Htû̌sò̌htò̌ 76 - Kawyaw New Testament

Cǒmara mî̌ pwa̤ma̤pè̤̌ta̤

Pha Asa ata̤sǎwǐ htû̌sò̌htò̌. Ta̤sǎwǐ numî̌ ta̤ tokhlǒ aikǒlǒkò dě ta̤lṳhtò̌hôkû nutôpwa̤ aya. Bǎ sǎwǐ ta̤sǎwǐ nuakha, bǎ dǒ kû̌ ta̤dǒta̤ǔ dě apli̤ô̌ tokhlǒ.

¹ Kòyò ô̌ dǒ Yǔdagǎkû tokhlǒ sî̌ganǎ̤ lô̌khô Cǒmaradû̌. Isôrělagǎphû̌ tokhlǒ bè̌dubè̌nǎ̤ mî̌ca lû̌mi̤.

² Ahǐ ô̌ dǒ Wî̤̌yarǔshôle. Agûlǎ̤ ô̌ dǒ Sǐû khôlôkhû̌.

³ A yǒgǎkèbò pwa̤sǎkhě tokhlǒ aplǎ̤mî̌u bǎnu tôkû. A dekèbò asîkhada, nò̌shî kû̌ ta̤wè̤̌ta̤htò.

⁴ Ǒ꤮ Cǒmaradû̌, naô̌ dǒ nalǎ̤ma̤pè̤̌ pwa̤sǎkhě na akhôlôkhû̌ dě na hèlò̤nu pa kè̌shǐ kû̌ nata̤sîrîpô̤phǎ, nasîrîdû̌sîrîhtû mî̌ca.

⁵ Asîkliphû̌ dǒ akhuahe tokhlǒ, kòyò phî̌ kèbò asî tě̤ta̤, a sikè bò hǒ. Asî ta̤khû̌ta̤ǎ, ta̤sî̌ta̤jò̌ tokhlǒ noǎ jò pe tôcǒ꤮ tô̤̌.

⁶ Ǒ꤮ Phayakò a Cǒmara, bǎ na sǎhtǎdû̌da akhanu, pwa̤dò̌ tîsî̌ kû̌ atîsî̌ tokhlǒ lò̤khǔpo̤si bò.

⁷ Ǒ Cǒmaradû̌, kòyò bǎ ǐsha pwǎ tǒ̤꤮ na. Bǎ na sǎphlǒdû̌ akhanu, kòyò ihtǒkhòbò̌ dǒ nalô̤mô̤̌ tôpwa̤꤮ tô̤̌.

⁸ Bǎ na ô̌ dǒ mǒkhû̌ hî̌bǎlò̤ kû̌ glè̌ cî̌htò̌ akhanu, kòyò ô̌ dǒ hǎkhû̌ hǒtokhlǒ ǐsha, sǔtukǔ a ô̌ lǒ̤bò.

⁹ Bǎ na sahtò̌ cî̌htò̌ hǒ pô̤̌nu akhanu, na ma̤hǎplǎkè ǐ lǒ̤꤮ bò kòyò dǒ kòyò ma̤jî̌ma̤jû̌ lû̌û bǎ hǎkhû̌ nutokhlǒ.

¹⁰ Na sǎphlǒdû̌ kòyòhǎkhû̌phû̌ hǒtokhlǒnu, a ma̤htûhtò̌ wô̌ bǎ pô̤̌ kòyò lǎ̤htû̌sò̌htò̌. Kòyò dǒ a ô̌htûpwa̤ lû̌kè dǒ ta̤shěta̤pě̤ akû nutokhlǒ gǔ cubǔcabǎhtò̌ na dǒ napwèdû̌pwèhtû pě.

¹¹ Olò̤ nayô̤̌ tokhlǒ kû̌ Cǒmara tûjû̌pwa̤, na Cǒmaradû̌nu dě ma̤lǒma̤be a. Lǒ̤bò kòyò ô̌ te̤we̤bò lǒ̤bò kû̌ lû̌û nutokhlǒ no phî̌hè lǒ̤bò asî sû dǒ Cǒmara a ô̌, Cǒmara dǒ kòyò tôbǎ sǎǐsha mî̌ tǒ̤꤮ pwǎ a.

¹² Cǒmara shò̌lò̤kèbò khwǐ kû̌ khwǐphû̌ tokhlǒ ata̤phǐdû̌phǐhtò̌yô̤̌ anǎ̤. Khwǐ bǎ hǎkhû̌ nutokhlǒ ǐshabò lû̌lǎ̤.