Htû̌sò̌htò̌ 82 - Kawyaw New Testament

Cǒmara mî̌ pwa̤pǒta̤ dǒ adû̌lǒkhlo kò

Pha Asa ata̤sǎwǐ htû̌sò̌htò̌

¹ Cǒmaradû̌ ihtǒphǐnṳ̌ gûlǎ̤ bǎ mǒkhû̌ ata̤ô̌cuô̌plǒdû̌nu. A cî̌htò̌ kòyò mṳ̌plô̤̌ ashǔshawa̤ Cǒmara tokhlǒ.

² A tṳ̂mṳ̂̌ta̤ma̤ asî kû̌, “Sî glè̌ onǐ̤ yî̤ pô̤̌ kòyò sǎphlǒ phû̌mò̌shǐhtô nutokhlǒ tǒ̤꤮ bǎkhòtè pěya? “Sî glè̌ kè̌dû̌ yî̤ pô̤̌ asî tǒ̤꤮ bǎkhòtè pěya?

³ “Ma̤tôma̤bǎ bǎ kòyò hǎwě̤shèwè̤ kû̌ phû̌ dǒ shôdôpha tokhlǒ. “Takaǐ kòyò dǒ kò pè̤̌ǎpè̤̌ô lû̌û nutokhlǒ kû̌ a khòbǎ ta̤jî̌ta̤jû̌ tokhlǒ.

⁴ “Ma̤hǎplǎge kòyò shuphǔshèwè̤ sî, kòyò shôdô pwa̤ma̤jè̌ sî dǒ kòyò sǎphlǒ phû̌mò̌shǐhtô sî acǔdekû.

⁵ “Pwa̤ma̤jî̌ma̤jû̌ kòyò sînu, ata̤sî̌ya ô̌ kû̌ kòyò tô̤̌, a phlôphǎ gû̌ kòyò ta̤ tô̤̌tô̤̌, a cû̌ge lô̌khô dǒ ta̤khǐsiwi̤ akla. “Ta̤ma̤tôma̤bǎ ô̌pe dǒ hǎkhû̌nu tôkû tô̤̌.

⁶ “He hî̌ kû̌ ‘sî mî̌ Cǒmara tokhlǒ. “‘Sî lǒ̤꤮ bò mî̌ Cǒmara dǒ adû̌ahtûgutṳ̌ aphû̌khû tokhlǒ hǒ.’

⁷ “Bǎbǎkǎlè sî glè̌ si sô̌sô̌kû̌ kòyòhǎkhû̌phû̌. “Sî lṳmṳ̌ni̤ glè̌ hǎlǒ̤kè sô̌sô̌kû̌ pwa̤htû ikǒlǒkò dǒ ashǔshawa̤ tokhlǒ.”

⁸ Ǒ Cǒmaradû̌, ma̤mò̌, cî̌htò̌ mò̌ hǎkhû̌nu. Lǒ̤bò kòyò khlilèphû̌ hǒtokhlǒ mî̌ na kòyò.