Htû̌sò̌htò̌ 68 - Kawyaw New Testament

Ta̤ma̤pè̤̌ lî̤sǎwǐ htû̌sò̌htò̌

Khwǐdawi̤ ata̤sǎwǐ htò̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya.

¹ Ǒ Cǒmaradû̌, ma̤mò̌, ma̤ lûcû̌peshe kèbò mò̌ pwa̤sǎkhě na. No khlè̌htôkhlè̌lò̤ bòmò̌ na khuwè̤.

² No khǔcû̌kè bò asî sô̌sô̌kû̌ mî̌khǔ khǔcû̌kè lǒ̤bònu. No jûbǔlò̤kè bò asî sô̌sô̌kû̌ mî̌ u jûbǔbò tarabônu. Kòjî̌kòjû̌ glè̌pî̌glè̌lṳ̂̌ bò dǒ Cǒmaradû̌ alô̤mô̤̌ nî̌.

³ Bǎbǎkǎlè kòyòcǒkòyòtè̤ gǔ sǎlě̤sǎlò̤ pû nî̌꤮. Asî sǎlě̤sǎlò̤ bò pû dǒ Cǒmaradû̌ alô̤mô̤̌ nî̌꤮. Asî ô̌ còcè̌ pwǎ kû̌ ta̤sǎlě̤sǎlò̤ nî̌꤮.

⁴ Sǎwǐhtò̌ Cǒmaradû̌, sǎwǐhtûsò̌htò̌ yǎ. Htû̌sò̌htò̌ pwa̤ dǒ a dò̌ poǒlṳ̌ nutôpwa̤. A mi̤ kû̌ Cǒmara tûjû̌pwa̤. Pô̤̌nudě sǎlě̤sǎlò̤ lô̌khô dǒ alô̤mô̤̌nu.

⁵ Cǒmaradû̌ ô̌ dǒ agûlǎ̤ plò̌shǐ. A mî̌ phû̌ dǒ shôdôpha tokhlǒ apha, pwa̤ dǒ a tugǔtakaǐ pwa̤mǒ̤khwè̌.

⁶ Kòyò dǒ a shôdôkhônu, Cǒmaradû̌ dǐô̌ bǎ lû̌û ahǐphû̌phòphû̌. A kaǎhtò̌ kòyò lò̤tě̤ dǒ apô̤kû, a ǐ asî gûlǎ̤ dǒ a pi̤li̤mô̤. Kòyò dǒ a shěshǔ Cǒmaranu a bǎ ô̌kè dǒ gǎshashigǎ.

⁷ Ǒ꤮ Cǒmaradû̌, bǎ na cû̌wǐ dǒ nakòyò alô̤mô̤̌, na sûcû̌ tûlû̌ asî kû̌ gǎshashigǎkhû̌ akhanu,

⁸ Hǎkhû̌ guyṳ̌ dě gǎ julò̤. A htûhtò̌ pô̤̌nu bǎ na mî̌ Cǒmaradû̌, Îsôrěla a Cǒmaradû̌ hèlò̤ ô̌lṳ̌htò̌ dǒ Tǐnǎ khôlôkhû̌nu akha.

⁹ Ǒ꤮ Cǒmaradû̌ na no julò̤ lǒlǒbebe gǎ. Na no sulahtò̌ sô̌ na shigǎkhwe dǒ na ǐ kû̌ na kòyònu.

¹⁰ Na kòyò ô̌ lô̌khô bǎnu. Ǒ Cǒmaradû̌, na sǎphlǒ wô̌ jî̌jî̌ akhû̌akhî, na kè̌pǒ̤ǐ kòyò dǒ kòyò pè̤̌ǎpè̤̌ô lû̌nu.

¹¹ Běcǎdû̌ hî̌bǎlò̤ ayô̤̌. Pwa̤mǒ̤ saprṳ̂ cû̌lè shôbǐǐlṳ̌ peshecû̌bò ta̤sǎlě̤we̤kè awe̤akè.

¹² Khwǐ kû̌ akliphû̌ tokhlǒ hǎhtò̌khlè̌ lǒ̤bò. Pwa̤mǒ̤ ô̌kè dǒ hǐ tokhlǒ bèpè̤̌bò ta̤phû̌ta̤li̤ dǒ a phǐgeǐ dǒ ta̤shěta̤pě̤ aklanu.

¹³ Kòyò dǒ a hǎmôô̌lò̤ dǒ sû̌phû̌pô̤kû tokhlǒ aya bǎbǎ, timǐtitè nutokhlǒ mî̌ asô̌sô̌kû̌ he htû̌lǐ̤dî̌ge dǒ kòyò plṳ̌bǐ rakha sô̌sô̌kû̌ a kû̌ ru. Ashû̌nu aplò̌kèshǐ sô̌sô̌kû̌ hta.

¹⁴ Bǎ Cǒmara dǒ apô̤pwa̤shû̌sho nutôpwa̤ no lûcû̌peshe kèbò khwǐ tokhlǒ akhanu, asô̌sô̌kû̌ shicòlò̤ dǒ Salamû khôlôkhû̌nu.

¹⁵ Basha khôlô mî̌ adû̌ahtû awî̤tè̤̌sǐlî.. Khôlô plǔhtò̌ tokhlǒ ô̌wô̤̌lî.

¹⁶ Ǒ Basha khôlôdû̌ khôlôkhi sî, ma̤titè̌ na cû̌ sǎkhwè̌tǒ̤ khôlô dǒ Cǒmaradû̌ rû̌htò̌ kû̌ alǎ̤ô̌ nutômè hětè? Cǒmara tûjû̌pwa̤ glè̌ ô̌ bǎnu tûjû̌pwa̤.

¹⁷ Cǒmaradû̌ alô̤ lǎ̤htò̌shě ta̤shěnu a ô̌ dǒ asò̌ kû̌ asò̌, asî̌ kû̌ asî̌kû. Běcǎdû̌ ô̌ dǒ Sǐnǎ khôlôkhû̌ dě a hèlò̤, a hènṳ̌ dǒ agûlǎ̤ aplò̌shǐ akû.

¹⁸ Bǎ na gehtò̌ dǒ gûlǎ̤htò̌yô̤̌ akhanu, na pṳ̂̌cû̌nṳ̌ pwa̤sǎkhě na dǒ alò̤jû̌kè nalǎ̤ nutokhlǒ. Kòyò dǒ a shěshǔ na nutokhlǒ bǎbǎ, na nǐ̤bǎ khû̌kǎ dǒ asîô̌. Běcǎ Cǒmara tûjû̌pwa̤ gǔ ô̌ bǎ gûlǎ̤ nutôkû pěpě.

¹⁹ Htû̌sò̌htò̌ Běcǎdû̌ dǒ a ò̌bǎ pa ta̤wǐta̤ò̌ pṳ̂̌ni̤ni̤ nutôpwa̤. A mî̌ Cǒmara dǒ a ma̤hǎplǎge pa.

²⁰ Pa Cǒmara mî̌ Cǒmara dǒ a ma̤hǎplǎge kòyò. A mî̌ Cǒmara tûjû̌pwa̤, Běcǎdû̌ dǒ a ma̤hǎplǎge pa dǒ ta̤si.

²¹ Cǒmaradû̌ glè̌ dephò̌ mè̤̌cacakè pwa̤sǎkhě a tokhlǒ a ikǒ. A glè̌ demǔ mè̤̌cacakè kòyò dǒ a ma̤ kudǔdǔ ta̤sǔ nutokhlǒ aikǒkhwǐ.

²² Běcǎdû̌ hî̌ kû̌, “He glè̌ kaǎge tîkhî sô̌ pwa̤sǎkhě he ô̌ dǒ Bashagǎ nutokhlǒ bǒo. “He glè̌ kaǎge tîkhî sô̌ asî ô̌ dǒ shidû̌te̤we̤ yô̤̌kû.

²³ “Ma̤pô̤̌nudě na glè̌ cophrǒcû̌ bò asîsǐ. “Na shǐ sîtokhlǒ gǔ hèlî̌ô bò asîsǐ.”

²⁴ Ǒ Cǒmaradû̌, kòyò kè̌shǐ bò na kòyòsaprṳ̂ sǎdôdô a cû̌htò̌nṳ̌wô̤̌wô̤̌ bòlû̌ûnu hǒ. Kòyò kè̌shǐ bò he Cǒmara dǒ amè̤̌kû̌ he khwǐ, cû̌htò̌nṳ̌ dǒ gûlǎ̤ plò̌shǐkûnu.

²⁵ Pwa̤sǎwǐta̤ ô̌ dǒ alô̤mô̤̌, pwa̤dǒ ta̤dǒta̤ǔ ô̌ dǒ nô̌kò, aplǎkû dě pwa̤mǒ̤ phû̌sǎ tokhlǒ plǎ̤ǐ lô̌khô jî̌ja.

²⁶ Asî hî̌ kû̌, “Sǎwǐhtûsò̌htò̌ mò̌ Cǒmaradû̌ dǒ kòyòsaprṳ̂ alô̤mô̤̌nu. “Îsôrěla aprṳ̂aphǎ sî, htû̌sò̌htò̌ mò̌ Cǒmara tûjû̌pwa̤.”

²⁷ Phabejame̤ dǒ akònònu akhlilè cû̌wǐ dǒ alô̤mô̤̌lǒ. Htodě Phayǔda akhlialè aikǒlǒkò aprṳ̂aphǎ gû̌ kû̌ dǒ nô̌kò. Htodě Phasabulû kû̌ Khûnatalǐ aikǒlǒkò gû̌ dǒ nô̌kò.

²⁸ Ǒ Cǒmaradû̌, no lò̤mò̌ na ta̤sîrîpô̤phǎ. Bè̌lṳ̌mò̌ na ta̤sîrîpô̤phǎ dǒ a ma̤hto bǎ pa dǒ awǐkhanu.

²⁹ Khwǐ glè̌ phǐhènǐ̤ bǎ na sû dǒ Wî̤̌yarǔshale dǒ na ta̤lṳ̌htò̌hôkû.

³⁰ Sǎhtǎdû̌da mò̌ Ijǐgǎ dǒ asô̌sô̌kû̌ ta̤mi̤ta̤mò̤̌ ô̌ dǒ gôpô̤mṳ̌klanu. Sǎhtǎdû̌da mò̌ khlilèphû̌ dǒ asô̌sô̌kû̌ pṳ̂̌pha saprṳ̂ ô̌ dǒ pṳ̂̌phû̌ akla nu. Tûlû̌ tṳ̂mṳ̂̌ asî tǒ̤htû̌ a shò̌lò̤ asǎphlǒ, nohè lṳhtò̌ asî kû̌ ruyî̌ kû̌ hta. Ma̤lûpò̌lûshe kèbò kòyò dǒ a sǎyṳshě sǎyṳpè̤̌ ta̤nu.

³¹ Khwǐ akòyòdû̌ glè̌ ô̌ dǒ Ijǐgǎ hè. Kǔshǎ khlilèphû̌ glè̌ bè̌dubè̌nǎ̤ Cǒmaradû̌, a glè̌ ǐ lû̌û sû.

³² Ǒ shigǎ ô̌ bǎ hǎkhû̌ hǒtôbǎ sî, sǎwǐ htû̌sò̌htò̌ mò̌ Cǒmaradû̌. Sǎwǐ htû̌sò̌htò̌mò̌ Běcǎdû̌.

³³ Htû̌sò̌htò̌ mò̌ Cǒmara dǒ a dò̌ cû̌tûlû̌nṳ̌ mǒlǎ̤ dǒ a ô̌ dǒwǐkha tǒ̤꤮ khònò̤̌ nutôpwa̤. A hî̌bǎ pwe̤nǎ̤sǎgô̌ sô̌sô̌kû̌ shî̌lî̌.

³⁴ Pwe̤ǐ shôbǐǐlṳ̌ mò̌ Cǒmaradû̌ asîrîpô̤phǎ. A pǒ ta̤ pô̤̌ khwǐ tôpwa̤ dǒ Isôrělaphû̌ akla. Asîrîpô̤phǎ ô̌lṳ̌htò̌ dǒ mǒlǎ̤.

³⁵ Ǒ Cǒmaradû̌, dǒ nata̤lṳhtò̌hô aplò̌shǐ akûnu, a gònò̤̌gòglè ǐsha jî̌jî̌. Îsôrěla a Cǒmaradû̌ ǐhto a kòyò tokhlǒ ata̤pô̤ta̤phǎ kû̌ ata̤khû̌ta̤ǎ. Htû̌sò̌htò̌ mò̌ Cǒmaradû̌.