Htû̌sò̌htò̌ 69 - Kawyaw New Testament

Kwihtò̌ ta̤ma̤jè̌

Hǒomî̌ khwǐdawi̤ ata̤sǎwǐ. Dě ta̤sǎwǐ numî̌ pwa̤sǎwǐ ta̤ aikǒlǒkòdû̌ dě ta̤lṳhtò̌hôkû nutokhlǒ aya. Dě bǎ sǎwǐ sô̌sô̌kû̌ ta̤phôta̤gî̌ ta̤sǎwǐ nutôshǒ

¹ Ǒ꤮ Cǒmaradû̌, ma̤hǎplǎge mò̌ he. Shidû̌ htò̌tǒ̤ kè dǒ he gô̌bô hǒ.

² He lò̤tě̤ô̌tò̤̌ dǒ pèè̌kla. He khacû̌jò pe tô̤̌. He lò̤cǔnṳ̌kè dǒ shiyô̤̌ hǒ. Shidû̌ plû̌bǐ bò he hǒ.

³ He kaǎgǔhtò̌ mî̌caca ta̤ma̤jè̌, he lò̤dô̌lò̤de jî̌jî̌. He gô̌bôkû mî̌ akhwe bò hǒhǒ. He ô̌pǒ̤ kè̌cû̌ǐ mî̌ca Cǒmaradû̌ dě a gayǎ̤ bò he mi̤sǎphlǒ.

⁴ Kòyò dǒ he ma̤si asî tôcǒ tô̤̌ dě a sǎkhě he tokhlǒ mî̌ aô̌plṳ̂ khlo pe kû̌ he khǔlṳ. Kòyò dǒ a ma̤pî̌ma̤lṳ̂̌kè he tokhlǒnu, asîrîshû̌sho jî̌jî̌. Timǐtitè dǒ he ǎhǔ tô̤̌ tokhlǒnu bǎbǎ, asî kwikudǔdǔ he.

⁵ Ǒ꤮ Cǒmaradû̌, na sǎganǎ̤ tûû̌ he ma̤takǎ ta̤sǔ nutokhlǒ. He bè̌hǔbè̌sè̌jò nô̌ he ta̤sǔ dǒ nalô̤mô̤̌ tô̤̌.

⁶ Ǒ꤮ Běcǎ tûjû̌pwa̤ dǒ a pǒ ta̤ lǒ̤꤮ bò, dǒ he khû̌khî no gènè̤pî̌tî̌kè tǎ̤ pwa̤ dǒ a ô̌pǒ̤kè̌shu nanu mǎ̤. Ǒ꤮ Îsôrěla Cǒmaradû̌, dǒ he khû̌khî, nohtûhtò̌ tǎ̤ ta̤shòwò̤̌ dǒ pwa̤kè̌lǎ nanu aya mǎ̤.

⁷ Dǒ na khû̌nakhî kòyò pî̤jî̌ǐsho bò he. He shòwò̤̌ mǐ̤sǎphû̌mò̤̌ jî̌jî̌.

⁸ Hekhlihelè bè̌ he pô̤̌ kòyò shǔshawa̤ tôpwa̤. Hepṳ̌hewè̤̌ kè̌ pe he tô̤̌.

⁹ He sǎphlǒshû̌ mô̤ǐ mî̌ca nahǐ. He ta̤sǎphlǒshû̌ mô̤ǐ numî̌ a u bòkè he sô̌sô̌kû̌ mî̌. Ta̤ dǒ kòyò pî̤jî̌ǐsho na tokhlǒnu, a hèbǎ he hǒ.

¹⁰ Bǎ hehǎhewô dǔǎdǔô shǎ akhanu, kòyò pî̤jî̌ bò he.

¹¹ He sô̌htò̌ jehǐyò̤̌tûphrû dǒ a dǔlṳ̌ ta̤sǎplǎ̤, kòyò sǎyǎ̤ bò he.

¹² Kòyò hǎnòò̌ lô̌khô dǒ wî̤̌takhadû̌htu nutokhlǒ dô̌kènè bò heyô̤. Pwa̤ǎmṳôphô̌ tokhlǒ sǎwǐ takǎ bò he.

¹³ Ǒ꤮ Cǒmara tûjû̌pwa̤, he dě he kwicabahtò̌ pwǎ dǒ naô̌. Ǒ Cǒmaradû̌, na ta̤mô̤nu ahǎbòjò tô̤̌ akhû̌akhî, bǎ ta̤shěta̤khǎ tôbǎ akha pěnu ganǎ̤de he kwi na hǒo. Ma̤jè̌mò̌ he kû̌ na ta̤ma̤hǎplǎge dǒ atě̤mè̤̌nu.

¹⁴ Cǐhtò̌ mò̌ he dǒ pèè̌ kla. No lò̤tě̤cǔ tǎ̤ he mǎ̤. Ma̤hǎplǎ mò̌ he kû̌ pwa̤ dǒ a sǎkhě he. Cî̌htò̌ mò̌ he dǒ shidû̌lò̤yô̤̌ akû.

¹⁵ No dû̌htò̌ plû̌bǐkè tǎ̤ he kû̌ shi mǎ̤. No lò̤cǔ tě̤kè tǎ̤ he mǎ̤. No jawǎ̤bǐkè tǎ̤ he dǒ lṳ̌kûnu mǎ̤.

¹⁶ Ǒ Cǒmara tûjû̌pwa̤, na ta̤mô̤ dǒ ahǎbòjòtô̤̌nu, a wô̌ mî̌ca akhû̌akhî, hî̌shǔ mò̌ he. Na gwèbǎǐ jî̌ he akhû̌akhî, htû̌tiwǐtô mò̌ dǒ he ô̌.

¹⁷ He kè̌shǐtṳ̌bǎ kû̌ ta̤pò̤̌ta̤sha akhû̌akhî, kè̌khô̌kè tǎ̤ na mǐ̤sǎ kû̌ na pwa̤ma̤ta̤phû̌nu mǎ̤. Hî̌bǎshǔ mò̌ he.

¹⁸ Hèô̌phǔ kû̌ he, ma̤hǎplǎge he. Ma̤hǎplǎge mò̌ he dǒ pwa̤sǎkhě he nutokhlǒ acǔdekû.

¹⁹ Kòyò pî̤jî̌ǐsho he, kòyò ma̤shòwò̤̌ he, kòyò ma̤yǒhtò̌yǒlè he hî̌tènu, na sî̌ganǎ̤ bò hǒ. Na kè̌shǐ bò pwa̤sǎkhě he sîtokhlǒ pṳ̂̌tôpwa̤ hǒ.

²⁰ Dǒ kòyò pî̤jî̌ǐsho he akhû̌akhî, a bǎsha jî̌ he sǎphlǒ, a shèwè̤ jî̌ he. He kè̌lǎ pwa̤gwèbǎǐ he bǎbǎkǎlè he kè̌shǐ tôpwǎ̤ tô̤̌. He kè̌shuǐ pwa̤ma̤mô̤ma̤bǎ he bǎbǎkǎlè he kè̌shǐ tôpwǎ̤ tô̤̌tô̤̌.

²¹ Asî shû̌nṳ̌ atiwǐ dǒ he shǎǎ kla. Bǎ he sǎôshi akhanu, asî dǐô̌ he shisǐyô̤̌ dǒ a shî̌bò.

²² Asî ma̤ ta̤ǎta̤ô pwè. Nopî̌nolṳ̂̌kè sô̌ tûû̌ kû̌ asînǎ̤ pô̤̌ a bǎ sumṳ̌ nupě. Pwè dǒ asî ǎô tû̌nu no htûhtò̌kè asî sumṳ̌ nî̌.

²³ No lakè bò asîmǐ̤sǎ. No jǎ gònò̤̌gòglè kudǔdǔ kèbò asî shè̌kò nî̌.

²⁴ Sǎphlǒdû̌ li̤pi̤sǐ asî, cî̌htò̌ kèmò̌ asî. No khòbǎbò sô̌ tûû̌ asî kû̌ na ta̤sǎphlǒdû̌ asî.

²⁵ No ô̌khwè̌ bò asîgûlǎ̤. Dǒ asîgûlǎ̤nu noô̌ tǎ̤ kòyò tôpwǎ̤ mǎ̤.

²⁶ Asî ma̤jî̌ma̤jû̌ kòyò dǒ na po̤ hto yǎ nutokhlǒ. Kòyò dǒ na ma̤sha hto lû̌û tokhlǒnu, asî ma̤sha shû̌shû̌ pô̤̌ lû̌û.

²⁷ Pô̤̌ asî ta̤sǔta̤plě ô̌nu bè̌plṳ̂ pô̤̌ asî ta̤sǔ. No nǐ̤bǎ tǎ̤ asî kû̌ na ta̤ma̤hǎplǎge tîkî̌ mǎ̤.

²⁸ Kòyò glè̌ htǔplîkè bò asîmi̤ dǒ lî̤htûpwa̤ akû. No wě̤ô̌ pa tǎ̤ asîmi̤ dǒ kòyòsǎphlǒwô̌ tokhlǒ ami̤ aklanu mǎ̤.

²⁹ Ajî̌ajû̌ ashuphǔshèwè̤ jî̌ he hǒ. Ǒ Cǒmaradû̌ ma̤hǎplǎge mò̌ he, takabǐ mò̌ he.

³⁰ He glè̌ htû̌sò̌htò̌ Cǒmaradû̌ ami̤ kû̌ lî̤sǎwǐhǎwô. He glè̌ bè̌dubè̌nǎ̤ lû̌û kû̌ he ta̤hî̌bwǐhî̌sîrîhtò̌ lû̌û.

³¹ Ma̤pô̤̌nudě Cǒmara tûjû̌pwa̤ glè̌ sǎphlǒô̌ khlo pe kû̌ lṳhtò̌ pṳ̂̌phadû̌ tôdo. A sǎphlǒtô khlo bò pe kû̌ pṳ̂̌phadû̌ dǒ ano̤ ô̌, akhò̌mè̤̌ ô̌ tôdo.

³² Kòyò dǒ a khòbǎ ta̤jî̌ta̤jû̌ glè̌ kè̌shǐ dě a gǔ sǎlě̤sǎlò̤. Sî dǒ a kè̌lǎ Cǒmaradû̌ tokhlǒnu, sî sǎphlǒ glè̌ shû̌htò̌shò̌htò̌.

³³ Cǒmara tûjû̌pwa̤ glè̌ ganǎ̤de kòyò shôdô pwa̤ma̤jè̌ ata̤yî̤̌kǒhtò̌. A shôpe̤shônǎkè bǎ kòyò dǒ kòyòpṳ̂̌dǒlò̤tě̤ lû̌û nutô̤̌.

³⁴ Ǒ mǒkhû̌, hǎkhû̌, shidû̌te̤we̤ kû̌ ta̤bô̌lò̤ ô̌ dǒ asîlô̤ lǒ̤bò sî, htû̌sò̌htò̌ mò̌ yǎ.

³⁵ Cǒmaradû̌ glè̌ ma̤hǎplǎge Wî̤̌yarǔshôle ô̌ dǒ Sǐû khôlôkhû̌. A gǔ bô̌htò̌ sô̌ wî̤̌ dǒ Yǔdagǎkû. A kòyò tokhlǒ gǔ ô̌ lô̌khô bǎnu. A nǐ̤bǎ pû hǎkhû̌ bǎnu pě nî̌.

³⁶ A pwa̤ma̤ta̤phû̌ aphû̌ali̤ dǒ acubucabahtò̌ lû̌ûnu, a glè̌ nǐ̤bǎ pû hǎkhû̌nu pô̤̌ asî aû̌cata̤bǐ pě. Kòyò dǒ a mô̤nǐ̤ lû̌û tokhlǒnu, a glè̌ ô̌ pa bǎnu pě.