Htû̌sò̌htò̌ 62 - Kawyaw New Testament

Yṳ̌ǎnṳ̌ Cǒmara ata̤takabǐ

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě ta̤sǎwǐ htû̌sò̌htò̌nu tôshǒ mî̌ Khûjedutǔ dǒ a yṳ̂̌klè̌nè̌klòǐ pwa̤sǎwǐ htû̌sò̌htò̌ ta̤ nutôpwa̤ aya.

¹ He sǎphlǒhtû ô̌pǒ̤ kè̌shuǐ tǒ̤dǒ Cǒmaradû̌ a ô̌. Ta̤ma̤hǎplǎge he ô̌ dǒ aô̌ hè.

² Pwa̤ dǒ a htû he lǒ̤dû̌ kû̌ pwa̤ma̤hǎplǎ he mî̌ a pwǎ. A mî̌ pwa̤takabǐ he, he lò̤jû̌jò pe tôkhò̌꤮ tô̤̌.

³ Sî lǒ̤꤮ bònu, sî gǔ shěpě̤yî̤ he pwǐtè? He mî̌ pwa̤khû̌ǎjǎ sô̌sô̌kû̌ we̤ dǒ alò̤tě̤pro, sî glè̌ shěpě̤ pe he ya?

⁴ Asî ma̤nǎ kû̌ a glè̌ bè̌lò̤ he dǒ ta̤bè̌dubè̌nǎ̤ agûlǎ̤htò̌yô̤̌nu. Asî mô̤nṳ̌ ta̤lahǎlahò tokhlǒ. Asî ǐshôwî̤ kòyò kû̌ khû̌phě, asî ǐsho kòyò dǒ asǎphlǒkû.

⁵ He sǎphlǒhtû ô̌pǒ̤ kè̌shuǐ pwǎtǒ̤ Cǒmaradû̌ a ô̌ nô̤̌. He ta̤kè̌shuǐ ô̌ dǒ a ô̌ hè.

⁶ Pwa̤ dǒ a htû he lǒ̤dû̌, pwa̤ma̤hǎplǎ he mî̌ a pwǎ. A mî̌ pwa̤takabǐ he, he lò̤jû̌jò petô̤̌.

⁷ Cǒmara mî̌ pwa̤ dǒ a ma̤hǎplǎge he, a ǐ he ta̤bè̌dubè̌nǎ̤. A mî̌ he lǒ̤dû̌ dǒ ashû̌asho, he lǎ̤ô̌tûdûbǐ gûlǎ̤.

⁸ Ǒ꤮ kòyò hǎkhû̌phû̌ sî, Cǒmaradû̌ mî̌ pa lǎ̤ô̌tûdûbǐ agûlǎ̤ hǒ, yṳ̌ǎnṳ̌ Cǒmaradû̌ pṳ̂̌꤮ tôplǎ. Shôbǐǐbò lû̌û kû̌ sî ta̤pò̤̌ta̤sha lǒ̤꤮ bò.

⁹ Kòyò hǎkhû̌phû̌ sô̌sô̌ pwǎkû̌ ta̤sǎnṳ̌sǎhtò̌ tôplǎ. Kòyò dû̌yò̤̌ bǎbǎ, kòyò shèwè̤ bǎbǎ, a tṳdè sô̌sô̌ bò pwǎ. Kè̌ jèmò̌ asî kû̌ còcûlǎ mî̌, a phidè̌shè̌ pwǎ. Asî lǒ̤꤮ bò mî̌ a sô̌sô̌pwǎ kû̌ ta̤sǎnṳ̌sǎhtò̌ tôplǎ nô̤̌pwǎ.

¹⁰ Yṳ̌ǎ kè̌shuǐ tǎ̤ ta̤ma̤jî̌ma̤jû̌ kòyò mǎ̤. Phî̌htò̌yô̤̌ǐ tǎ̤ sînǎ̤ kû̌ ta̤phû̌ta̤li̤ dǒ sî pṳ̂̌sigwǐyǒsaphǎ kòyò nutokhlǒ mǎ̤. Na ta̤dû̌yò̤̌htò̌sa sǔ sǔ a ô̌dû̌htò̌ bǎbǎ, sǎmǒ ǐ tǎ̤ ta̤ nutokhlǒ mǎ̤.

¹¹ Cǒmaradû̌ hî̌phlôtě̤mè̤̌ ayô̤̌ dě he ganǎ̤de dû̌wî̤ kû̌ Cǒmaradû̌ mî̌ a pô̤phǎshû̌sho.

¹² Kǎtô̤̌ ǒ Běcǎdû̌, nata̤mô̤ mî̌ ta̤mô̤ dǒ ahǎbòjò tô̤̌. Pô̤̌ asî ma̤ hto ta̤nu, na ǐ mè̤̌caca kòyò pṳ̂̌꤮ tôpwa̤ ata̤ma̤nǐ̤khû̌kǎ pě.