Htû̌sò̌htò̌ 7 - Kawyaw New Testament

Kwicabahtò̌ dǒ ta̤ma̤tôma̤bǎ aya

Khwǐdawi̤ sǎwǐ Bejame̤ khlilèphû̌ khûkǔshǎ awe̤akè dě a sǎwǐkwihtò̌ Cǒmara tûjû̌pwa̤.

¹ Ǒ꤮ Cǒmara tûjû̌pwa̤, he Cǒmaradû̌ he hèô̌tûdû dǒ naô̌ hǒ. Ma̤hǎplǎkè he kû̌ lǒ̤꤮ bò kòyò dǒ a lṳ̂pṳ̂̌ he, sǎyṳ ma̤pò̤̌ma̤sha henu.

² Kè̌ mè̤̌tô̤̌ hî̌mî̌, asî htěphrǔhtěpò̌ bò he pô̤̌ khî ěphrǔěbò̌ kòyò nupě. A ěmǔěplě bò he pě. Kòyò ma̤hǎplǎ jò he tôpwa̤ tô̤̌ pe.

³ Ǒ Cǒmara tûjû̌pwa̤, he Cǒmaradû̌, he ma̤sǔ nô̌ kòyò tôpwǎ̤ tô̤̌.

⁴ He shaǎmi̤ shaǎhtò̌ nô̌ he sû̌khô tô̤̌. Bǎ pwa̤sǎkhě he ma̤sǔ he tôcǒ tô̤̌ akhanu, he cû̌pṳ̂̌sigwǐyǒsaphǎ nô̌ asîta̤ tôkhò̌ tô̤̌ ya.

⁵ He kè̌ ma̤ pô̤̌nu hî̌dě no lṳ̂lǎ he kû̌ pwa̤sǎkhě he, no lṳ̂pṳ̂̌nṳ̌ kètû̌ he. No yî̤̌pwǐyî̤̌pò̌ kètû̌ he sǎphlǒhtûpwa̤nu kû̌ a dǒ hǎkhûnu, no bè̌tě̤kè henǎ̤glǒnu dǒ hǎkumṳ̌kla nu.

⁶ Ǒ Cǒmara tûjû̌pwa̤, ma̤mò̌, sǎphlǒdû̌mò̌, shěshǔmò̌ pwa̤sǎkhě he dǒ a sǎphlǒdû̌ jòjî̌ he hǒo. Pô̤̌ na mǎnǎ hto nayô̤̌nu ma̤ bǎmò̌ heya, cî̌htò̌ mò̌ yǎ.

⁷ No hèô̌plǒ te̤we̤ bòmò̌ kòyòsaprṳ̂ dǒ na kòshî̌. Hǎnòò̌ô̌ dǒ mǒkhû̌ nagògǒhta akhû̌nu, dě pǒǐ nṳ̌bòmò̌ asî.

⁸ Cǒmara tûjû̌pwa̤ cî̌htò̌cǒ cî̌htò̌tô kòyò khlilèphû̌ tokhlǒ. Ǒ Cǒmara tûjû̌pwa̤, ta̤dû̌ta̤htûlǒ aběcǎ, hecǒhetè̤, heta̤sǔ ô̌ tô̤̌ akhû̌akhî, khòlṳ̌mò̌ bǎ he tôkhô.

⁹ Ǒ Cǒmaradû̌ dǒ acǒatè̤, pwa̤dǒ ama̤kè̌bǎ kòta̤gènè̤, sî̌ganǎ̤bò kòsǎphlǒ ata̤sǎyṳ, khòsǎdô no ô̌kǔbǎ kòyò phû̌mò̤̌ dǒ a ma̤ ta̤phû̌mò̤̌ nutokhlǒ. Kè̌khwè̌takaǐ kòyò dǒ acǒatè̤nu.

¹⁰ Cǒmaradû̌ mî̌ pwa̤takabǐ he sô̌sô̌kû̌ ta̤gòtò̤ tôbǎ. A ma̤hǎplǎkè kòyòcǒkòyòtè̤.

¹¹ Cǒmaradû̌ mî̌ pwa̤cî̌htò̌cǒ cî̌htò̌tè̤ ta̤. A sǎphlǒdû̌ mî̌ca kòyò sǎphlǒphû̌mò̤̌shǐhtô nutokhlǒ pṳ̂̌ tôni̤.

¹² Asî kè̌ yò̤lǎ̤plǎdî̌ gesô̌ lô̌khô asǎphlǒ tô̤̌mî̌, Cǒmaradû̌ gǔ yû̌htò̌ anò̌she, ayè̤htò̌ nǎ akhlǐ pě.

¹³ A tîwî̌tòwò nǎ ata̤wè̤̌ta̤htò dǒ a ma̤sijò kòyò, ayè̤htò̌ nǎ aplǎ̤mî̌u dǒ a ma̤hǎmǎjò kòyò nu.

¹⁴ Kè̌mò̌, kòyòkhu tôpwa̤nu asô̌sô̌kû̌ pwa̤mǒ̤ mǒ̤dohtò̌nṳ̌ ta̤phû̌mò̤̌shǐhtô, hǐphudû̌htò̌ ta̤pò̤̌ta̤sha, phû̌ô̌lò̤ nǐ̤ ta̤lòhô hǒtokhlǒ.

¹⁵ A pho lò̤yô̤̌ hǎkû dǒ kòyò gǔ lò̤tě̤ aya bǎbǎkǎlè a lò̤tě̤kè sô̌ tûû̌.

¹⁶ Ta̤phû̌mò̤̌shǐhtô dǒ a gǔma̤ kòyò tokhlǒ a bǎtîkhî sô̌ kû̌ anǎ̤ tûû̌. A ma̤jî̌ma̤jû̌ kòyò tokhlǒ lò̤tě̤bǎ sô̌ tûû̌ dǒ akhû̌shikhû̌.

¹⁷ Cǒmara tûjû̌pwa̤ cèròcǒ cèròtè̤ ta̤ akhû̌akhî, he hî̌bwǐhî̌sîrî htò̌ a, sǎwǐ htû̌sò̌htò̌ a dǒ adû̌ahtûlǒ nutôpwa̤ ami̤ pě.