô̤̌khô mî̌ lěucû̌ khôlô sînu.

¹⁵ Gû̌lṳ̂ pṳ̂̌ mò̌ asî kû̌ na gili̤sǎdû̌. Ma̤gònò̤̌gèglè ǐsha mò̌ asî kû̌ na gili̤piwi̤dû̌.

¹⁶ Ǒ꤮ Cǒmara tûjû̌pwa̤, pô̤̌khô asî glè̌ kè̌lǎ htû̌tiwǐ ge tîkhîsô̌ na ayanu, ma̤sòwò̤̌ sikè mò̌ asî.

¹⁷ No ǐsha sòwò̤̌kè asî tûjû̌pwa̤. No si sòwò̤̌kè asî.

¹⁸ Na ma̤ pô̤̌nutô̤̌ mî̌ asî glè̌ sî̌ganǎ̤hè kû̌ na mî̌ Cǒmara tûjû̌pwa̤. Asî glè̌ sî̌ganǎ̤bò kû̌ tǒ̤꤮ pwǎ na mî̌ Cǒmara dǒ adû̌ahtûlǒ dǒ a pǒǐ hǎkhû̌běkhû̌nu.