Htû̌sò̌htò̌ 66 - Kawyaw New Testament

Lî̤sǎwǐ htû̌sò̌htò̌ kû̌ ta̤hî̌bwǐsîrî

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya.

¹ Kòyòhǎkhû̌phû̌ lǒ̤bò sî, sǎlě̤sǎlò̤ yî̤̌kǒ htû̌sò̌htò̌ Cǒmaradû̌.

² Sǎwǐhtò̌mò̌ ami̤ dǒ asîrîdû̌sîrîhtûnu. Cǒmara mî̌ asîrîdû̌sîrîhtû gutṳ̌ hî̌ lô̌khô pô̤̌nu.

³ Hî̌ Cǒmaradû̌ kû̌, “Na ma̤ta̤ tokhlǒnu a cô̌klǐcô̌sè gutṳ̌. “Dǒ na ta̤sîrîpô̤phǎ nî̌ ashû̌asho gutṳ̌ akhû̌akhî, pwa̤sǎkhě na tokhlǒ ǐsha gònò̤̌gòglè dô̌gînî̤lò̤ bò dǒ na lô̤mô̤̌.

⁴ “Lǒ̤bò kòyòhǎkhû̌phû̌ cubucabahtò̌ na. “Asî sǎwǐhtûsò̌htò̌ na. “Asî sǎwǐhtûsò̌htò̌ nami̤.”

⁵ Hè kè̌mò̌ Cǒmaradû̌ ma̤ta̤nu. A ma̤ bǎ kòyò hǎkhû̌phû̌ agûlǎ̤nu sǎgònò̤̌ ǐsha jî̌jî̌.

⁶ A no sǔtèkhwě꤮ kè shidû̌shite̤we̤. Asî cû̌bò̌ kèbò shidû̌te̤we̤ kû̌ khò̌lôpô̤̌. Dǒ a ma̤ta̤ pô̤̌nukhû̌khî, pa sǎlě̤sǎlò̤ mî̌ca.

⁷ A pǒǐ ta̤ kû̌ ata̤sîrîphôphǎ tûjû̌pwa̤. A kè̌shǐbò kòyò lǒ̤bò. No shěshǔ tǎ̤ a kû̌ kòyò dǒ aikǒpwǐ̤nu tǎ̤mǎ̤.

⁸ Ǒ kòyòhǎkhû̌phû̌ lǒ̤bò sî, htû̌sò̌htò̌ pa Cǒmaradû̌. No ganǎ̤debò kòyò kû̌ sî ta̤htû̌sò̌htò̌ lû̌ûnu.

⁹ A no si pa khôtô̤̌, kòyò ma̤pè̤̌ nô̌ pa tôpwǎ̤tô̤̌.

¹⁰ Ǒ Cǒmaradû̌, na ma̤kè̌kè̌ pa hǒ, asô̌sô̌kû̌ kòyò sèlèkè̌kè̌ ma̤bûphǔ ruyî̌ kû̌ mî̌nu.

¹¹ Na no tôphôbǎ pa kû̌ sumṳ̌. Na no ò̌ pa kû̌ ta̤kî̌ta̤krû̌ dǒ ahtǒ.

¹² Na no htò̌yî̤̌ paikǒ kû̌ pwa̤sǎkhě pa. Pa khòbǎ asô̌sô̌kû̌ kòyò dǒ a khòbǎ mî̌ulò̤tě̤ shidû̌bǐbò nu. Bǎbǎkǎlè khònò̤̌ na ǐ lǒlǒbebe betǐpǐ pa.

¹³ He gǔ phî̌hè nǐ̤ lǎ̤shû̌u lṳhtò̌ kû̌ na tokhlǒ dǒ nata̤lṳ̌htò̌hôkû. He gǔ ma̤lǒbehtò̌ he ta̤olò̤ pô̤̌ he olò̤ hto nanu.

¹⁴ Bǎ he kè̌shǐtṳ̌bǎ kû̌ ta̤pò̤̌ta̤sha akhanu, he olò̤ hto heyô̤̌ hǒ. Khònò̤̌ he ma̤ pô̤̌ he ta̤olò̤ pě.

¹⁵ He gǔ shû̌u lṳhtò̌ na kû̌ ta̤phû̌ta̤wè̤ dǒ abû̌suklǔtû̌ kû̌ sû̌phû̌phadû̌. A glè̌ gu numû̌nushu htò̌ dǒ naô̌ pě. He gǔ lṳhtò̌ na kû̌ pṳ̂̌phadû̌ kû̌ pè̤̌ tokhlǒ.

¹⁶ Ǒ kòyò dǒ a ǐsha bè̌dubè̌nǎ̤ Cǒmaradû̌ lǒ̤bò sî, hè mò̌ dě ganǎ̤de lô̌khô. He glè̌ ǐ sî kû̌ ta̤ dǒ a ma̤ bǎ htobò henu.

¹⁷ He kwisǎyṳhtò̌ lû̌û ta̤ma̤jè̌. He htû̌sò̌htò̌ lû̌û kû̌ lî̤sǎwǐhǎwô.

¹⁸ He kè̌ bè̌û̌bè̌bǐkè ta̤sǔ dǒ he sǎphlǒkû mî̌, Běcǎdû̌ ganǎ̤de heta̤kwinu tô̤̌.

¹⁹ Bǎbǎkǎlè Cǒmaradû̌ ganǎ̤de mè̤̌caca he ta̤kwi. A ganǎ̤de he ta̤kwicabanu.

²⁰ Htû̌sò̌htò̌ Cǒmaradû̌. A htè̌shěshu he ta̤kwicaba lû̌ûnu tô̤̌. A mô̤nǐ̤ he kû̌ ta̤mô̤ dǒ ahǎbòjò tô̤̌nu pṳ̂̌tôplǎ.