Htû̌sò̌htò̌ 77 - Kawyaw New Testament

Cǒmara ô̌kû̌ a kòyò bǎ asî tṳ̌bǎ ta̤pò̤̌ta̤sha akha

Pha Asa ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dě ata̤lṳhtò̌hôkû nutôpwa̤ aya. Dě ta̤sǎwǐ htû̌sò̌htò̌ nutôshǒ mî̌ Khûjedutǔ dǒ a yṳ̂̌klè̌nè̌klòǐ pwa̤sǎwǐ htû̌sò̌htò̌ ta̤ nutôpwa̤ aya.

¹ He kwi꤮ sǎyṳhtò̌ mî̌ca Cǒmaradû̌ ata̤ma̤jè̌. He kwi꤮ cabahtò̌ nò a dǒ a gǔ ganǎ̤de heta̤kwi.

² Bǎ he kè̌shǐ tṳ̌bǎ kû̌ ta̤pò̤̌ta̤sha akhanu, he kè̌lǎ Běcǎdû̌. He yò̤̌htò̌ hecǔde, he kwicabahtò̌ na tônǎ̤mǒ̤shě bǎbǎkǎlè agayǎ̤ nô̌ hecǔdetô̤̌. Bǎbǎbǎkǎlè amô̤ tǒ̤꤮ nô̌ hesǎphlǒ tîkî̌꤮ tô̤̌.

³ Bǎ he gènè̤̌htò̌tǒ̤ Cǒmaradû̌ akhanu, he ta̤kookasha. He gènè̤̌꤮ gènè̤ awe̤akè dě he sǎphlǒpî̌ mî̌ca.

⁴ Na nohǎmôô̌nǐ̤ pe he tô̤̌. Agû̌agè̌ tûlû̌shû̌lě he, he hî̌bǎhǎhtò̌bò̌ pe tô̤̌.

⁵ He gènè̤htò̌tǒ̤ lṳmṳ̌ni̤ lṳmṳ̌sa dǒ atûlû̌hto tokhlǒ, he gènè̤tǒ̤bǎ něla dǒ awǐnu tokhlǒ.

⁶ He hî̌lò̤ ǐtû̌ henǎ̤ kû̌, “Lṳmṳ̌khǐkha he gènè̤bǎǐ heta̤sǎwǐ. “He gǔ gènè̤ tě̤tě̤mè̤̌mè̤̌ ǐ lû̌û.

⁷ “Mî̌ Běcǎdû̌ glè̌ wîkèhǒ pa tûjû̌pwa̤ ya? “Mî̌ a dǔlṳ̌ pejò ata̤mô̤ kû̌ pa tôplǎ tô̤̌ya?

⁸ “Ata̤mô̤̌ dǒ ahǎbòjò tô̤̌nu a tě̤tṳ kèhtohǒ tûjû̌pwa̤ ya? “A ta̤olò̤ mî̌ a pî̌gutṳ̌ kalò̤ kètû̌ yahî̌?

⁹ “Cǒmaradû̌ hǒo a tôbǎ gwèbǎǐ kòyò numî̌ a shôpe̤ kèbò hǒ ya? “A sǎphlǒdû̌ talû̌ shû̌lě dě a sǎyṳgwèbǎǐ pe tô̤̌ ya?”

¹⁰ Htodě he hî̌ kû̌, “Cǒmara dǒ adû̌ahtûlǒ kòyò nutôpwa̤ ma̤jè̌ pe he kû̌ acǔde dǒ asîrîshû̌sho tô̤̌ he hî̌nu, a bè̌pò̤̌bè̌sha lǒ he.”

¹¹ He gènè̤̌htò̌tǒ̤ Cǒmara tûjû̌pwa̤ ata̤ma̤ nutokhlǒ. He gǔ gènè̤htò̌bǎ nata̤ma̤ cô̌klǐcô̌sè dǒ awǐnu nutokhlǒ.

¹² Na ma̤ kwè̌ mî̌titènu he gǔ gènè̤ tě̤mè̤̌ lǒ̤bò. He gǔ gènè̤bò nata̤ma̤ dǒ apô̤pwa̤shû̌sho nutokhlǒ.

¹³ Ǒ Cǒmaradû̌, na ma̤ nakòyò tokhlǒ titètè̌ bǎbǎ, awî̤awô̌ lǒ̤bò. Cǒmara dǒ adû̌ sô̌sô̌kû̌ pa Cǒmaranu a ô̌ tôpwa̤ tô̤̌.

¹⁴ Na mî̌ Cǒmara dǒ a ma̤ ta̤cô̌klǐcô̌sè. Na dǔlṳ̌ tû̌ nasîrîshû̌sho dǒ khlilèphû̌ tokhlǒ akla.

¹⁵ Nakòyò dǒ a amè̤̌ Phayakò kû̌ PhaIsè̌ akhlialè sîtokhlǒnu, na ma̤hǎplǎge asî kû̌ nacǔde dǒ a ta̤po̤ta̤phǎ.

¹⁶ Ǒ Cǒmaradû̌, bǎ shi tokhlǒ kè̌shǐ na akhanu, a ǐsha bò nalǎ̤. Shidû̌shite̤we̤ tokhlǒ gònò̤̌ guyṳ̌ lò̤tǒ̤ dǒ akòda.

¹⁷ Gǎjudû̌ shilô̤̌shikho hè. Mǒgǒ dǒ mǒlǎ̤. Shî̌lî̌bǒ pṳ̂̌꤮ tôkû.

¹⁸ Na no shî̌lî̌ mǒgǒmǒyî̌ a pi̤ti̤pètè̌ dǒ phôpi̤wi̤dû̌ kla. Shî̌lî̌bǒ dě a lîtîklî̌bò dǒ hǎkhû̌. Hǎkhû̌ ǐsha gònò̤̌gòglè, guyṳ̌kèsè̌ lǒ̤bò.

¹⁹ Na cû̌phlǔbò̌ shidû̌te̤we̤, na cû̌tûlû̌bò̌ shidû̌shiyô̤̌. Kòyò kè̌shǐ nô̌ nakhǎlǎkha gûlǎ̤ tôpwa̤ tô̤̌.

²⁰ Napǒnasûnṳ̌ nakòyò tokhlǒ asô̌sô̌kû̌ sû̌phû̌sî dǒ Phamṳ̂shě kû̌ Pha Arṳ̂ sûcû̌ǐ asînu hǒ.