Htû̌sò̌htò̌ 60 - Kawyaw New Testament

Kwicaba dǒ ta̤hǎplǎ aya

Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě bǎ sǎwǐ sô̌sô̌kû̌ Khwǐdawi̤ ata̤sǎwǐ dǒ ami̤ kû̌ ta̤olò̤ ata̤phôta̤gî̌ nutôshǒ. Dǒ Hebrǔyô̤̌nu, a kaǎ ta̤sǎwǐ nukû̌ mî̌katama ta̤sǎwǐ. Ta̤sǎwǐ hǒo tôshǒ mî̌ ta̤sû̌ǐ. Dě a sǎwǐ bǎ shěshǔ kû̌ Khûaranaharai kû̌ Khûarasûbǎ kû̌ bǎ Khûyûa ge sô̌ dě a geshěpè̤̌kè Edû khlilè apwa̤ tôsò̌ kû̌ ginǐ̤rǐ bǎ îsǎ lǒ̤to̤kû akhanuhǒ.

¹ Ǒ꤮ Cǒmaradû̌, na wîkè pa hǒ, na ma̤pè̤̌kè wî̤̌we̤dû̌ dǒ pa lǎ̤ô̌tûdûnu, na sǎphlǒdû̌ pa hǒhǒ. Khònò̤̌dě htû̌tiwǐgetô sô̌ dǒ paô̌.

² Na ma̤ guyṳ̌ hǎkhû̌ dě a è̌phò̌kè. A guyṳ̌shû̌ akhû̌akhî, ma̤icu getîkhî sô̌mò̌ è̌phò̌kènu.

³ Na nokhòbǎ na kòyò tokhlǒ kû̌ ta̤pò̤̌ta̤sha dǒ ajî̌ajû̌. Na ǐ pa shisǐyô̤̌, a ma̤lûhtôlûlò̤bò pa.

⁴ Pô̤̌khô kòyò dǒ a ǐsha bè̌dubè̌nǎ̤ na tokhlǒ gǔ hǎplǎ kû̌ ta̤pî̌ta̤lṳ̂̌ ayanu, na dǐsè̌rè̌ nǎhto asî hǒ.

⁵ Kòyò dǒ na mô̤nṳ̌ nutokhlǒ gǔ hǎplǎ ayanu, ma̤hǎplǎge pa kû̌ nacǔde dǒ ata̤sîrîpô̤phǎshû̌sho. Ganǎ̤de mò̌ pa ta̤kwicaba.

⁶ Cǒmaradû̌ ô̌ dǒ agûlǎ̤ plò̌shǐ, a hî̌bǎlò̤ kû̌, “He yî̤̌kǒ sǎlě̤sǎlò̤ bèpè̤̌kè Wî̤̌shake pě. “He bèpè̤̌kè pô̤̌ Sǔkû̌ gǎlǒ̤te̤kû.

⁷ “Kǐlè̌gǎ mî̌ heta. Manǎshigǎ mî̌ he tata. “Ebarěgǎ mî̌ he khû̌glû̌tě̤htò̌. “Yǔdagǎ mî̌ he nò̌htô̌ dǒ a dǔlṳ̌ he sîrîshû̌sho.

⁸ “Mò̤bǎgǎ mî̌ he lǎ̤cǔbò shibǎjôwô̤dû̌ kûyô̤̌. “He no htû Ědûgǎ kû̌ he pwa̤ma̤ta̤phû̌. “He ma̤pè̤̌ Phǐlǐsatǐgǎ hǒ akhû̌akhî, he gǔ yî̤̌kǒhtò̌ ta̤ma̤pè̤̌,” Cǒmara hî̌ pô̤̌nu.

⁹ Mò̌pè glè̌ cû̌sû he dǒ wî̤̌dû̌wî̤̌htû akû? Mò̌pè glè̌ cû̌sû he dǒ Ědûgǎkû?

¹⁰ Ǒ꤮ Cǒmaradû̌, na wîkè bò pa pě ya? Ǒ꤮ Cǒmaradû̌, na htò̌shěpě̤ pe ta̤ kû̌ pakliphû̌ tokhlǒ tô̤̌ ya?

¹¹ Kòyò hǎkhû̌phû̌ ata̤ma̤jè̌nu a bwǐsîrî ô̌ nô̌ tôcǒ tô̤̌. Shěpě̤jè̌ padô̌ pa khuwè̤ nutokhlǒ ya.

¹² Dǒ Cǒmaradû̌ ô̌ dǒ pa tôkhô akhû̌akhî, pa gǔ ma̤pè̤̌ ta̤. A ma̤pè̤̌ bòkè pa khuwè̤ nutokhlǒ pě.