Htû̌sò̌htò̌ 64 - Kawyaw New Testament

Ta̤kwicaba dǒ lǎ̤takabǐ aya

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya.

¹ Ǒ꤮ Cǒmaradû̌, ganǎ̤de mò̌ he ta̤kiǐkoo kwihtò̌ na. Takaǐ he dǒ pwa̤sǎkhě he tokhlǒ ata̤ma̤sǎgònò̤̌ ǐsha henu.

² Takabǐǐ he kû̌ kòyò dǒ a glè̌ma̤ phû̌mò̌shǐhtô he, kòyò phû̌mò̤̌ nutokhlǒ asaprṳ̂kû.

³ Asî wṳ̂̌htòǐ lô̌khô aplî̤ sô̌sô̌kû̌ nò̌shî. Asî hî̌bǎkhu yô̤̌sǎ phû̌mò̤̌shǐhtô sô̌sô̌kû̌ kòyò khǎhè plǎ̤.

⁴ Asî ô̌hǔ kè̌jôkhǎ kòyò dǒ ata̤sǔ ô̌tô̤̌nu. A khǎ asî tôplǎ nô̤̌, a ǐsha bǎ tô̤̌.

⁵ Asî gǔ tîwî̌tòwò ma̤phǔmò̤̌ ta̤ ayanu, a ǐkhû̌ǐǎ kè̌khî lû̌û tôpwa̤ kû̌ tôpwa̤. Asî hî̌bǎǐ lû̌û kû̌ glè̌dò ta̤dònǎ. Asî hî̌ kè̌khî lû̌û kû̌, “Mò̌pè kè̌shǐjò pa ya?”

⁶ Asî tîwî̌tòwònǎ ta̤phû̌mò̤̌shǐhtô. Dě a hî̌ lô̌khô kû̌, “Pa ta̤tîwî̌tòwònǎnu awô̌ jî̌jî̌.” Kòyòhǎkhû̌phû̌ sǎphlǒ kû̌ ta̤gènè̤ tokhlǒmî̌ adû̌ayô̤̌, asî̌ya pò̤̌mǔpò̤̌sha.

⁷ Cǒmaradû̌ glè̌ khǎ asî kû̌ aplǎ̤. Tôplǎnô̤̌ asî bǎkamǎ bò pě.

⁸ Asî ta̤hî̌bǎ nî̌ a glè̌ ma̤pî̌kè bò sô̌ asî pě. Lǒ̤bò kòyò dǒ a kè̌shǐ asî tokhlǒ pî̤jî̌ sǎyǎ̤bò asî pě.

⁹ Kòyò pṳ̂̌tôpwa̤ ǐshabò pě. Asî shôbǐǐlṳ̌ Cǒmaradû̌ ata̤ma̤ pě. Asî glè̌ sî̌yaphlôwô̌ Cǒmaradû̌ ma̤ hto ta̤nu.

¹⁰ Dǒ Cǒmara tûjû̌pwa̤ akhû̌akhî, kòyòcǒkòyòtè̤ lǒ̤bò sǎlě̤sǎlò̤ pě. Asî ô̌tûdûbò dǒ lû̌ô̌ pě. Kòyò sǎphlǒwî̤ sǎphlǒwô̌ htû̌sò̌htò̌ lû̌û pě.