Htû̌sò̌htò̌ 70 - Kawyaw New Testament

Ta̤kwicabahtò̌ dǒ ta̤ma̤jè̌ aya

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ aikǒlǒkòdû̌ dě ta̤lṳhtò̌hôkû nutokhlǒ aya. Dě bǎ akwigwèbǎǐhtò̌ Cǒmara akhanu, a sǎwǐ ta̤sǎwǐ nutôshǒ.

¹ Ǒ Cǒmaradû̌ ma̤hǎplǎkè phwèmò̌ he. Ǒ Cǒmara tûjû̌pwa̤ hèma̤jè̌ phwèphwè mò̌ he.

² Kòyò dǒ a kè̌shuǐ ma̤si he tokhlǒnu, no shòwò̤̌ htò̌shôpe̤shônǎ kèbò tûû̌ asî. Kòyò dǒ a sǎyṳ nopî̌nolṳ̂̌kè he tokhlǒnu, no shòwò̤̌ tîkhlî̌ lògesô̌ bò asî.

³ Kòyò dǒ a hî̌ he kû̌, “Grǔ, grǔ” tokhlǒnu, no khlè̌gesô̌bò asî kû̌ ta̤shòwò̤̌ pě nî̌.

⁴ Bǎbǎkǎlè, kòyò dǒ a kè̌shuǐ na tokhlǒnu, a gǔ sǎlě̤sǎlò̤ sû̌mô̤sò̌mô̤ bò. Kòyò dǒ a mô̤nǐ̤ nata̤ma̤hǎplǎge tokhlǒnu, a gǔ hî̌ pô̤̌ lô̌khô kû̌, “Htû̌sò̌htò̌ Cǒmaradû̌,” pô̤̌nu pṳ̂̌plǎplǎ pě.

⁵ Ǒ Cǒmaradû̌ he mî̌ kòyò dǒ kòyò pè̤̌ǎpè̤̌ô lû̌û. He ô̌shuphǔshèwè akhû̌akhî, hèphwè mò̌ dǒ heô̌. Na mî̌ pwa̤ma̤jè̌ he, pwa̤ma̤hǎplǎ he. Ǒ Cǒmara tûjû̌pwa̤, kèsò̌ tǎ̤mǎ̤.