Htû̌sò̌htò̌ 74 - Kawyaw New Testament

Ta̤kwicaba dǒ pakhlilèphû̌ gǔ hǎplǎ aya

Hǒomî̌ Pha Asa ata̤sǎwǐ dě dǒ Hebrǔyô̤̌nu, a kaǎ ta̤sǎwǐnu kû̌ Masakǐla ta̤sǎwǐ dě ta̤sǎwǐ hǒtôshǒ mî̌ a ǐ kòyò ta̤sî̌ya.

¹ Ǒ Cǒmaradû̌, na cû̌ wîkè pa tûjû̌pwa̤ ma̤titè? Na cû̌ sǎphlǒdû̌ li̤pi̤sǐ nasû̌phû̌ saprṳ̂ dǒ na kè̌ nǐ̤ nutokhlǒ mî̌ a ma̤titè?

² Gènè̤htò̌bǎǐ nakòyò dǒ na rû̌htò̌ge asî dǒwǐkha kû̌ nakhlilè dǒ na pwe̤ge asî dǒ a glè̌ htûhtò̌bò nakòyò nu. Kǎtô̤̌ gènè̤htò̌bǎǐ pô̤̌ Wî̤̌yarǔshale ô̌ dǒ Sǐû khôlôkhû̌ dǒ na dǐ ô̌ a nutôkû.

³ Hèkè̌mò̌ kòyò ma̤lò̤tě̤pro̤ pî̌kèbò hǒo. Pwa̤sǎkhě pa tokhlǒ ma̤pî̌ma̤lṳ̂̌ bò ta̤ ô̌ dǒ ta̤plò̌shǐ gûlǎ̤ akû nutokhlǒ hǒ.

⁴ Pwa̤sǎkhě na tokhlǒ ma̤pè̤̌ ta̤ dě yî̤̌kǒyî̤̌sa dǒ na ta̤lṳhtò̌hôkû hǒ. Asî bô̌htò̌ akhû̌pa̤la̤ bǎnu pô̤̌ ta̤ma̤pè̤̌ ta̤mǎnǎ tôcǒ.

Ta̤kwicaba dǒ khlilèphû̌ ta̤ma̤hǎplǎge aya

⁵ Asî hèlò̤ delò̤tě̤pro̤lò̤tě̤pò̌ bò ta̤phû̌ta̤li̤ asô̌sô̌kû̌ kòyò gû̌ sǒ dǒ mi̤kla.

⁶ Sǒbě dǒ kòyò htǎwî̤ ǐlû̌û tokhlǒnu, asî po̤lò̤tě̤pò̌ kèbò akû kû̌ akhǐpo̤.

⁷ Asî shû̌gè̌kèbò na ta̤plò̌shǐ agûlǎ̤. Asî ma̤bǐma̤ô̌ phû̌mò̌shǐhtô bòkè na lǎ̤ô̌ gûlǎ̤.

⁸ Asî hî̌ kû̌, “Pa ma̤pî̌ kèbò asî pṳ̂̌tôpwa̤ tǎ.” Asî shû̌gè̌kèbò gûlǎ̤ dǒ kòyò lǎ̤cubucabahtò̌ Cǒmara nutokhlǒ.

⁹ Pa kè̌shǐ na ta̤ma̤cô̌klǐkǐya tôcǒ tô̤̌. Piwi̤pèsè ô̌ pe tôpwa̤ tô̤̌tô̤̌. Ashěakhǎ yî̤ pwǐtè pěnu kòyò sî̌ganǎ̤ tôpwǎ̤ tô̤̌tô̤̌.

¹⁰ Ǒ Cǒmaradû̌, pwa̤sǎkhě na tokhlǒ glè̌ sǎyî̤̌ lò̤wě̤lò̤sô na pwǐtè pě? A glè̌ pî̤jî̌ǐsho nami̤ tûjû̌pwa̤ pě ya?

¹¹ Na cû̌dò̌tûklû̌ ma̤titè? Hèma̤jè̌ mò̌ pa, ma̤pî̌ma̤lṳ̂̌ bòmò̌ asî.

¹² Ǒ Cǒmaradû̌, he sî̌yahto kû̌ na mî̌ pa khwǐ dǒwǐkha pe. Na ma̤hǎplǎ taga pa dǒ pa gǎkûnu.

¹³ Na ma̤ yòkè shidû̌shite̤we̤ kû̌ na ta̤sîrîpô̤phǎ. Na po̤phò̌kè wṳ̂̌dû̌ ô̌ dǒ shidû̌shitewe̤kû nutôbô a ikǒ tokhlǒ.

¹⁴ Na demǔdeprû̌ ta̤phû̌ta̤wè̤ ô̌ dǒ shikû dǒ kòyò kaǎ lû̌û kû̌ Laweta hǒtôdo a ikǒ tokhlǒ. Na dǐǎ lû̌û kû̌ ta̤mi̤ta̤mò̤̌ ô̌ dǒ gǎshashigǎ.

¹⁵ Na no hèlò̤ shipǒ̤hǎhtò̌ tokhlǒ, na no lô̤̌lò̤ shilô̤̌ tokhlǒ. Na no sǔtèkhwè̌꤮ kè shilô̤̌mǒ̤ tokhlǒ.

¹⁶ Na no htûhtò̌ lṳmṳ̌khǐ kû̌ lṳmṳ̌sha. Na tèlò̤ lṳmṳ̌ kû̌ la dǒ agûlǎ̤ kû̌ agûlǎ̤.

¹⁷ Dǒ hǎkhû̌nu na bè̌tôbè̌bǎ bò ta̤pṳ̂̌tôcǒ agûlǎ̤ kû̌ agûlǎ̤. Na nohtûhtò̌ gǎgû̌kha kû̌ gǎwô̤̌kha.

¹⁸ Ǒ Cǒmara tûjû̌pwa̤, pwa̤sǎkhě na hǒtokhlǒ sǎyî̤̌ bò na pwǐtènu, gènè̤̌htò̌bǎ pě nî̌. Kòyò ǒò̌ pî̤jî̌ǐsho bò nami̤ pwǐtènu, gènè̤̌htò̌bǎ tûû̌.

¹⁹ Ǐ kè tǎ̤ htû̌lǐ̤ amè̤̌kû̌ na kòyò tokhlǒ ta̤ô̌htûpwa̤ kû̌ ta̤mi̤ta̤mò̤̌ mǎ̤. Shôpe̤shônǎ tǎ̤ na kòyò dǒ a khòbǎ ta̤shuphǔshèwè̤ nutokhlǒ ta̤ô̌htûpwa̤ tîkî̌ mǎ̤.

²⁰ Hǎkhû̌ dǒ akhǐalo̤ gûlǎ̤ nutokhlǒ, a ô̌lǒô̌be bò kû̌ ta̤ma̤numa̤cî̌ akhû̌akhî, gènè̤htò̌ǐ na ta̤olò̤.

²¹ No htûhtò̌ tǎ̤ ta̤shòwò̤̌ dǒ kòyò ma̤jî̌ma̤jû̌ lû̌û nutokhlǒ ayamǎ̤. No htû̌sò̌htò̌ nami̤ kû̌ kòyò dǒ kò pè̤̌ǎpè̤̌ô lû̌û, kòyò shôdô pwa̤ma̤jè̌ nutokhlǒ.

²² Ǒ Cǒmaradû̌ taka mò̌ nanǎ̤, gènè̤bǎ mò̌ kòyò ǒò̌ phuhtò nutokhlǒ hî̌phû̌mò̤̌shǐhtô na tônǐ̤mṳ̌hǎnu.

²³ Pwa̤sǎkhě na dǒ a sǎphlǒdû̌ na, a yî̤̌kǒyî̤̌sa na tokhlǒnu, shôpe̤shônǎ asî mǎ̤. Pṳ̂̌plǎplǎ asî hèma̤ pi̤ti̤pûtṳ̂ takǎ na tokhlǒnu, shôpe̤shônǎ tǎ̤mǎ̤mǎ̤.