Htû̌sò̌htò̌ 63 - Kawyaw New Testament

Sǎyṳ ô̌phǔ kû̌ Cǒmara

Khwǐdawi̤ ata̤sǎwǐ htû̌sò̌htò̌. Dě a sǎwǐ bǎ a cû̌ô̌ dǒ yǔda gǎshashigakhû̌ akhanu.

¹ Ǒ꤮ Cǒmaradû̌, na mî̌ he Cǒmara. He sǎphlǒshû̌ kè̌lǎǐ na. He kè̌shuǐ mî̌ca na. He sǎyṳ ô̌phǔ kû̌ na asô̌sô̌kû̌ kòyò sǎyṳ ô shi dǒ gǎshashiga dǒ shi ô̌ tômè꤮ tô̤̌nu.

² He kè̌shǐ hto nata̤pô̤ta̤phǎ kû̌ na ta̤sîrîdû̌sîrîhtû. He kè̌shǐ na dǒ nagûlǎ̤ aplò̌shǐ akû.

³ Nata̤mô̤ dǒ ahǎbòjò tô̤̌nu awô̌ khlope kû̌ ta̤ô̌htûpwa̤ akhû̌akhî, he htû̌sò̌htò̌ na.

⁴ He gǔ hî̌bwǐsîrî htû̌sò̌htò̌ na tǒ̤htû̌ he si. Bǎ he kwicabahtò̌ na akhanu, he yṳ̂̌htò̌ hecǔde.

⁵ A mô̤sû̌mô̤sò̌kè he pô̤̌ kòyò ǎkǒôbe dîhǎsǐwǐ. He gǔ sǎlě̤sǎlò̤ htû̌sò̌htò̌ na kû̌ lî̤sǎwǐhtû̌sò̌htò̌.

⁶ Bǎ he ô̌ dǒ lǎ̤dakhû̌ akhanu, he gènè̤bǎ na. He gènè̤ bǎ na tôsamǒ̤shî̌.

⁷ Na mî̌ pwa̤ma̤jè̌ he akhû̌akhî, he sǎlě̤sǎlò̤ sǎwǐhtûsò̌htò̌ na dǒ na děge ayô̤ǔlǎ̤.

⁸ He phô̌mě na. Nacǔde cǔtamû ma̤jè̌ he.

⁹ Kòyò tokhlǒ kè̌lǎ ma̤si lô̌khô he. Asî gǔ lò̤tě̤kè bò dǒ lṳ̌gǎnǎdo.

¹⁰ Asî sikèbò kû̌ nò̌shî. Asî htûhtò̌bò shǐmi̤shǎ.

¹¹ Dǒ Cǒmaradû̌ ma̤jè̌ bǎ khwǐdû̌ akhû̌akhî, a gǔ sǎlě̤sǎlò̤. Lǒ̤bò kòyò dǒ a wṳ̂̌dò ayô̤̌ kû̌ Cǒmara ami̤ nutokhlǒ gǔ htû̌sò̌htò̌ tû̌ Cǒmara. Kòyò dǒ a lòhǎlòhô tokhlǒnu, a ô̌sǔtukǔ kèbò pě.